30 ni Tiseba–5 ni Janueri

Tabana ni iVakamacala ni iVola i Momani

“E Dua Tale na iVakadinadina kei Jisu Karisito”

Tekivuna nomu vakavakarau ni veivakavulici ena nomu wilika na iVola i Momani tabana ni ulutaga kei na ivakamacala taumada; nodratou ivakadinadina na Lewe Tolu, na Lewe Walu, kei na Parofita o Josefa Simici; kei na “iVakamacala Lekaleka baleta na iVola i Momani.” Vakananuma vakatitobu na ivakarau mo vakauqeti ira kina na gone me ra vuli mai na iVola i Momani.

Vola na Veika o Uqeti Kina

Sureta na Veiwasei

Sureti ira na gone me ra wasea na italanoa era kila mai na iVola i Momani, ena nodra vakayagataka na iyaloyalo 67–86 ena iVola ni iYaloyalo Vakosipeli se so tale na iyaloyalo e tu vei iko.

Vakavulica na iVunau: Gone Sobu

Tabana ni iulutaga ni iVola i Momani

Na iVola i Momani e rawa ni vukei au meu vakabauti Jisu Karisito.

Vukei ira na gone me ra raica ni inaki ni iVola i Momani me vakadinadinataki Jisu Karisito.

iTaviqaravi e Rawa ni Caka

• Taura cake e dua na iVola i Momani, ka dusia na ivakadewa ni, Dua Tale na iVakadinadina kei Jisu Karisito. Me ra veivukevuke na gone ena nodra kaya, “E Dua Tale na iVakadinadina kei Jisu Karisito.” Tukuna vakalekaleka vei ira na gone se sa vakaukauwataka vakacava na iVola i Momani na nomu vakabauti Jisu Karisito.

• Tukuna e dua na italanoa mai na iVola i Momani ka vakavuvulitaka na veika e baleti Jisu Karisito, me vaka na italanoa ni nona parofisaitaki Karisito o Samuela na Leimani (raica na Ilamani 14–16), nona vakalougatataki ira na gone na iVakabula (raica 3 Nifai 17), se nona raici Jisu Karisito na Taci Jereti (raica na Ica 2–3). Na iwase eso mai na Book of Mormon Stories (kei na kena vidio ena ChurchofJesusChrist.org) e rawa ni veivuke. Dusia vei ira na gone na veika eda vulica me baleti Jisu mai na italanoa eso oqo. Tukuna vei ira ni ra na vulica e levu na ka me baleti Jisu Kaisito mai na iVola i Momani ena yabaki oqo.

• Lagata e dua na sere baleta na iVola i Momani, me vaka na “Book of Mormon Stories” (Children’s Songbook, 118). Me lagati vata vakavica na sere, me ra qai veivukevuke tiko na gone ena nodra taura tu e dua na iyaloyalo ni iVakabula ni o lagasere tiko.

iVakamacala Taumada ni iVola i Momani.

Na iVola i Momani sa vatuivakadei ni noda Lotu.

E vakamacalataka o Peresitedi Thomas S. Monson: “Kevaka e dina na [iVola i Momani]—kau vakadinadinataka vakatitobu ni vakakina—io e parofita dina ko Josefa Simici … , Na Lotu i Jisu Karisito ni Yalododonu Edaidai e nona Lotu na Turaga e vuravura, ka sa vakalesui mai na matabete tabu ni Kalou” (“Na Mana ni iVola i Momani,” Ensign se Liaona, Me 2017, 86–87).

iTaviqaravi e Rawa ni Caka

• Wilika vei ira na gone na iyatuvosa eso oqo nei Josefa Simici ena ivakamacala taumada ni iVola i Momani: “Na iVola i Momani na vatuivakadei ni noda lotu.” Vakamacalataka me vaka ga na kena taura vata tu na vo ni vucuvatu na vatuivakadei, na noda ivakadinadina ni iVola i Momani e taura vata tu ka vaqaqacotaka na ivakadinadina ni veika tale eso, me vakataki Josefa Simici kei na kosipeli.

• Sureta na nona itubutubu e dua na gone me wasea na sala a rawata kina o koya e dua na ivakadinadina ni iVola i Momani. Wilika vata kei ira na gone na veisureti ena mua ni ivakamacala taumada ni iVola i Momani, ka vukei ira ena nodra matanataka na veika e rawa ni ra cakava me ra rawata kina nodra dui ivakadinadina.

“Na iVakadinadina ni Parofita ko Josefa Simici”

A soli vei keda na iVola i Momani mai na kaukauwa ni Kalou.

Na ivakadinadina nei Josefa Simici e rawa ni vukea me ra kila na gone nai naki vakalou ni iVola i Momani.

iTaviqaravi e Rawa ni Caka

• Tukuna vakalekaleka vei ira na gone na italanoa ni kena yaco mai na iVola i Momani me vaka e vakamacalataki ena “Na iVakadinadina ni Parofita o Josefa Simici.” Ena rawa tale beka ga ni o vakayagataka na “Wase 1: How We Got the Book of Mormon” (Book of Mormon Stories, 2–4, se na kena vidio ena ChurchofJesusChrist.org). Vukei ira na gone me ra matanataka vakavica na italanoa ni o talanoataka tale.

• Vakaraitaka vei ira na gone e dua na iyaloyalo ni matanivola mai na peleti koula. Vakamacalataka ni a vukei Josefa na Kalou me vakadewataka na veimatanivola oqo ki na vosa e rawa ni da wilika ka kila.

  

  Vakadewataka o Josefa Simici na matanivola e volai tu ena peleti koula.

Vakavulica na iVunau: Gone Qase Cake

Tabana ni iulutaga ni i Vola i Momani

Na iVola i Momani e rawa ni vukei au meu vakabauti Jisu Karisito.

Nanuma tiko na nomu inaki ena nodra vakavulici na gone baleta na iVola i Momani sai koya me tara cake nodra vakabauta na iVakabula.

iTaviqaravi e Rawa ni Caka

• Wasea me ra veisasa na kalasi. Sureta na isa yadua me ra wilika na ikarua ni parakaravu ena tabana ni ulutaga ni iVola i Momani, ka vaqara e dua na ka ena tukuna vei ira na inaki ni iVola i Momani. Qai sureta na isa yadua me ra wasea ena kalasi.

• Vukei ira na gone me ra kunea ena tabana ni ulutaga na malanivosa “me ra vakadinadinataka kina na Jiu kei ira na Matanitu Tani ni o Jisu na Karisito.” Me na vakadinadinataka vakacava vei au na iVola i Momani ni o Jisu na Karisito? Sureti ira me ra wasea e dua na italanoa mai na iVola i Momani ka sa vakadeitaka nodra vakabauti Karisito, se wasea e dua na nomu.

iVakamacala Taumada ni iVola i Momani

Na iVola i Momani sa vatuivakadei ni noda Lotu.

Nodra rawata e dua na ivakadinadina ni iVola i Momani ena vukei ira na gone me ra kila ni Lotu i Jisu Karisito ni Yalododonu Edaidai sai koya na Lotu ni Kalou.

iTaviqaravi e Rawa ni Caka

• Kerei ira na gone me ra vakatayaloyalotaka ni o se bera vakadua ni rogoca na iVola i Momani. Sureti ira me ra cakacaka vata kei na dua na itokani me rau vakasamataka na sala eso e rawa ni rau vakamacalataka kina vei iko na cava oya kei na vanua cava e vu mai kina, ena nodra vakayagataka na veika matailalai eso mai na ivakamacala taumada. Me rau qai veivukevuke na isa yadua me rau vakavulici iko. Na iyaloyalo The Bible and the Book of Mormon Testify of Christ (ChurchofJesusChrist.org) e rawa talega ni vukei iko.

• Sureta e dua na gone me wilika na itukutuku nei Josefa Simici ena ikaono ni parakaravu ni ivakamacala taumada. Ni o vakayagataka na tabana ni itaviqaravi vakamacalataka na ivakarau e taura cake tu kina e dua na vucuvatu e dua na vatuivakadei. Me vaka na iotioti ni parakaravu ni ivakamacala taumada, na cava eso tale na ka eda na kila ena gauna ga eda sa rawata kina e dua na ivakadinadina ni dina na iVola i Momani?

“Nodratou iVakadinadina na Lewe Tolu”; “Nodratou iVakadinadina na Lewe Walu”

E rawa niu dua na ivakadinadina ni iVola i Momani.

E rawa ni o vukei ira vakacava na gone me ra rawata ka wasea nodra ivakadinadina ni iVola i Momani?

iTaviqaravi e Rawa ni Caka

• Sureti ira na gone me ra vakamacalataka e dua na ka era sa raica ka se bera ni dua tale ena kalasi e sa raica. Vakamacalataka ni iVola i Momani e tu kina na nodra ivakadinadina e 11 na tamata sega ni wili kina o Josefa Simici era a raica na peleti koula ka vakadewataki mai kina na iVola i Momani. Wilika vata na ivakadinadina. Na cava na vuna eratou vinakata kina na ivakadinadina bula oqo me ra kila na nodratou ivakadinadina o ira eso tale na tamata?

• Taroga kevaka e dua vei ira na gone e vinakata me wasea na sala e kila kina ni dina na iVola i Momani. Wilika vata na Moronai 10:3–5, ka sureti ira yadua na gone me ra wilika ena yabaki oqo na iVola i Momani ka rawata se vaqaqacotaka nona ivakadinadina ni dina. Tukuna vei ira na gone na ivakarau o rawata kina na nomu ivakadinadina ni iVola i Momani.

Vakayaloqaqataka na Vuli e Vale

Kevaka e rawa, vakadeitaka ni ra sa yadua tiko na gone na iVola i Momani, ka sureti ira me ra tekivu wilika taudua vata kei ira nodra matavuvale.

Vakatorocaketaki Noda Veivakavulici

Vakasaqara na veika e uqeti iko. Mo kua ni raica na ituvatuva oqo ni ra sa idusidusi mo muria ni o veivakavulici, vakayagataka me dua na ivurevure ni vakasama me vakauqeti iko vakaiiko ni o vakananuma titobu na nodra gagadre na gone o vakavulica.