Lako voli na matavuvale i Liai ena vanua dravuisiga

E Lako Volekata Tiko o Liai na Wasa Damudamu, mai vei Gary Smith

6–12 ni Janueri

1 Nifai 1–7

“Au na Lako ka Kitaka”

Ni o wilika na 1 Nifai 1–7, vakasamataka na veitikina, veika e sotavi, na taro, kei na ivurevure tale eso o uqeti mo vakayagataka mo vakavulici ira na gone. Na itaviqaravi ena ituvatuva oqo e rawa ni moici me baleti ira na gone qase cake se o ira na gone sobu.

Vola na Veika o Uqeti Kina

ivakatakilakila ni veiwasei

Sureta na Veiwasei

Eso na gone ena nomu kalasi era sa rogoca oti beka se wilika na veika a sotava na matavuvale i Nifai ena 1 Nifai 1–7. Sureti ira me ra wasea na veika era kila. Kevaka era sega soti ni kila vinaka na gone na veika a sotava o Nifai, solia vei ira na madigi ena mua ni lesoni me ra wasea na veika era sotava.

ivakatakilakila ni veivakavulici

Vakavulica na iVunau: Gone Sobu

1 Nifai 2:16

Au gadreva na noqu ivakadinadina vakataki au.

A yaco me vakabauta o Nifai na vosa i tamana baleta ni a gadreva me kila vakataki koya ka masuta kina na Turaga. Vukei ira na gone me ra vuli mai na nona ivakaraitaki.

iTaviqaravi e Rawa ni Caka

• Kauta mai e dua na kateni ka sogo tu ka toka e loma e dua na iyaloyalo ni iVakabula, ka solia vei ira na gone yadua e dua na gauna me ra kila vakataki ira na cava e tiko e loma ni kateni. Tukuna vei ira na gone ni a vinakata o Nifai me dua Nona ivakadinadina vakataki Koya ni sa vakarota na Turaga me biuti Jerusalemi na nona matavuvale. Kerei ira na gone me ra vakarogoca na veika a cakava o Nifai me rawata kina nona ivakadinadina ena nomu wilika na 1 Nifai 2:16. Vakadinadinataka me vaka ga na noda a dolava na kateni me da kila se cava e tiko e loma, eda na gadreva taucoko me da kerea vua na Kalou me da rawata na noda dui ivakadinadina.

• Kauta mai na iyaloyalo se na iyaya ka matataka na veika era na vaqara na gone na kena ivakadinadina, me vaka na iyaloyalo kei Jisu Karisito, na iVola i Momani, se dua na kena iyaloyalo na parofita bula. Sureti ira na gone me ra digitaka e dua na iyaloyalo se dua na iyaya ka wasea nodra ivakadinadina me baleta na ka oqori ena kalasi.

1 Nifai 2:2–4; 3–4

Ena vukei au na Kalou meu muria Nona ivunau.

E rawa vakacava ni o vakayagataka na itukutuku eso oqo me vukea nodra kila na gone ni dau vukei keda na Kalou me da muria na Nona ivunau, ena gauna sara mada ga e dau dredre kina noda muria?

iTaviqaravi e Rawa ni Caka

• Wilika na 1 Nifai 2:2–4 vei ira na gone, ka vakaraitaka e vica na iyaloyalo ni iyaya eso a rawa ni ratou kauta voli o Liai kei na nona matavuvale ki na lekutu, me vaka na valelaca, itutuvi, kei na dakaititi kei na kena gasau. Kerei ira me ra raitayaloyalotaka na ivakarau ni lomadra kevaka me ra na biuta na nodra vale ka lako ki na lekutu. Na cava sa kerea vei keda na Kalou me da cakava me da talairawarawa kina Vua nikua?

• Vukei ira na gone me ra rokataka ka kotiva na ibulibuli pepa ena tabana ni itaviqaravi ni macawa oqo; qai kerei ira me ra vakayagataka me vakalekalekataki kina na italanoa i Nifai kei iratou na tacina ena nodratou laki kauta mai na peleti parasa (raica na 1 Nifai 3–4). Na sere “Nephi’s Courage” (Children’s Songbook, 120–21) kei na “Wase 4: The Brass Plates” (Book of Mormon Stories, 8–12; raica talega na kena vidio ena ChurchofJesusChrist.org) e rawa ni vukea nomu talanoataka na italanoa.

• Vakayagataka na iyaloyalo 103–15 ena iVola ni iYaloyalo Vakosipeli me vukei ira na gone me ra vakasamataka na veika sa vakarota na Turaga me da cakava. Eda na vakalougatataki vakacava ni da talairawarawa Vua? Vukei ira me ra ukutaka na itokaniyaca me ra dara ka tukuni kina Au na lako ka kitaka na ka sa vakarota na Turaga (1 Nifai 3:7). Tokaruataka vata vakavica na malanivosa.

1 Nifai 3:19–21; 5:19–22

E dua na iyau levu na ivolanikalou.

O rawa ni vukei ira vakacava na gone me ra vakamareqeta na ivolanikalou, se na vosa ni Kalou?

iTaviqaravi e Rawa ni Caka

• Vakaraitaka vei ira na gone e dua na ka (se na iyaloyalo ni dua na ka) e vakamareqeti sara vei iko. Tukuna na ivakarau o dau raica ka qarauna kina. Vakamacalataka ki na matavuvale i Liai sa rui vakamareqeti sara na ivolanikalou, me vaka na iyautalei.

• Sureti ira na gone me ra vukei iko mo tukuna se matanataka na veika eratou a cakava o Nifai kei iratou na tuakana me ratou rawata kina na peleti parasa: eratou a lakova e dua na vanua balavu, solia nodratou koula kei na siliva, ka vuni ena dua na qara me ratou bula. Wilika na 1 Nifai 5:21. Na cava na vuna e sa rui vakamareqeti kina ki na matavuvale i Liai na ivolanikalou? Me da na raica vakacava na ivolanikalou me vaka na iyautalei?

Vulica tiko o Liai na peleti varasa.

Ciqoma na Peleti Varasa o Liai, mai vei Clark Kelley Price

ivakatakilakila ni veivakavulici

Vakavulica na iVunau: Gone Qase

1 Nifai 2:16, 19–20

E rawa ni dua na noqu ivakadinadina vakataki au.

Na cava o vulica mai na ivakaraitaki i Nifai baleta nomu rawata vakataki iko e dua na ivakadinadina? O na rawa ni vukei ira vakacava na gone me vuli mai na ivakaraitaki i Jisu?

iTaviqaravi e Rawa ni Caka

• Kerei ira na gone me ra vakasaqaqara ena 1 Nifai 2:16, 19 me ra kila se a rawata vakacava o Nifai e dua na ivakadinadina ni vosa i tamana. Sureti ira me ra vola na veika a cakava o Nifai ena buloko se na iyaya tale eso qai tara e dua na ka ena iyaya eso oqori me matataka na kena dau vukei keda na veika oqori me da tara e dua na ivakadinadina.

• Tukuna vei ira na gone na ivakarau o rawata kina e dua na nomu ivakadinadina ni kosipeli. Sureti ira me ra wasea na veika vata oqori era sa sotava, ka vakayaloqaqataki ira me ra muria na ivakaraitaki i Nifai me ra tara cake tikoga nodra ivakadinadina. Ena vukei keda vakacava na noda taukena e dua noda ivakadinadina?

1 Nifai 3:1–8

Au rawa ni sauma ena vakabauta na ivunau ni Turaga.

Ni da tara cake na ivakarau ni bula vakataki Nifai ena vukei ira na gone me ra cakava na ka dredre ena gauna e kerei ira kina na Turaga.

iTaviqaravi e Rawa ni Caka

• Wasea vakarua na kalasi. Sureta e dua na ilawalawa me ra wilika na veika erau tukuna o Leimani kei Lemueli vei Liai (raica na 1 Nifai 3:2–5) kei na ilawalawa kadua me wilika na veika e tukuna o Nifai (raica na 1 Nifai 3:2–4, 7). Sureta e dua na gone me vaka ni o koya o Liai ka kerei ira na vo ni gone me vaka ni ra sa lesu tiko ki Jerusalemi me ra kauta mai na peleti varasa. Sureta na ilawalawa yadua me tukuna mai ena nodra vosa me vaka ni o ira na tamata era wilika tiko na veika baleti ira. Na cava eso na ka e vakarota vei keda na Tamada Vakalomalagi me da cakava? Eda na rawa vakacava ni vakataki Nifai?

• Lagata vata e dua na sere baleta na talairawarawa, me vaka na “Nephi’s Courage” se “Keep the Commandments” (Children’s Songbook, 120–21, 146–47), ka kerei ira na gone me ra vakarogoca na malanivosa ka vakavulica na ivakarau me da sotava kina na Turaga.

1 Nifai 3–4

Ena tuberi au na Yalo Tabu niu segata meu cakava na loma ni Turaga.

A muria o Nifai na Yalo, “[ka] a sega ni kila rawa tiko yani na ka [okoya] na cakava” (1 Nifai 4:6). O na vukei ira vakacava na gone o vakavulica me ra vakasaqara na veituberi ni Yalo Tabu?

iTaviqaravi e Rawa ni Caka

• Sureti ira na gone me ra matanataka na italanoa i Nifai kei iratou na tacina ni ratou tovolea tiko me ratou taura na peleti varasa (raica na 1 Nifai 3–4). Sureta e dua na gone me wilika na 1 Nifai 4:6, ka kerei ira na lewe ni kalasi me ra vakarogoca na ka e cakava o Nifai me ratou qaqa kina.

• Wasea vata kei ira na gone eso na ivakaraitaki ni ka ena vinakata na Kalou me ra cakava, me vaka na vakaitokanitaka e dua e vaka me galili voli e koronivuli, vosota e dua na tacina, se tukuna na ka dina ni oti na caka cala. Kerei ira na gone me ra wasea na ivakarau ena vukei ira kina na Yalo Tabu ena veigauna vakaoqori. Eda rawa ni sureta vakacava na Yalo Tabu me vukei keda ni talairawarawa vua na Kalou?

ivakatakilakila ni vuli

Vakauqeta na Vuli e Vale

Sureti ira na gone me ra wasea ki na nodra matavuvale na veika era sotava ena gauna era a vakalougatataki kina ni muria na ivunau. Vakauqeti ira me ra kerea na lewe ni nodra matavuvale me wasea na veika vata vakaoqori.

Vakatorocaketaki Noda Veivakavulici

Vukei ira na gone sobu me ra vuli mai na ivolanikalou. Me vukei ira na gone sobu ni vuli mai na ivolanikalou, vakanamata ki na dua na tikina ena ivolanikalou se dua mada ga na malanivosa bibi. O na rairai sureti ira na gone me ra tucake se laveta na ligadra ni ra rgoca na vosa se malanivosa oya. (Raica na Veivakavulici ena iVakarau ni iVakabula, 21.)

tabana ni itaviqaravi: Sa dau vukei au na Kalou ni muria na Nona ivunau.