“2-8 ni Maji. 2 Nifai 31-33: ‘Sai Koya Oqo na Sala,’” Lako Mai, Mo Muri Au—Me Baleti Ira na Tamata Yadua kei na Matavuvale: Na iVola i Momani 2020 (2020)
“2-8 ni Maji. 2 Nifai 31–33,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
E Vakatavulici Ira Nona Tisaipeli o Karisito, mai vei Justin Kunz
2–8 ni Maji
2 Nifai 31–33
“Sai Koya Oqo na Sala”
Na dusidusi oqo e vakatura eso na ivakavuvuli ena vakaibalebale vakalevu ena 2 Nifai 31–33. Ia na ka bibi duadua o na vulica ena lako mai ena vakasolokakana ni Yalo. Vakadikeva na idusidusi oqo, ka vola na veika o vakauqeti kina.
Vola na Veika o Vakauqeti Kina
Ena maliwa ni otioti ni vosa nei Nifai, eda kunea kina na veika oqo: “Sa vakaroti au vakaoqo na Turaga, ka sa dodonu meu talairawarawa kina” (2 Nifai 33:15). E veiganiti na veika oqo me vakalekalekataki kina na itukutuku ni bula nei Nifai. E vakasaqara vagumatua ena qaqa na lewa ni Turaga ka talairawarawa kina—kevaka e gadrevi kina me mate me rawa mai kina vei Lepani na peleti parasa, me tara e dua na waqa me takosovi na wasawasa, se vakavulica vakamatata ena yalodina na ivunau i Karisito ena kaukauwa. E rawa ni vakamatatataka o Nifai na gagadre meda “toso ki liu ka tudei vei Karisito,” ena kena vakamuri na “sala qiqo ka rabailailai sa basika ki na bula tawamudu” (2 Nifai 31:20, 18), baleta oqori na sala e muria o koya. E kila vinaka tu o koya mai na veika sa sotava ni oqo na sala, e dina ni levu na gauna e drakidrakita, ka e marautaki, ni “ia sa sega sara e dua tale na sala se na yaca sa soli e ruku i lomalagi me ra vakabulai kina na tamata ki na matanitu ni Kalou” (2 Nifai 31:21).
Vakasama eso ni Vuli iVolanikalou Yadua
Na sala duadua ga ki na bula tawamudu sai Jisu Karisito kei na Nona ivunau.
Kevaka mo vakalekalekataka na ivakamacala ni sala ki na bula tawamudu ena vica ga na vosa, na cava o na tukuna? E vakayacora vakaoqo o Nifai, ena nona vosa rawarawa ka matata sara: vakabauti Karisito, veivutuni, papitaiso, ciqoma na isolisoli ni Yalo Tabu, ka vosota me yacova nai vakataotioti. Ni o sa vulica oti na ivakavuvuli i Nifai ena 2 Nifai 31–32, vakasamataka mada o na vakamacalataka vakacava vua e dua tale ena nomu vosa. Vakasamataka mada esa vakalougatataki iko vakacava na nomu bulataka na ivakavuvuli oqo. E rawa ni o vakasamataka na ivakavuvuli i Nifai ena 2 Nifai 31:18–20 ka vakadikeva na nomu sasaga mo “toso ki liu” ena sala ni kosipeli.
Raica talega na 3 Nifai 11:32–39; 27:13–22; D. Todd Christofferson, “Na iVunau i Karisito,” Ensign se Liaona, Me 2012, 86–90; Brian K. Ashton, “Na iVunau i Karisito,” Ensign se Liaona, Nove. 2016, 106–9.
Noda vakamuria na ivakavuvuli i Jisu Karisito ena liutaki keda ki na bula tawamudu.
E vakaraitaka na ivakaraitaki uasivi ni talairawarawa o Jisu Karisito ena Nona mai papitaiso.
Kevaka o a papitaiso ena noa se 80 na yabaki sa oti, e dua na gauna bibi oqori—ni o sa veiyalayalati kina ena vo ni nomu bula taucoko mo muri Jisu Karisito. Vakasamataka na nomu papitaiso ni o wilika na veika me baleta na papitaiso ni Vakabula ena 2 Nifai 31:4–13. Na cava e papitaiso kina na iVakabula? E tautauvata vakacava nai naki ni Nona papitaiso ki na nomu i naki ni papitaiso? Na cava o sa cakava tiko nikua me tomani tiko kina na nomu vakamuria na ivakaraitaki ni talairawarawa ni Vakabula?
Na cakacaka vakalotu ni sakaramede e dua na madigi ena veimacawa mo vakavinakataka na nomu vakamuri Jisu Karisito. Na gauna tarava o vakaivotavota kina ena sakaramede, nanuma mo wilika na 2 Nifai 31:13 ka vakasamataka vakatitobu na nomu guta mo “muria na Luvena, ena lomamudou taucoko” kei na nomu lomasoli mo “dou taura na yacai Karisito.”
Ena vakaraitaka vei au na Yalo Tabu na veika meu cakava.
Kevaka esa “matamata [meda] curu kina” na papitaiso kei na veivakadeitaki ena sala qiqo ka rabailailai (2 Nifai 31:17), na cava eda na cakava ena gauna eda sa tiko kina ena sala oqo? Oqori na veika era via kila na tamata i Nifai (raica na 2 Nifai 32:1). Na saunitaro cava so e solia mai o Nifai ena 2 Nifai 31:19–20 kei na wase 32? Na cava na isau ni taro o kunea vakataki iko?
Raica talega na David A. Bednar, “Ciqoma na Yalo Tabu,” Ensign se Liaona, Nove. 2010, 94–97; “Yalo Tabu,” Ulutaga Vakosipeli, topics.ChurchofJesusChrist.org.
Na iVola i Momani e vakamasuta na tamata kecega me vakabauti Karisito.
Ena 2 Nifai 33, ni mai vakacavara o Nifai nona volavola, e vakamacalataka o koya na vuna e volavola tiko kina. Na cava eso na vuna o kunea ena wase oqo? Vakasamataka na veika o sa wilika oti ena 1 Nifai kei na 2 Nifai kei na veika o sa vola toka. Esa vakavotukana vakacava vei iko na italanoa kei na ivakavuvuli eso nei Nifai? Me ivakaraitaki, e vakayarayarataki iko vakacava na veika oqo mo “vakabauti [Jisu] ka vosota me yacova na ivakataotioti”? (tikina 4). Nanuma mo vola na veika o sotava eke se wasea vei ira na lewe ni nomu vuvale se itokani.
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
2 Nifai 31:5–13
E dua beka na lewenivuvale e vakavakarau tiko me papitaiso, se sa qai papitaiso walega oqo? Ena rawa beka ni wasea na i naki e vakatulewataka kina me papitaiso. Ena veivakavulici nei Nifai, na cava eso na i naki meda papitaiso kina? Na cava eso na veivakalougatataki eda ciqoma ni da papitaiso?
2 Nifai 31:17–21
Ena rawa ni kila vakacava me matata na nomu vuvale na vakatautauvata ni “sala qiqo ka rabailailai” nei Nifai? (2 Nifai 31:18). Me vakaoqo, e rawa ni dou cakacaka vata mo dou droinitaka na iyaloyalo ni sala e vakamacalataka o Nifai ena 2 Nifai 31:17–21, ka vakayacana na veika kece e dodonu meda cakava me rawa ni da curu yani ki na sala ka toso tikoga ki liu. E vukei keda vakacava na iVakabula meda toso tikoga ki liu ena sala?
2 Nifai 31:20
Kevaka o vinaka me kila vakavinaka cake na nomu vuvale na vosota me yacova na ivakataotioti, tabana 6 ni Vunautaka Noqu Kosipeli e tiko kina na ivakamacala e rawa ni veivuke; vakakina na itukutuku nei Elder Dale G. Renlund “Era Tovolea Tikoga na Yalododonu Edaidai” (Ensign se Liaona, Me 2015, 56–58).
2 Nifai 32:8–9
Me vukea na lewe ni vuvale me ra “masu tikoga,” e rawa ni o cakava e dua na ituvatuva ni tuvaki eso eda rawa ni masu kina (se droinitaka e dua nai yaloyalo me matataka na veituvaki oqori). E rawa ni qai lagata nomu vuvale e dua na sere e vakavulica na masu, me vaka na “Bera Ni Ko Gole Yani?” (Serenilotu, naba 78), me qai veisosomitaki eso na vosa ena sere ena nodra vosa mai na ituvatuva esa tiko vei ira. Ena vakalougatataki keda vakacava na Turaga ni da dau masu?
2 Nifai 33:1–2
Na cava ena rawa ni liutaki ira na tamata “mera vakaukauwataka na lomadra vua na Yalo Tabu”? Ena rawa vakacava nida qarauna me na tiko “e yalo[da])” na Yalo Tabu?
Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Vakadadamuria na iVakabula. E veivuke na noda vulica na ivakarau e veivakavulici kina na iVakabula—na iwalewale a vakayagataka o Koya kei na veika a cavuta. Ia na kaukauwa ni nona rawa ni veivakavulici vakaibalebale ka veilaveti vei ira na tani e sala mai ena vakarau e bulataka na Nona bula kei na Nona ituvaki vakalou. Na levu ni nomu saga vakagumatua mo bula vakataki Jisu Karisito ka vakararavi ki na Nona kaukauwa ni veisorovaki, na levu ni nomu na veivakavulici vakarawarawa sara ena Nona vakarau ni veivakavulici.
Me Vakataucokotaka na Valavala Dodonu Kecega, mai vei Liz Lemon Swindle