“2–8 ni Maji. 2 Nifai 31–33: ‘Oqo na Sala,’” Lako Mai, Mo Muri Au—Baleta na Lalai: iVola i Momani 2020 (2020)
2–8 ni Maji. 2 Nifai 31–33,” Lako Mai, Mo Muri Au—Baleta na Lalai: 2020
Vakavulici Ira Nona Tisaipeli o Karisito, mai vei Justin Kunz
2–8 ni Maji
2 Nifai 31–33
“Oqo na Sala”
Tekivuna nomu vakavakarau ena wiliki ni 2 Nifai 31–33. Vakasaqara na veituberi ni Yalo baleta na ka mo vakavulica vei ira na gone. Ena rairai solia vei iko eso na vakasama na ituvatuva oqo.
Vola na Veika o Uqeti Kina
Sureta na Veiwasei
Baleta ni a vakavulica o Nifai na papitaiso i Karisito, kerei ira na gone me ra wasea e dua na ka era sa vulica baleta na papitaiso. E rawa talega ni ra wasea na vakasama kei na lomadra baleta nodra papitaiso se papitaiso ni itokani se lewe ni matavuvale.
Vakavulica na iVunau: Gone Sobu
E vakavulica vei au o Jisu Karisito na sala meu lesu kina vei Tamada Vakalomalagi.
E vakavuvulitaka o Nifai na noda muria na ivakaraitaki kei na ivakavuvuli ni iVakabula sai koya duadua na sala eda “na vakabulai kina ena matanitu ni Kalou” (2 Nifai 31:21).
iTaviqaravi e Rawa ni Caka
-
Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ni o vakalekataka na italanoa ni nona papitaiso o Jisu (raica na 2 Nifai 31:4–13). Vakamacalataka ni papitaiso sa dua na ikalawa ena sala lesu ki na noda bula vata tale kei Tamada Vakalomalagi. Sureta e dua e se qai papitaiso walega oqo me tukuna vei ira na gone na nona nanuma me baleta na papitaiso.
-
Vakamacalataka ni vakavulica vei keda o Jisu Karisito na veika eda na gadreva me da cakava me da lesu tale kina Vua ni da sa mate. Droinitaka e dua na sala ena papa, ka biuta e dua na iyaloyalo kei Karisito ena mua ni sala. Solia vei ira na gone na iyaloyalo ka matataka na veitiki ni ivunau i Karisito (vakabauti Karisito, veivutuni, papitaiso, na isolisoli ni Yalo Tabu, kei na vosota ki na ivakataotioti). Vukei ira me biu na iyaloyalo ena salatu.
-
Vukei ira na gone me ra vulica na ikava ni yavu ni vakabauta. Lagata vata e dua na sere baleta e dua na imatai ni ivakavuvuli ni kosipeli, me vaka na “Faith,” “When I Am Baptized,” se “Choose the Right Way” (Children’s Songbook, 96–97, 103, 160–61).
E rawa niu tugana ki lomaqu na vosa i Karisito.
Me na vukea vakacava nodra kila na gone na “kanamagiti ena vosa i Karisito” (2 Nifai 32:3) na veika o sa vakila me baleta na malanivosa oqo?
iTaviqaravi e Rawa ni Caka
-
Kerei ira na gone me ra cavuta eso na kedra kakana taleitaki, ka sureti ira me ra vakaraitaka na ivakarau era na kanamagiti kina. Wilika na 2 Nifai 32:3, vakarogoca na veika e tukuna o Nifai ni dodonu me da kanamagiti kina. Na cava na kena ibalebale me da kanamagiti ena ivolanikalou? Vakamacalataka ni ivolanikalou e dua na vanua eda rawa ni kunea kina na vosa i Karisito.
-
Vola na vosa Kalou kei na Turaga ena papa. Sureti ira na gone me ra cega e dua na tabana ena ivolanikalou ka vakaraica na vosa eso oqo. Vukei ira kevaka e gadrevi. Vakadinadinataka ni gauna eda wilika kina na ivolanikalou, e rawa ni da vulica me baleta na Kalou.
E vinakata na Tamada Vakalomalagi meu dau masu tikoga.
Na veitikina oqo e rawa ni uqeti ira na gone me ra cakava me tiki ni nodra bula e veisiga na masu.
iTaviqaravi e Rawa ni Caka
-
Tarogi ira na gone na gauna era masu kina. Era dau masu beka ena mataka? ena bogi? ni se bera na kana? Kerei ira na gone me ra vakasamataka eso na iwalewale me vakaraitaka na gauna eda rawa ni masu kina, me vaka na gauna eda yadra kina, ni da vakarau moce, kei na kana—se ena dua tale na gauna e rawa. Wilika vei ira na imatai ni laini se ikarua mai na 2 Nifai 32:9, ka vakabibitaka na malanivosa “dou daumasu tikoga.”
-
Tarogi ira na gone ena ivakarau ni nodra masu. Na cava era na cakava e uludra, ligadra, kei na so tale? Na cava era dau kaya? Kerei ira me ra vakatayaloyalotaka ni o sega ni kila na masu, me ra vakavulici iko. Cava na vuna e vinakata kina na Tamada Vakalomalagi me da dau masu?
Eda rawa ni vosa vua na Kalou ena masu.
Vakavulica na iVunau: Gone Qase Cake
E vakavulica vei au o Jisu Karisito na sala meu lesu kina vei Tamada Vakalomalagi.
Eda na rawa ni lesu tale vua na Kalou ni oti na bula oqo ena noda muria na ivunau i Karisito (vakabauti Karisito, veivutuni, papitaiso, na isolisoli ni Yalo Tabu, kei na vosota ki na ivakataotioti).
iTaviqaravi e Rawa ni Caka
-
Vakaraitaka na iyaloyalo mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka kerei ira na gone me ra wasea na ka era kila me baleta na papitaiso nei Jisu (raica Maciu 3:13–17). Dui biubiuta na veivosa oqo ena papa: a vakadinadinataka o Jisu vei Tamana ni na dau talairawarawa Vua. Sureti ira na gone me ra wilika vata vakalasi na 2 Nifai 31:7 ka tuva vakadodonu na veivosa.
-
Tarogi ira na gone ena ka era na tukuna vua e dua e vakarau tiko me papitaiso, ka vukei ira me ra biuta vata nodra ivakasala ena kadi rawarawa ga me rawa ni ra solia vua e dua. Me da na tomana tiko vakacava noda muria na ivakaraitaki nei Jisu ni da sa papitaiso oti?
-
Vakamacalataka ni ivunau nei Karisito e okati kina na veika e vakavuvulitaka o Jisu Karisito ni da gadreva me da cakava me da lesu tale kina vei Tamada Vakalomalagi. Vola ena veitikinipepa duidui vakabauti Karisito, veivutuni, papitaiso, na isolisoli ni Yalo Tabu, kei na vosota ki na ivakataotioti, ka veibiuyaka ena loma ni rumu. Wilika vei ira na gone na 2 Nifai 31:11–19, ka sureti ira na gone me ra veivukevuke ena rika mai na dua na pepa ki na dua tale ni ra rogoca na ivakavuvui eso oqo. Vukei ira me ra vakasamataka e dua na gauna era sotava ena ivakavuvuli yadua oqo.
Au rawa ni kana magiti ena vosa i Karisito.
Na cava era gadreva kina na gone me ra kila na kena bibi me ra kanamgiti ena vosa i Karisito?
iTaviqaravi e Rawa ni Caka
-
Kerei ira na gone me ra vakatayaloyalotaka e dua na kanamagiti. Na kakana cava beka era na vinakata kina? Na cava era na kania i liu? Qai sureti ira me ra vakatayaloyalotaka se cava na ibalebale ni kanamagiti ena ivolanikalou ni o wilika na 2 Nifai 32:3. Na cava e vakayagataka kina o Nifai na vosa kanamagiti me vakavulica vei keda na ivakarau me da vulica kina na vosa ni Kalou? Na cava a sega ni kaya ga kina wilika? Na cava na kena ibalebale me da kanamagiti ena ivolanikalou? Wasea vei ira na gone na veivakalougatataki o sa rawata ena nomu kanamagiti ena ivolanikalou.
-
Vakalewena na tabana ni itaviqaravi vata kei ira na gone, ka sureti ira me ra nakita me ra cakava ke dua mada ga na ka me ra kanamagiti ena ivolanikalou ena macawa oqo.
E vinakata na Tamada Vakalomalagi meu dau masu tikoga.
E dau temaki keda na vunica me da kakua ni dau masu. Vakasamataka na ivakarau e rawa ni o vukei ira kina na gone me ra vorata na veitemaki oqo ka dau “masu tikoga” (2 Nifai 32:9).
iTaviqaravi e Rawa ni Caka
-
Digitaka e dua na malanivosa baleta na masu mai na 2 Nifai 32:8–9, vola ena papa, ka ubia na vosa yadua ena dua na tiki ni pepa. Sureti ira na gone me ra veivukevuke ena nodra cereka tani yadudua na pepa me yacova ni ra sa rawa ni kila na malanivosa.
-
Wilika vata na 2 Nifai 32:8–9 , ka kerei ira na gone me ra wasea na veika era vulica me baleta na masu mai na veitikina oqo. Na cava e kena ibalebale me da dau “masu tikoga”? (tikina 9). Eda na cakava vakacava na ka oqo?
-
Na cava e rawa ni vakavuna nona sega ni via masu e dua? Wasea e dua na gauna o a masu kina dina ga ni a sega tu ni lomamu. Na cava o a vakila e muri? Sureta e dua na gone me wilika na ikarua ni veimama ni 2 Nifai 32:8, ka solia vei ira na gone na gauna me ra vakananuma kina vakatitobu. Cava na vuna e sega ni vinakata kina o Setani me da dau masu? Me da na vakananuma beka vakacava vei keda me da masu ena gauna sara mada ga e sega tu kina ni lomada?
Vakayaloqaqataka na Vuli e Vale
Vakayaloqaqataki ira na gone me ra vaqara e dua—dua na itokani, dua na tacina, se dua tale na lewe ni matavuvale—e rawa ni ra vakavulica vua na ivakarau ni masu.
Vakatorocaketaki Noda Veivakavulici
Era dau waribariba na gone. Sureti ira na gone me ra matanataka na italanoa ni ivolanikalou kei na sere. Vakayagataka nodra itovonibula waribariba me vakatorocaketaki kina na vuli. (Raica na Veivakavulici ena iVakarau ni iVakabula, 25–26.)