Volavola ena ivivivi o Aisea

17–23 ni Feperueri

2 Nifai 11:25

“Eda Rekitaki Karisito”

Nomu vakavakarau ena veivakavulici e tekivu ena nomu wilika na 2 Nifai 11–25. Lako Mai, Mo Muri Au—Baleta na Tamata Yadua kei na Matavuvale sa rawa ni vukei iko mo kila na veiwase oqo, ka rawa ni solia vei iko na ituvatuva oqo eso na vakasama ni veivakavulici.

Vola na Veika o Uqeti Kina

ivakatakilakila ni veiwasei

Sureta na Veiwasei

Railesuva vakalekaleka vata kei ira na gone na veika era vulica me baleta na iVakabula kei na Nona Veisorovaki ena macawa sa oti. Kevaka era a wasea na veika era vulica kei ira nodra matavuvale, vakayaloqaqataki ira me ra tukuna oqori.

ivakatakilakila ni veivakavulici

Vakavulica na iVunau: Gone Sobu

2 Nifai 12:2–3

Na valetabu e vale ni Turaga

Na parofisai nei Aisea me baleta na “ulunivanua ni vale ni Turaga” e rawa ni dua na madigi me vakavulici kina vei ira na gone baleta na valetabu ka vukei ira me ra nanamaki ni ra na lako kina ena dua na siga.

iTaviqaravi e Rawa ni Caka

• Me taura cake tu e dua na gone na iyaloyalo ni dua na valetabu (na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e tiko kina e dua), ka kerei ira na gone me ra wasea na veika era kila me baleta na valetabu. Wilika na 2 Nifai 12:3, ka vakamacalataka ni a parofisaitaka e dua na parofita na yacana o Aisea ni na tu na valetabu ena itabagauna oqo. Wilika tale na tikina oqo, ka vakabibitaka ni da lako ki na valetabu, na Turaga ena “vakavulica vei keda nona ivalavala” ka vukei keda me da “lakova na nona sala.”

• Cakava e dua na salatu ena fuloa, ena mua ni salatu, biuta kina e dua na iyaloyalo ni valetabu me ubi tu. Me ra taubale na gone ena salatu, ni ra taubale tiko, vukei ira me ra tokaruataka na malanivosa “lakova na nona sala.” Ni ra sa yacova na gone na mua ni sala, me ra qai cereka na iubi ni iyaloyalo. Na cava na kena ibalebale me da lako ena sala ni Kalou?

• Lagata vata kei ira na gone e dua na sere baleta na valetabu, me vaka na “I Love to See the Temple” (Children’s Songbook, 95). Vukei ira me ra kunea na vosa kei na malanivosa ena sere ka vakavulica na cava na valetabu kei na ka eda dau cakava kina.

2 Nifai 19:6; 25:26

“Eda Rekitaki Karisito.”

Erau taukena o Nifai kei Aisea na ivakadinadina baleta na iVakabula, ka rau dau reki vakalevu ena vuku ni nodrau ivakadinadina. Vukei ira na gone me ra raica ni o iko o dau “rekitaki Karisito.”

iTaviqaravi e Rawa ni Caka

• Sureta e dua na gone me taura tu na iyaloyalo ni nona sucu o Jisu Karisito (me vaka na iVola ni iYaloyalo Vakosipeli, naba 30), ka vukei ira na gone me ra raica na gonelailai ko Jisu ena iyaloyalo. Wilika na 2 Nifai 19:6 se vakaraitaka na vidio “A Savior Is Born—Christmas Video” (ChurchofJesusChrist.org), ka kerei ira na gone me ra dusi Jisu ni ra rogoca na vosa gonelailai kei na luvena. Vakamacalataka ni parofita o Aisea, ka a vola na vosa ena 2 Nifai 19:6, sa kila tu na sucu i Jisu ni se vo e vica na drau na yabaki me qai yaco.

• Tukuna e dua na italanoa baleti Jisu Karisito ena nona kauta mai na reki vei ira na tani, se vakaraitaka e dua na vidio me vaka na “Jesus Heals a Man Born Blind” or “Suffer the Little Children to Come unto Me” (ChurchofJesusChrist.org). Dusia na veigauna rekitaki ena italanoa se vidio. Wilika na 2 Nifai 25:26 ka tukuna na vuna o “rekitaki Karisito kina.” Kerei ira na gone me ra tukuna na vuna e kauta mai kina vei ira na reki o Jisu.

2 Nifai 21:6–9; 22

Na mileniumi ena gauna ni sautu kei na reki.

Ni oti na iKarua ni Nona Lako Mai, ena mai tiko o Jisu Karisito vei ira Nona tamata ena dua na gauna ni bula sautu ka vakatokai na Mileniumi.

iTaviqaravi e Rawa ni Caka

• Vakaraitaka vei ira na gone na iyaloyalo ni manumanu era tukuni ena 2 Nifai 21:6–7, ka kerei ira na gone me ra vakayacana na manumanu. Vakamacalataka ni o ira na manumanu oqo e vakalevu ni ra dau veimecaki, ia e vakavuvulitaka o Aisea ni sa oti nona lako tale mai o Jisu Karisito, ena yaco e dua na gauna ni sautu, ka vakatokai na Mileniumi, era na sega kina ni veivakamavoataki vakataki ira na manumanu. Eda na muria vakacava na nodra ivakaraitaki na manumanu oqo ena noda veiqaravi vakataki keda. Sureti ira na gone me ra droinitaka na kedra iyaloyalo na manumanu oqo ni ra bula vata ena veilomani.

• Wilika na 2 Nifai 22:5, ka kerei ira na gone me ra vukei iko mo kunea e dua na sere e vakamacalataka na “veika vakasakiti” sa cakava na Turaga. Eso na ivakaraitaki ena oka kina na “My Heavenly Father Loves Me” (Children’s Songbook, 228–29) se “Noqu Kalou Au Kurabui ka Galu” (Sere ni Lotu, naba 86). Lagata vata na sere. Vakamacalataka ena Mileniumi, na tamata kece ena kila na “veika vakasakiti” sa cakava na Turaga.

ivakatakilakila ni veivakavulici

Vakavulica na iVunau: Gone Qase Cake

2 Nifai 12:2–3

Na valetabu e vale ni Turaga

Mo vakayagataka beka vakacava na tikina eso oqo mo vukei ira na gone me ra vakanamata ki na siga sa rawa ni ra curu kina ki na valetabu?

iTaviqaravi e Rawa ni Caka

• Vakaraitaka na iyaloyalo ni valetabu (e tiko e dua enaituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ). Kerea e dua na gone me wilika na 2 Nifai 12:2–3, ka sureti ira na gone me ra vakarogoca na vuna e kaya kina o Aisea ni da gadreva na valetabu. E rawa ni o vakamacalataka ni a vakatoka o Aisea na valetabu me “ulunivanua ni vale ni Turaga.” Na cava e ivakatakarakara vinaka kina ni valetabu na ulunivanua?

• Sureti ira na gone me ra droinitaka e dua na kedra iyaloyalo ni ra lako tiko ki na valetabu. Kevaka e rawa, kerea e dua na cauravou se goneyalewa ena tabanalevu me tukuna vei ira na gone se vakacava tu na noda laki papitaiso ena vukudra na mate ena valetabu. Na itabagone oqo se dua tale ena tabanalevu e rawa ni vakavulica vei ira na gone na ivakarau me kune kina na yacadra na tubudra era gadreva tu na cakacaka vakalotu ni valetabu.

2 Nifai 15:20

E dau tovolea o Setani me vakasesea noqu vakasama baleta na vinaka kei na ca.

Eda bula tiko ena dua na vuravura, me vaka na parofisai nei Aisea, era vakatoka kina na tamata na ca me vinaka kei na vinaka me ca. O na vukei ira vakacava na gone me ra kila rawa na veicavilaki vakaoqori?

iTaviqaravi e Rawa ni Caka

• Vakaraitaka vei ira na gone e dua na ka wiwi, me vaka na molikaro, ena dua na iolo ni loli. Wilika vata na 2 Nifai 15:20, ka vakamacalataka ni o Setani e dau tovolea me vakarairai vinakataka na veika ca. Vukei ira na gone me ra vakasamataka na sala eso e dau cakava kina o Setani na ka oqo. Me da toboka vakacava na veicavilaki vakaoqo?

• Vakaraitaka na imatai ni dua na miniti ka 30 na sekodi ni vidio “You Will Be Freed” (ChurchofJesusChrist.org). Na cava na vuna e matavulotaka kina nona batinisiwa na dausiwa oqo? Na cava e dau matavulotaka kina o Setani na ivalavala ca?

2 Nifai 17:14; 19:6; 25:23–26

“Eda Rekitaki Karisito.”

Era gadreva na gone me ra kila ni ka rekitaki na kosipeli i Jisu Karisito. Mo vukei ira vakacava me ra “rekitaki Karisito”?

iTaviqaravi e Rawa ni Caka

• Vukei ira na gone me ra raica na yacai Jisu Karisito ena 2 Nifai 17:14 kei na 19:6. O na gadreva beka mo vakamacalataka ni “Imanueli” e dua vei ira na yaca oqori, ka kena ibalebale na “Kalou sa tiko vata kei keda.” Na cava era vakavuvulitaka vei keda na yaca yadua oqori me baleti Koya?

• Biuta e dua na kena iyaloyalo na iVakabula ena papa, ka wilika vata na 2 Nifai 25:26. Na cava na vuna e dau tukuna ka vola kina o Nifai e vuqa na ka baleti Jisu Karisito? Me ra vola na gone yadua ena papa volekata na yacai Jisu, e dua na ka baleta na iVakabula e kauta mai vei ira na reki.

• Kerei ira na gone me ra vakasamataka e dua era na vinakata me ra “vakayarayarataka … me vakabauti Karisito” (2 Nifai 25:23). Me da vakaraitaka vakacava vei ira tale eso na reki e kauta mai ki na noda bula na iVakabula? Me ra vola na gone se matanataka eso na ka e rawa ni ra cakava me vukea na tamata era vakasamataka me vakabauti Jisu Karisito.

ivakatakilakila ni vuli

Vakayaloqaqataka na Vuli e Vale

Sureti ira na gone me ra vakasamataka e dua na ka e rawa ni ra cakava me ra vakaraitaka vei ira nodra matavuvale ni ra “rekitaki Karisito.”

Vakatorocaketaki Noda Veivakavulici

Laiva me ra vakayagataka nodra vakasama na gone. “Ni o vakavulici ira na gone, vakatarai ira me ra tara, droinitaka, rokataka, vola, ka bulia. Na veika oqo sa ra levu cake mai na itaviqaravi lasa eso—era sa yaga sara ki na vuli” (Veivakavulici ena iVakarau ni iVakabula, 25).

tabana ni itaviqaravi: na valetabu e vale ni Turaga.