“Janueri 13–19. 1 Nifai 8–10: ‘Lako Mai ka Kania na Vuanikau,’” Lako Mai, Mo Muri Au—Baleta na Lalai: iVola i Momani 2020 (2020)
“Janueri 13–19. 1 Nifai 8–10,” Lako Mai, Mo Muri Au—Baleta na Lalai: 2020
Na Tadra nei Liai, mai vei Steven Lloyd Neal
13–19 ni Janueri
1 Nifai 8–10
“Lako Mai ka Kania na Vuanikau”
Me ikuri ni nomu raici iko ena tadra nei Liai, tovolea mo raici ira na gone o vakavulica. E vakayaco-ka vakacava vei ira na tadra oqo?
Vola na Veika o Uqeti Kina
Sureta na Veiwasei
Veitaratara rawa kei na vica na gone ka kerei ira me ra vakasamataka toka e vica na gauna se ivolanikalou e rawa ni ra wasea a vukea nodra vakila na loloma ni Kalou.
Vakavulica na iVunau: Gone Sobu
Na vosa ni Kalou e kauti au vua na Kalou ka vukei au meu vakila Nona loloma.
Ena tadra nei Liai, eda sa sureti me da vakaivotavota ena loloma ni Kalou, ka vakatakarakarataki ena vunikau kei na vuana. O na vukei ira vakacava na gone me ra ciqoma na veisureti oqo?
iTaviqaravi e Rawa ni Caka
-
Sureti ira na gone me ra vukei iko mo tukuna na italanoa ni tadra nei Liai mai na 1 Nifai 8:10–34. Me vukea nodra raitayaloyalotaka na italanoa, e rawa ni o vakaraitaka e dua na iyaloyalo ni tadra nei Liai (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale) se na iyaloyalo ena “Chapter 6: Lehi’s Dream” (Book of Mormon Stories, 18–20, se na kena vidio ena ChurchofJesusChrist.org). Vakadeitaka me ra kila na gone ni ititoko kaukamea e matataka na vosa ni Kalou, eda wilika ena ivolanikalou ka rogoca mai vei ira na parofita bula. Vukei ira me ra kila ni vunikau e matataka na loloma ni Kalou ena vukuda.
-
Kauta mai e dua na dali me matataka na ititoko kaukamea ena tadra nei Liai. Kerei ira na gone me ra taura toka ni o liutaki ira wavoki ena rumu ki na dua na iyaloyalo ni vunikau. Vukei ira me ra kila ni vosa ni Kalou a kauti keda voleka yani Vua, me vaka na dali ka matataka na ititoko kaukamea ka a kauti keda yani ki na vunikau. Me vakaraitaka ni vunikau e matataka na loloma ni Kalou, e rawa ni o vakaraitaka na iyaloyalo ni veika sa solia vei keda na Kalou ka ivakaraitaki ni Nona lomani keda, me vaka na iVakabula, noda matavuvale, kei na vuravura rairai totoka.
-
Kauta mai eso na vuanikau ka kabi toka kina e dua na uto. Solia vei ira na gone e dua na tiki ni vuanikau ko ya me ra tovolea ka tarogi ira me baleta na kedra vuanikau taleitaki. Vakamacalataka ni vuanikau ena tadra nei Liai na vuanikau kamica duadua e se qai bau tovolea, ka vakasinaita na yalona ena reki. Me vaka ga na kena dau vakamarautaki keda na vuanikau kamica, eda na vakila na marau ni da muri Jisu ka laki bula vata tale kei na Tamada Vakalomalagi.
-
Wilika na 1 Nifai 8:12, ka sureti ira na gone me ra vakarogoca matua na veika a vinakata me cakava o Liai ni oti nona tovolea na vuanikau. Me ra veivukevuke na gone me ra vakataki Liai ena nona sureti ira na kena vo me ra mai kania na vuanikau. Na cava eda rawa ni cakava me da sureti ira na tani me ra lako mai ka marautaka vata kei keda na veivakalougatataki ni kosipeli?
Ena vakatakila vei au na Kalou na dina ena kaukauwa ni Yalo Tabu.
Ni oti nona rogoca na tadra nei tamana, sa gadreva sara ko Nifai e dodonu me vakakina vei keda kece—me da gadreva me da dui kila vakataki keda na dina.
iTaviqaravi e Rawa ni Caka
-
Wilika na 1 Nifai 10:19, ka sureti ira na gone me ra laveta na ligadra ni ra rogoca na vosa “tevuka” kei na “Yalo Tabu.” Vukei ira na gone me ra kila na ivolanikalou oqo, ka vakavulica ni na vukei keda na Yalo Tabu me da kila na isau ni noda taro. Me vukea nodra raitayaloyalotaka na gone na ibalebale ni “tevuki” na dina, kauta mai e dua na itutuvi e lobi tu kei na iyaloyalo ni iVakabula e loma, ka kerei ira na gone me ra tevuka.
-
Lagata e dua na sere vata kei ira na gone baleta na vaqarai ni dina, me vaka na “Search, Ponder, and Pray” (Children’s Songbook, 109). Vakaraitaka na iyaloyalo ka vakamacalataka na qaqa ni sere me vukei ira na gone me ra nanuma na ivakarau e vakavulici keda kina na Yalo Tabu.
-
Vakasamataka mo wasea vei ira na gone e dua na gauna a vukei iko kina na Yalo Tabu mo kila ni dina e dua na ka. Tukuna vei ira na gone na sala a vosa kina vei iko na Yalo Tabu.
Vakavulica na ivunau: Gone Qase Cake
Na vosa ni Kalou e kauti au vua na Kalou ka vukei au meu vakila Nona loloma.
Ni ra vulica na gone ena nomu kalasi na tadra nei Liai, vakayaloqaqataki ira me ra vulica na vosa ni Kalou ka wasea na loloma ni Kalou kei ira tale eso.
iTaviqaravi e Rawa ni Caka
-
Ni ra wilika na gone na veitikina digitaki mai na 1 Nifai 8, sureti ira me ra raica na veika matailalai mai na tikina oqo ena dua na iyaloyalo ni tadra nei Liai (me vaka na kena ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Se sureti ira me ra droinitaka na iyaloyalo ena papa me baleta na veika matailalai era wilika. Qai vukei ira na gone me ra kila se cava e matataka na ivakatakarakara eso ena tadra (raica na 1 Nifai 11:21–22; 12:16–18; 15:23–33, 36).
-
Kevaka e rawa, kauta mai e dua na tiki ni kaukamea ki na kalasi ka sureti ira na gone me ra vakamacalataka eso na kena igacagaca kei na veika e rawa ni vakayagataki kina. E tautauvata vakacava kei na ititoko kaukamea na vosa ni Kalou? Evei eda na kunea kina na vosa ni Kalou? Na cava sa rui bibi kina na ititoko kaukamea ena tadra nei Liai?
iVakatakilakilaKania o Liai na vua ni vunikau ni bulaKania o Liai na vua ni vunikau ni bula Vunikau ni Bula, mai vei Marcus Alan Vincent
-
Sureti ira na gone me ra vola ena dua na tiki ni pepa e dua na ka era sotava ni vukei ira na vosa ni Kalou me ra kila na veika me ra cakava se vukei ira me ra voleka cake vei Tamada Vakalomalagi. Ni ra wasea na veika era vola, sureti ira me ra viviga nodra pepa me vaka e dua na ititoko. E rawa sara mada ga ni o kabira vata nodra “ititoko” na gone me matataka na ititoko kaukamea ena tadra nei Liai.
-
Sureti ira eso na gone me ra wilika na 1 Nifai 8:10–12 ka vakamacalataka na ka a raica o Liai. Kerei ira tale eso me ra wilika na 1 Nifai 11:20–23 ka vakamacalataka na ka a raica o Nifai. Na cava e vakaraitaka kina vei Nifai na agilosi na gonelailai ko Jisu me vakavulica vua baleta na loloma ni Kalou? Me vukea na saumi ni taro oqo, wilika vata na Joni 3:16 se lagata vata e dua na sere baleta na iVakabula, me vaka na “He Sent His Son” (Children’s Songbook, 34–35). Tukuna vei ira na gone na ivakarau o vakila kina na nona loloma na Tamada Vakalomalagi kei na Luvena o Jisu Karisito ena nomu bula.
-
Vola ena papa: Na cava eda vulica mai na ivakaraitaki nei Liai? Sureti ira na gone me ra vakasamataka na tadra nei Liai ka vola na kena levu na isaunitaro era rawata. Sureti ira mera wasea ena kalasi na nodra isaunitaro. Qai kerei ira na gone me ra vakasamataka e dua e rawa ni ra wasea vata na reki ni kosipeli.
Ena vakatakila vei au na Kalou na dina ena kaukauwa ni Yalo Tabu.
Kevaka eda kerea vua na Tamada Vakalomalagi ena vakabauta, ena “tevuki vei [keda] na dina ena kaukauwa ni Yalo Tabu” (1 Nifai 10:19). O na vukei ira vakacava na gone o vakavulica me ra kila na dina oqo?
iTaviqaravi e Rawa ni Caka
-
Sureti ira na gone me ra tukuna na sala e rawa ni ra kunea kina na isau ni dua na taro. Vakayaloqaqataki ira na gone me ra wilika na 1 Nifai 10:17–19 kei na 11:1. Na cava beka ena kaya o Nifai kevaka e dua e tarogi koya me laurai vakacava na isau ni dua na taro baleta na kosipeli? E vakavulici keda vakacava na Kalou mai na Yalo Tabu? (raica na VV 8:2).
-
Kerei ira na gone me ra tukuna e dua na gauna a vukei ira kina na Yalo Tabu me ra kila ni dina e dua na ka. Kerei ira me ra vakatayaloyalotaka e dua na itokani e nanuma ni sega ni rawa ni ciqoma na isaunitaro mai na Yalo Tabu. Na cava e rawa ni ra wasea mai na 1 Nifai 10:17–19 kei na 11:1 me vukea na itokani oya?
Vakayaloqaqataka na Vuli e Vale
Vakayaloqaqataki ira na gone me ra vakayagataka na tabana ni itaviqaravi ni macawa oqo me ra wasea vata kei na nodra matavuvale na ka era sa vulica baleta na tadra nei Liai ni vunikau ni bula.
Vakatorocaketaki Noda Veivakavulici
Era dau vuli ena vuqa na sala o ira na gone. Era dau marautaka na gone me ra vuli ena veika vovou ka duidui era sotava. Vakayagataka na itaviqaravi eso ena vukea me ra veitosoyaki, vakayagataka taucoko nodra wakilakila, ka tovolea na veika vovou. (Raica na Veivakavulici ena iVakarau ni iVakabula, 25–26.)