“13-19 ni Janueri. 1 Nifai 8–10: ‘Lako Mai ka Kania Talega na Vuanikau,’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“13–19 ni Janueri. 1 Nifai 8–10,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
Tadra nei Liai, mai vei Steven Lloyd Neal
Janueri 13–19
1 Nifai 8–10
“Lako Mai ka Kania Talega na Vuanikau”
Ni o wilika na 1 Nifai 8–10, vakasamataka na itukutuku cava ena raivotu nei Liai e baleti iko. Vola toka na veivakauqeti vakayalo o ciqoma ena nomu ivolanikalou, dua na ivola ni volavola lailai, se dua tale na vanua e rawa ni maroroi tiko kina.
Vola na Veika o Uqeti Kina
Na tadra nei Liai—kei na kena titoko kaukamea, na kabu ni butobuto, na vale levu ka vakaitamera, kei na vunikau e “kamica duadua” na vuana—e veisureti veivakauqeti meda ciqoma na veivakalougatataki ni loloma kei na veisorovaki ni iVakabula. Kivei Liai, na tadra talega oqo e baleta na nona vuvale: “Ka raica, ena vuku ni veika au a raica, sa dodonu me’u marau kina vua na Turaga ena vukui Nifai kei Semi talega. … Ia raica, Leimani kei Lemueli, au sa ririko vakalevu ena vukumudrau” (1 Nifai 8:3–4). Ni sa oti na nona vakamacalataka o Liai na nona tadra, e vakamasuti Leimani kei Lemueli me “rau muria na nona vosa, de na qai lomani rau kina na Turaga” (1 Nifai 8:37). Kevaka madaga o sa vulica vakavica vata na raivotu nei Liai, gauna oqo vakasamataka mada me vakataki Liai—vakasamataka e dua o daulomana. Ni o kitaka vakakina, na veitaqomaki ni tautauri kaukamea, na rerevaki ni vale levu ka vakaitamera, kei na kamikamica ni vuanikau ena vakavoutaki na kena i balebale. O na qai kila vakavinaka cake vakatitobu na “veikauwaitaki taucoko vakaitubutubu dau loloma” ka ciqoma na tadra vakasakiti oqo.
Vakasama eso ni Vuli iVolanikalou Yadua
Na vosa ni Kalou e liutaki au vua na iVakabula ka vukei au meu vakila na Nona loloma.
Na raivotu nei Liai e solia na veisureti meda vakasamataka vakatitobu na vanua o tiko kina—kei na vanua o lako tiko kina—ena nomu sasaga yadua mo kila na iVakabula ka vakila Nona loloma. E vakatavulica o Peresitedi Boyd K. Packer: “O na nanuma beka ni tadra se raivotu nei Liai e sega ni dua na kena ibalebale bibi vei iko, ia e tiko dina. O tiko kina o iko, eda tiko kece kina (raica na 1 Nifai 19:23). Na tadra kei na raivotu nei Liai me baleta na itautauri kaukaumea e tiko kece kina na veika kece … e gadreva e dua na Yalododonu Edaidai me kila vinaka cake na veitarogi ni bula” (Lehi’s Dream and You,” New Era, Jan. 2015, 2).
E dua na sala me vulici kina na 1 Nifai 8 sai koya me vakaleweni na ilavelave me vaka na kena e vakaraitaki tiko oqo. Meda kila vinaka cake na i balebale ni vakatakilakila, ena veivuke vakalevu cake meda raica talega na raivotu nei Nifai ena gauna e masu kina me kila vakavinaka na tadra nei tamana—raica talega na 1 Nifai 11:4–25, 32–36; 12:16–18; kei na 15:21–33, 36. Ni o vulica tiko na raivotu nei Liai, vakasamataka vakavinaka na veika e vinakata mo vulica na Turaga.
|
Na ivakatakilakila mai na raivotu nei Liai |
Kena i balebale |
Taro me vakasamataki vakatitobu |
|---|---|---|
Na ivakatakilakila mai na raivotu nei Liai Na vunikau kei na vuana (1 Nifai 8:10–12) | Kena i balebale | Taro me vakasamataki vakatitobu Na cava au sa cakava tiko meu sureti ira na tani me ra vakaivotavota ena loloma ni Kalou? |
Na ivakatakilakila mai na raivotu nei Liai Uciwai (1 Nifai 8:13) | Kena i balebale | Taro me vakasamataki vakatitobu |
Na ivakatakilakila mai na raivotu nei Liai Tautauri kaukamea (1 Nifai 8:19–20, 30) | Kena i balebale | Taro me vakasamataki vakatitobu |
Na ivakatakilakila mai na raivotu nei Liai Kabu ni butobuto (1 Nifai 8:23) | Kena i balebale | Taro me vakasamataki vakatitobu |
Na ivakatakilakila mai na raivotu nei Liai Vale levu ka vakaitamera (1 Nifai 8:26–27, 33) | Kena i balebale | Taro me vakasamataki vakatitobu |
Na ivakatakilakila mai na raivotu nei Liai | Kena i balebale | Taro me vakasamataki vakatitobu |
Raica talega na David A. Bednar, “Lehi’s Dream: Holding Fast to the Rod,” Ensign se Liaona, Okot. 2011, 33–37.
E kania o Liai na vuata ni vunikau ni bula Vunikau ni Bula, mai vei Marcus Alan Vincent
Na cava e cakava kina o Nifai e rua na iwasewase ni peleti?
Nai “naki vuku” ni Turaga me bulia e rua na itukutuku e matata sara ni oti e vica vata na drau na yabaki e liu. Ni vakadewataka oti o Josefa Simici na matai ni 116 na draunipepa ni Vola i Momani, e solia na draunipepa oqo vei Matini Erisi, qai vakayalia o koya (raica na VV 10:1–23). Ia nai karua ni wasewase ni peleti i Nifai e tauri talega mai kina na itukutuku ni gauna vata ga oya, ka vakaroti Josefa Simici na Turaga me vakadewataka na peleti oqo ka kua ni vakadewataka tale kena e sa mai yali (raica na VV 10:38–45).
Me ikuri ni veika e tukuni baleta na peleti e sa cavuti ena 1 Nifai 9, raica na “iVakamacala Lekaleka baleta nai Vola i Momani”; 1 Nifai 19:1–5; 2 Nifai 5:29–32; kei na Vosa i Momani 1:3–9.
Era kila me baleta nai lesilesi i Jisu Karisito o ira na parofita ni gauna makawa ka ra vakadinadinataki Koya.
Na itukutuku me baleta na raivotu nei Liai e vakaraitaka e dua na ka me baleta nona vuvale, ia e tiko eso tale na dina tawamudu me vakavulica vei ira na ilesilesi ni Vakabula. Ni o wilika na 1 Nifai 10:2–16, vakasamataka se e cava beka ena vinakata kina na Turaga me kila na matavuvale i Liai—kei keda kece—na dina oqo. Vakasamataka na veika e rawa ni o tukuna vei ira na nomu daulomani ka sureti ira mera vuki yani vua na iVakabula. Ni oti nomu vulica na raivotu i Liai kei na kena ivakavuvuli, na cava o sa, vakataki Nifai kina, ka vakauqeti mo vulica ena “kaukauwa ni Yalo Tabu”? (1 Nifai 10:17).
Ena vakatakila vei au na Kalou na dina kevaka au na vakasaqara vagumatua.
Na cava o cakava ni o sotava e dua na ivakavuvuli ni kosipeli o sega ni kila vinaka? Raica na duidui e tiko ena veika e cakava o Nifai me baleta na raivotu nei Liai (raica na 1 Nifai 10:17–19; 11:1) kei na veika erau cakava o Leimani kei Lemueli (raica na 1 Nifai 15:1–10). Na cava e yaco ena gauna era vakayacora kina na veika oqo, kei na cava na ivatuka ni veika era cakava?
Vakasamataka e dua na gauna o rawa ni vola ena gauna o vinakata kina mo kila kevaka e dina e dua na ivakavuvuli ni kosipeli. E rawa ni vakatauvatani vakacava na iwalewale o vakamuria kei na veika e vakayacora o Nifai?
Raica talega na 1 Nifai 2:11–19; Vunau kei na Veiyalayalati 8:1–3.
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
1 Nifai 8
Ena rawa ni taleitaka nomu matavuvale me ra vakatasuasuataka na raivotu i Liai, se droinitaka e dua na iyaloyalo ka vakayagataka na droini me talanoataka na veika oqori. Se e rawa ni o vakaraitaka na ivakamatailalai nei dau droini me baleta na raivotu nei Liai ka sala vata tiko mai kei na lesoni ka sureta na matavuvale me raica vata na ivolanikalou e vakamacalataka tiko na veika oqo kei na kena i balebale. Na serenilotu “Nai Toko Kaukamea” (Serenilotu, naba 167) e sala vata kei na wase oqo. E rawa talega ni o sarava e dua na vidio e vakaraitaka tiko na raivotu i Liai (raica na vidio ni iVola i Momani ena ChurchofJesusChrist.org se na app ni Gospel Library).
1 Nifai 8:10–16
Ocei beka e rawa nida sureta me toro voleka mai vei Jisu Karisito ka vakila na kamica ni Nona loloma? Na cava eda rawa ni cakava meda “yalovi ira mai”?
1 Nifai 9:5–6
Ena gauna cava beka eda sa vakamuria tu e dua na ivunau ka sega nida kila vakavinaka na kena i naki? Eda vakalougatataki vakacava?
1 Nifai 10:20–22
E tautauvata vakacava na dukadukali vakayago ki na dukadukali vakayalo? Na cava eda rawa ni cakava me rawa nida savasava tikoga vakayalo?
Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
E vakatautauvatataki vakacava na ivolanikalou ki na noda bula? Ni o wilika oti e dua na tikini volanikalou, sureti ira na lewenivuvale me ra wasea na sala ena tikina oya e veiganiti ki na nodra bula. Me vaka beka oqo, ni ra wilika na lewe ni nomu vuvale na 1 Nifai 8:33, e rawa ni ra veitalanoataka na nodra sa sega ni dau kauwaitaka nai “dusidusi ni veivakalialiai.”
Na Vunikau ni Bula, mai vei Avon Oakeson