E Bula Tiko o Koya!

Na Nodra iVakadinadina na Parofita ni Gauna Oqo

“Ia me ikuri ni itukutuku kece ka vakadinadinataki kina ko Koya, keirau sa tukuna oqo na kena iotioti me yacova edaidai: Raica sa bula dina tiko ko Koya!” (V&V 76:22).

“E bula tiko o Koya!” E vakadinadinataka vakakina na Parofita ko Josefa Simici me baleta na iVakabula o Jisu Karisito. Ena veivakadeitaki vata oqori, ko ira kece na Peresitedi vakaveitaravi ni Lotu i Jisu Karisito ni Yalododonu Edaidai era sa tokoni me ra parofita, daurairai, ka dauvakatakila—era sa vakadinadinataka kina na dina, na vakalou, na Veisorovaki, kei na Tucaketale ni iVakabula.

Peresitedi Gordon B. Hinckley

“Au kila niu sega ni ulu ni Lotu oqo koi au. E uluna na Turaga ko Jisu Karisito. Na noqu veiqaravi, na noqu itavi taumada, na ka dokai duadua vei au sai koya meu vakadinadinataka na dina, ni bula dina tiko o Koya. Ko Jisu Karisito na Luve ni Kalou, o Koya sa siro sobu mai ki na vuravura ni bula veilecayaki, dredre, kei na mosi oqo, me tara na yalodra na tamata ena veika vinaka, me vakavulica na sala ni bula tawamudu, ka soli Koya me isoro ni nodra ivalavala ca na kawatamata. Sai Koya na nodra ‘Tui na Tui ka nodra Turaga na Turaga, ka na veiliutaki tiko me tawamudu ka tawamudu’ (Handel’s Messiah). … Au vakadinadinataka ni bula tiko o Koya ka tu ena liga imatau i Tamana.”¹

Peresitedi Howard W. Hunter (1907–95)

“Au vakavinavinaka … niu veimaliwai kei na dua na matatamata era vakabauta deivaki tu ni bula tiko na Kalou, ni Karisito ko Jisu, kau vakadinadinataka vei kemuni ni sega ni italanoa buli ni gauna makawa na italanoa ni gonelailai ka a sucu ena vale ni manumanu mai Peceliema, ia ko Jisu, na Luve ni Kalou a sucu mai vei Meri ki na bula oqo; a mai bula ena kedra maliwa na tamata; ni a mate ena kauveilatai ka sa tucaketale; e bula dina tiko nikua; o koya e dua na ka bula vakataki koya ka iVakabula kei vuravura.”²

Peresitedi Ezra Taft Benson (1899–1994)

“Sa dau tarogi ena so na gauna, ‘Era Lotu Vakarisito beka na Momani?’ Eda kacivaka na vakalou i Jisu Karisito. Eda raici Koya ni sa ivurevure ni noda vakabulai. Eda segata me da bulataka na Nona ivakavuvuli, ka da vakanamata ki na gauna ena lesu tale mai kina ki na vuravura oqo me vakatulewa ka veiliutaki ni nodra Tui na Tui ka nodra Turaga na Turaga. Ena nona vosa e dua na parofita ni iVola i Momani, eda kaya kina vei ira na tamata nikua, ‘Sa sega tale ni dua na yaca se na sala se ivakarau sa soli me ra bula rawa kina na luve ni tamata, na yaca duadua ga i Karisito na Turaga Kaukauwa Sara’ (Mosaia 3:17).”³

Peresitedi Spencer W. Kimball (1895–1985)

“Eda biuti (Jisu Karisito) ena dua na itutu ka sega tale ni dua na ilawalawa au kila me biuta kina. Vei keda e sega walega ni Luve ni Kalou ko koya, e Kalou talega ka da vakarorogo vua o keda… .

“Veitalia na levu ni ka eda tukuna me baleti koya, e se lailai ga.

“E sega walega ni Matai, kai Nasareci, se kai Kalili ko koya, ia ko Jisu Karisito, na Kalou ni vura- vura, na Luve ni Kalou, ka bibi duadua, ni noda iVakabula, na noda Dauveivueti… .

“Au vakuria kina na noqu ivakadinadina. Au kila ni ko Jisu Karisito e Luve ni Kalou Bula ka a vakamatei ena kauveilatai me baleta na ivalavala ca ni kai vuravura.

“O Koya na noqu itokani, na noqu iVakabula, noqu Turaga, noqu Kalou.”⁴

Peresitedi Harold B. Lee (1899–1973)

“Ni oti e dua na bogi balavu ni vakasaqaqara kei na veisiga ni vakavakarau vakayalo e tarava, sa yaco meu vakadinadinataka vakaukauwa cake mai na veika e raica na mata, me yacova ni sa rawa meu vakadinadinataka e vu ni yaloqu ka sega kina ni dua na lomalomarua, niu sa kila ena veitiki ni yaloqu yadua ni Karisito ko Jisu, na Luve ni Kalou bula, ni bula tiko o Koya, a mate, tucaketale, ia nikua sa vakatulewa tiko mai lomalagi, ka liutaka na cakacaka ni lotu oqo, ka vakatokai ena Yacana baleta ni vunautaka na Nona ivakavuvuli. Au tukuna na ivakadinadina oqori ena yalomalumalumu ka laiva vei kemuni na noqu ivakadinadina.”⁵

Peresitedi Joseph Fielding Smith (1876–1972)

“E tu vei Karisito na veivakabulai. E yaco mai ena vuku ni veisorovaki bibi ka tawamudu a vakayacora ena nona vakadavea na nona dra. Sai koya na Luve ni Kalou, ka lako mai ki vuravura me mai voli ira na tamata mai na mate vakayago kei na mate vakayalo sa yaco mai ena vuku ni ka eda vakatoka me lutu tani.

“Ena nona vinaka kei na iloloma soli wale ena tucake kina mai na ibulubulu na tamata kecega, me ra lewai me vaka na nodra ivalavala ena bula vakayago oqo… .

“Au kila ni bula tiko o koya, ni veiliutaki tiko mai lomalagi e cake kei na vuravura e ra, ka ni na yaco dina na nona inaki. Sai koya na noda Turaga ka noda Kalou. Me vaka a tukuna o koya vei Josefa Simici: ‘Raica sa Kalou ko koya na Turaga, ka sai koya ga na iVakabula’ (V&V 76:1).”⁶

Peresitedi David O. McKay (1873–1970)

“‘Keitou na kila vakacava na sala?’ a taroga ko Tomasi, ni dabe vata kei iratou na nona itokani iApositolo kei na nodratou Turaga ena teveli ni oti na ivakayakavi ena bogi tawa guilecavi ko ya ka a soli yani kina na Turaga; a vakakina oqo na nona isau ni taro vakalou na Karisito: ‘Koi au na sala, kei na vu ni dina, kei na vu ni bula… .’ (Joni 14:5–6.) Sa vakadina kina! Sai koya na ivurevure ni noda tiko vinaka, na inuinui ni noda bula, sa vakatekivuna na noda vakabulai. Kevaka eda vinakata me da kila na keda isema vua na Kalou, eda na lako vei Jisu Karisito. Kevaka eda vinakata me da kila na dina ni kena tawamate rawa na yalo, sa vakaraitayaloyalotaki tu vei keda ena nona tucaketale na iVakabula… .

“… Sai koya duadua ga na Tamata sa Vinaka sara me mai bula e vuravura; na ivakaraitaki cecere duadua ni bula vakaturaga, e vaka na Kalou na kena ituvaki; e taucoko na nona loloma; na noda Dauveivueti; na noda iVakabula; na Luvena tawacala na Tamada Tawamudu; na Rarama, na Bula, na Sala.”⁷

Peresitedi George Albert Smith (1870–1951)

“Sa mate na iVakabula me rawa vei keda na bula. Sa vakadruka na mate kei na ibulubulu ka sa solia tu vei ira kece era talairawarawa ki na Nona ivakavuvuli na inuinui ki na dua na tucaketale lagilagi.”⁸

“Au sa kunea e lewevuqa e vuravura era sega tu ni kila ni da vakabauta na nona ilesilesi vakalou na Turaga, kau sa vakauqeti meu tukuna ena vica na gauna ni sega tale ni dua na matatamata e vuravura era kila vakavinaka sara na nona ilesilesi vakalou ko Jisu Karisito, ka taucoko na nodra vakabauti koya ni Luve ni Kalou, ka ra kila deivaki tu e vu ni yalodra ni ena gauna oqo sa vakaisalataki ena lagilagi ena liga imatau i Tamana, me vakataki ira na Yalododonu Edaidai.”⁹

Peresitedi Heber J. Grant (1856–1945)

“Kivei ira na lewe ni Lotu e vuravura raraba, kei ira kece era dau taleitaka na veisaututaki e veivanua kecega, keimami kaya, raici koya na Kai Kalili oqo e sega walega ni dua na iVakavuvuli cecere, e sega ni dua na iLiuliu vinaka, ia na Tui ni Sautu, o koya sa Vakatekivuna na Veivakabulai, eke ena gauna oqo, sai koya dina sara na iVakabula kei Vuravura!

“… Ko Jisu na Dauveivueti kei vuravura, na iVakabula ni kawatamata, sa lako mai ki vuravura ena dua na ilesilesi vakalou me mai mate me sereki kina na kawatamata. Ko Jisu Karisito na Luvena dina na Kalou, na Le Duabau ga ena yago. Sai koya na noda Dauveivueti, eda dau qaravi koya.”¹⁰

Peresitedi Joseph F. Smith (1838–1918)

“Sa vosa vei au na Yalona Tabu na Kalou—e sega ena daligaqu, e sega talega e mataqu, ia ki na yaloqu, ki na tikiqu bula ka tawamudu,—ka sa vakatakila vei au ni Karisito ko Jisu, na Luvena na Kalou bula. Au vakadinadinataka vei kemuni niu kila ni bula tiko na noqu Dauveivueti. Me kena ikuri, au kila niu na raici Koya e vuravura oqo, niu na raici Koya ena kena ituvaki oqo… . Sa vakatakila vei au oqo na Turaga. Sa vakasinaita na yaloqu kece sara ena ivakadinadina oqo, me yacova ni sa sega tale ni dua na vanua ni vakatitiqa.”¹¹

Peresitedi Lorenzo Snow (1814–1901)

“O koya na Tamata ko ya sa tiko mai Lomalagi, ka veiliutaki tu kina ni se bera ni buli na vuravura, o koya ka a bulia na vuravura, kei koya, ena ituvaki ni gauna, sa lako sobu mai me vakataucokotaka ka vakabula na veika a bulia ko Koya, sa rairai mai vua na tamata ena itabagauna oqo.”¹²

“Keimami sa vakadinadinataka ki vuravura taucoko ni keimami kila, ena ivakatakila vakalou, io ena veivakatakilai ni Yalo Tabu, ni Karisito ko Jisu, na Luvena na Kalou Bula, ka ni a vakatakilai koya vei Josefa Simici me vaka na nona a vakatakilai koya vei ira na nona iapositolo ni gauna makawa, ni sa tucake tale mai na ibulubulu, ka ni a vakatakila talega vua na veidina eso vakalomalagi, na sala duadua ga ena rawata kina na tamata na bula.”¹³

Peresitedi Wilford Woodruff (1807–98)

“Na inaki ni nona itavi e vuravura na Karisito o ya me mai sorovaki koya me sereka na kawatamata mai na mate tawamudu… . E veiqaravi ena nona talairawarawa ki na lomai Tamana ena veika kece sara mai na ivakatekivu, ka gunuva na bilo wiwi ka soli vua. Oqori sa vakatakilai kina, na lagilagi, na vakarokoroko, na tawamate rawa, kei na bula tawamudu, ena loloma uasivi ko ya ka cecere cake mai na vakabauta se na inuinui, ni sa mai vakayacora oqori ena vukuna na tamata o koya na Lami ni Kalou na ka ena sega ni cakava rawa na [tamata] me baleti koya… .

“E sega tale ni dua na tamata e tu vua na kaukauwa me vakabula na yalo ni tamata ka solia vua na bula tawamudu, vakavo ga na Turaga ko Jisu Karisito, ena nona ivakaro na Tamana.”¹⁴

Peresitedi John Taylor (1808–87)

“Sa lumuti, vakaidina, ena waiwai ni reki sa levu ka lailai na nodra na Nomuni itokani, sa veisaqasaqa vata ka vakamalumalumutaka na nodra kaukauwa na tamata kei na tevoro ni vuravura kei eli; ka vukei koya na kaukauwa cecere ni Letolu Vakalou, sa vakamalumalumutaka na mate, eli kei na ibulubulu, ka tucake mai ena qaqa ni Luve ni Kalou, na Tama ni tawamudu, na Mesaia, na Tui ni Sautu, na Dauveivueti, na iVakabula kei vuravura; ni sa vakaotia ka vakacavara na cakacaka ni veisorovaki, sa solia Vua na Tamana me cakava me vaka ni Luve ni Kalou ka Luve ni tamata.”¹⁵

Peresitedi Brigham Young (1801–77)

“Au vakadinadinataka ni ko Jisu na Karisito, na iVakabula ka Dauveivueti kei vuravura; au sa talairawarawa ki na nona vosa, ka vakila na nona yalayala, kei na kila ka e tu vei au me baleti koya, na vuku e sega ni solia rawa na vuravura oqo, e sega talega vakakina ni kauta tani rawa… .

“Na noda Turaga ko Jisu Karisito—na iVakabula, o koya sa vueta na vuravura kei na veika kece sara e tu kina, sai koya na Le Duabau ga nei Tamana ena yagona… . Sa tovolea na mate ena vukudra na tamata kecega, ka sa sauma na dinau sa takavi keda mai ena vukudrau na noda itubutubu taumada.”¹⁶

Na Parofita ko Josefa Simici (1805–44)

“Raica oqo ga na itukutuku vinaka, io na itukutuku taleitaki sa tukuna vei keirau na domo mai lomalagi —

“Raica a lako mai ki vuravura ko Koya; io ko Jisu me mai vakoti ki na kauveilatai ena vukudra na kai vuravura, raica sa colata na nodra ivalavala ca na kai vuravura, ka vakasavasavataka mai na veika dukadukali kecega;

“Raica era na vakabulai ena vukuna ko ira kecega, me vaka na kaukauwa kei na lewa sa solia vua ko Tamana” (V&V 76:40–42).