Sa Vosoti, mai vei Greg K. Olsen

9–15 ni Maji

Jekope 1–4

“Mo Duavata kei na Kalou ena Veisorovaki i Karisito”

Ni o wilika na Jekope 1–4, vakananuma vakatitobu na ivakavuvuli mai na iwase eso oqo e bibi me ra vulica na gone. Vaqara na veidusimaki vakayalo mo kila na ivakarau vinaka duadua mo vakavulica kina na ivakavuvuli eso oqo, ka vola na veika o uqeti kina.

Vola na Veika o Uqeti Kina

Sureta na Veiwasei

Sureti ira na gone me ra wasea e dua na ka era a cakava o ira se na nodra matavuvale me ra vuli kina mai na Jekope 1–4. Kerei ira me ra wasea e dua na ka era bau nanuma mai na lesoni ena macawa sa oti. Na taro cava e rawa ni o taroga me vukea nodra nanuma?

Vakavulica na iVunau: Gone Sobu

Jekope 1:6–8, 18; 2:1–11

E kacivi ira na iliuliu ni Lotu na Kalou me ra vukei au meu muri Jisu Karisito.

Vukei ira na gone me ra kila ni ra na vakalougatataki ena nodra muria na nodra ivakasala na iliuliu ni Lotu.

iTaviqaravi e Rawa ni Caka

• Cakava na matakau rawarawa me matataki rau o Jekope kei Josefa, o rau na taci Nifai gone, ka rau a iliuliu ni Lotu. Wasea eso na tikina mai na Jekope 1 kei na 2 mo vakamacalataka na veika era kacivi kina na iliuliu ni Lotu me ra cakava. Me vaka oqo, era vakauqeti keda na iliuliu me da “vakabauti Karisito” (Jacob 1:8), sureti keda me da veivutuni (raica na Jekope 2:5–6, 9–10), “ka tukuna na vosa [ni Kalou]” (Jekope 2:2, 11). Me ra vakayagataka na gone na matakau me vaka ni ra sa cakava tiko eso na ka oqo.

• Sureti ira na gone me ra cavuta na yacadra eso na iliuliu ni Lotu era kila, me vakataki ira na iliuliu ena Lalai, lewe ni matabisopi, kei ira na parofita kei na iapositolo. Vukei ira na gone me ra vakasamataka na sala eso era vakalougatataki keda kina na iliuliu eso oqo.

O ira na iliuliu ni Lotu era vukei keda me da muri Jisu Karisito.

Jekope 2:12–14, 17–21

Au rawa ni vukei ira era vakaleqai tu ena noqu veiwasei vei ira.

Era sa kila beka na gone o vakavulica na veivakalougatataki ena yaco mai ena nodra veiwasei vata kei ira era leqa tu? Mo vukei ira vakacava me ra kila ni rau vinakata na Tamada Vakalomalagi kei Jisu me ra vukei ira na tani?

iTaviqaravi e Rawa ni Caka

• Vakamacalataka ni so na tamata ena gauna i Jekope era a vutuniyau vakalevu, ia era a sega ni via wasea vei ira na dravudravua na veika e tu vei ira. Wilika na Jekope 2:17–19 me vukei ira na gone me ra kila na ivakavuvuli nei Jekope vei ira na tamata oqo. Ni o vakayacora vakakina, solia vei ira na gone na iyaloyalo se iyaya me ra taura tu ka salavata kei na vosa se malanivosa ena veitikina oqo.

• Sureti ira na gone me ra matanataka na sala eso e rawa ni ra wasea kina na veika e tu vei ira vua e dua e vakaleqai tu. Vakadinadinataka ni da na vakalougatataki ni da veiwasei vei ira tale eso.

• Kauta mai ki na kalasi e dua na ka ena rawa ni o wasea vei ira na gone. Solia eso vei ira yadua na gone, ka vakamacalataka ni o sa veiwasei tiko. Tarogi ira se cava era vakila ena gauna o veiwasei kina vei ira. Na cava era vakila ni ra veiwasei vei ira tale eso? Vukei ira me ra vakasamataka e dua na ka e rawa ni ra wasea me ra vakamarautaka kina e dua.

Jekope 4:6

E rawa niu vaqaqacotaka na noqu vakabauti Jisu Karisito.

Ni buladodonu o Jekope e dina ga ni levu tu na ca e vakavolivoliti koya, a yaco me kaukauwa sara nona vakabauta ka sega ni yavalati rawa. Vakananuma vakatitobu na sala mo vukei ira kina na gone me ra kila na cava na kena ibalebale me tu vei iko na vakabauta e sega ni yavalati rawa.

iTaviqaravi e Rawa ni Caka

• Vukei ira na gone me ra vakasamataka na veika era dau cakava me vakaukauwataka na yagodra. Na cava eda rawa ni cakava me da vakaukauwataka cake kina noda vakabauta? Cega na ivolanikalou ki na Jekope 4:6, ka vukei ira na gone me ra kila vakataki ira na veika era a cakava o Jekope kei na nona tamata me kakua kina ni “yavalati” nodra vakabauta.

• Lagata vata kei ira na gone na “The Wise Man and the Foolish Man” (Children’s Songbook, 281). Ena yasa ni dua na papa, droinitaka kina na vale e tara ena nuku. Ena yasa ni dua na papa, droinitaka kina na vale e tara ena vatu. Ke rawa, kauta mai ki na kalasi na nuku kei na vatu. O cei vei rau e rawarawa me da kuretaka se tosoya? O cei vei rau, na nuku se vatu, eda vinakata me tautauvata kaya noda vakabauta?

Vakavulica na iVunau: Gone Qase Cake

Jekope 1:6–8, 18; 2:1–6, 11

E kacivi ira na iliuliu ni Lotu na Kalou me ra vukei au meu muri Jisu Karisito.

Era na kalougata na gone o vakavulica ena nodra vakabauta ka muria na nodra ivakasala na iliuliu ni Lotu.

iTaviqaravi e Rawa ni Caka

• Wilika vata kei ira na gone na Jekope 1:6–8 kei na 2:1–6, 11, ka vukei ira me ra vaqara na malanivosa ka vakamacalataka na ivakarau era liutaka kina na Lotu na italai ni Kalou. Kerei ira me ra vola na veimalanivosa oqo ena veitikinipepa ka qai vakaraitaka tu na pepa ena papa. Na cava na vuna e kacivi ira kina na iliuliu ni Lotu na Kalou me ra tuberi keda? Kerei ira na gone me ra wasea na veika era sotava me baleta na vulici se na ciqomi ni veituberi mai vua e dua na iliuliu ni Lotu se na qasenivuli kei na veivakalougatataki era ciqoma.

• Kerei ira na gone me ra droinitaka e dua na iliuliu ni Lotu era kila, me ra qai vakilakila na vo ni kalasi se o cei era droinitaka. Na cava era cakava na iliuliu oqo me ra vukei keda me da muri Jisu Karisito? Sureti ira na gone me ra vola na itukutuku vei ira na iliuliu ni Lotu, ka vakavinavinakataki ira ena nodra veiqaravi.

• Sureta e dua na iliuliu ni Lotu ena noda vanua me tukuna vei ira na gone na ka e cakava me qarava vinaka kina nona veikacivi. Kerei ira na gone me ra cavuta eso na ka e rawa ni ra cakava me ra tokoni ira kina nodra iliuliu.

Jekope 2:12–14, 17–21

Au rawa ni vukei ira eso me ra marau ena noqu veiwasei vei ira.

O ira era dau muri Jisu Karisito dina era sa tuvakarau me ra wasea na veika sa tu vei ira. Vakayaloqaqataki ira na gone me ra kauta mai na reki vei ira era vakaleqai tu ena nodra veiwasei vei ira.

iTaviqaravi e Rawa ni Caka

• Tukuna vei ira na gone ni vuqa na tamata ena gauna nei Jekope era sa dokadoka ka yaloca baleta ni ra sa rui taleitaka na iyau (raica na Jekope 2:12–14, 17–21). Sureta e vica na gone me ra wilika i cake na Jekope 2:17–19 , ka vukei ira me ra kila na vosa dredre. Na cava e dodonu me da vakasaqara ni se bera ni da vaqara na iyau? Na cava e dodonu me da cakava ena iyau cava ga eda ciqoma?

• Wilika na Jekope 2:17 vei ira na gone. Na veivakalougatataki cava sa wasea vei keda na Tamada Vakalomalagi? Na cava na vuna e vinakata kina o Koya me da dau veiwasei vakataki keda? Sureti ira na gone me ra wasea e dua na gauna era wasea kina e dua na ka vata kei na dua, oka kina na ivakarau ni yalodra kei na ivakarau ni yalona o koya ka dua.

Jekope 4:4–13, 17

E rawa niu vaqaqacotaka na noqu vakabauti Jisu Karisito.

Sa yaco me sega ni yavalati rawa na vakabauta nei Jekope ena nona vakasaqara na nodra vosa na parofita ka rawata na nona ivakadinadina (raica na Jekope 4:6). Mo vukei ira vakacava na gone me ra gadreva me ra tara na vakabauta ena sega ni yavalati rawa?

iTaviqaravi e Rawa ni Caka

• Sureti ira na gone me ra vakasamataka na veika eso ena kaukauwa cake ka tudei ni toso na gauna, me vaka e dua na vunikau levu. E tautauvata vakacava kei na veika era vakasamataka na vakabauta? Na malanivosa cava ena Jekope 4:6, 10–11 e vakamacalataka na veika e rawa ni da cakava me kua kina ni yavalati rawa noda vakabauta? Kerei ira na gone me ra vola e dua na lisi ena papa ena ivakarau e rawa ni ra vaqaqacotaka kina nodra vakabauti Jisu Karisito.

• Wasea na vakasama nei Elder Neil L. Andersen ni vunikau e tubucake ena dua na vanua tadravi cagi, e kunei ena nona itukutuku “Na Covulaca Vakayalo” (Ensign se Liaona, Me 2014, 18–21), se vakaraitaka na vidio “Spiritual Whirlwinds” (ChurchofJesusChrist.org). Na cava na vuna e bibi kina me sega ni yavalati rawa ka kaukauwa me vaka na tolo ni dua na vunikau na noda vakabauta? Na cava era matataka na covulaca? Na cava eda rawa ni cakava me da tara cake kina na vakabauta e sega ni yavalati? Vukei ira na gone me ra vakasamataka eso tale na vakasama ka vakavuvulitaka me tu vei keda na vakabauta e sega ni yavalati rawa.

Vakayaloqaqataka na Vuli e Vale

Sureti ira na gone me ra vakasamataka e dua na ka e rawa ni ra wasea vata kei ira nodra matavuvale—okati kina nodra wasea e dua na ka era vulica ena kalasi nikua. Solia vei ira na madigi ena dua na lesoni i muri me ra veivosakitaka na veika era wasea.

Vakatorocaketaki Noda Veivakavulici

Vakauqeta na vakarokoroko Vukei ira na gone me ra kila ni dua na tiki bibi ni vakarokoroko na noda vakasamataki rau na Tamada Vakalomalagi kei Jisu Karisito. O na rairai vakananumi ira na gone mera dau vakarokoroko ni lagati se vagugutaki malua e dua na sere se vakaraitaki e dua na iyaloyalo kei Jisu.