Na Karisito Bula

Na Nodra iVakadinadina na iApositolo ni Lotu i Jisu Karisito ni Yalododonu Edaidai

“Na Karisito Bula: Na nodra iVakadinadina Na iApositolo.” 1 ni Janueri, 2000, ka sainitaki mai vei ira na Mataveiliutaki Taumada kei na Kuoramu ni iApositolo Le Tinikarua. E a tabaki ena Liaona ni Epereli 2000.

Ni da vakananuma na sucu i Jisu Karisito ena rua na udolu na yabaki sa oti, keimami sa cauraka kina na neimami ivakadinadina me baleta na dina ni Nona bula e sega ni vakatauvatani rawa kei na savasava ni Nona solibula veisorovaki cecere. E sega tale ni dua me levu cake na nona veivakauqeti vei ira kece era sa mai bula kei ira era na qai mai bula.

Sai Koya ko Jiova sa Cecere Sara ni Veiyalayalati Makawa, na Mesaia ni ka Vou. Ena veidusimaki nei Tamana, a Bulia kina na vuravura. “Sa cakava na ka kecega ko koya; a sa sega ni dua na ka sa caka me sega ni cakava ko koya” (Joni 1:3). E dina ni sega na nona ivalavala ca, a papitaiso me vakayacori kina na ivalavala dodonu kecega. Ko Koya “sa lako voli ka dau caka vinaka” (Cakacaka 10:38), ia a cati kina. Na Nona kosipeli e itukutuku ni sautu kei na inuinui vinaka. Sa sureta na tamata kecega me ra muria na Nona ivakaraitaki. A lakova na veisalatu kei Palesitaina, ka vakabulai ira na tauvimate, e vakavuna me ra rai na mataboko, ka vakaturi ira cake na mate. A vakavuvulitaka na dina ni veigauna tawamudu, na dina ni noda a bula ena bula taumada, na inaki ni noda bula e vuravura, kei na vanua e rawa ni da yacova na luvena tagane kei na yalewa na Kalou ena bula sa bera mai.

A tauyavutaka na sakaramede me ivakananumi ni Nona solibula veisorovaki cecere. A vesu ka beitaki vakailasu ena veicala eso, a bala ki valeniveivesu me ra vakacegui kina e dua na ilawalawa dau vakacaca, ka lewai me mate ena kauveilatai mai Kalivari. A solia na Nona bula me sorovaka na ivalavala ca ni kawatamata. Na Nona iloloma e isolisoli cecere vakaveisosomitaki ena vukuda kece eda na mai bula e vuravura.

Keimami vakadinadinataka ni Nona bula, ka itakele ni itukutuku kece ni tamata, a sega ni tekivu mai Peceliema ka sega talega ni a cava e Kalivari. Sai koya na Ulumatua nei Tamada, na Le Duabau ga ena yagona, na Dauveivueti kei vuravura.

A tucake mai na ibulubulu me “yaco kina me kena isevu vei ira era sa moce” (1 Korinica 15:20). Me vaka ni sa Vakaturi cake tale na Turaga, a sikovi ira ka dau lomani ira ena Nona bula. A veiqaravi talega vei ira na Nona “sipi tale eso” (Joni 10:16) e Amerika makawa. Ena vuravura vou, erau a rairai vata kei Tamana vua na gonetagane o Josefa Simici, ka vakacuruma mai kina na “itabagauna ni taucoko ni gauna sa yalataki tu mai vakabalavu” (Efeso 1:10).

Me baleta na Karisito Bula, a vola kina o Parofita Josefa: “A sa vaka na yameyame ni bukawaqa na yaloka ni matana; sa vulavula sara na drau ni uluna me vaka na uca cevata; ia na iserau ni matana sa uasivi cake mai na rarama ni matanisiga; a rorogo ni domona sa vaka na vadu-gu ni wailevu, io na domo i Jiova sa kaya:

“Koi au na kena ivakatekivu kei na kena ivakataotioti; sai au sa bula, sai au talega a vakamatei; raica koi au na nomudou dautataro vei Tamada” (V&V 110:3–4).

Ena Vukuna talega era sa tukuna kina na Parofita: “Ia me ikuri ni itukutuku kece ka vakadinadinataki kina ko Koya, keirau sa tukuna oqo na kena iotioti me yacova edaidai. Raica sa bula dina tiko ko Koya!

“Keirau a raici koya vakaidina ni sa tiko ena liga imatau ni Kalou; keirau sa rogoca talega na domo sa tukuna ni sai Koya na Le Duabau ga nei Tamana—

“Raica sa vu mai vua na ka kecega, ia sai Koya sa lesi me bulia na vuravura; io ena vukuna ga era sa yaco kina na lewe i vuravura me ra luve ni Kalou” (V&V 76:22–24).

Keimami sa tukuna kina ena vakarokoroko ni sa vakalesui mai ki vuravura na Nona matabete kei na Nona Lotu—“ka sa tara cake ena nodra yavu na iapositolo kei ira na parofita, ia sai koya ko Jisu Karisito sa kena ivakadei ena tutu ni vale” (Efeso 2:20).

Keimami vakadinadinataka ni na lesu tale mai ki vuravura ena dua na siga. “Ena qai vakaraitaki mai na iukuuku i Jiova, ka ra na raica vata na tamata kecega ni sa cavuta na gusu i Jiova” (Aisea 40:5). Ena nodra Tui na Tui ka nodra Turaga na Turaga, ia ena tekiduru na duru vakayadua ka vakatusai Koya na yame kecega. Eda na tucake vakayadua me da lewai mai Vua me vaka na noda ivalavala kei na gagadre ni lomada.

Keimami vakadinadinataka, me vaka ni keimami Nona iapositolo tabaki —ni ko Jisu na Karisito Bula, na luve ni Kalou tawamate rawa. Sai Koya ko Imanueli na Tui sa cecere sara, ka sa tu nikua ena liga imatau i Tamana. Sai koya na rarama, na bula, ka inuinui ni vuravura. Na Nona sala sai koya sa liutaki keda ki na marau ni bula oqo kei na bula tawamudu ena bula sa bera mai. Me vakavinavinakataki na Kalou ena isolisoli sega ni vakatauvatani rawa ni Luvena vakalou.