Ovici ena Liga ni Nona Loloma
Ni sa qai yabaki dua ga, a paralase o Nolan na luvei keirau tagane ena vuku ni dua na mate ka vu mai na nona suitu. Ni sa yabaki 14 oqo, sa dau sotava na dredre ena kena vakadrodroi na dra ki na veitiki ni yagona eso, dredre na nona vuli, ka sa mate tu e dua na yasana.
E dina ni gauna dredre e sotava mai, ia sa sivia ko Nolan na veika keirau a namaka vua. Na veika kece e rawata e kauta mai na marau levu vei keirau. Sa rawata o koya me dauvosota kei na gugumatua e dodonu me vakatotomuri.
Keitou sa vakatataki cake vakayalo o au, o Ryan na watiqu, vata kei iratou na luvei keirau tagane e lewe lima, mai na veika keitou sotava vata kei Nolan. Ena so na gauna keitou dau yalolailai ka lomaleqa ena vuku ni nona gauna ni bula, ia ena so tale na gauna keitou raica na neitou veivakalougatataki, kila na loloma kei na Nona kauwai na Tamada Vakalomalagi kei na Luvena me baleti keitou yadudua, ka keitou dau nanuma e dua na masu ka a saumi mai ni se qai yabaki ono o Nolan.
Ena dua na bogi ni keirau sega ni kila na veika me keirau vakayacora ena vuku ni dredre e sotava tiko o Nolan, keirau a tekiduru kei na watiqu ka masuta me taqomaki. Ni keirau vakatakekere vua na Turaga, keirau vakaraitaka vakabibi na neirau kauwaitaka na ivakarau nei Nolan me baleta na nona rai ena vuku ni veika e rawa ni cakava. Keirau a kerea ena yalodina me vakila o Nolan na nona loloma na iVakabula ka vakila na levu ni kena yaga me vaka ni luve ni Kalou.
Ena mataka ni siga ka tarava, a lako vakadodonu sara mai ki valenikuro ko Nolan na vanua au vakasaqara tiko kina na ikatalau. Ni se bera na katalau ena veigauna e dau qito vata kei iratou na tacina se dadavo tu ga ena idavodavo balavu. Ia e rairai bulabula ena gauna e kabata kina e dua na idabedabe ena vanua ni katalau, raici au cake, ka kaya, “Au a tadra ena bogi.”
Au vakila na nona sega ni veiwali tiko, kau sa gadreva sara ga meu rogoci koya.
“E dina e?” Au taroga yani. “Na cava e yaco ena nomu tadra?”
“A tiko kina ko Jisu,” e sauma mai ko Nolan, a mokoti au ko Koya.“
Au vakadinadinataka ni sa dau rogoca ka sauma na noda masu na Tamada mai Lomalagi ka vakakina ni noda dautataro vei Tamana na iVakabula. Erau kilai keda yadua. Erau kila na noda gagadre kei na veika eda rawa ni rawata. Erau kila na ivakarau me rau vakaukauwataki keda kina.
E tukuna vei keda ko Moronai, “kevaka dou sa kerea ena yalodina ena lomamudou taucoko ka vakabauta na Karisito, ena vakatakila vei kemudou ko Koya ena kaukauwa ni Yalo Tabu ni sa dina” (Moronai 10:4–5). Au sa vulica ni ivolanikalou oqo e sega ni baleta walega na noda rawata e dua na ivakadinadina ni iVola i Momani ia e baleta talega na kena rawati na isau ni dua na taro eda sa vakasaqara tiko vagumatua. Ni da sotava na dredre, na mosi ni yalo, kei na veivakatovolei, sa na dina na yaloda ka tudei sara na noda inaki.
Au sa vakavinavinaka vakalevu niu lewena na Nona Lotu na iVakabula, kau sa vulica kina e vuqa sara na Nona kosipeli ena vuli, na veiqaravi, kei na Yalo Tabu. Au sa vakavinavinaka vakalevu niu kila ni na vukei keda, vakacegui keda, ka dusimaki keda yadua na iVakabula. Au kila ni rawa ni da na “ovici ena [Nona] loloma” (V&V 6:20) ni da lako mai Vua.