Na Ligana Veivakabulai na iVakabula
Ena dua na vulaikatakata niu tubu cake tiko e Arkansas, eratou a sureti au na noqu itokani keimami tiko veivolekati me keimami laki keba, siwa, ka sisili ena dua na ivakaso ni wai levu volekati Sardis, e Mississippi. Keitou a tiko voli kina ena vica na siga ka marau ena veicakacaka eso e tautuba.
Ena iotioti ni siga keitou a sili tiko ena iotioti ni gauna ni bera ni keitou gole ki vale. Ni keitou a veipasitaka tiko e dua na polo kei iratou na noqu itokani, a mani vuka sivita na uluqu na polo ka laki tau ena vica na fiti mai vei au. Sa qai tekivu me liwava na cagi ka kauta tani yani mai vei au. Sa tekivu meu qalova yani, ia sa qai tosoya tani tikoga mai vei au na cagi. Ena dua na gauna lekaleka au sa yacova yani na ivakatakilakila ka wasea tani na vanua vodea ni sisili. Sa liwava tani yani na polo na cagi ki na vanua titobu ni ivakaso ni wai.
Niu yacova yani na ivakatakilakila, au sega ni vakasamataka meu qalo siviti ira sara. E sega soti ni yawa sara mai vei au na polo, au kila ni rawa niu tara yani. Au sa cakava oti e dua na vuli ni veivueti kau daramaka voli na ivakatakilakila ni vuli o ya ena noqu isulu ni sisili. Au dau logaloga vinaka e wai kau kila ni tu vei au na kaukauwa meu kauta lesu mai na polo.
Ia sa qai biliga tani tikoga yani mai vei au na cagi. Ena so na gauna au sa dau volekata sara yani ka sa rawa niu tara ena samosamo ni noqu iqaqalo, ia e qai dau toso tani tale yani. Sa qai mai biliga tani sara mai vei au e dua na bati ni cagi.
Au sega tiko ni kila na yawa ni vanua au sa qalova me yacova na gauna au tu kina vakadua meu cegu. E butobuto vakalevu cake sara ka batabata talega na wai mai na vanua vovodea ni sisili. Niu rai yani ki vanua, au qai kila niu sa tu sara ga ena lomadonu ni ivakaso. Au sa nanuma meu laiva yani na polo ka lesu ki vanua. Au sa oca sara vakalevu ka malumalumu talega, ia au sega ga ni lomaleqa. Au se gone kau vakila ni na sega ni dua na leqa.
Ia niu tovolea meu lesu ki vanua, sa vorati au na cagi vata ga ka a vukea na polo me ciri yani. E vaka me sega ni yaga na noqu sasaga kaukauwa tiko meu qalo yani, au toso sara tiko vakamalua. Sa tekivu me katakata mai ka mosi na ligaqu kei na yavaqu. Sa tekivu meu qalo vakoli ka vakaciriciri voli, me rawa ni lesu tale mai na noqu icegu.
Au qai rogoca e dua na rorogo au kila—na rorogo ni idini ni boto. Au marau ka vakacegu ena noqu raica e dua na turaga ena dua na boto lailai ni kabi yani ka vakavodoki au ki vanua. Sa oca sara ga vakalevu na ligaqu kei na yavaqu. Au sa sega mada ga ni rawa ni vakavodoki au rawa ki loma ni boto, au sa mani biuta ga yani ki loma e dua na ligaqu ka lili toka, qai tui au yani ki vanua na turaga oqo. Au taura e dua na ivakatakilakila, laiva na boto, yalovaka na noqu vakavinavinaka, ka qalo yani ki vanua.
Ni oti e tinikalima na yabaki au baci sota kaya tale e dua na leqa. Au a qalo voli ena dua na ivakaso ni ivalavala ca ena dua na gauna balavu. Na noqu vakasaga voli eso na sasaga vakavuravura ka sega na betena au sa laki tu kina ena vanua titobu sara. Sa oti na noqu kaukauwa, ka sa yali na inuinui. Au sega tikoga ni yacova rawa na veika au segata tu, ka sa vaka me tilomi au na butobuto.
Ena lomaleqa au kaci kina vei Tamada Vakalomalagi. Me vaka na turaga ena boto o ya, a lako mai me vueti au na iVakabula ena gauna sara ga au gadrevi Koya vakalevu kina. A liutaki au ko Koya ki na iVola i Momani, mai vua e dua na parofita ni Kalou ena gauna oqo. A tuberi au ena sala ni veivutuni ka vakasavasavataki au mai na noqu ivalavala ca ena wai ni veipapitaisotaki. Sa qai biuti au ena dua na vanua cecere, kau sa segata tiko me tekivu mai na gauna o ya meu tikoga kina.