Atama kei Ivi, maivei Douglas Fryer

3–9 ni Feperueri

2 Nifai 1–5

“Keimami sa Bula ena iValavala ni Bula Marau”

Na ivolanikalou ena rawa ni dolava na katuba ki na ivakatakila vua na tamata yadua. Ni o wilika na 2 Nifai 1-5, o na kunea ni vinakata na Turaga e dua na ka bibi e vinakata oKoya me vakatavulica vei iko.

Vola na Veika o Uqeti Kina

Kevaka o kila ni sa vakarau cava na nomu bula, na cava na iotioti ni tukutuku o vinakata mo wasea kei ira o lomana vakalevu? Ena gauna e vakila kina na parofita o Liai ni sa voleka tiko mai me cava nona bula, e soqoni ira vata mai na luvena me parofisai ka wasea vakadua tale na dina ni kosipeli e dau vakamareqeta tu kei na tamata e dau lomana. E vakatavulica na tu galala, talairawarawa, na Lutu nei Atama kei Ivi, na veivueti mai vei Jisu Karisito, kei na reki. Era sega ni ciqoma kece na luvena na nona iotioti ni vakadinadina, ia o ira era ciqoma—kei ira tale na milioni era wilika ena gauna nikua—era kunea ena nona ivakadinadina na ivakavuvuli ni “bula ena ivalavala ni bula marau” (2 Nifai 5:27).

Vakasama eso ni Vuli iVolanikalou ni Tamata Yadua

2 Nifai 2

Au sa galala meu digia na bula tawamudu.

E kaya o Elder D. Todd Christofferson: “Na Kalou e saga me ra cakacakataka na Luvena me vaka na ivalavala ni digidigi e sa solia vei ira oKoya. … Sa Nona ituvatuva ka lomana talega oya me noda na itavi ni caka vakatulewa deivaki ena noda ituvaki ni bula” (“Galala Vakaoti, Me ra Kitaka Vakaiira,” Ensign se Liaona, Nove. 2014, 16). Ena nona ivakavuvuli me baleta na galala, e dusimaka o Liai eso na tikina bibi e rawa kina na galala ka rawa kina meda na yacova na noda ituvaki vakalou, e oka kina na veika oqo:

1. Na kila me baleta na vinaka kei na ca (2 Nifai 2:5)

2. E dua na lawa e soli ki na kawa tamata (2 Nifai 2:5)

3. Digidigi veisaqasaqa, ka veirawai (2 Nifai 2:11)

4. Na kaukauwa meda cakacaka kina (2 Nifai 2:16)

Ni o wilika na 2 Nifai 2, na cava o vulica mai na veitikina yadua oqo ni galala kei na nodra veisemati vakataki ira? Na cava ena yaco ki na noda galala kevaka e yali e dua se sivia mai na veitikina oqo? Na cava tale o vulica me baleta na galala mai na vosa i Liai?

2 Nifai 2:22–29

Na Lutu kei na Veisorovaki i Jisu Karisito e tiki bibi ni ituvatuva ni Tamada Vakalomalagi.

E vuqa era raica na Lutu nei Atama kei Ivi me dua na ka vakavuleqa. Ia, na ivakavuvuli i Liai me baleta na Lutu e vakaraitaka na cava na vuna e tiki bibi kina ena ituvatuva ni Tamada me baleta na noda torocake tawamudu. Ni o wilika na veitikina oqo, vakaraica na vuna e gadrevi kina me yaco na Lutu me rawa kina vei keda—na luvena na Tamada Vakalomalagi—me da torocake tikoga. E rawa vakacava ni vueti keda mai na Lutu na nona veisorovaki solibula na iVakabula?

Raica talega na Mosese 5:9–12; 6:51–62; “Na Lutu nei Atama kei Ivi,” Ulutaga ni Kosipeli, topics.ChurchofJesusChrist.org

2 Nifai 3:6–24

E lumuti taumada o Josefa Simici me vakalesuya mai na kosipeli.

Na icavacava ni 2 Nifai 3 e tiko kina e dua na parofisai e soli mai vei Josefa e Ijipita me baleta e dua na daurairai ni veigauna e muri ka na tautauvata na yacadrau (raica na tikina e 14–15)—Josefa Simici. E levu sara na ka e vakaraitaka me baleta na nona ilesilesi o Josefa Simici. Na cava e kaya na tikina e 6–24 ni o Josefa Simici, “dua na daurairai digitaki,” ena cakava me vakalougatataki ira na tamata ni Kalou? E sa “yaga vakalevu” vakacava na cakacaka i Josefa Simici vei iko?

E dua na tiki bibi ni ilesilesi i Josefa Simici sai koya na kena kau mai na volavola ni kawa i Josefa, ka tiko ena iVola i Momani. Na cava beka era vakavulica vei keda na wase ni vola oqo me baleta na bibi ni iVola i Momani?

Raica talega na Joseph Smith Translation, Genesis 50:24–38 (ena Bible appendix).

Parofita ni Turaga, mai vei David Lindsley

2 Nifai 4:15–35

Au rawa ni vuki vua na Kalou ena noqu malumalumu.

Sa mai yali wale toka ga na tamai Nifai. Na itavi ni nodra liutaki na nona vuvale sa mai koto vua. E vakila o koya na veitemaki ka vakila na yalolailai baleta na nona ivalavala ca. Kevaka madaga e duidui na veika o sotava mai na kena e sotava o Nifai, ena rawa beka ni o kila eso na nona vakanananu kei na veika e vakila e toka ena 2 Nifai 4:15–35. Na cava e vukei Nifai ena nona dredre eso? Ena rawa ni vukei iko vakacava na veika e vakayacora o Nifai ena veika e bolei kina?

2 Nifai 5

Na marau e kune ena bulataki ni kosipeli.

Na cava na nomu ivakamacala baleta na mamarau? E vola o Nifai ni ra bula na nona tamata ena “ivalavala ni bula marau” (2 Nifai 5:27). E rawa ni o vakaraica na digidigi eso era cakava o Nifai kei ira na nona tamata ka vakavuna na marau—na sala era veitokoni kina kei na nodra matavuvale, na veika era vakamareqeta ena nodra itikotiko, kei na veika tale eso. Na cava o vulica ena rawa ni vukei iko mo tara cake e dua na bula ni mamarau, me vakai ira na tamata i Nifai?

2 Nifai 5:20–21

Na cava na “cudru” qai tau vei ira na Lemanaiti?

Ena gauna nei Nifai e a sa na cudruvi na Leimanaiti ni ra sa “muduki tani mai [na Turaga] iserau… ena vuku ni nodra ivalavala ca”(2 Nifai 5:20–21). Sa kena ibalebale oqo na Yalo ni Turaga ea kautani mai na nodra bula. Ni ra qai ciqoma na Leimanaiti na kosipeli i Jisu Karisito, “na cudru ni Kalou sa sega ni muri ira tale” (Alama 23:18).

E tukuna talega na iVola i Momani ni sa buto mai na kuli ni yagodra na Leimanaiti ni ra sa tawase tani na Nifaiti mai vei ira. Na ituvaki kei na irairai ni ivakatakilakila oqo e sega ni kilaimatata taucoko. Na ivakatakilakila e vakaduiduitaka taumada na Lemanaiti mai vei ira na Nifaiti. E muri, ni rau sa lako curuma ruarua na Nifaiti kei na Leimanaiti na gauna ni caka ca kei na ivalavala dodonu, sa tawayaga na ivakatakilakila me ivakatakilakila vei ira na Leimanaiti ena kedra ituvaki vua na Kalou.

Era vakadeitaka na parofita ena noda gauna ni buto ni kuli e sega ni ivakatakilakila ni rarawa se cudru vakalou. Na Lotu e karona na ivakavuvuli i Nifai ni Turaga “e sega ni bureitaka vua e dua me lako mai ki vua, loaloa kei na vulavula, na bobula kei na itaukei, na tagane kei na yalewa” (2 Nifai 26: 33). A kaya kina o Peresitedi Russell M. Nelson: “na Turaga ea vakamatatataki kina ni nona na ivunau vakamareqeti ni rau tautauvata na madigi vei ira na Luvena. … Na duidui ni itovo, na vosa, na tagane se yalewa, na veimatatamata kei na duikaikai e sa seyavu yani me tawayaga ni ra sa curu na yalodina ki na salatu ni veiyalayalati ka lako mai vua na noda Dauveivueti lomani” (“Vosa nei Peresitedi Nelson ena Marautaki ni Matabete e Vuravura raraba” [1 ni June, 2018], ni itukutuku ni veimatanitu. ChurchofJesusChrist.org).

Raica talega na “Me da Yaco Sara koi Keda Kecega Me da Lomavata ena Vakabauta” (vidio, ChurchofJesusChrist.org).

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

2 Nifai 1:13–25

Na cava e vakatavulica vei keda na veitikina oqo me baleta na nodra gagadre levu duadua na itubutubu bula dodonu vei ira na luvena?

2 Nifai 3:6

Wilika vata na “Seer” ena Bible Dictionary. E daurairai vakacava o Josefa Simici? Na cava na vuna eda sa vakavinavinaka kina ki na cakacaka sa vakayacora oti o Joseph Smith? (raica na 2 Nifai 3:6–24).

2 Nifai 4:20–25

Ni dou wilika vata na 2 Nifai 4:20–25 cegu ni oti na vei tikina yadua, ka sureta na lewenivuvale me ra wasea na nodra sotava se vakila na veika e vakamacalataka o Nifai. Na cava e sa cakava na Kalou ki na noda vuvale?

2 Nifai 5

Na cava eso na sala e sa bulataka tiko kina na nomu vuvale na “bula ena ivalavala ni bula marau”? Ni wilika na nomu vuvale na 2 Nifai 5, ena rawa ni o veitalanoataka na veika era kauwaitaka na Nifaiti: matavuvale (tikina 6), na ivakaro (tikina 10), na ivolanikalou (tikina 12), vuli (tikina 15), valetabu (tikina 16), cakacaka (tikina 17), kei na lesilesi ena Lotu (tikina 26). E dua na sala e rawa ni vakayacori kina oqo sai koya me vakasaqarai eso na iyaya e rawa ni matataka eso na ka qai veitalanoataki na sala eda vakataki ira kina na Nifaiti, ka vakamareqeta na veika tautauvata.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

Vakatorocaketaki Noda Veivakavulici

Dau vakaraica vakavinaka na ka. Kevaka o yadrava na veika e yaco tiko ena nodra bula na luvemu, o na raica na veimadigi vakasakiti ni veivakatavulici. Na vosa era tukuna se taro era taroga na luvemu e rawa ni madigi ni gauna ni veivakatavulici. (Raica na Veivakavulici ena iVakarau ni iVakabula, 6.)

Era sa Yaco mai ki na Vuravura Vou o Liai kei na Nona Tamata, mai vei Clark Kelley Price