Raica tiko na Liaona o Liai

Liai kei na Liaona, mai vei Joseph Brickey

27 ni Janueri–2 ni Feperueri

1 Nifai 16–22

“Au na Vakarautaka na Sala e Matamu”

Na italanoa veivakauqeti ena 1 Nifai 16–22 e vakavuvulitaka na dina ka na rawa ni vakalougatataki ira na gone ena nomu kalasi. Wilika na iwase eso oqo ka vola na veivakauqeti o ciqoma.

Vola na Veika o Uqeti Kina

ivakatakilakila ni veiwasei

Sureta na Veiwasei

Vola na vosa eso oqo ena papa, se vakaraitaka na kedra iyaloyalo: na Liaona, na dakaititi, kei na waqa. Sureti iratou e lewe tolu na gone me ra dui tomika e dua na vosa se iyaloyalo ka wasea na tiki ni italanoa i Nifai e vakaraitaki kina na ka oqori. Veivuke kevaka e gadrevi.

ivakatakilakila ni veivakavulici

Vakavulica na iVunau: Gone Sobu

1 Nifai 16:10, 28–29; 18:8–13, 20–22

E rawa ni tuberi au ka dusimaki au na Turaga.

Vakavulica vei ira na gone ni gauna mada ga era sotava kina na bolebole dredre, e rawa ni tuberi ira na Turaga (raica na 1 Nifai 16:29).

iTaviqaravi e Rawa ni Caka

• Vakaraitaka vei ira na gone e dua na kabasi, dua na mape, se dua tale na ka e vukei keda me da kunea na sala, ka vakamacalataka na ivakavakayagataki ni iyaya ni cakacaka oqo. Vakatauvatana na iyaya ni cakacaka oqo ki na Liaona ni o vakalekataka na italanoa ena 1 Nifai 16:10, 28–29 kei na 18:9–13, 20–22. Dusimaka ni gauna a sega ni talairawarawa kina na matavuvale nei Liai, a sega ni cakacaka na Liaona (raica talega na 1 Nifai 18:9–12, 20–22). Na cava e vukei keda nikua me da kunea na noda sala lesu vei Tamada Vakalomalagi?

• Kauta mai e dua na kateni ka tiko e loma e vicavata na idusidusi me vakamacalataka e dua na vanua e loma se wavolita na vale ni lotu. Vakayagataka na kateni kei na idusidusi me matataka na Liaona, me ra veivukevuke na gone ena digitaki ni idusidusi ka kilakila se evei na vanua oya. Ni qai lako vata ki na vanua oya. Vakamacalataka ni gauna eda vakaraitaka kina noda vakabauta ka muria na idusidusi e solia vei keda na Turaga, ena vukei keda o Koya me da lesu yani Vua (raica na Alama 37:38–42). E tuberi keda vakacava na Tamada Vakalomalagi ena noda ilakolako lesu Vua?

1 Nifai 16:14–32

E rawa niu ivakaraitaki vinaka ki na noqu matavuvale.

Na nona veimaliwai o Nifai kei iratou na nona matavuvale ena dua na gauna dredre e rawa ni vukea me ra raica na gone ni dina ga ni ra se gone, e rawa ni ra ivakaraitaki vei ira nodra matavuvale.

iTaviqaravi e Rawa ni Caka

• Lesia na gone yadua me droinitaka e dua na ka mai na italanoa ni kena ramusu na dakaititi nei Nifai (raica na 1 Nifai 16:14–32), me vakataki Nifai, na dakaititi, se na Liaona. Qai vakayagataka na iyaloyalo mo tukuna na italanoa ki na kalasi, ka biuta vei ira na gone me ra veivukevuke ena kena caka tiko. Me da na vakataki Nifai vakacava beka ena gauna e sotava tiko kina na dredre na noda matavuvale?

• Sureti ira yadua na gone me ra kotiva e yadua na iwirini pepa ka droinitaka e dua na matararawa ena dua na yasana kei na matamarau ena dua tale. Ni o talanoataka na ramusu ni dakaititi nei Nifai, sureti ira me ra vakayagataka na droini ni mata me vakaraitaka na ivakarau ni yalodra na matavuvale nei Nifai ena veigauna duidui ena italanoa. A veivuke vakacava o Nifai ena nodra vakamarautaki na matavuvale nei Nifai? Na cava e rawa ni da cakava me da vakamarautaki ira kina noda matavuvale?

1 Nifai 17:7–19; 18:1–4

Na Tamaqu Vakalomalagi e rawa ni vukei au meu cakava na veika dredre.

Me vakataki Nifai, o ira na gone o vakavulica era sa vulica tiko me ra cakava na ka dredre. Na veika e sotava o Nifai e rawa ni vukei ira me ra kila ni na vukei ira na Tamada Vakalomalagi ni ra kerea.

iTaviqaravi e Rawa ni Caka

• Tukuna vei ira na gone na italanoa ni nona vakaroti o Nifai me taya e dua na waqa, ena nomu vakayagataka na 1 Nifai 17:7–19 kei na 18:1–4. E rawa talega ni o vakayagataka na “Wase 7: Building the Ship” (Book of Mormon Stories, 21–22) se na kena vidio ena isoqoni ni Book of Mormon Videos ena ChurchofJesusChrist.org. Na itaviqaravi ni macawa oqo e rawa ni vaqaqacotaka na ivakavuvuli ni a vukei Nifai na Tamada Vakalomalagi, ka na vukei keda o Koya.

• Lagata vata na ikarua ni tikina ni “Nephi’s Courage” (Children’s Songbook, 120–21). Na cava a vukei Nifai me yaloqaqa tiko ena gauna era vakalialiai koya kina na tacina ni tovolea tiko me taya e dua na waqa?

ivakatakilakila ni veivakavulici

Vakavulica na iVunau: Gone Qase Cake

1 Nifai 16:10, 28–29; 17:13–15; 18:8–13, 20–22

Niu muria na ivunau, ena tuberi au na Turaga.

Vakayagataka na italanoa ni kena dusimaki iratou na matavuvale nei Liai na Liaona me vakaraitaka na ivakarau ena dusimaki ira kina na Kalou ni ra segata me ra cakava na Lomana.

iTaviqaravi e Rawa ni Caka

• Digitaka e dua se sivia mai na veitukutuku oqo mo lagata vata kei ira na gone: 1 Nifai 16:10, 28–29; 17:13–15; kei na 18:8–13, 20–22. Kerei ira me ra vaqara na veika e dodonu me da cakava me da tuberi ka dusimaki kina mai vua na Kalou ka veivosakitaka na veika eda sa vulica.

• Ni da sa railesuva oti na italanoa ena 1 Nifai 16–18, vakatarogi ira e vica na gone me vaka ni ra a lako vata tiko kei na matavuvale nei Liai. E rawa ni o taroga na taro vakaoqo: Na cava o vakavinavinakataka kina na Liaona? Na cava e gadrevi mo cakava me yavala kina na Liaona? (raica na 1 Nifai 16:28–29). Sureti ira na lewe ni kalasi me ra veivosakitaka na veika sa vakarautaka na Turaga me dusimaki keda ena gauna oqo.

• Kerei ira na gone me ra vakasamataka na sala me ra vakayagataka kina na italanoa ni Liaona me vukea e dua na itokani e gadreva me vakatauca e dua na lewa bibi. Vakatura me ikuri ni 1 Nifai 16:10, 26–31 kei na 18:9–22, e rawa ni ra raica talega na Alama 37:38–44. Wasea e dua na gauna a vukei iko kina na Tamada Vakalomalagi ena loma ni dua na gauna dredre, se sureti ira na gone me ra wasea e dua na ka. Na cava e dodonu me da vakayacora me da ciqomi ira kina?

1 Nifai 16:14–39; 18:1–5

Na noqu itovo kei na digidigi e rawa ni veivakayarayarataki vakavinaka ki na noqu matavuvale.

A yaco me dua na veivakalougatataki levu na vakabauta nei Nifai ena gauna e sotava kina na nona matavuvale na veivakatovolei. O na rawa ni vukei ira vakacava na gone me ra vuli mai na nona ivakaraitaki?

iTaviqaravi e Rawa ni Caka

• Sureti ira na gone me ra droinitaka na iyaloyalo ka vakaraitaka na italanoa ni nona dakaititi ramusu o Nifai (raica na 1 Nifai 16:14–39). Railesuva vata kei ira na italanoa, kevaka e gadrevi. Ni ra wasea nodra droini, vukei ira me ra raica na sala a vakalougatataka kina na matavuvale nei Nifai na nona yalodina. Sureti ira na gone me ra vakasamataka vakatitobu na dredre era sotava tiko o ira se na nodra matavuvale. Na cava era rawa ni cakava mera muria kina na ivakaraitaki nei Nifai?

• Wilika vata eso na tikina mai na 1 Nifai 16:21–32. Veivosakitaka eso na nodra takete na nodra matavuvale na gone, me vaka na lotu vakamatavuvale e veigauna se na masu vakamatavuvale. Me ra na vukea vakacava na gone na nodra matavuvale me ra rawata na veitakete oqo? Sureti ira me ra tuva me ra cakava e dua na ka me vukea nodra matavuvale me rawata nodra takete ena macawa oqo.

1 Nifai 19:22–24

Au rawa ni vakatauvatana na ivolanikalou ki na noqu bula.

Vukei ira na gone me ra raica ni itukutuku ena ivolanikalou era sega ni italanoa walega—e tu kina na ivakavuvuli e rawa ni vakalougatataka nodra bula.

iTaviqaravi e Rawa ni Caka

• Kerea e dua na gone me wilika i cake na 1 Nifai 19:22–24 , ka kerei ira na gone se cava nodra nanuma me ibalebale ni “vakatautauvatatataka vei keimami na ivolanikalou”. Vukei ira me ra kila na ivakarau a vakatauvatana kina o Nifai na itukutuku vakaivolanikalou ki na veika a sotava ena nona laki kauta mai na peleti varasa (raica na 1 Nifai 4:1–4; raica talega Lako Yani 14). A vukei Nifai kei iratou na tacina vakacava na nona nanuma tiko na italanoa oqo?

• Railesuva eso na italanoa era sa vulica na gone me baleti Liai kei na nona matavuvale mai na 1 Nifai, ka sureti ira me ra wasea na veika era sa vulica mai na ivolanikalou. Vukei ira me ra vakasamataka eso na ka ena nodra bula ena tautauvata kei na italanoa eso oqo. Kena ivakaraitaki, nona kerei Nifai na Turaga me taya e dua na waqa e rawa ni vakananuma vei ira na gauna era a gadreva kina me ra cakava e dua na ka derdre ka qai kerea na veivuke ni Turaga.

ivakatakilakila ni vuli

Vakayaloqaqataka na Vuli e Vale

Sureti ira na gone me ra digitaka e dua na italanoa mai na 1 Nifai 16–22 ka wasea vata kei ira nodra matavuvale na sala e rawa ni ra “vakatauvatana” kina na italanoa oya ki na nodra matavuvale.

Vakatorocaketaki Noda Veivakavulici

Vakayagataka na italanoa. Na italanoa ena vukea nodra kila na gone na ivakavuvuli ni kosipeli baleta ni ra vakaraitaka na ivakarau era bulataka kina eso tale na ivakavuvuli.

tabana ni itaviqaravi: E dau vukei au na Kalou meu muria Nona ivunau