“20–26 ni Janueri . 1 Nifai 11–15: ‘Vakaiyaragi ena Buladodonu kei na Kaukauwa ni Kalou,’” Lako Mai, Mo Muri Au—Baleta na Lalai: iVola i Momani 2020 (2020)
“20–26 ni Janueri . 1 Nifai 11–15,” Lako Mai, Mo Muri Au—Baleta na Lalai: 2020
Kamica Cake mai na Veika sa Kamikamica, mai vei Miguel Angel González Romero
20–26 ni Janueri.
1 Nifai 11–15
“Vakaiyaragi ena Buladodonu kei na Kaukauwa ni Kalou”
Wilika na 1 Nifai 11–15 ka vakasamataki ira tiko na gone o vakavulica, ka vola na veika o uqeti kina.
Vola na Veika o Uqeti Kina
Sureta na Veiwasei
Vakaraitaka e dua na iyaloyalo ni tadra nei Liai ni vunikau ni bula, ka sureti ira na gone me ra wasea na veika era nanuma ena veika era a vulica tiko ena macawa sa oti me baleta na tadra oqo. Tarogi ira kevaka era sa vulica kina e dua na ka vou mai na gauna oya.
Vakavulica na iVunau: Gone Sobu
A talai Jisu Karisito mai ki vuravura na Tamada Vakalomalagi baleta ni lomani au.
A raica ena raivotu o Nifai na bula kei na veiqaravi nei Jisu Karisito. Vakananuma na veika e rawa ni ra vulica na gone ena nomu kalasi me baleta na iVakabula mai na 1 Nifai 11.
iTaviqaravi e Rawa ni Caka
-
Solia vei ira yadua na gone e dua na iyaloyalo ka vakaraitaka e dua na ka mai na nona bula na iVakabula ka a tukuni taumada ena 1 Nifai 11:20, 24, 27, 31, kei na 33 (raica na iVola ni iYaloyalo Vakosipeli, naba 30, 35, 39, 42, 57). Ni o wilika na veitikina oqo, kerei ira na gone me ra taura cake nodra iyaloyalo ni ra rogoca na tikina erau veisotari.
-
Tukuna vei ira na gone me baleta eso na ka a vulica o Nifai ni na cakava o Jisu Karisito ena Nona gauna ni bula (raica na 1 Nifai 11:16–33), ka vakaraitaka vei ira na iyaloyalo ni veika eso oqo (raica, taura mada na, iVola ni iYaloyalo Vakosipeli, naba 41, 46, 47, 49, 56, 57, 58, 59). Wasea na ka sa cakava vei iko na iVakabula. Vakaraitaka na iyaloyalo me vukei ira na gone me ra vakasamataka na sala eso e rawa ni da wasea kina na loloma ni Kalou (raica na iVola ni iYaloyalo Vakosipeli, naba 109, 110, 115).
Na iVola i Momani e vakavuvulitaka na veidina vakamareqeti.
Na cava o vakavinavinakataka kina na iVola i Momani? Vakasamataka na ivakarau mo wasea kina na nomu ivakadinadina ni iVola i Momani vei ira na gone.
iTaviqaravi e Rawa ni Caka
-
Droinitaka e dua na iyaloyalo ena papa, ka sureti ira na gone me ra veisautaka se kauta laivi eso na tiki ni iyaloyalo me rairai duatani kina. Vukei ira me ra kila ni, me vaka na iyaloyalo oqo, eso na ka ena iVolatabu era a veisautaki ka kau laivi ni toso tiko na gauna. Wilika eso na tiki ni 1 Nifai 13:40 ka vakavuvulitaka na ivakarau e vukei keda kina na iVola i Momani (ka vakatoka o Nifai “na ivolatukutuku e muri oqo”) me da kila na “veika rawarawa ka vakamareqeti oqo” ka ra a yali mai na iVolatabu.
-
Vunia wavoki ena rumu na iyaloyalo e matataka na dina vakosipeli ka vakamatatataki tu ena iVola i Momani, me vaka na papitaiso, na sakaramede, kei na tucake tale. Sureti ira na gone me ra raica na iyaloyalo eso oqo. Vakamacalataka ni iVola i Momani sa kauta lesu mai na dina vakosipeli era sa yali tu.
Na vosa ni Kalou e solia vei au na kaukauwa.
Mo vakayagataka beka vakacava na iyaloyalo ni ititoko kaukamea mo vakavulica vei ira na gone me baleta na kaukauwa, veitaqomaki, kei na mana ni vosa ni Kalou?
iTaviqaravi e Rawa ni Caka
-
Vakaraitaka e dua na iyaloyalo ni tadra nei Liai, me vaka na kena ena ituvatuva ni macawa sa oti ena Lako Mai, Mo Muri Au—Baleta na Tamata Yadua kei na Matavuvale. Sureti ira na gone me ra raica na ititoko kaukamea ena iyaloyalo, ka vukei ira me ra kila na ivakarau ena taqomaki keda kina na tautauri ena vosa ni Kalou (raica na 1 Nifai 15:23–24). Solia vei ira na gone e dua na ka e tautauvata kei na ititoko kaukamea me ra taura tu, me vaka e dua na paipo se kau, ni o wilika tiko na tikina 24. Evei eda na kunea kina na vosa ni Kalou? Na cava eda rawa ni cakava me rawa kina ni dua na tiki ni noda bula e veisiga na vosa ni Kalou?
-
Vukei ira na gone me ra vakacavara na tabana ni itaviqaravi ni macawa oqo. Me da na “taura matua” toka vakacava na vosa ni Kalou? (1 Nifai 15:24).
Vakavulica na iVunau: Gone Qase Cake
A talai Jisu Karisito mai ki vuravura na Tamada Vakalomalagi baleta ni lomani au.
A raica o Nifai e dua na raivotu ka vakadinadinataka kina na ituvatuva nei Tamada Vakalomalagi ena vukuda, ka itakele ni raivotu oya o Jisu Karisito.
iTaviqaravi e Rawa ni Caka
-
Sureti ira na gone me ra vakasotara na veitikina ena 1 Nifai 11:16–33 kei na iyaloyalo e vakaraitaka na veika e vakamacalataka na veitikina (me vaka na 1 Nifai 11:20, 24, 27, 29, 31, 33; raica na iVola ni iYaloyalo Vakosipeli, naba 30, 35, 38, 39, 42, 57). Na cava era vulica na gone me baleti Karisito mai na veitikina kei na iyaloyalo?
-
Taroga vei ira na gone na vuna e rui bibi kina vei ira o Jisu Karisito. Lagata e dua na sere baleta na iVakabula, me vaka na “He Sent His Son” (Children’s Songbook, 34–35), ka taroga vei ira na gone se cava e vakavulica na sere oqo baleti Jisu. Sureti ira na gone me ra taura na gauna ena loma ni macawa me ra vakasamataki Jisu Karisito ka wasea nodra vakasama ena kalasi ni macawa mai oqo.
Na iVola i Momani e tu kina na kosipeli i Jisu Karisito.
Na iVola i Momani e vakavuvulitaka na veidina vakamareqeti.
Na cava era kila na gone me baleta na Vukitani? Mo vukei ira vakacava me ra kila na bibi ni iVola i Momani ena vakalesui mai ni dina vakosipeli era a yali ena Vukitani?
iTaviqaravi e Rawa ni Caka
-
Wilika vata na 1 Nifai 13:26–29 ka sureti ira na gone me ra vakaraica na cava ena yaco ni sega tu vei ira na tamata na veidina “rawarawa ka vakamareqeti” ni kosipeli. E vakalesuya mai vakacava na Turaga na dina eso sa yali tu? (raica na tikina e 35–36, 40). Sureti ira na gone me ra wasea nodra ivakadinadina ni veidina era sa vulica mai na iVola i Momani, se wasea na nomu.
-
Vakaraitaka na vidio “The Book of Mormon—a Book from God” (ChurchofJesusChrist.org) me vakaraitaka na ivakarau erau cakacaka vata kina na iVolatabu kei na iVola i Momani me rau vakavulica na dina. Na cava na vuna ena veivuke vakalevu kina ni sivia e dua na ivakadinadina? Vola e dua na maka ena papa, ka vakayacana iVolatabu, ka sureti ira yadua na gone me ra droinitaka e dua na laini dodonu me lako curuma na maka me vakaraitaka na ivakavuvuli ena iVolatabu e rawa ni levu na kena ivakadewa ni tu duadua na iVolatabu. Bokoca na laini, ka droinitaka tale e dua na ikarua ni maka ka vakayacana na iVola i Momani. Sureta e dua na gone me droinitaka e dua na laini dodonu me lako curuma na maka ruarua me vakaraitaka ni dua ga na ivakavakadewa ni kosipeli ni rau vakayagataki vata na iVolatabu kei na iVola i Momani.
-
Vukei ira na gone me ra cavuqaqataka na ikawalu ni yavu ni vakabauta.
Na vosa ni Kalou e solia vei au na kaukauwa meu vorata na veitemaki.
Ena rawa vakacava ni o vukei ira na gone o vakavulica me ra vaqaqacotaka nodra ivakadinadina ni ivolanikalou? Vakananuma na taro oqo ni o wilika tiko na 1 Nifai 15:23–25, ka vakayagataka na itaviqaravi e ra me tokona nomu vakasama.
iTaviqaravi e Rawa ni Caka
-
Kerei ira na gone me ra vakalekataka na tadra ni vunikau ni bula (raica na 1 Nifai 8; 11). Na cava a tarovi ira na tamata ena nodra yacova na vunikau? Na cava qai vukei ira me ra yacova? Sureti ira na gone me ra wilika na 1 Nifai 15:23–25. A vukei ira vakacava na tamata na ititoko kaukamea me ra lako curuma na kabukabu butobuto? Ena vukei keda vakacava na vosa ni Kalou me da vorata na veitemaki kei na butobuto ena gauna oqo?
-
Vakacavara vata kei ira na gone na tabana ni itaviqaravi. Ni ra vakayacora tiko, kerei ira me ra tukuna eso na veitemaki era dau sotava na gone. Me ra na nanuma tiko vakacava me ra tautauri toka ena ititoko kaukamea e veisiga? Lagata na “iToko Kaukamea” (Sere ni Lotu, naba 167) me tiki ni itaviqaravi oqo.
Vakayaloqaqataka na Vuli e Vale
Vakayaloqaqataki ira na gone me ra vakaraitaka vei ira nodra matavuvale na “ititoko kaukamea” era cakava mai na tabana ni itaviqaravi ka wasea na ivakarau e rawa ni ra taura toka kina na itoko kaukamea ena nodra wilika na ivolanikalou.
Vakatorocaketaki Noda Veivakavulici
Vakayagataka na cakacakaniliga me ra vagolei mai kina na vuli voli. Ni o vakavulica vei ira na gone e dua na italanoa ni ivolanikalou, vukei ira me ra raica na sala me ra raitayaloyalotaka kina. E rawa ni o vakayagataka na iyaloyalo, vidio, matakau isulu, isulu, kei na so tale.