Kakua ni Yaco na Noqu Lewa, Nomuni Lewa Ga, mai vei Harry Anderson

10–16 ni Feperueri

2 Nifai 6–10

“A Ka Levu Vakaidina na Nona iTuvatuva na Noda Kalou!”

Ni o wilika na 2 Nifai 6–10, vakasamataka vakatitobu na veika e via vakavulica vei iko na Turaga. Ni o raica mai na dina eso oqo, vola toka ka masulaka toka mo kila na cava mo cakava ena veika o sa vulica.

Vola na Veika o Uqeti Kina

E sa sivia e 40 na yabaki mai na gauna e biuti Jerusalemi kina na matavuvale nei Liai. Eratou sa tiko ena dua na vanua vou, ena tai ka dua kei vuravura mai vei Jerusalemi kei ira na nona tamata ni veiyalayalati na Kalou. Sa mai mate o Liai, ka sa tekivutaka yani na nona kawa na veileti ena lako tu ki na drau vakacaca na yabaki ena kedra maliwa na Nifaiti—“sai ira era vakabauta na ivakasala kei na ivakatakila ni Kalou”—kei ira na Lemanaiti, era sega ni vakakina (2 Nifai 5:6). Ena veituvaki oqo, e vinakata o Jekope, na tacina o Nifai ka sa lumuti me ivakavuvuli vei ira na Nifaiti, me ra kila na tamata ni veiyalayalati ni na sega ni guilecavi ira na Kalou, ka sa sega ni dodonu mera guilecavi Koya. Oqo e dua na itukutuku eda gadreva ena noda vuravura vakaoqo, ni sa vakalolovirataki na veiyalayalati ka sega ni ciqomi na ivakatakila. “Me da nanumi koya sara, … ni da sa sega ni muduki tani. … Sa cecere sara na yalayala ni Turaga,” e kaya o koya (2 Nifai 10:20–21). Ena kedra maliwa na yalayala eso oqori, e sega ni dua vei ira e cecere mai na “veisorovaki tawayalani” me ulabaleta rawa kina na mate kei eli (2 Nifai 9:7). “O koya,” e tinia o Jekope, “me reki na lomamudou”! (2 Nifai 10:23).

Vakasama eso ni Vuli iVolanikalou Yadua

2 Nifai 6–8

E sa dauloloma na Turaga vei ira na Nona tamata ka na vakayacora na Nona yalayala.

Me vukei ira na nona tamata me ra kila ni ra kawa talega i Isireli ka rawa ni nuitaka na Kalou kei na Nona yalayala, e cavuta kina o Jekope na parofisai nei Aisea, e vola ena 2 Nifai 6–8. E vakamacalataka o Aisea na veiseyaki i Isireli kei na yalayala ni iVakabula kei na Nona veivueti vei ira na Nona tamata. Ni o wilika, vakasamataka vakatitobu na taro eso oqo:

• Na cava au sa vulica me baleta na nona loloma veivueti na iVakabula me baleti au?

• Na vakacegu cava e solia na iVakabula vei ira era vakasaqarai Koya?

• Na cava e rawa niu cakava meu “waraka” na iVakabula ena yalodina kei na Nona yalayala?

2 Nifai 9:1–26

Ena Nona Veisorovaki, sa sereki ira na tamata kecega o Jisu Karisito mai na mate vakayago, vakayalo talega.

Na vosa cava se yaloyalo cava o na vakayagataka mo vakamacalataka vua e dua tale na noda gagadre me dua na noda Dauveivueti me vakabulai keda mai na mate kei na ivalavala ca? E vakayagataka o Jekope na vosa na “rerevaki” kei na “manumanu.” Na cava e vakavulica o Jekope me baleta na “manumanu ko ya, ko mate kei eli” kei nai “dro[dro]” e vakarautaka vei keda na Kalou? (2 Nifai 9:10). Ni o wilika ena 2 Nifai 9:1–26, nanuma mo rokataka ena dua ga na roka na veika ena yaco vei keda kevaka e sega na Veisorovaki i Jisu Karisito. Ena dua tale na roka, e rawa ni o makataka na veika eda ciqoma mai na Veisorovaki ni Vakabula. Na dina cava soti o kunea me baleta na Veisorovaki i Jisu Karisito ka vakavuna mo vakalagilagia na “nona yalomatua na Kalou na nona loloma cecere kei na nona loloma soli wale”? (2 Nifai 9:8).

Raica na “Veisorovaki i Jisu Karisito,” Ulutaga Vakosipeli, topics.ChurchofJesusChrist.org.

2 Nifai 9:27–54

Sa rawa niu lako mai vei Karisito ka ciqoma na veivakalougatataki lagilagi ni Nona Veisorovaki.

“Sa lako mai ki vuravura me vakabulai ira na tamata kecega kevaka era na vakarorogo ki na domona” ko Jisu Karisito (2 Nifai 9:21; e vakaikuritaki). E dua tale na kena itukutukuni, sa dodonu meda ciqoma na veivakalougatataki ni veivakabulai e solia tiko o Koya. Ni sa vakamacalataka oti na ituvatuva ni veivueti, e solia e dua na ivakaro kei na veisureti bibi o Jekope, e kune ena 2 Nifai 9:27–54, me vukei keda meda ciqoma na veivakalougatataki ni Veisorovaki. Vakasamataka mo vola toka ena dua na ituvatuva vakaoqo:

iVakaro	Veisureti
iVakaro	Veisureti
iVakaro	Veisureti

Na cava e vakauqeti iko kina na Yalo mo cakava ena ivakaro kei na veisureti eso oqo?

2 Nifai 10:20, 23–25

Baleta na solibula nei Jisu Karisito, sa rawa ni “reki” na yaloqu.

E tukutuku ni reki na itukutuku i Jekope. “Au sa vosataka vei kemudou na veika oqo,” e kaya o koya, “mo dou reki kina, ka laveta cake na ulumudou me sega ni mudu” (2 Nifai 9:3). Ni o wilika na 2 Nifai 10:20, 23–25, na cava o raica e solia vei iko na inuinui? Na cava tale o kunea ena 2 Nifai 9–10 ka sa solia vei iko nai nuinui? Na cava o na cakava me rawa ni o nanuma tiko na veika oqo ena gauna o vakila kina ni o sa yalolailai mai?

Raica talega Joni 16:33.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

2 Nifai 8:3–7

Ni o wilika na 2 Nifai 8:3, e rawa ni o vakaraitaka na iyaloyalo ni dua na vanua dravuisiga kei na dua na iteitei. E vukica vakacava na Turaga na noda bula mai na dua na vanua dravuisiga ki na dua na iteitei? Ena tikina 4–7, na cava e vakasalataki keda kina na Turaga meda cakava meda rawa ni ciqoma na reki e vakamacalataki tiko ena tikina 3?

2 Nifai 8:24–25

E rawa ni vaqaqacotaki keda vakacava na vosa veivakauqeti nei Aisea vei ira na tamata i Saioni, ena noda sasaga meda rawa ni tisaipeli yalodina i Jisu Karisito? E tautauvata vakacava na noda duri mai ena veimataka ka vakarautaki keda kei na veika e vinakata meda cakava vakayalo na Kalou?

2 Nifai 9:1–26

Na cava e rawa ni cakava na nomu vuvale mo kila vinaka cake na vakaitamera ni “veisorovaki tawamudu” i Jisu Karisito? (tikina 7). Ena rawa beka ni ra raica se vakasamataka na veika e tawawili rawa—na veico ena dua na rara, na mataninuku e matasawa, se na kalokalo ni lomalagi. E sa tawamudu vakacava na Veisorovaki ni Vakabula? Na veitikina cava ena 2 Nifai 9 e vakatitobutaka na noda vakavinavinaka me baleta na veika sa cakava vei keda noda iVakabula?

2 Nifai 9:27–44

Ena dua beka na siga ena loma ni macawa e rawa ni vakasaqara nomu vuvale na 2 Nifai 9:27–38, ka vakasaqara na ivakaro (e muria mai na “ca”). Evei vei ira oqori e bibi me veitalanoataka na nomu vuvale? Ena dua tale na siga, e rawa ni o vakasaqara na 2 Nifai 9:39–44, ka vakasaqara na veika e sureti ira kina me ra nanuma na nona tamata o Jekope.

2 Nifai 9:28–29, 50–51

Na cava eso na ivakaraitaki ni “nodra viavialevu, kei na nodra malumalumu, kei na nodra lialia na tamata”? (tikina 28). Na cava eda rawa ni cakava me vakabibitaka na veika ni Kalou ka vakalailaitaka na veika vakavuravura?

2 Nifai 9:45

Ena rawa ni marautaka na nomu vuvale na kena caka na pepa era veisemati me vaka na sinucodo ka qai daramaka yadua ka luvata tale. E tautauvata vakacava beka na sinucodo kei na ivalavala ca? E vukei keda vakacava na iVakabula meda kuretaka laivi?

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Noda Veivakavulici

Meda dau tu voleka ka rawarawa ni tarai. “Eso na gauna uasivi ni veivakatavulici e tekivu ena taro se kauwai e yalona e dua na lewe ni [vuvale]. … Vakatakila vei ira ena nomu vosa kei na ivalavala ni o sa tu vakarau mo rogoci ira” (Veivakavulici ena Sala ni iVakabula, 16).

Ena vakabulai ira kece na luvena na iVakabula “kevaka era na vakarorogo ki na domona” (2 Nifai 9:21). E Vakabula na Veimataqali Mate Kecega, mai vei J. Kirk Richards