Rau biuta na Were ko Iteni o Atama kei Ivi

Atama kei Ivi mai vei Douglas Fryer

3–9 ni Feperueri

2 Nifai 1–5

“Eda Bula ena iVakarau ni Bula Mamarau”

E vakavulici ira na luvena yadua o Liai me vaka na nodra dui gagadre kei na ituvaki. Muria nona ivakaraitaki ni o vakarau mo vakavulici ira na gone ena nomu kalasi.

Vola na Veika o Uqeti Kina

ivakatakilakila ni veiwasei

Sureta na Veiwasei

Ni o sa vakamacalataka oti ni a vakavulici iratou na nona matavuvale o Liai me baleta na galala me da dui digidigi vakataki keda, sureti ira na gone me ra wasea na veika era sa sotava ena nodra digitaka na dodonu. Na cava era vakila ni ra sa cakava oti na digidigi oya? Me ra na nanuma tiko vakacava me ra digitaka na dodonu ena veisiga ni mataka?

ivakatakilakila ni veivakavulici

Vakavulica na iVunau: Gone Sobu

2 Nifai 1:20

Au vakalougatataki niu talairawarawa.

Na ivakavuvuli e vakavuvulitaki ena tikina oqo—na talairawarawa e kauta mai na veivakalougatataki—sa dau tukuni vakavuqa ena iVola i Momani. Vakasamataka na sala e rawa ni o vukei ira kina na gone me ra vakadinadinataka ena nodra bula.

iTaviqaravi e Rawa ni Caka

• Kerei ira na gone me ra vukei iko mo vakamacalataka na vosa ivakaro ka cakava e dua na ituvatuva ni ivakaro. Wilika na 2 Nifai 1:20, ka vakabibitaka ni da na “sautu,” se da vakalougatataki ni da muria na ivakaro. E vakaevei na ivakarau ni yaloda ni da talairawarawa ki na Nona ivakaro?

• Vakaraitaka vei ira na gone na veika e dau veitaqomaki, me vaka na ivava, isala, kei na qaniliga. Solia me ra tovolea. Era taqomaki keda vakacava na veika oqo? Tukuna vei ira ni rawa ni taqomaki keda mai na veika rerevaki vakayalo na ivakaro nei Tamada Vakalomalagi. Wasea e dua na gauna o a taqomaki kina ena nomu muria na ivakaro.

2 Nifai 2:11, 16, 27

E solia vei au na Kalou na galala meu digidigi.

Ena vuku ni nodrau digidigi, erau a biuta kina na were ko Iteni ko Atama kei Ivi. Mo vakavulica vakacava vei ira na gone ni nodrau digidigi o Atama kei Ivi sa rawa kina vei keda me da vakayagataka noda galala me da digitaki Tamada Vakalomalagi nikua?

iTaviqaravi e Rawa ni Caka

• Droinitaka e dua na tamata galala kei na dua na tamata e vesuki tu (e dua beka na tamata e curu tu e valeniveivesu), ka sureti ira na gone me ra dusia na iyaloyalo donu ni o wilika na vosa galala kei na vesuki ena 2 Nifai 2:27. Vakabibitaka na malanivosa “galala mo digidigi,” ka sureti ira na gone yadua me ra tokaruataka.

• Taleva lesu vei ira na gone na kedrau italanoa o Atama kei Ivi (raica na 2 Nifai 2:17–19; raica talega na “Wase 3: Adam and Eve,” Old Testament Stories, 15–18, se na kena vidio ena ChurchofJesusChrist.org) kei na digidigi erau a vakayacora ena Were ko Iteni. Vukei ira na gone me ra tuva eso na digidigi era dau cakava e veisiga. Vakadinadinataka ni o Tamada Vakalomalagi e solia vei keda na galala me da digitaka na vinaka se na ca, ka sureti ira na gone me ra rikarika ka vakasausau me ra marautaka na galala ni digidigi.

• Qitora e dua na qito mo tukuna kina e dua na vosa (me vaka na rarama) me ra qai cavuta na gone na kena veibasai (butobuto). Tokaruataka vakavica na itaviqaravi oqo. Me vukea nodra kila na gone na kena vukea noda digidigi na veibasai ni ka, wilika na imatai ni veimama ni 2 Nifai 2:11 kei na 2 Nifai 2:16. Tukuna vei ira na gone na kena italanoa e dua na gone a temaki me digitaka na cala. Vukei ira na gone me ra vakasamataka se cava na veibasai ni digidigi oya, ka sureti ira me ra matanataka. Vakadinadinataka ni dau vakalougatataki keda na Tamada Vakalomalagi ni da digitaka na dodonu.

• Lagata vata e dua na sere me baleta na digidigi, me vaka na “I’m Trying to Be like Jesus” se “Choose the Right Way” (Children’s Songbook, 78–79, 160–61), ka tarogi ira na gone se cava era vulica mai na sere me baleta na digidigi.

ivakatakilakila ni veivakavulici

Vakavulica na ivunau: Gone Qase Cake

2 Nifai 1:20

Au vakalougatataki niu talairawarawa.

Ni ra vakabauta na gone ni na vakalougatataki ira na Kalou ni ra talairawarawa ki na ivakaro—kevaka mada ga e sega ni yaco totolo mai na veivakalougatataki oya—e rawarawa cake vei ira me ra digidigi donu.

iTaviqaravi e Rawa ni Caka

• Vukei ira na gone me ra railesuva eso na digidigi eratou a cakava o Nifai kei iratou na tacina. Me baleta eso na ivakaraitaki, raica na 1 Nifai 2:11–16; 3:5–7; kei na 18:9–11. Sureti ira me ra wilika vata na 2 Nifai 1:20 ka wasea na vuna era nanuma kina ni na solia na itukutuku oqo vei ira na luvena o Liai.

• Vola na malanivosa eso mai na 2 Nifai 1:20 ena tikitikinipepa, ka veivosakitaka na ibalebale ni malanivosa. Sureti ira na gone me ra tuva vakadodonu na tikinipepa ena kena vakayagataki na tikinivola. Me vakaraitaka na duidui ni sautu kei na muduki tani, vakaraitaka e dua na vunikau bulabula kei na dua na drauna se tabana sa muduki tani mai na vunikau. Na cava na kedrau duidui e dua na draunikau se toka i vuna kei na dua sa muduki tani mai? Eda tautauvata vakacava kei na draunikau se toka i vuna ni da muria na ivakaro ni Kalou? Sureti ira na gone me ra vola ena nodra ivolaniveisiga na ivakarau eso e vakalougatataki ira kina na Kalou ni ra digitaka na dodonu.

2 Nifai 2:22–28

E solia vei au na Kalou na galala meu digidigi.

E vakabulai keda o Jisu Karisito mai na mate vakayago kei na mate vakayalo (na tawasei tani mai vua na Kalou ena vuku ni ivalavala ca) ena nona Veisorovaki kei na Tucake tale. Me rawa ni da laki bula vata tale kei Tamada Vakalomalagi, sa dodonu me da vakayagataka na noda galala me da veivutuni tikoga ka segata me da bula dodonu.

iTaviqaravi e Rawa ni Caka

• Taura cake e dua na iyaloyalo kei Atama kei Ivi (raica na Kato ni iYaloyalo Vakosipeli, naba 4), ka sureti ira na gone me ra wasea na veika era kila me baleta na veika a yaco vei Atama kei Ivi ena were o Iteni. Vukei ira na gone me ra kunea na isaunitaro ena 2 Nifai 2:22–27. Vakamacalataka ni ena vuku ni nodrau digidigi o Atama kei Ivi, eda sa vakalougatataki ena noda lako mai ki vuravura ka vakayagataka noda galala me da cakava na veidigidigi vinaka ka veivutuni ena Veisorovaki i Karisito ni da digidigi cala.

• Vola na vosa ni 2 Nifai 2:27 ena papa. Vukei ira na gone me cavuqaqataki na tikinivola ena kena tokaruataki ka veivukevuke me bokoci na vosa ena veigauna e tokaruataki kina. Vukei ira na gone me ra raitayaloyalotaka se na vakacava tu na bula e sega kina na digidigi. Na cava era vakavinavinakataka kina na galala ni digidigi?

• Sureti ira na gone me ra wasea e dua na gauna era a digidigi vinaka kina. Na cava era vakila ni ra sa cakava oti na digidigi oya? Na cava e rawa ni da cakava me da vukei keda kina me digitaki na dodonu ni da temaki me da cakava e dua na ka cala? Vakasamataka mo lagata e dua na sere me baleta na digidigi, me vaka na “Digitaka na Dodonu” (Sere ni Lotu, naba 142), ka sureti ira na gone me ra wasea na veika era sa vulica mai na sere.

2 Nifai 3:6–24

O Josefa Simici a dua na “daurairai digitaki.”

Ena 2 Nifai 3 a tukuna kina o Liai e dua na parofisai baleta na Parofita o Josefa Simici. E rawa ni o vakayagataka oqo mo vakavulica kina vei ira na gone baleta nona itavi ena itabagauna oqo.

iTaviqaravi e Rawa ni Caka

• Sureti ira na gone me ra vaqara ena 2 Nifai 3:6–24 na ivakadinadina me baleta na parofita e tukuni tiko. Vola ena papa na veika era tukuna mai. Na cava e vakatokai kina o Josefa Simici ni dua na “daurairai digitaki”? Na cava a cakava o Josefa Simici ka “yaga vakalevu sara vei ira [na wekana]”? (tikina 7).

• Lagata e dua na sere baleti Josefa Simici, me vaka na “Dokai Koya” (Sere ni Lotu, naba 27), se sarava e dua na vidio ka vakaraitaka na duidui ni nona itavi, me vaka era kunei ena history.ChurchofJesusChrist.org/article/joseph-smith-video-downloads. Tarogi ira na gone na vuna era vakavinavinakataka kina na Parofita o Josefa Simici.

ivakatakilakila ni vuli

Vakayaloqaqataka na Vuli e Vale

Vakayaloqaqataki ira na gone me ra raica na madig e donumaki ira ena macawa oqo me ra digidigi. Sureti ira me ra vakarau mai ena macawa mai oqo me ra wasea na digidigi era a cakava kei na vua ni nodra digidigi.

Vakatorocaketaki Noda Veivakavulici

E rawa ni ra vakila na gone na veivakayarayarataki ni Yalo. Vakavulica vei ira na gone ni yalo vakacegu, loloma, kei na lomavinaka e tiko vei ira ni ra tukuni se lagati Jisu Karisito kei na Nona kosipeli e sa vakavuna na Yalo Tabu. Na veiyalo oqo sa rawa ni tara cake na nodra ivakadinadina.

tabana ni itaviqaravi: me vakataki rau o Atama kei Ivi, au galala talega meu digidigi