Ena Liutaki Iko o Koya e Ligana, mai vei Sandra Rast

24 ni Feperueri–1 ni Maji

2 Nifai 26–30

“E Dua na Cakacaka Talei ka Veivakurabuitaki”

E tukuna na Turaga, au “sa vakarota na tamata kecega … me ra vola na vosa au sa vosataka vei ira” (2 Nifai 29:11). Ena Yalo, ena vosa vei iko na Turaga ni o vulica tiko na Nona vosa. Vola na veika o ciqoma.

Vola na Veika o Uqeti Kina

“Au sa parofisai vei kemudou me baleta na veisiga mai muri,” e vola o Nifai (2 Nifai 26:14). E rawa ni tukuni talega, ni vola tiko o koya me baleta na noda gauna. Ka tiko nai naki meda loma leqataka na veika e raica: era cakitaka tiko na tamata na kaukauwa kei na cakacaka mana ni Kalou, sega ni qaqarauni na vakalevulevui ni veileti kei na veicacati, ka vesuki ira tu na tamata na tevoro ena ivau kaukauwa. Ia, me ikuri ni veika ena gauna edaidai “na cakacaka ni butobuto” (2 Nifai 26:10, 22) liutaki mai na vu ni ca, e tukuna talega o Nifai na “cakacaka totoka ka veivakurabuitaki” e liutaka na Turaga vakataki Koya (2 Nifai 27:26). Ena lomadonu ni cakacaka oqori e dua na ivola—na ivola e vosa mai na kuvu ni soso, ka vakaraitaka mai na lasu kece nei Setani, ka kumuni ira vata mai na yalododonu me dua na ivakatagedegede. Na ivola oqori na iVola i Momani, na cakacaka totoka ka talei oqori na cakacaka ni Lotu ni Turaga ena gauna edaidai, ka kena talei sai koya ni sureti keda tu o Koya, meda vakaitavi, veitalia ga na noda dui malumalumu.

Vakasama eso ni Vuli iVolanikalou Yadua

2 Nifai 26:20–33

E sureti keda o Jisu Karisito meda lako yani Vua.

E vakatavulica na Parofita o Josefa Simici ni sa “sega ni vakaiyalayala ena nona loloma veivueti kei na veivakalougatataki, eda sa vakarau tu meda vakabauta se ciqoma” na Tamada Vakalomalagi (The Joseph Smith Papers, “History, 1838–1856, volume D-1,” p 4 [addenda], josephsmithpapers.org). Wilika na veika e raica o Nifai ena 2 Nifai 26:20–22 kei na veika e vakatavulica me baleta na iVakabula ena tikina 23–33, ka vakatautauvatataka oqo ki na itukutuku i Josefa Simici. Na cava o vulica me baleta na loloma veivueti ni Turaga sega ni vakaiyalayala? Na cava e rawa ni o cakava me vaka e dua na lewe ni Lotu i Jisu Karisito me va-Karisito vakalevu cake na nomu ivakarau vei ira na luvena na Kalou?

Raica talega na 3 Nifai 18:30–32.

2 Nifai 26–27

Na ivola cava e cavuti tiko ena iwase oqo?

Na parofisai nei Nifai ena 2 Nifai 26–27, ka tauri mai vakalevu ena dua na parofisai taumada i Aisea (raica na Aisea 29), e tukuna tiko me baleta na kena lako mai na iVola i Momani. Na parofisai oqo e vakamacalataka na veika oqo:

• Na vosa ki na kawa i Liai e vosa tiko mai ena “kau sobu ki na kuvu ni soso” ena “vaka na domoi koya sa dau curumi” ka ra “volai ka dregati ena dua na ivola” (2 Nifai 26:14–17; raica talega na Aisea 29:4).

• E dua na iwase ni vola e soli vua e dua na tamata vuli ka kaya, “Au sega ni wilika rawa” (2 Nifai 27:15–20; Josefa Simici—Ai Tukutuku 1:64–65; raica talega na Aisea 29:11).

Me ikuri ni Aisea, era tukuna talega na parofita eso ni volatabu na iVola i Momani, e dina ga ni ra sega ni cavuta na yacana. Me ivakaraitaki, Isikeli 37:15–20 e tukuna tiko na “titoko i Josefa,” ka rawa ni vakaibalebaletaka na itukutuku i Nifai, ka kawa nei Josefa. Na itukutuku oqo ena yaco me duavata kei na “titoko i Juta,” ka vakaibalebaletaka tiko na iVola Tabu.

Eso tale na ivakaraitaki e rawa ni kune ena iDusidusi ki na iVolanikalou, “iVola i Momani” (scriptures.ChurchofJesusChrist.org).

2 Nifai 28

E dau vakasaga o Setani me vakaisina.

E vuqa na lasu kei na iwalewale nei Setani e vakaraitaki vakamatata ena ivakamacala ni otioti ni gauna 2 Nifai 28. Raica kevaka o rawa ni kunea (me ivakaraitaki, raica na tikina 6, 8, 21–23, 29). Na cava o gadreva mo kila me baleta na lasu nei Setani? Na cava o na cakava ni saga me vakaisini iko na vu ni ca?

2 Nifai 28:27-31; 29

E solia tikoga na Kalou na ivakatakila me dusimaki ira kina na Luvena.

Ni da Yalododonu Edaidai eda sa vakalougatataki ena levu ni vosa ni Kalou, e rawa ni noda talega na veivakaroti nei Nifai: e sega ni dodonu meda nanuma ni “sa rauti [keda] ga oqo!” Ni o wilika na ivakaro ena 2 Nifai 28 kei na 29, vakasamataka vakatitobu na veitaro vakaoqo:

• Na cava e vinakata me da cakava na Turaga me baleta na Nona vosa?

• Na cava era dau “cudru” kina o ira na tamata ena so na gauna me baleta na dina era ciqoma mai vua na Kalou? (2 Nifai 28:28). E dau vaka beka oqo na veika au vakila? Kevaka e vakakina, ena rawa vakacava niu ciqoma vakalevu cake na dina?

• Na cava na kena ibalebale me da ciqoma na vosa ni Kalou? Au na vakaraitaka vakacava vei Koya niu vinakata meu ciqoma vakalevu na Nona vosa?

Raica talega na Alama 12:10–11; 3 Nifai 26:6–10.

2 Nifai 29–30

E vakarautaka na iVola i Momani na Kalou me baleta na noda gauna.

E kila ena vakatakila o Nifai, ena gauna sara madaga ni se bera ni volai vakaoti na iVola i Momani, ni na yaco mai na siga me “yaga vakalevu sara vei ira na luve ni tamata” (2 Nifai 28:2). Na cava na vuna e bibi kina vei iko na iVola i Momani? Vakasamataka na veitaro oqo ni o wilika na 2 Nifai 29–30. Na cava eso na cakacaka “talei” e rawata tiko na Kalou ena cakacaka e vuravura kei na nomu bula mai na iVola i Momani?

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

2 Nifai 26:12–13

E vakatavulica o Nifai ni vakaraitaki Koya o Jisu Karisito mai na Yalo Tabu. Na cava eso na veika era sotava na lewe ni vuvale ka rawa ni ra wasea ena gauna e vaqaqacotaki kina na nodra ivakadinadina na iVakabula mai na Yalo Tabu?

2 Nifai 26:22; 28:19-22

Ena rawa beka ni marautaka na nomu vuvale na veika e vakaraitaki ena lesoni ka vakavulici ena 2 Nifai 26:22 me baleta na tevoro. Ni o wilika na iwalewale i Setani ena 2 Nifai 28:19–22, e rawa ni o viviga wavokita na wa ena isema ni ligana me matataka na “dali laino.” E rau tautauvata vakacava na dali laino kei na veitemaki nei Setani? Ena rawa vakacava ni yaco me dali kaukauwa? Ena rawa vakacava ni da kidava na lasu nei Setani?

E vakatautauvatataka o Nifai na veitemaki ni tevoro ki na “dali laino.”

2 Nifai 27:20–21

Na cava beka e vakaibalebaletaka na Turaga ni kaya, “sa rawa vei au meu kitaka ga na noqu cakacaka”? Ena rawa vakacava me veisautaka na dina oqo na sala ni noda veiqaravi ena Nona Lotu?

2 Nifai 28:30–31

Ena rawa beka ni vakasamataka na nomu vuvale, e dua na ivakatakila mai vua na Kalou, e vinaka cake me ciqomi vakayadua ena dua na gauna? Na cava e dauvakaraitaka kina vei keda na dina na Kalou mai “na vosa ena vosa, ivunau ena ivunau, vakalailai eke ka vakalailai e kea” ka sega ni biu kece mai ena dua ga na gauna?

2 Nifai 29:7–9

Na cava e vinakata me vakaraitaka na Turaga mai na iVola i Momani?

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Wasea na rai titobu. Ena nomu veitalanoa kei ira tale eso ena rawa ni vakaukauwataka na nomu kila vakavinaka cake. Ni o wilika oti na 2 Nifai 29:6–14, o na vakila beka na veivakauqeti mo vakamacalataka vua e dua nai tokani na vuna eda gadreva kina na iVola i Momani.

E tukuna na volavola i Nifai me baleta na “cakacaka totoka ka veivakurabuitaki” ena rawa ni yaco ena iotioti ni tabagauna (2 Nifai 27:26).