2008
Na Dina Rawarawa ka Talei
Maji 2008

Na Dina Rawarawa ka Talei

Eda sa kalougata ni tu na ivolanikalou ni gauna oqo ka vakakina na iVolatabu me vakavulica vei keda ka vakadinadinataki Jisu Karisito. E koto e ra e 25 na dina me baleta na iVakabula vata kei na ivolanikalou e sala vata kei na nodra ivakavuvuli na parofita ni gauna oqo. (Na ivolakabi oqo e sega ni ituvatuva ni ivakavuvuli ena veiulutaga oqo. Me baleta na veika tale eso ena iulutaga eso oqo, raica na “Na Karisito Bula: Na Nodra iVakadinadina na iApositolo,” ena draunipepa 42 ena ivola oqo.)

iVunau

Mai na iVolatabu

Mai na iVolanikalou ni Gauna Oqo kei ira na Parofita

1 Na Tamana, na Luvena, kei na Yalo Tabu eratou tolu na tamata duidui.

“Eratou le tolu eratou tukuni ni ratou tiko mai lomalagi, na Tamana, na Vosa, kei na Yalo Tabu: ia ko iratou na le tolu oqo eratou sa duabau ga” (1 Joni 5:7; raica talega Maciu 3:16–17; Cakacaka 7:55).

“Au sa dau tukuna tikoga ni Kalou e dua na tamata vakataki Koya, ko Jisu Karisito e duatani talega na tamata vakataki Koya, ka vakakina na Yalo Tabu e duatani talega na tamata vakataki Koya ka Yalo: ia ko iratou na le tolu oqo eratou le tolu na tamata vakataki iratou ka duidui ka tolu na Kalou” (Josefa Simici, Na Nodra iVakavuvuli na Peresitedi ni Lotu: Josefa Simici [2007], 41–42).

2 Koi rau na Tamana kei na Luvena e tiko na yagodrau ena lewe kei na sui; na Yalo Tabu e tamata vakayalo ga.

“Tarai au ka raica ni sa sega ni vakalewena se vakasuina na yalo, me vaka dou sa raica vei au” (Luke 24:39; raica talega iVakatekivu 5:1; Joni 14:9; Filipai 3:21).

“Raica sa vakalewena ka vakasuina ko koya na Tamada, io sa vakayago me vaka na tamata; sa vakatalega kina ko koya na Luvena; ia na Yalo Tabu sa sega ni vakalewena se vakasuina; raica sa yalo ga ka vaka na ibulibuli ni tamata. Kevaka me sega ni vakakina, ena sega ni rawa ni mai tiko vei keda na Yalo Tabu” (V&V 130:22; raica talega 3 Nifai 11:13–15).

3 E taucoko sara vakavinaka na nodratou inaki na le tolu Vakalou.

“Tamaqu yalododonu, maroroi ira ena yacamuni, ko ira ko ni a solia mai vei au, me ra duabau ga me vakataki kedaru” (Joni 17:11).

“Erau ka bula duidui, ia erau sa duabau ga ena inaki kei na sasaga. Erau sa duavata ka duabau ga ena kena rawati na ituvatuva vakalou me baleta na nodra vakabulai kei na nodra bula vakacerecerei na luve ni Kalou” (Gordon B. Hinckley, “Na Veika e Tolu Oqo Au sa Vakabauta,” Liaona, Julai 2006, 8; raica talega 3 Nifai 11:27).

4 Na nona cakacaka kei na nona lagilagi na Kalou sai koya me tucake tale mai na mate na tamata kecega ka rawata na bula tawamudu.

“Ia ka sa qai vakaraitaki mai ni sa rairai mai na noda iVakabula ko Jisu Karisito, o koya sa vakaotia na mate ka vakavotuya na bula kei na tawa mate rawa ena itukutuku vinaka” (2 Timoci 1:10; raica talega Joni 3:16–17; 1 Korinica 15:22; Iperiu 9:11–12, 28).

“Raica oqo na inaki kei na lagilagi ni noqu cakacaka me tucake tale mai na mate na tamata kecega ka rawata na bula tawamudu” (Mosese 1:39; raica talega V&V 29:43).

5 Ena ivakatekivu sa tiko vata kei Tamana ko Jisu Karisito ka sa nona Ulumatua.

“Ena ivakatekivu sa bula ko koya na Vosa, ka rau sa tiko vata kei na Kalou ko koya na Vosa, ka sa Kalou ko koya na Vosa.

“Ena ivakatekivu erau sa tiko vata ko koya oqo kei na Kalou” (Joni 1:1–2; raica talega Roma 8:29; Iperiu 1:5–6).

“Au a tiko vata kei Tamaqu mai na ivakatekivu; io sai au na Ulumatua” (V&V 93:21; raica talega 3 Nifai 9:15; Mosese 2:26).

6 Ena vuravura taumada a digitaki Jisu Karisito na Tamada Vakalomalagi me iVakabula.

“[Na Karisito] sa tabaki rawa ni se bera ni tauyavu na vuravura, ia a qai vakaraitaki mai ena gauna ena iotioti ni gauna me baleti kemuni” (1 Pita 1:20; raica talega Ai Vakatakila 13:8).

“A sa kaya vei au na Noqu Gone ni Toko, o koya au sa Daulomana kau sa digitaka mai na ivakatekivu, I Tamaqu me yaco ga na lomamuni, ka me nomuni tikoga na vakarokoroko ka sega ni mudu” (Mosese 4:2; raica talega Ica 3:14).

7 Ena veidusimaki nei Tamana, sa Bulia kina na vuravura ko Jisu.

“Sa cakava na ka kecega ko koya; a sa sega ni dua na ka sa caka me sega ni cakava ko koya” (Joni 1:3; raica talega Aisea 40:28; Kolosa 1:16).

“Raica, koi Au ko Jisu Karisito na Luve ni Kalou. Au sa bulia na lomalagi kei na vuravura kei na veika kecega sa tu kina” (3 Nifai 9:15; raica talega Mosaia 3:8; Mosese 1:33).

8 Ko Jisu Karisito na Jiova ni Veiyalayalati Makawa.

“Sa kaya vei ira ko Jisu, e dina, e dina, au sa kaya vei kemudou, ni sa bera ni sucu ko Eparaama, au sa bula ” (Joni 8:58; raica talega iVakatekivu 22:14; 1 Korinica 10:1–4).

“Eda taukena tu e yaloda e dua na yalayala tudei ka sega ni yavalati rawa me baleta na nona cakacaka vakalotu na Turaga o Jisu Karisito. Sai koya na Jiova cecere ni Veiyalayalati Makawa, na Dauveibuli o koya, ena veidusimaki nei Tamana, sa cakava na ka kecega” (Gordon B. Hinckley, “Na Gauna ni Vakavinavinaka,” Liaona, Tise. 1997, 4; raica talega Eparaama 2:8).

9 Ko Jisu na Le Duabau ga nei Tamana vakayago.

“A sa yaco me tamata ko koya na Vosa, ka tiko vata kei keda, (ia eda sa raica na nona lagilagi, na lagilagi sa vaka na le duabau ga nei Tamana,) sa sinai ena loloma kei na dina” (Joni 1:14; raica talega Joni 3:16).

“Ena lako vakaidina mai ko Jisu Karisito na Luvena e Duabau ga na Tamada, raica sa sinai ena loloma kei na dina. Ia ena lako mai me bokoca na nodra ivalavala ca na kai vuravura, io ko ira sa vakabauta vakaidina na yacana” (Alama 5:48; raica talega Alama 9:26; V&V 93:11).

10 Ko Jisu na ivakaraitaki uasivi duadua ki na kawatamata.

“Niu sa solia e dua na ivakarau vei kemudou mo dou kitaka, mo dou kitaka me vaka kau sa kitaka oti vei kemudou” (Joni 13:15; raica talega 1 Pita 2:21).

“E dua na inaki levu ni noda mai tu oqo me rawa ni da veisau me vaka na kena ituvaki kei na kena irairai o koya a mai bula vakayago ka sega vakadua ni bau dua na kena ca—taucoko na nona vinaka, savasava, ka sega ni duka! A sega ni lako walega mai na Karisito me sorovaka na ivalavala ca ni kai vuravura, ia me biuta e dua na ivakaraitaki vei ira na tamata kecega ka tauyavutaka na ivakatagedegede ni nona vinaka sara na Kalou, me baleta na lawa ni Kalou, ka vakakina me baleta na talairawarawa vua na Tamana” (Joseph F. Smith, Nodra iVakavuvuli na Peresitedi ni Lotu: Joseph F. Smith [1998], 151; raica talega 2 Nifai 31:16; 3 Nifai 18:16).

11 Ni tekivuna na Turaga na Nona veiqaravi vakavuravura, a tauyavutaka o Koya na Nona Lotu.

“Ia sai koya sa solia eso, me ra iapositolo; ka so me ra parofita; ka so me tamata dauvunau voli; ka so me ra ivakatawa ka ivakavuvuli;

“Me ra vakavinakataki kina ko ira sa lotu, me ia na cakacaka ni italatala, me vakatataki cake na ivavakoso nei Karisito” (Efeso 4:11–12; raica talega Maciu 16:18; Luke 6:13).

“Keimami vakabauta na ivakarau a taurivaki tu ena Lotu Taumada, ka ra vakaitavi kina na iapositolo, na parofita, na italatala, na ivakavuvuli, na dauvunau kei na vakailesilesi vakalotu tale eso” (Yavu ni Vakabauta 1:6; raica talega 3 Nifai 12:1).

12 Sa solia na Nona bula na iVakabula me sorovaka kina na ivalavala ca ni kawatamata.

“Oqo na noqu dra ni veiyalayalati vou sa liviraki ena vukudra e lewevuqa, me bokoci na ivalavala ca” (Maciu 26:28; raica talega Aisea 53:5–6; 1 Joni 2:1–2).

“Raica, koi Au, na Kalou, au sa vosota oti na veika oqo, me ra bula kina ko ira era sa veivutuni; …

“Raica koi au na Kalou sa Kaukauwa sara; au sa sautaninini ena mosi ni veivakararawataki koya, au a bunotka na dra ka sa yaluma sara kina na yagoqu kei na yaloqu—ia au a sa kerea me kau tani vei au na bilo ni cudru,—

“Ia me vakarokorokotaki ga ko Tamaqu, raica au a gunuva na bilo ko ya, ka vakacavara na noqu itavi ena vukudra na luve ni tamata” (V&V 19:16, 18–19; raica talega 1 Nifai 11:32–33).

13 O Jisu duadua ga e rawa ni sauma na isau ni noda ivalavala ca.

“A sa sega na bula ena vukuna e dua tani: ni sa sega sara ni dua tale na yaca e rukui lomalagi sa soli ki vei ira na tamata me ra bula rawa kina” (Cakacaka 4:12).

“Sa rawa vua me vakacavara na Nona itavi ni veiqaravi baleta ni o Koya na Luve ni Kalou ka tu Vua na kaukauwa ni Kalou… .

“E sega ni dua na tamata ena bula oqo e tu vua na kaukauwa se rawata me sereki ira na tamata kece tale mai na nodra itutu era sa lakosese ka lutu tani voli kina, e sega talega vakakina ni rawa vua e dua me solia vakataki koya na nona bula ka rawata kina e dua na tucaketale raraba ki na tamata kecega.

“Ko Jisu Karisito duadua ga sa tu vakarau ka lomasoli tu me qarava na ivalavala veivueti ni loloma vakaoqo” (Ezra Taft Benson, “Jisu Kakrisito—Na Noda iVakabula ka Dauveivueti,” Tambuli, Tise. 1990, 5; raica talega Alama 34:8–10).

14 Sa tamusuka ko Jisu na ivesu ni mate.

“Ia ka sa qai tucake tale mai na mate na Karisito, a sa yaco me kedra isevu era sa moce tu” (1 Korinica 15:20; raica talega Joni 14:19; 1 Korinica 15:54).

“Ia, sa dua na mate sa vakatokai na mate vakayago; ia na mate i Karisito ena sereka na ivau ni mate vakayago, ka ra na tucake tale ko ira kecega era sa mate” (Alama 11:42; raica talega Mosaia 16:7–8; Alama 22:14).

15 Ko Jisu na iVakabula ka Dauveivueti kei vuravura.

“Ia eda sa raica ka tukuna tiko ni sa tala na Luvena ko Tamada me ivakabula kei vuravura” (1 Joni 4:14; raica talega Luke 2:11).

“Ia ena lako mai ki vuravura me vakabulai ira na tamata kecega kevaka era na vakabauta na nona vosa; a sa colata ko koya na rarawa ni tamata kecega, io na rarawa ni veika bula kecega, na tagane kei na yalewa kei na gone” (2 Nifai 9:21; raica talega V&V 66:1; Mosese 1:6).

16 Ko Jisu na Mesaia ni Veiyalayalati Vou.

“Sa kaya vei koya na yalewa, au sa kila ni na lako mai na Mesaia, ko koya sa vakatokai na Karisito: ni sa tadu mai ko koya ena tukuna vei keda na ka kecega.

“Sa kaya vua ko Jisu, sai au ga sa qai vosa tiko vei iko” (Joni 4: 25–26; raica talega Luke 4:16–21).

“Ia ena oti mada e ono na drau na yabaki mai na gauna ka biuti Jerusalemi mai kina ko Tamaqu, ena qai vakatubura na Turaga na Kalou vei ira na Jiu e dua na parofita—sai koya na Mesaia na nodra iVakabula na kai vuravura” (1 Nifai 10:4; raica talega 2 Nifai 2:26; Mosese 7:53).

17 Sa veiqaravi na Turaga ena kedra maliwa na Nona “sipi tani tale eso” ena vanua ko Amerika makawa.

“Eso tani tale na sipi era sa sega ni tiko ena bai oqo: sa kilikili meu kauti ira talega mai, a ra na rogoca na domoqu, ena qai duabau na qelenisipi ka duabau na ivakatawa” (Joni 10:16).

“Au sa kaya vakaidina vei kemudou sai kemudou ga au sa kaya kina vakaoqo: Eso tani tale na noqu sipi era sa sega ni tiko ena bai oqo, sa kilikili meu kauti ira talega mai, a ra na rogoca na domoqu; ena qai duabau ga na qele ni sipi ka duabau ga na ivakatawa” (3 Nifai 15:21; raica talega 3 Nifai 19:2–3; 26:13, 15).

18 Ko Jisu ena Vosa ena Vukuda ka noda Dautataro talega vei Tamada.

“Ni sa duabau ga na Kalou ka duabau ga na dauveisorovaki ena maliwa ni Kalou kei ira na tamata, io, na tamata ko Jisu Karisito” (1 Timoci 2:5; raica talega 1 Joni 2:1).

“Mo dou reki ka marau, raica au sa tiko ena kemudou maliwa, meu vakaveivinakatitaki kemudou vei Tamaqu” (V&V 29:5; raica talega 2 Nifai 2:27–28; V&V 45:3–5).

19 Na Turaga sai koya na Rarama kei na Bula kei vuravura.

“Sa qai vosa tale vei ira ko Jisu ka kaya, oi au na rarama kei vuravura: ko koya sa muri ena sega ni lako ena butobuto ena tu vei koya na rarama ni bula” (Joni 8:12; raica talega Same 27:1; Joni 1:9).

“Raica au sa kaya vakaidina vei kemudou koi au na Alifa kei na Omeka, na ivakatekivu kei na ivakataotioti; koi au na vunibula kei na rarama kei vuravura—na rarama sa cilava na butobuto ia na butobuto sa sega ni kunea” (V&V 45:7; raica talega Mosaia 16:9; V&V 12:9).

20 Sa rawa ni vakaukauwataki ira na Nona tamata me vaka na nodra dui malumalumu ko Jisu.

“Ni sa vosota na ka ca ko Koya, ni sa dauveretaki sa qai rawata kina me vukei ira era sa dauveretaki” (Iperiu 2:18; raica talega Aisea 53:5).

“Ena soli koya me mate me sereka kina na ivesu ni mate sa vesuki ira tu na nona tamata; ia sa mai bula vakatamata ko Koya me kila kina na nodra malumalumu na nona tamata, ka vakabulai ira ena nona yalololoma” (Alama 7:12; raica talega V&V 62:1).

21 E rawa ni veisautaka na bula vakatamata na iVakabula.

“Ia kevaka sa tu vata kei Karisito e dua na tamata, sa qai buli vou: sa lako tani na veika makawa, raica, sa yaco me vou na ka kecega” (2 Korinica 5:17; raica talega na 1 Joni 5:4).

“Kakua ni kurabui ni sa dodonu me sucu tale na tamata kecega, io na tagane kei na yalewa, na veimatanitu, veimataqali, duivosavosa, kei na lewe ni veivanua, me ra sucu tale vua na Kalou, ka saumaki mai na nodra ivalavala vakayago kei na ivalavala ca me ra ivalavala dodonu; a sa vakabulai ira na Kalou, ka sa yaco me ra luvena;

“O koya sa yaco kina me ra tamata yalovou; ia kevaka era sa sega ni kitaka oqo, era na sega ni rawata na matanitu ni Kalou” (Mosaia 27:25–26; raica talega Mosaia 5:2, 7; Alama 5:14).

22 Sa vakalesuya tale mai na Turaga na Nona Lotu taumada ena veigauna e muri oqo.

“Ka talai Karisito ko koya, io ko Jisu ka vunautaki e liu vei kemudou:

“Ko koya e dodonu me tiko mada ga mai lomalagi, me yaco mada na gauna ena caka kina me vinaka tale na ka kecega ka vosa kina na Kalou ena gusudra kece na nona parofita yalosavasava, ena gauna makawa” (Cakacaka 3:20–21; raica talega Maciu 17:11).

“Sa soli talega na kaukauwa vei ira sa lesi me ra tura na yavu ni Lotu oqo, io me ra kauta tani mai na vanua butobuto sa tu kina na lotu dina duadua ga e vuravur. Raica oqo na Lotu au sa vakadonuya koi au na Turaga” (V&V 1:30; raica talega V&V 20).

23 Sa liutaka ko Jisu na Nona Lotu mai vei ira na Nona parofita digitaki.

“Dou sa tara cake ena nodra yavu na iapositolo kei ira na parofita, io sai koya ko Jisu Karisito sa kena ivakadei ena tutu ni vale” (Efeso 2:20).

“Na ulu ni Lotu ko Jisu Karisito. Oqo na Nona Lotu. Ia na kena iliuliu e vuravura na noda parofita” (Gordon B. Hinckley, “Sa Muadonu tiko na Lotu,” Ensign, Nove. 1992, 53; raica talega V&V 21:1–5).

24 Ena lesu tale mai ena dua na siga ki vuravura.

“Ko Jisu oqo ko koya sa kau tani cake vei kemudou ki lomalagi,, ena lako tale mai vakakina me vaka ni dou sa raici koya ni sa lako ki lomalagi” (Cakacaka 1:11; raica talega 1 Cesalonaika 4:16; Ai Vakatakila 1:7).

“Ia au na lako sobu mai lomalagi ena kaukauwa vata kei na iukuuku levu vata kei ira na lewei lomalagi; io au na mai tiko vata kei ira na yalododonu e vuravura me dua na udolu na yabaki; ia ko ira sa ivalavala ca era na muduki tani” (V&V 29:11; raica talega V&V 34:6; Mosese 7:62–64).

25 Ena lewai vuravura ena lewa dodonu na Turaga.

“Ni sa lokuca ko Koya na siga, ena lewai vuravura kina ena lewa dodonu,” (Cakacaka 17:31; raica talega Same 9:8; Aisea 11:3–4).

“Ia ko koya yadua sa veivutuni ka papitaisotaki ena yacaqu, ena vakasinaiti ena Yalo Tabu; ia kevaka sa vosota me yacova na ivakataotioti, au na kunea ni sa savasava ko koya ena mata i Tamaqu ena siga au sa tu kina meu lewai ira na kai vuravura” (3 Nifai 27:16; raica talega V&V 19:1–3).