“6–12 ni Janueri. 1 Nifai 1–7: ‘Au Na Lako ka Kitaka,’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“6–12 ni Janueri. 1 Nifai 1–7,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
E Lako Volekata Tiko o Liai na Wasa Damudamu, mai vei Gary Smith
6–12 ni Janueri
1 Nifai 1–7
“Au Na Lako ka Kitaka”
E vola o Nifai na “veika ni Kalou” (1 Nifai 6:3). Ni o vulica na itukutuku i Nifai, raica matua na veika baleta na Kalou o kunea, vakabibi na veivakauqeti ni Yalo.
Vola na Veika o Vakauqeti Kina
Na iVola i Momani e tekivu ena dua na itukutuku me baleta na veidredre dina e sotava na vuvale. E a yaco ena 600 BnK, ia ena so na itukutuku oqo ena rogorogo tautauvata kei na veika era sotava na vuvale ena gauna nikua. Na matavuvale oqo e a bula tiko ena dua na vuravura sa tubu cake tikoga kina na ivalavala ca, ia a yalataka na Turaga kevaka era na muri Koya, ena muataki ira ki na vanua taqomaki. Ena sala oqori a tiko kina na veigauna vinaka kei na ca; era a vakila kina na veivakalougatataki kei na caka mana cecere, ia era a sotava talega e dua na iwase ni veiba kei na veileti. E tu yadua ena ivolanikalou na italanoa balavu me baleta e dua na matavuvale e tovolea tiko me bulataka na kosipeli: e dua na tama e saga dredre tiko me vakauqeta na vakabauta ena nona vuvale, o ira na luvena tagane era se vakatulewa tiko me ra vakabauti koya, e dua na tina ka leqataka tiko na nodra taqomaki na luvena, kei ira na veitacini e yacovi ira tiko na vuvu kei na veileti—kei na so na gauna e ra veivosoti. Vakararaba, e tiko e dua na kaukauwa dina ena kena vakamuri na ivakaraitaki ni vakabauta e vakaraitaka na matavuvale oqo—e dina ni tu nodra malumalumu.
Vakasama eso ni Vuli iVolanikalou Yadua
Na ivolanikalou era sa ka yaga vakalevu sara.
Na imatai ni ono na iwase ni iVola i Momani e tu kina e vuqa na ivola veisemati tabu, tukutuku tabu, kei na vosa ni Turaga. Ni o wilika na 1 Nifai 1–6, na cava o vulica baleta na kena “yaga vakalevu sara” na vosa ni Kalou? (1 Nifai 5:21). Na cava e vakavulica vei iko na veitikina oqo me baleta na ivolanikalou? Na cava o raica e vakauqeti iko mo vakasaqara na ivolanikalou ena yalodina?
Raica talega na “Scriptures Legacy” (vidio, ChurchofJesusChrist.org).
Na iVola i Momani e ivakadinadinataki Jisu Karisito.
E dina sara kina i naki e koto ena tabana eliu—me vakatakila ki na tamata kecega ni sai Jisu na Karisito—e tekivu na iVola i Momani ena raivotu vakasakiti nei Liai me baleta na iVakabula. Na cava o vulica baleti Jisu Karisito mai na veika a raica o Liai? Na cava eso na “vuqa na ka lelevu ka talei” e sa cakava na iVakabula ena nomu bula? (1 Nifai 1:14).
Niu vakasaqara ka nuitaka na Turaga, e rawa ni vakamalumalumutaka na yaloqu o Koya.
E dina ni ratou susu vata mai ena dua na matavuvale o Lemani, Lemueli, kei Nifai ka sotava na veika ni bula, e duidui sara na veika eratou qai cakava me isau ni dusidusi vakalou a ciqoma na tamadratou ena iwase oqo. Ni o wilika na 1 Nifai 2, raica kevaka o rawa ni kila se cava e vakamalumalumutaki kina na yaloi Nifai ka sega o rau na tuakana. Ena rawa ni o vakasamataka talega na veika o na cakava ena vuku ni veidusimaki mai vua na Turaga, ke lako mai vua na Yalo Tabu se Nona parofita. Na gauna cava beka o vakila kina ni vakamalumalumutaka na Turaga na yalomu me rawa ni o ciqoma vakaidina kina na Nona veidusimaki kei na ivakasala?
Ena vakarautaka na Kalou na sala meu vakayacora kina na Nona lewa.
Ena gauna a vakaroti Liai kei na nona vuvale na Turaga me kauta mai na peleti parasa mai vei Lepani, e a sega ni solia o Koya na idusidusi matailalai e na sala me vakayacori kina na ivakaro oqo. E dau dina na ka oqo ki na ivakaro eso se ivakatakila yadua eda ciqoma mai vua na Kalou, ka rawa ni vakavuna meda nanuma ni sa “rui dredre” na veika e gadreva o Koya (1 Nifai 3:5). Na cava e vakauqeti iko me baleta na veika e kaya o Nifai ena vuku ni ivakaro ni Turaga, e kune ena 1 Nifai 3:7, 15–16? E tiko beka edua na ka o vakila ni o uqeti kina mo “lako ka kitaka”?
Ni o vulica na 1 Nifai 1–7, vakasaqara na sala eso a vakarautaka kina na Kalou na sala vei Liai kei na nona matavuvale. E sa vakayacora beka vakacava vei iko o Koya na veika oqo?
Raica talega na Vosa Vakaibalebale 3:5–6; 1 Nifai 17:3; “Talairawarawa,” Ulutaga Vakosipeli, topics.ChurchofJesusChrist.org; na vidio ni iVola i Momani era tiko ena ChurchofJesusChrist.org se na app ni Gosple Library.
Vakananumi ni cakacaka ni Kalou ena rawa ni solia vei au na vakabauta meu talairawarawa ki na Nona ivakaro.
Ena gauna rau dau via vosa kudrukudru kina o Leimani kei Lemueli, e dau tiko voleka o Nifai kei Liai me vakauqeti ka vunauci rau. Ena gauna o via vosa kudrukudru kina, na wiliki ni vosa i Nifai kei Liai ena rawa ni vakarautaka na ivakasala vinaka kei na rai vakayalomatua. Erau tovolea vakacava o Nifai kei Liai me vukea nodrau lewe ni matavuvale me tara cake nodra vakabauta na Kalou? (raica na 1 Nifai 4:1–3; 5:1–8; 7:6–21). Na cava o vulica mai na nodrau ivakaraitaki ka na rawa ni vukei iko ena gauna tale o temaki kina mo vosa kudrukudru se veivorati?
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
1 Nifai 1–7
Ena veiwase kece ni 1 Nifai 1–7, e rawa ni o vakauqeti ira kina na lewe ni vuvale me ra raica na veimaliwai ena matavuvale nei Liai kei Seraia. Na cava eda rawa ni vulica mai na veimaliwai oqo ka rawa ni vukea noda vuvale?
Eratou vakamareqeta o Nifai kei na nona matavuvale na nodra vosa na parofita.
1 Nifai 2:20
Na ivakavuvuli ena 1 Nifai 2:20 e cavuti vakawasoma ena iVola i Momani. E rawa ni bulataka vakacava na veika oqo nomu lewe ni matavuvale ni dou vulica vata na iVola i Momani ena yabaki oqo? Ena rawa ni dou cakava vata e dua na ivolakabi me tuvai kina na yalayala ni Turaga ena tikina oqo ka vakaliliga ena loma ni nomudou vale. Ena rawa talega ni veivakananumi me dau veitalanoataki vakawasoma na veika dou sa raica ni sa vakalougatataka tiko kina na nomu vuvale na Turaga ni dou sa talairawarawa tiko ki na Nona ivakaro. Nanuma mo vola na veika sotavi oqo ena ivolakabi.
1 Nifai 2:11–13; 3:5–7
Ena rawa beka ni vinaka ki na nomu vuvale me kila toka na duidui e tiko ena veika rau kaya o Leimani kei Lemueli ki na ivakaro ni Turaga kei na veika e kaya o Nifai. Na cava eda rawa ni vulica mai na 1 Nifai 2:11–13; 3:5–7 me baleta na vosa kudrukudru? Na veivakalougatataki cava e dau yaco mai nida cakacaka taka na vakabauta?
1 Nifai 3:19–20; 5:10–22; 6
Na veitikina oqo e rawa ni vakauqeta nomu vuvale me maroroya e dua na ivola tukutuku ni veika e yaco kei na veika sotavi bibi ena nomudou bula. Ena rawa beka ni dou tekivutaka nomudou vola vakavuvale, me vakataka na itukutuku nei Nifai kei Liai kei na veika e sotava nodrau vuvale. Na cava beka eso na ka o rawa ni o kata ena nomu itukutuku ni vuvale?
1 Nifai 7:19–21
Na cava e vakauqeti keda me baleta na ivakaraitaki i Nifai ena veitikina oqo? E vakalougatataki vakacava na noda vuvale nida “[vei]vosoti dina sara”?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Vulica na ivolanikalou e veigauna. E dua na ki ni veivakavulici vakaibalebale ena loma ni vuvale sai koya na kena buli e veigauna na madigi ni vuli me baleta na nomu matavuvale. E vakatavulica o Peresitedi Thomas S. Monson, “Na kalasi vakatotolotaki ni vuli e sega soti ni dau yaga me vaka na bulataki kei na wiliki ni ivolanikalou ena vei siga yadua ena noda bula” (“Be Your Best Self,” Ensign se Liaona, Me 2009, 68).
Au Talairawarawa ki na Domo ni Yalo, mai vei Walter Rane