na peleti koula

30 ni Tiseba–5 ni Janueri

Tabana ni iVakamacala ni iVola i Momani

“E Dua Tale na iVakadinadina kei Jisu Karisito”

Ena rawa ni momona na nomu vulica na iVola i Momani kevaka o tekivu wilika mai na veitabana ni se bera na 1 Nifai. Na cava o sa kila mai ni vaqaqacotaka na nomu ivakadinadina?

Vola na Veika o Uqeti Kina

Ni se bera ni o yacova yani na 1 Nifai wase 1, e sa matata sara ni sega walega ni dua na ivola na iVola i Momani. Na draunipepa e toka kina na ivakamacala taumada e tukuni kina e dua na italanoa ka sega ni vakatale e dua—oka kina na veisiko ni agilosi, na itukutuku makawa ka buluti tu mai ena vica vata na drau na yabaki sa oti ena dua na delana, vakakina na italanoa ni dua na dauteitei e vakadewataka na itukutuku ena kaukauwa ni Kalou. Na iVola i Momani e sega walega ni dua na itukutuku makawa me baleta e dua na kawa tamata qase sara ena veigauna kei Amerika. E tiko kina na “taucoko ni kosipeli tawavakaiyalayala” (ai vakamacala taumada ni Vola i Momani), ka dusimaka na kena vakalesui mai na Kalou vakataki Koya—na kena volai, na kena maroroi, kei na kena sa mai tiko oqo vei keda ena gauna oqo. Ena yabaki oqo, ni o wilika na Vola i Momani, masulaka, ka bulataka na kena ivakavuvuli, o na sureta na kena kaukauwa mana ki na nomu bula, o na vakila mo tukuna, me vakataki iratou na Tolu na iVakadinadina ena nodratou ivakadinadina, “Ka totoka dina e mata[qu].”

ivakatakilakila ni vuli yadua

Vakasama eso ni Vuli iVolanikalou Yadua

Tabana ni iulutaga ni i Vola i Momani

Na iVola i Momani e rawa ni vaqaqacotaka na noqu vakabauti Jisu Karisito.

Na tabana ni ulutaga ni Vola i Momani e sega walega ni vakarautaka e dua na iulutaga. Mai na veika tale eso, e tuva e vica na inaki ni tukutuku tabu oqo. Vakasaqara nai naki eso oqo, ni o sa vulica na iVola i Momani ena yabaki oqo, vola toka na veitikina o vakila e vakavotukanataka nai naki oqo. Me ivakaraitaki, na veitikina cava so e veivuke mo vakabauta ni “sa Karisito ko Jisu, na Kalou Tawamudu”?

iVakamacala Taumada ni iVola i Momani

Na iVola i Momani e “tuva na ituvatuva ni veivakabulai.”

Na ituvatuva ni veivakabulai e tuvatuva ni Tamada Vakalomalagi me vukei ira na Luvena me ra vakacerecerei, me vakataki Koya, ka sotava na reki e vakila o Koya (raica na 2 Nifai 2:25–26). Na Veisorovaki i Jisu Karisito e vakavotukanataka na ituvatuva oqo, kei na ivunau kece, cakacaka vakalotu, veiyalayalati, kei na ivakaro e solia na Kalou ka nakiti me vukea na vakavotukana ni tuvatuva oqo.

Kevaka o via kila vinaka na ituvatuva ni veivakabulai, e sega tale ni dua na ivola e vinaka cake mai na iVola i Momani mo wilika. E tukuna na ituvatuva ni Kalou—ni vakayagataka e vica vata na yaca—e sivia na 20 na gauna. Ena gauna ni nomu vulica tiko na yabaki oqo, vakaraica na veigauna e cavuti tiko kina na ituvatuva ni Kalou se vakaibalebaletaki tiko kina kei na veika e tukuna tiko na iVola i Momani me baleta na ituvatuva oqo.

Oqo eso na itaviqaravi mo rawa ni tekivu kina. Wilika na veitikina eso oqo, ka toqa na yaca eso e vakatokai tiko kina na ituvatuva ni Kalou: 2 Nifai 9:13; 11:5; kei na Alama 12:32–34; 24:14; 41:2; 42:15–16. Na cava era kaya vei iko na yaca eso oqo me baleta na ituvatuva nei Tamada?

“Na iVakadinadina ni Lewe Tolu”; “Na iVakadinadina ni Lewe Walu”

Au rawa ni vakadinadina ni Vola i Momani.

E rawa ni vakadinadinataka vei iko na Yalo Tabu ni dina na iVola i Momani, kevaka madaga o sega ni se raica na peleti koula me vakataki iratou na Lewe Tolu kei na Lewe Walu na ivakadinadina. E vaqaqacotaki iko vakacava na nodratou ivakadinadina? Ena rawa vakacava ni o “solia na [yacamu] ki vuravura, me ivakadinadina” ni veika o kila me baleta na iVola i Momani? (“Na iVakadinadina ni Lewe Walu”).

“Na iVakadinadina ni Parofita ko Josefa Simici”

E dua na cakacaka mana ni tadu mai nai iVola i Momani.

Kevaka e tarogi iko e dua se lako mai vei na iVola i Momani, na cava o na kaya? Ena rawa ni o vakamacalataka beka vakacava na liga ni Turaga ena kena kau mai na iVola i Momani? A vakamacalataka vakacava o Josefa Simici na kena vakarau tadu mai na iVola i Momani?

“Na iVakadinadina ni Parofita ko Josefa Simici”

E vakadewataki beka vakacava na iVola i Momani?

E vakadewataki na iVola i Momani “ena isolisoli kei na kaukauwa ni Kalou.” Eda sega soti ni kila na matailalai ni walewale cakamana eso ni vavakadewa a caka, ia eda kila ni o Josefa Simici e daurairai, ka vukei mai na veika e vakarautaka na Kalou: e rua na vatu mamare ka vakatokai na Urimi kei na Cumimi kei na dua tale na vatu ka vakatokai me vatu daurairai. E raica o Josefa ena vatu eso oqo nai vakadewa vaka-Valagi ni vosa era volai tu ena peleti, ka wilika toka o koya e cake na kena ivakavakadewa ka sa vola sara tiko e dua na dauvolavola. Era vakadinadinataka o ira na dauvolavola yadua nei Josefa ni laurai votu na kaukauwa mana ni Kalou ena cakacaka tabu ni vakavakadewa oqo.

Raica na “Vakadewataki ni Vola i Momani” (Gospeli Topics, topics.ChurchofJesusChrist.org).

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Tabana ni iulutaga ni i Vola i Momani

Ena rawa beka ni tekivuna na nomu matavuvale e dua nai tuvatuva ni veitikina mai na iVola i Momani ka sa tara cake nomu vakabauta “ni sa Karisito ko Jisu” ka dou qai tomana tikoga ena loma ni yabaki. Ena rawa ni gauna vinaka oqo mo dou tauyavutaka e dua na ituvatuva vakamatavuvale ni kena wiliki na iVola i Momani: Ena gauna cava kei na vanua cava dou na soqoni kina mo dou wiliwili? Ena vakaitavi vakacava na lewe ni vuvale yadua? Me baleta eso tale na veivuke, raica na “Vakasama eso me Vakavinakataki Cake kina na Nomu Vuli iVolanikalou Yadua” ena itekivu ni ivurevure oqo.

iVakamacala Taumada ni iVola i Momani

Na vatu-ivakadei e dua na vatu ka momoto tu ena dua na muana ka rabaraba ena dua tale na muana ka dau taura vata na vo ni vatu eso. Me vukea na nomu vuvale me kila vinaka ni “vatu ivakadei ni noda lotu,” na iVola i Momani, ena rawa ni o tara se droinitaka e dua na vucu ka toka e delana na vatu ivakadei. Na cava ena yaco kevaka e kautani mai na vatu ivakadei? Na cava e rawa ni yaco kevaka e sega vei keda na Vola i Momani? Ena rawa nida cakava vakacava me ivatu vakadei ni noda vakabauti Jisu Karisito na iVola i Momani?

E dua na vucu ka caka mai na vatu ka taura matua toka na kena vatu ivakadei

Na iVola i Momani sa vatuivakadei ni noda Lotu.

“Na iVakadinadina ni Lewe Tolu”; “Na iVakadinadina ni Lewe Walu”

Era rawa ni vola nodra ivakadinadina na nomu lewe ni vuvale me baleta na Vola i Momani, sainitaka na yacadra, ka qai vakasamataka na sala ena rawa kina me ra wasea nodra ivakadinadina.

“Na iVakadinadina ni Parofita ko Josefa Simici”

Ena itukutuku nei Josefa Simici, na ivakadinadina cava eda kunea ni a tiki talega ni tadu mai ni iVola i Momani na Kalou?

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

E dua na yalayala vakaparofita. E kaya o Peresitedi Russell M. Nelson, “Au yalataka ena nomuni vakasamataka vakatitobu na veika o vulica, ena tadolavi na katubaleka ni lomalagi, o na ciqoma na isau ni nomu taro kei na idusidusi ena nomu bula” (“Na iVola i Momani: Ena Vakaivei Beka Nomu Bula Kevaka e Sega?” Ensign se Liaona, Nove. 2017, 62–63).

E ciqoma tiko mai vei Moronai na peleti koula o Josefa

Sa Solia na Peleti Koula o Moronai, mai vei Gary L. Kapp