O Cei o Jisu Karisito?
Ni sota vata kei iratou na Le Tinikarua mai Sisaria e Filipai, a taro ko Jisu, “Dou sa kaya se ko cei koi au?” a sauma ko Saimoni Pita na iApositolo liu, “Oi kemuni na Karisito na Luve ni Kalou bula” (Maciu 16:15–16). A qai vakadinadinataka e muri ko Pita ni a sa “lesi e liu,” ko Jisu, “sa qai tauyavutaki e muri ko vuravura” (1 Pita 1:20). A sa “tiko vata kei tama[na] mai na ivakatekivu; io sai [koya] na Ulumatua” (V&V 93:21).
Ena gauna a vakaraitaki kina na ituvatuva nei Tamana—na yavu ni veivakabulai kei na marau (raica na Alama 34:9)—(raica na Alama 42:5, 8), sa gadrevi e dua me isoro me veivueti ka vakarautaka na loloma uasivi vei ira kece era na ciqoma na ituvatuva (raica Alama 34:16; 39:18; 42:15). A taroga na tamana, “Ko cei meu tala?” A sauma ena yalo galala o koya ka a qai kilai e muri ko Jisu, “Koi au oqo, ni talai au” (Eparaama 3:27). “I Tamaqu me yaco ga na lomamuni, ka me nomuni tikoga na vakarokoroko ka sega ni mudu” (Mosese 4:2).
Ena kena vakarautaki, sa buli na vuravura: “Sa buli ira [na vuravura], na Luvequ e Duabau ga ena vukuqu,” sa kaya na Tamana (Mosese 1:33; raica talega Efeso 3:9; Ilamani 14:12; Mosese 2:1).
Na iTutu nei Jisu Karisito
A kilai me Jiova vei ira na parofita ni Veiyalayalati Makawa (raica Eparaama 1:16; Lako Yani 6:3). A vakaraitaki vei ira na parofita na Nona lako mai: “Raica na Lami ni Kalou, io, na Luvena na Tamada Tawamudu!” (1 Nifai 11:21; raica talega Joni 1:14). A tukuni vua na tinana, “mo vakayacani koya ko Jisu… . Ka na vakatokai na Luvei Koya sa cecere sara” (Luke 1:31–32).
E vuqa na itutu kei na yaca e vakamacalataka na Nona ilesilesi vakalou kei na nona veiqaravi. A vakavuvulitaka o Koya vakataki Koya: “Koi au na rarama kei na vu ni bula kei vuravura, Koi au na Alifa kei na Omeka, ai vakatekivu kei na ivakataotioti” (3 Nifai 9:18). “Raica au sa tiko ena kemudou maliwa … meu vakaveivinakatitaki kemudou vei Tamaqu” (V&V 29:5; raica talega V&V 110:14). “Koi au na ivakatawa vinaka” (Joni 10:11). “Koi au na Mesaia na Tui kei Saioni, au sa Bulia na Lomalagi” (Mosese 7:53). “Koi au na madrai ni bula: ko koya sa lako mai vei au ena sega ni viakana [se] viagunu” (Joni 6:35). “Koi au na vaini dina, ka sa ivakatawa ni were ko Tamaqu” (Joni 15:1). “Koi au na tucaketale, kei na bula” (Joni 11:25). “Koi au … na kalokalo ivolasiga e serau tu” (Ai Vakatakila 22:16), “Ko Jisu Karisito na nomudou iVakabula, io koi au na Kalou Kaukauwa” (D&C 29:1).
O koya na Dauveisorovaki (raica 1 Timoci 2:5), na iVakabula (raica Luke 2:11), na Dauveivueti (raica V&V 18:47), sa Ulu ni iSoqosoqo Lotu ko Karisito (raica Efeso 5:23), na Vatuivakadei Liu (raica Efeso 2:20). Ena iotioti ni gauna, “Ena lewai ira na tamata na Kalou mai vei Jisu Karisito me vaka na itukutuku vinaka” (Roma 2:16; raica talega Momani 3:20).
“Sa lomani vuravura vakaoqo na Kalou, me solia kina na Luvena e duabau ga” (Joni 3:16); “sa yaco na bula ena vukui Koya na Mesaia Yalosavasava, ni sa sinai ena loloma kei na dina” (2 Nifai 2:6).
Sa dau tarogi vakavuqa na Parofita ko Josefa Simici, “Na cava beka na ivakavuvuli taumada ni nomu lotu?”
“Na ivakavuvuli taumada ni neimami lotu sai koya na nodra ivakadinadina na iApositolo kei ira na Parofita, me baleti Jisu Karisito, ni a mate, bulu, ka tucake tale ena ikatolu ni siga, ka cabe cake ki lomalagi; kei na veika kece tale ena neimami lotu era kena ikuri walega.”1
Na Yalomalumalumu nei Jisu Karisito
Ena gauna a vesu kina ni se bera na Nona Vakamatei ena Kauveilatai, a lako na Turaga mai Kecisemani. Ena gauna a soli yani kina, a laveta ko Pita na nona seleiwau ka yaviti Maliko, na nona tamata e dua na bete levu. Sa qai kaya vua ko Jisu:
“Daramaka tale na nomu iseleiwau ki na kena taga… .
“Ko sa nanuma beka e sega ni rawarawa vei au meu masuti Tamaqu, ka na solia sara mai vei au ko koya na agilosi e tinikarua na ivavakoso ka mani vakacaca?” (Maciu 26:52–53).
Ena gauna taucoko ni veivakalialiai, na veivakacacani, na veivakanakuitataki, kei na iotioti ni veivakararawataki ni sa vakoti ki na kauveilatai, a galu voli ga ka soli koya vakadua na Turaga—vakavo ga, ena dua na gauna bibi ka vakatakilai kina na ivakavuvuli dina va-Karisito. Na gauna oqori a basika ena gauna ni veilewai. Ko Pailato ni sa rere tu ena gauna ko ya, sa kaya vei Jisu: “O sa sega li ni vosa mai vei au? Ko sa sega beka ni kila niu sa rawata meu vakoti iko ki na kauveilatai, kau sa rawata talega meu sereki iko?” (Joni 19:10).
Eda rawa ni raitayaloyalotaka na vakaturaga ni yalo ena nona vosa na Turaga: “Ko sa sega ni rawata e dua na ka vei au, kevaka sa sega ni soli vei iko mai cake” (Joni 19:11). Na veika a yaco ni oti o ya a sega ni yaco baleta ni tu vei Pailato na kaukauwa me vakayacora ia baleta ni a lomana na Turaga me taura.
“Niu sa solia na noqu bula,” sa kaya na Turaga, “meu kauta tale.
“Sa sega e dua sa kovea vei au oqo, ia kau sa solia vakaiau ga. Au sa rawata meu solia, ia kau sa rawata meu kauta tale” (Joni 10:17–18).
Na Veisorovaki i Jisu Karisito
Ni se bera ni Vakamatei ena kauveilatai ka vakakina ni sa oti, e vuqa na tamata era sa solia na nodra bula ena ivalavala qaqa ni sega ni nanumi koya vakaikoya. Ia e sega ni dua vei ira e sotava na veika a sotava na Karisito. A colata na icolacola ni ivalavala ca kece ni tamata, na cala ni tamata kecega. Sa koto kina ena dua na itutu bibi na Veisorovaki. Ena Nona ivalavala yalodina, sa vakaduavatataki kina na loloma uasivi kei na lewa dodonu, sa vakayacori kina na lawa tawamudu, ka rawa kina na sala ni veivosaki o ya, ka na sega kina ni rawa na sereki vua na tamata ena bula vakayago oqo kevaka e sega.
Ena nona digidigi sa ciqoma kina na itotogi ena vukudra kece sara na kawatamata me baleta na isoqoni kece sara ni caka cala kei na itovo ca; na veivakararawataki, na ivalavala tawasavasava, na ivakarau tawakilikili, kei na basulawa; na ivalavala dau veivakabobulataki, na veivakamatei, na veivakararawataki vakayago kei na veivakarerei—me baleta na veika kece sa yaco oti se na veika kece ena qai yaco e vuravura. Ena nona digitaka sa sotava kina ko Koya na kaukauwa levu nei koya na vu ni ca, o koya a sega ni soli vua e dua na yago ka sega talega ni vakila na mosi vakayago. O ya ko Kecisemani!
Na kena vakayacori na Veisorovaki eda sega ni kila. A sega ni dua na tamata a raica tu na nona gole tani na vu ni ca ka vunitaki koya ena madua mai na kena Rarama na ka bula savasava ko ya. E sega ni rawa ki na veimataqali ca kecega me ra vakamamautaka na Rarama ko ya. Ni sa vakayacori na veika a vakayacori, sa saumi na kena isau. Erau sa vakasuka ruarua ko mate kei eli na nodrau ile vei ira kece sara era sa veivutuni. Era sa qai galala kina na tamata. Sa qai rawa kina vei ira kecega na yalo era sa mai bula me ra tara na Rarama ko ya ka sereki.
Ena veisorovaki bibi ko ya, “ena Veisorovaki [oqo] i Karisito, ena vakabulai kina na tamata kecega, kevaka eda sa muria na vunau kei na ivakavuvuli ni itukutuku vinaka” (Yavu ni Vakabauta 1:3).
“Na Veisorovaki” ena iVolanikalou
Na vosa Vakavalagi na atonement (veivakaduavatataki) e tolu na vosa: at-one-ment ka kena ibalebale me vakaduavatataki; duavata kei na Kalou; me vakaveiyalonitaki, me veiyaloni, me vauca vata.
Ia o ni kila beka ni vosa veivakaduavatataki e basika ga vakadua ena Veiyalayalati Vou Vakavalagi? E vakadua ga? Au na cavuvosa mai na ivola nei Paula vei ira na kai Roma:
“Sa mate na Karisito me keda isosomi.
“… Eda sa veivinakati kei na Kalou ena vuku ni nona mate na Luvena, ni da sa veimecaki, ena qai rawarawa cake ni da sa veivinakati tu, me da vakabulai tiko ena vuku ni nona bula.
“A sa sega ni koya walega, ia eda sa dau reki talega ena Kalou ena vuku ni noda Turaga ko Jisu Karisito, o koya eda sa yaco kina me da veivinakati tu” (Roma 5:8, 10–11; vakamatatataki).
E vakadua walega oqori na kena basika ena Veiyalayalati Vou Vakavalagi na vosa atonement. Na Atonement, mai na veivosa kece! E sega ni vosa vulagi, ni sa dau vakayagataki vakalevu ena Veiyalayalati Makawa ena lawa i Mosese, ia e vakadua ga ena Veiyalayalati Vou. Au raica oqori ni dua na ka matalia.
Au kila e dua ga na kena ivakamacala. Me da na cereka kina na iVola i Momani. E vakadinadinataka ko Nifai ni a dau “macala vinaka sara na itukutuku vinaka ni Turaga,” ka tu ena iVolatabu, “ka ratou a vakadinadinataka na iapositolo e le tinikarua,” ia ni “ratou sa kauta yani na iapositolo ni Lami e le tinikarua vei ira na Matanitu tani, ia na lotu vakaitamera ka vakasisila duadua vei ira na lotu kecega, sa kauta tani e vuqa na tikina macala vinaka sara ka talei mai na nona itukutuku vinaka na Lami; sa kauta tani talega e vuqa na veiyalayalati ni Turaga” (1 Nifai 13:24, 26).
A vakamacalataka na lotu vakaitamera ka vakasisila ena veimalanivosa oqo ko Jekope: “Ia ko ira sa veivala kei Saioni, era na rusa; io ko ira na Jiu kei ira sa matanitu tani, na bobula kei na itaukei, na tagane kei na yalewa; raica sai ira oqo na dautagane ni vuravura kecega; ia ko ira era sa sega ni totaki au era sa veivala kei au, sa kaya na noda Kalou” (2 Nifai 10:16).
E kaya talega vakaoqo ko Nifai, “Ia ni sa kau tani na veitikina macala vinaka sara ka talei, … era sa tarabe kina na lewevuqa ka sa lewai ira ko Setani” (1 Nifai 13:29). Sa qai parofisaitaka ni ra na vakalesui tale mai na veitikina macala vinaka ka talei (raica 1 Nifai 13:34–35).
Era sa qai vakalesui mai. Ena iVola i Momani e basika kina vaka 39 na vosa atone, ena kena icavucavuti oqo kei na so tale na kena icavucavuti. Au cavuta mada e dua ga na tikina mai na Alama: “Raica sa rawa walega me ra lomani kevaka sa sorovaki na nodra ivalavala ca; ia sa mai sorovaka na Kalou na nodra ivalavala ca na kai vuravura, me ra bula kina; io me vakayacori kina na lewa dodonu ni Kalou, ni sa yalododonu ka dauloloma talega ko Koya” (Alama 42:15; vakamatatataki).
E vakadua ga ena Veiyalayalati Vou ia e vaka 39 ena iVola i Momani. Na ivakadinadina vinaka cava tale ni iVola i Momani e dua dina talega na ivakadinadina kei Jisu Karisito?
E sega ni o koya walega oqori. Na vosa atone, atoneth, kei na atonement eratou basika vakalima ena Vunau kei na Veiyalayalati ka vakarua ena Mataniciva Talei. E vasagavulu kavitu na idusidusi bibi sara. Ka sega ni o koya walega oqori! E drau vakadrau tale na veitikina tale eso era veivuke ena kena vakamacalataki na Veisorovaki.
Na Galala ni Digidigi
Na isau ni Veisorovaki a colata galugalu na Turaga, ni galala ni digidigi e ivakavuvuli vakaturaga. Me vaka na ituvatuva, sa dodonu me na rokovi na galala ni digidigi. A vakakina ena ivakatekivu, mai Iteni.
“Sa kaya vei Inoke na Turaga: Ena vukudra na wekamu; raica au sa buli ira koi au, kau vakavulica vei ira na ka dina ena siga kau a buli ira kina. Ia au sa solia na galala vua na tamata mai na were ko Iteni, me lewa kina na ka me kitaka” (Mosese 7:32).
Na veika kece tale a yaco mai Iteni, ena nona gauna dredre duadua ni vakatovolei, a vakayacora kina ko Atama e dua na digiidigi. Ni sa vakaroti rau oti ko Atama kei Ivi na Turaga me rau tubu ka lewe levu ka vakatawai vuravura ka vakaroti rau talega me rau kakua ni kania na vuanikau sa kilai kina na vinaka mai na ca, e kaya kina o Koya, “Ia sa soli tu vei iko mo lewa na ka mo kitaka; ia mo nanuma ga niu sa vakatabuya vei iko; raica ena siga ko sa kana kina, ko na mate vakaidina” (Mosese 3:17).
Sa rui levu na ka e tu me caka kevaka me vakasaurarataki na tamata ena nona mai bula vakayago. Ena veisaqasaqa kei na lawa sara ga e yaga ena ituvatuva. E vakarautaki ena ituvatuva ni ra na mai taukena e dua na yago vakavuravura na luvena vakayalo yadua na Kalou ka ra na vakatovolei. A raica o Atama ni dodonu me vakakina ka vakayacora na nona digidigi. “Sa lutu ko Atama me sucu na tamata; ia sa sucu na tamata me rawata na marau” (2 Nifai 2:25).
Erau sa mani gole yani ko Atama kei Ivi me rau tubu me lewe levu ka vakatawai vuravura me vaka erau sa vakaroti kina. Na kena buli na yagodrau me vaka na ibulibuli ni Kalou, ka dua na ibulibuli ga vakataki koya, sa tiki bibi sara ni ituvatuva. E yaga na Lutu a yaco vei rau, kevaka e vina- kati me yaco na ituvaki vakayago oqo ka vakavotukana na ituvatuva.
Na Yaga ni Veisorovaki
E vakamacalataka ko Nifai na veika ena yaco ki na yagoda kei na yaloda vakavo kevaka e vakacabori “e dua na isoro vakalou.” “Na yaloda,“ e kaya o koya, ”ena yaco me vaka na [tevoro].“ (Raica 2 Nifai 9:7–10.)
Au dau vakayagataka ena so na gauna na vosa ganita vakavinaka. Ena so na gauna e dau veiganiti. Au vakayagataka ena gauna oqo—vakarua:
Ena vuku ni Lutu, sa ganita vakavinaka me yaco na Veisorovaki me rawa ni yaco kina na tucake tale ka vakadrukai na mate vakayago.
Na Veisorovaki e ganita vakavinaka me ra vakasavasavataki ira na tamata mai na ivalavala ca ka vakamalumalumutaka na ikarua ni mate, na mate vakayalo, sai koya na tawasei mai vei Tamada Vakalomalagi, ni sa tukuna vakawalu vei keda na ivolanikalou ni na sega ni dua na ka tawasavasava me na curu rawa ki na nona iserau na Kalou (raica 1 Nifai 10:21; 15:34; Alama 7:21; 11:37; 40:26; Ilamani 8:25; 3 Nifai 27:19; Mosese 6:57).
Na veimalanivosa ni ivolanikalou ko ya, “ia sa soli tu vei iko na galala mo lewa na ka mo kitaka” (Mosese 3:17), sa vakatakilai Atama kei Ivi kei ira na nodrau kawa ki na veivakatulewa dredre kece ni bula oqo. Ena bula oqo e galala tu na tamata me ra digidigi, ia na veidigidigi kece sa tu vata na kena isau. Na digidigi a vakayacora ko Atama sa vaqaqacotaka na lawa ni lewa dodonu, ka gadrevi kina me itotogi ni talaidredre na mate.
Ia na veimalanivosa a tukuni ena veilewai, “Ko sa sega ni rawata vei au e dua na ka, kevaka sa sega ni soli vei iko mai cake” (Joni 19:11), sa vakadinadinataka ni sa tautauvata na nodrau itutu kei na loloma vakalou. Sa talai mai e dua na dauveivueti me mai sauma na idinau ka sereka na tamata. Sai koya oqori na inaki.
E nanuma ko Korianitoni na luvei Alama ni sega ni dodonu me rau veimuri na itotogi kei na ivalavala ca, ni dodonu me dau caka na itotogi. Ena dua na lesoni bibi, a vakavuvulitaka kina ko Alama na ituvatuva ni veivueti vua na luvena ka vakakina vei keda. A vosa ko Alama me baleta na Veisorovaki ka kaya, “Ia sa sega ni yaga na veivutuni kevaka sa sega na itotogi” (Alama 42:16).
Kevaka e kerea na veivutuni me kena isau na itotogi, ena yaco mai ena dua na isau erau vakadonuya vata. Na isau ni ivalavala, na kena sara mada ga e mosimosi, ena dau taqomaki keda. Na ka rawarawa sara me vaka na nona kaila ena tagi e dua na gone ni tara na ligana na bukawaqa e rawa ni vakavuvulitaka vei keda na tikina oqo. E dina ni na mosi, ia a rawa me kama sara vakaca na gone.
Veivakalougatataki ni Veivutuni
Au sa vakatusa rawa oqo niu na sega sara ni kunea na vakacegu, ka vakakina na marau se na veitaqomaki, ena dua na vuravura kevaka e sega na veivutuni. Au sega ni kila na veika e dodonu meu vakayacora kevaka a sega ni dua na sala meu bokoca laivi kina na noqu cala. Na kena mosi ena sega beka ni rawa niu vosota. Ena sega beka ni vakakina vei kemuni, o au e sega ni rawa.
Sa vakayacori na Veisorovaki. Ena veigauna kece sa dodoka tu vei keda na veivosoti mai na talaidredre kei na mate kevaka walega eda veivutuni. Na veivutuni sai koya na sala duadua me da dro tani mai kina. Na veivutuni sai koya na ki eda rawa ni dolava kina na katuba ni valeniveivesu mai loma. Eda taura tu na ki oqori e ligada, ka noda na galala me da vakayagataka.
Sa dua na ka na kena taleitaki na bula galala; sa dua na ka uasivi ka vakamareqeti na galala.
Sa dau vakayavalata na noda digidigi ena veisala maqosa eso o Lusefa, e dau cavilaki keda me baleta na ivalavala ca kei na kena isau. Era sa dau temaki keda o koya kei ira na nona agilosi me da tawakilikili, me da caka ca. Ia e sega ni rawa vua—ena veigauna tawamudu kece sara e sega ni rawa vua, ena nona kaukauwa taucoko e sega ni rawa vua—me vakarusai keda vakadua, e sega ni rawa kevaka eda sega ni vakadonuya. Kevaka beka me a yaco mai vua na tamata na galala ni digidigi ka sega na Veisorovaki, ke sa qai dua na iloloma vakatubu leqa.
Buli me Ucui Koya
Eda sa vakavulici ena iVakatekivu, ena Mosese, ena Eparaama, ena iVola i Momani, ka vakakina ena edaumeni ni a caka na yago ni tamata ena kena ivatuka na Kalou ena dua ga na veibuli vakataki koya. Kevaka beka me a yaco ena dua tale na sala na veibuli, ke a sega beka na Lutu.
Kevaka beka era a manumanu na tamata, ke na sega beka ni gadrevi me da na saumi taro ena galala e soli vei keda.
Au kila vakavinaka ni ra tu ena kedra maliwa na tamata vuku eso era dau vakasaqara ena manumanu kei na vatu na vanua e vu mai kina na tamata. Era sega ni dau raica na lomadra me ra raica kina na yalo e tiko kina. Era vakavulici ira me ra vakarautaka na ka ena gauna, ena udolu kei na milioni, ka ra kaya ni o ira na manumanu oqo ka vakatokai na tamata era basika mai ena vakacalaka. Ka ra galala me ra vakayacora na veika oqo, ni nodra na galala ni digidigi.
Ia e noda talega na galala. Eda rai cake ka raica ena maliwa lala na cakacaka ni ligana na Kalou ka vakarautaka na ka ena veika dau yaco vagauna, ena veigauna tawa wiliki rawa, ena veitabagauna, ena veigauna tawamudu. Na veika eda sega ni kila eda taura ga ena vakabauta.
Ia na veika oqo eda kila! A nakiti kece na veika oqo “ni se bera ni tauyavu na vuravura” (V&V 38:1; raica talega V&V 49:17; 76:13, 39; 93:7; Eparaama 3:22–25). Na veika eso mai na Veibuli ki na iotioti ni veika ena vakayacori era sega ni ka vakacalaka; era yavutaki ena digidigi! A nakiti me vakakoya.
Na veika oqo eda kila! Na dina rawarawa oqo! Kevaka me a sega na Veibuli ka sega na Lutu, a sega ni dodonu me dua na Veisorovaki, ka sega talega ni dua na Dauveivueti me veivosaki ena vukuda. Ka sega kina ni dodonu me dua na Karisito.
Na iVakatakilakila ni Veisorovaki
A vakadavei na nona dra na iVakabula mai Kecisemani kei Kolikoca. Ena vica na senijiuri yani ki liu a tekivutaki kina na Lakosivia me ivakatakarakara ka dua na mataqali ka ena qai yaco mai. E dua na cakacakatabu vakalotu me na dau vakayacori tiko me tawamudu. (Raica Lako Yani 12.)
Ni sa lewai me lutuki Ijipita na mate veitauvi, sa vakaroti vei ira yadua na matavuvale ni Isireli me ra kauta e dua na lami—na ulumatua, me tagane, ka sega na kena ca. Na lami ni kanavata ni lakosivia sa vakamatei ka sega ni vakacacani e dua na kena sui, na kena dra me vakatakilakilataki kina na katuba ni vale. Sa yalataka na Turaga ni na lako sivia na agilosi dauveivakamatei na vale e makataki tu vakakoya ka sega ni vakamatei ira era tiko e loma. Era a vakabulai ena dra ni lami.
Ni sa Vakamatei oti ena Kauveilatai na Turaga, sa sega tale ni qai gadrevi ena lawa ni sorovaki ka na vakadavei ni dra. Ni a vakayacori oqori, me vaka e vakavuvulitaka o Paula vei ira na Iperiu, “ni sa vakacabora oti vakadua na isoro e dua ga ena vuku ni ivalavala ca” (Iperiu 10:10, 12). Na isoro sa gadrevi me tekivu mai na gauna ko ya sai koya na yalo sa raramusumusu ka bibivoro—na veivutuni.
Sa na dau vakananumi tu me tawamudu na Lakosivia ena sakaramede, eda dau vakavouya kina na noda veiyalayalati ni papitaiso ka vakaivotavota me da vakananuma kina na yagona kei na Nona dra na Lami ni Kalou, ka a dave ena vukuda.
E sega ni ka wale na kena basika tale na ivakatakarakara oqo ena Vosa ni Vuku. E uasivia na yalayala ni ra na bulabula vinaka ka vakavukui ko ira na yalododonu era muria, na veika oqo: “Ia koi au na Turaga au sa yalataka vei ira ni na lako siviti ira na agilosi dauveivakarusai, ia me vaka a lako siviti ira na Isireli ka sega ni vakamatei ira” (V&V 89:21).
Niu dau tukuna na veika e tu e yaloqu me baleta na Veisorovaki e dau luluvu na lomaqu. E dau tara vakatitobu sara na yalo ni vakavinavinaka kei na itavi. Sa dau gole na yaloqu vei Koya a vakayacora—na Karisito oqo, na noda iVakabula, o koya au kena ivakadinadina bula. Au vakadinadinataki koya. O Koya na noda Turaga, na noda Dauveivueti, o koya ena Vosa ena Vukuda vei Tamana. Sa voli keda ena Nona dra.
Au sa rawa ni kaya kina ena yalomalumalumu ni sa noqu na Veisorovaki i Karisito. Au sega ni madua meu tekiduru sobu ka qarava na Tamada kei na Luvena. Ni sa noqu na galala meu digidigi, kau sa digitaka meu vakayacora na veika oqo!