Sa Masu o Jisu e Kecisemani

Kakua ni Yaco na Noqu Lewa, Nomuni Lewa Ga, mai vei Harry Anderson.

10–16 ni Feperueri

2 Nifai 6–10

“Isa na Cecere ni iTuvatuva ni Noda Kalou!”

Ni o wilika na 2 Nifai 6–10, vaqara na veituberi ni Yalo me baleta na veika o vakavulica. Na ituvatuva oqo kei na Lako Mai, Mo Muri Au—Baleta na Tamata Yadua kei na Matavuvale e rawa ni vakauqeta na ikuri ni vakasama.

Vola na Veika o Uqeti Kina

ivakatakilakila ni veiwasei

Sureta na Veiwasei

Vakayaloqaqataki ira na gone me ra veivukevuke ena nodra wasea e dua na ka era sa vulica baleti Jisu Karisito kei na Nona Veisorovaki ni vulici tiko na 2 Nifai 6–10 yadudua se vata kei ira nodra matavuvale.

ivakatakilakila ni veivakavulici

Vakavulica na iVunau: Gone Sobu

2 Nifai 9:7–13, 20–23

E vakabulai au mai na ivalavala ca kei na mate o Jisu Karisito.

Mo vakayagataka beka vakacava na 2 Nifai 9:7–13 kei na 20–23 me vukei ira na gone me ra kila ni o Jisu Karisito e vakabula na tamata kece mai na mate ka rawata vei keda na veivutuni mai na ivalavala ca?

iTaviqaravi e Rawa ni Caka

• Tukuna na kena italanoa e dua na tamata a lutu ena loma ni dua na qara titobu ka sega ni rawa ni lako tani mai kina. Qai lako mai e dua na tamata ka mai laveta tani na tamata oqo mai na loma ni qara. O na vinakata beka mo droinitaka na iyaloyalo ni italanoa oqo ena papa ni volavola se matanataka vata kei ira na gone. Vakamacalataka ni qara oqo e vaka na mate kei na tamata e mai veivuke vua na tamata ka lutu tiko oya e vakataki Jisu Karisito, ka vakabula na tamata kecega mai na mate ena nona solia vei keda na isolisoli ni tucake tale. Tukuna vei ira na gone ni tamata vata ga oqo a lutu ena loma ni dua tale na qara. Ena gauna oqo a solia o koya na dauveivueti vua e dua na ikabakaba me kaba cake mai kina. Vakamacalataka ni qara oqo e vaka na ivalavala ca kei na ikabakaba na Veisorovaki i Jisu Karisito, e rawa kina vei keda me da veivutuni ka vosoti ena noda ivalavala ca. Wilika na 2 Nifai 9:22–23, ka wasea nomu ivakadinadina baleti Jisu Karisito kei na Nona Veisorovaki.

• Lagata vata e dua na sere baleta na loloma i Karisito, me vaka na “I Feel My Savior’s Love” (Children’s Songbook, 74–75). Sureti ira na gone me ra droinitaka eso na ka me vukea nodra kila ni lomani ira na iVakabula.

2 Nifai 9:49

“Sa rekitaka na lomaqu na ivalavala dodonu.”

Mo vakayaloqaqataki ira vakacava na gone o vakavulica me ra “[marautaka] na ivalavala dodonu,” se talairawarawa ena reki vua na Turaga? (2 Nephi 9:49).

iTaviqaravi e Rawa ni Caka

• Wilika na 2 Nifai 9:49 vei ira na gone, ka vukei ira me ra raica ka kila na veika e kaya o Jekope ni taleitaka kei na kena e cata. Wasea na veika eso e yaco ka digidigi vinaka se digidigi cala kina e dua, ka sureti ira na gone me ra tucake ena gauna e kauta mai na digidigi oya na marau ka dabe sobu ke kauta mai na digidigi oya na rarawa. E kauta mai vakacava vei keda na reki na digidigi dodonu? Na gauna cava beka o vakila kina na marau baleta ni o digidigi donu?

• Lagata vata e dua na sere me baleta na reki e yaco mai ni da talairawarawa, me vaka na “When We’re Helping” (Children’s Songbook, 198), ka sureti ira na gone me ra vakarogoca na veika e kauta mai vei ira na marau. Me ra veivukevuke na gone ena nodra vaka e dua na itubutubu ka kerei ira na vo ni gone me ra cakava e dua na ka. Me ra vakatovotovotaka na vo ni gone na talairawarawa ena reki.

ivakatakilakila ni veivakavulici

Vakavulica na iVunau: Gone Qase Cake

2 Nifai 6; 7:1–2

Ena dau vakayacora na Turaga na Nona yalayala.

Na noda kila ni dau rokova Nona yalayala na Turaga e rawa ni vukei ira na gone me ra tara cake nodra vakabauti Koya kei na nodra yalodei me ra talairawarawa ki na nona ivakaro.

iTaviqaravi e Rawa ni Caka

• Kerei ira na gone me ra veitalanoataka eso na yalayala era sa cakava, me vaka na yalayala era vakayacora vua e dua na itokani se na yalayala era vakayacora ena papitaiso. Na cava e dredre kina me da rokova noda veiyalayalati? Na cava na vuna e bibi kina me da dau rokova noda yalayala? Wilika na veimalanivosa oqo: “Ena vakayacora na Turaga na Kalou na nona veiyalayalati sa cakava vei ira na luvena” (2 Nifai 6:12). Wasea e dua na ivakaraitaki ni nona maroroya Nona yalayala na Kalou, kevaka sara mada ga a sega ni yaco totolo mai na veivakalougatataki.

• Vakaraitaka e dua na iyaloyalo kei Jisu ka toka tikiva na kena iyaloyalo e dua na gone. Wilika na 2 Nifai 7:1, ka vakamacalataka ni sa mudu nodra talairawarawa na tamata ni Kalou ki na Nona kosipeli, e vaka ni ra sa “sereki” mai Vua. Tosoya tani na kena iyaloyalo na gone mai na iyaloyalo kei Jisu me vakaraitaka ni gauna eda sega kina ni rokova noda veiyalayalati, me vaka na veiyalayalati ni papitaiso, eda sa tawasei keda tani mai vei Tamada Vakalomalagi kei na iVakabula. (Me railesuvi na veiyalayalati ni papitaiso, raica na V&V 20:37.) Na sala cava e rawa kina vei keda mai na Veisorovaki ni iVakabula me da toro voleka tale yani Vua? Ni o veivosakitaka tiko oqo, sureti ira na gone me ra veivolekatitaka tale yani na iyaloyalo.

2 Nifai 9:10–23

E vakabulai au mai na ivalavala ca kei na mate o Jisu Karisito.

O na vakayagataka beka vakacava na 2 Nifai 9:10–23 mo vukei ira na gone me ra vulica ni o Jisu Karisito na iVakabula?

iTaviqaravi e Rawa ni Caka

• Kerei ira na gone me ra vukei iko ni droinitaka ena papa ni volavola e dua na salatu, ka sureti ira me ra biuta eso na itatarabe se itatao ena salatu. Wilika vata na 2 Nifai 9:10, ka sureti ira na gone me ra vakayacana na itatao ena vosa eso mai na tikina e vakamacalataka na veika e rawa ni vakataotaka noda lesu tale vua na Kalou. Qai tukuna na ivakarau e ulabaleta kina ko Jisu Karisito na itatao eso oqo ena vukuda (raica na 2 Nifai 9:21–23), ni o kitaka vakakina, sureti ira na gone me ra bokoca laivi na itatao.

• Vakaraitaka e dua na iyaloyalo kei Atama kei Ivi, me vaka na Leaving the Garden of Eden (ChurchofJesusChrist.org). Vakamacalataka ni gauna erau kania kina o Atama kei Ivi na vuanikau a tukuna vei rau na Kalou me rau kakua ni kania ena Were ko Iteni, erau sa kauta mai na ivalavala ca kei na mate ki vuravura. Vakaraitaka e dua na iyaloyalo kei Jisu Karisito. Me vukea nodra kila na gone na iwalewale e ulabaleta kina na ivalavala ca kei na mate o Jisu, talanoataka na tamata a lutu ki na qara, ka kunei ena imatai ni vakasama ni veivakakavulici ena ruku ni “Gone Sobu” ena idusidusi oqo. Qai kerei ira na gone me ra droinitaka na iyaloyalo ni italanoa oqo se matanataka. Wilika na 2 Nifai 9:21–23, ka wasea nomu ivakadinadina kei Jisu Karisito kei na Nona Veisorovaki.

• Vukei ira yadua na gone me ra raica e dua na sere baleta na Veisorovaki ni iVakabula ena dua vei rau na Sere ni Lotu se na Children’s Songbook (na ituvatuva vakamatanivola ena ivola eso oqo e rawa ni veivuke). Sureti ira na gone me ra raica ka wasea na veimalanivosa mai na sere ka vakamacalataka na veika a cakava ena vukuda o Jisu. Kerei ira na gone me ra wasea nodra nanuma kei na veika era vakila baleta na Veisorovaki ni iVakabula, se wasea nomu ivakadinadina.

2 Nifai 9:20, 28–29, 42–43

Au na vakalougatataki niu muria na ivakasala ni Kalou.

Vukei ira na gone me ra tara cake e dua na yavu kaukauwa ni veivakabauti vua na Kalou me rawa kina ni gauna e tubu cake kina nodra kila kei na kaukauwa, era na vakararavi tikoga Vua ka muria Nona ivakasala.

iTaviqaravi e Rawa ni Caka

• Sureti ira na gone me ra tukuna vei iko me baleta e dua na ka era kila kina e levu na ka me vaka e dua na ivola taleitaki se dua na cakacaka taleitaki. Kerea e dua na gone me wilika na 2 Nifai 9:20, ka vakadinadinataka ni Kalou e “[kila] na ka kecega.” Na cava e bibi kina vei keda me da kila ni Kalou e kila na ka kecega?

• Kerei ira na gone me ra raitayaloyalotaka ni ra a rogoca e dua na itokani ni kaya ni ra sa ka lialia na ivakaro kei na ivakavuvuli ni Lotu. Na cava era na kaya vua nodra itokani? Na cava na vuna e bibi kina me da vakabauta na ivakasala ni Kalou kevaka sara mada ga e se bera ni taucoko noda kila? Vakayaloqaqataki ira na gone me ra rai ena 2 Nifai 9:20, 28–29, kei na 42–43 me ra vukei ena kena vakasamataki vakatitobu ka veivosakitaki na taro eso oqo.

ivakatakilakila ni vuli

Vakauqeta na Vuli e Vale

Vukei ira na gone me ra vakasamataka e dua na sala e rawa ni ra vakavulica kina ena nodra matavuvale na veika era sa vulica baleti Jisu Karisito kei na Nona Veisorovaki. Kena ivakaraitaki, e rawa ni ra vakayagataka na tabana ni itaviqaravi ni macawa oqo me ra vakamacalataka na ivakarau e vukei keda kina na iVakabula me da ulabaleta na ivalavala ca kei na mate.

Vakatorocaketaki Noda Veivakavulici

Vakayagataka na tabana ni itaviqaravi. Ni ra cakacaka tiko na gone ena tabana ni itaviqaravi, vakayagataka na gauna mo vukei ira me ra raica na sala e sema kina na itaviqaravi ki na ivakavuvuli kei na sala e yaga kina na ivakavuvuli ki na nodra bula.

tabana ni itaviqaravi: sa vakabulai keda mai na ivalavala ca kei na mate o Jisu Karisito