“20-26 ni Janueri. 1 Nifai 11-15: ‘Sa Vakaiyaragi tu ena iValavaladodonu kei na Kaukauwa ni Kalou,’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“20-26 ni Janueri. 1 Nifai 11–15,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
Kamica mai na veika Kamikamica Kecega, mai vei Miguel Angel González Romero
20–26 ni Janueri
1 Nifai 11–15
“Sa Vakaiyaragi tu ena iValavaladodonu kei na Kaukauwa ni Kalou”
E rawa beka ni o raici iko ena 1 Nifai 11–15? Na tikina cava soti e vakamareqeti vakalevu cake vei iko kei na nomu vuvale?
Vola na Veika o Uqeti Kina
Ena gauna e tiko kina na cakacaka vakaitamera me ra cakava na Nona parofita, e dau solia o Koya vua na parofita oya na raivotu vakaitamera me vukei koya me kila vakavinaka cake na inaki ni Kalou vei ira na Luvena. E raica o Mosese e dua na raivotu “e baleta na vuravura oqo, kei ira na lewena, kei na lomalagi talega” (Mosese 1:36). E raica na iApositolo o Joni na veika kece sa yaco oti e vuravura kei na Karua ni Lako tale Mai na iVakabula (raica na ivola ni Ai Vakatakila). E raica na Tamada kei na Luvena o Josefa Simici (raica na Josefa Simici—Ai Tukutuku 1:17–18). E raica na raivotu o Liai ka vakaraitaka na ilakolako e dodonu meda lakova vua na iVakabula kei na Nona loloma.
Me vaka e volai ena 1 Nifai 11–14, e raica o Nifai na veiqaravi ni Vakabula, na veisiga ni mataka ni nona kawa o Liai ena vanua yalataki, kei na icavacava ni cakacaka ni Kalou ena iotioti ni gauna. E veivuke na raivotu ki na kena vakarautaki na cakacaka e tu e matai Nifai, ka na rawa talega ni veivuke ena nomu vakarautaki—ni sa tiko vua na Kalou na cakacaka mo cakava ena Nona matanitu. Ni o sa wili kei ira “na yalododonu ni lotu ni Lami” ka raica o Nifai, “ka ra sa veiseyaki tu e delai vuravura; ka ra sa vakaiyaragi tu ena ivalavala dodonu kei na kaukauwa ni Kalou ena lagilagi cecere” (1 Nifai 14:14).
Vakasama eso ni Vuli iVolanikalou Yadua
E talai Jisu Karisito mai na Kalou me ivakaraitaki ni Nona loloma.
Me vukei Nifai me kila vinaka nai balebale ni vunikau e raica o tamana, e vakaraitaka vua e dua na agilosi “na Luvena na Tamada Tawamudu” (1 Nifai 11:21). E vakavuna me kila mai o Nifai ni matataka na vunikau na loloma ni Kalou. Ia e sega ni cava ekea na raivotu. Ni o wilika tiko ka vakasamataka vakatitobu na 1 Nifai 11, na cava o kunea e vukei iko mo kila vakavinaka na vuna e ivakaraitaki cecere duadua ni loloma ni Kalou o Jisu Karisito?
Meda vulica tale eso na ivakatakilakila ni nona tadra o Liai, raica na 1 Nifai 11:35–36; 12:16–18; kei na 15:21–30.
Raica talega na Joni 3:16.
E vakarautaka na sala na Turaga me baleta na Veivakalesui mai.
E sega ni bula donuya na gauna o Nifai me raica na kena vakavotukanataki na veika e raica ena nona raivotu. Na cava o nanuma kina ni bibi sara me kila o Nifai na veika oqo? Na cava e bibi kina vei iko mo kila na veika oqo? Ena rawa beka ni o taroga na veitaro oqo ena veigauna o wilika kina e dua na ka e raica o Nifai ena nona raivotu.
Oqo eso na ka e raica o Nifai: nodra veigauna ni mataka na nona tamata (raica na wase 12), na vakatawani ni vanua o Amerika kei na veisautaki (raica na wase 13:12–19), na Lutu Tani Levu (raica na wase 13:20–29), kei na Vakalesuimai ni kosipeli (raica na wase 13:32–42).
Na cava na “lotu vakaitamera ka vakasisila” ka raica o Nifai?
E vakamacalataka o Elder Dallin H. Oaks ni “lotu vakaitamera ka vakasisila” e vakamacalataka o Nifai e matataka na “vakasama vakavuli se soqosoqo e veisaqasaqa kei na vakavuvuli ni Kalou. Na ‘veivesu’ e veikau mai kina na ‘lotu’ e saga me kua ni vakaiyalayalataka na veiyasana vakayago vei ira na yalododonu me vaka na veivesuki ni so na vakasama lasutaki” (“Stand as Witnesses of God,” Ensign, Mar. 2015, 32.
Ocei na tamata e raica o Nifai ni “sa lako sobu mai” na Yalo ka cakacaka yaco vua ka “kosova yani na veiwasawasa e vuqa”?
E raica o Nifai ni na vakauqeti Christopher Columbus na Yalo Tabu me lakova yani na ilakolako rogo ki na vanua vaka-Amerika. Ena i ka 14 ni Maji, 1493, e vola o Columbus me baleta na ilakolako oqo: “Na veika cecere ka vakasakiti sa mai yaco oqo e sega ni rawa ni mai rawa ena noqu kaukauwa koi au … ; e sega ni dua na vuku ni vakasama vakatamata e rawa ni liutaka na ilakolako vakaoqo, na Yalo ni Kalou e solia ki na sasaga vakatamata, ni sa rogoca na Kalou na nodra masu na Nona tamata era sa taleitaka na Nona iwalewale ni cakacaka me rawati kina na veika e veivakakurabuitaki ka sega ni rawata vakai koya na tamata” (The Annals of America [Encyclopedia Britannica, Inc., 1976], 1:5).
Na ivolanikalou ni gauna edaidai e vakalesuya mai na “tikina macala vinaka ka talei sara.”
E raica o Nifai ena raivotu ni Vola Tabu—e vakamacalataka o koya ni “sa kedra itukutuku na Jiu”—ka sa “kau tani mai na ivola e vuqa na tikina macala vinaka ka talei” (1 Nifai 13:23, 28). Ia, e raica talega o koya ni vakalesuya mai na Kalou na veika oqo ena “so tale na ivola”—na iVola i Momani kei na so tale na ivolanikalou ni gauna edaidai (raica na 1 Nifai 13:39–40). Na cava eso tale na dina talei e vukei keda meda kila vinaka na iVola i Momani? E sa duidui mai vakacava na nomu bula baleta na vei tikina macala vinaka ka talei e sa vakalesui mai?
Na Vola i Momani e vakalesuya mai na dina vakosipeli era yali na gauna ni Lutu Tani.
Raica talega na “Plain and Precious Truths,” Ensign, Mar. 2008, 68–73; Russell M. Nelson, “Na iVola i Momani : Ena Vakaivei Beka Nomu Bula Kevaka e Sega?” Ensign se Liaona, Nove. 2017, 60–63.
Ena sauma mai na Turaga kevaka au kerekere ena vakabauta kei na yalo malumalumu.
O sa bau vakila ni o sega ni ciqoma tiko na ivakatakila yadua—ni sega ni se vosa tiko vei iko na Kalou? Na ivakasala cava e solia o Nifai vei ira na tacina ena gauna eratou vakila na veika oqo? Ena rawa vakacava ni o bulataka na veika e vakasalataka o Nifai ena nomu bula, ka o na rawa ni vakayagataka vakacava na ivakasala oqo mo vukei ira na tani?
Raica talega na Jekope 4:8; Alama 5:46; 26:21–22.
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
1 Nifai 11–14
Ni sa wilika na nomu vuvale na wase oqo, dau cegu ka taroga na taro vakaoqo: Na cava e raica o Nifai ena nona raivotu ka vakavuna me marau? Na cava e rawa ni vakavuna nona rarawa? Na cava e vuna?
1 Nifai 13:20–42
Me vukei ira na lewe ni vuvale me ra kila vinaka na isau ni veidina e “macala vakavinaka ka talei” ena iVola i Momani, vakatautauvata taka e dua na itukutuku matata ki na dua na itukutuku sega ni matata. Na cava beka na vuna e vinakata kina na Tamada Vakalomalagi me vakatavulici kina vakamatata na Nona dina? Era rawa ni vakadinadinataka eso na lewenivuvale eso na dina “macala vakavinaka ka talei” era sa vulica mai na iVola i Momani.
1 Nifai 14:12–15
Na cava eda sa “vakaiyaragi tu ena ivalavala dodonu kei na kaukauwa ni Kalou” ena gauna eda bula dodonu tiko ki na noda veiyalayalati ni Kalou?
1 Nifai 15:8–11
Na cava eso na veika era sotava na nomu vuvale era rawa ni wasea ena gauna era sa “bau taroga li vua na Turaga”? Na cava eda sa vulica ena ivakaraitaki i Nifai?
Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakayagataka na veivuke ni vuli. Na ivakamacala e ra, na iDusidusi ki na iVolanikalou, kei na veivuke tale eso ni vuli e vakarautaka na rai titobu ki na ivolanikalou. Me ivakaraitaki, na cava e vukei iko mo kila vakavinaka na ivakamacala e ra ena 1 Nifai 14:20–21?
Na raivotu nei Nifai baleti Meri, mai vei James Johnson