Na Yalayala Vakaparofita

Na vulici ni iVola i Momani ena veisautaki iko. E na veisautaka na nomu matavuvale. Era sa yalataka na parofita ni gauna oqo baleta na kaukauwa mana ni Vola i Momani, tekivu mai na gauna e vakalesui mai na Lotu i Jisu Karisito ni Yalododonu Edaidai. Vakananuma vakatitobu na iyatuvosa oqo, ka railesuva wasoma. O cei vei ira na veivakalougatataki o vinakata mo ciqoma? Ni o wilika na iVola i Momani, vakasamataka mo vola ka wasea vei ira tale eso na kena sa vakavotukana na yalayala oqo ena nomu bula.

E a vola na parofita o Josefa Simici: “Au tukuna vei ira na veitacini ni Vola i Momani sa ivola dodonu duadua vei ira na ivola e vuravura, ka sa vatuivakadei ni noda lotu, ka na toro voleka vua na Kalou e dua na tamata ena nona bulataka na kena ivakavuvuli mai na ivola tale eso.” (Nodra iVakavuvuli na Peresitedi ni Lotu; Josefa Simici [2007], 64).

Peresitedi Ezra Taft Benson: “E sega walega ni vakavulica vei keda na dina na iVola i Momani, e dina ga ni vakayacora oqori. E sega walega vakadinadinataki Karisito na Vola i Momani, e dina ga ni vakayacora na veika oqori. Ia e dua tale na ka levu. E tiko na kaukauwa ena ivola ka na tekivu me drodro yani ki na nomu bula ena gauna ga o sa tekivu vulica kina vagumatua na ivola. Ko na kunea na kaukauwa levu cake mo vorata kina na veitemaki. Ko na kunea na kaukauwa mo levea kina na ivadi ca. Ko na kunea na kaukauwa mo tikoga kina ena sala qiqo ka rabailailai. Era vakatokai na ivolanikalou me ra ‘vosa ni bula’ (VV 84:85), ka sega tale ni dua na vanua e dina vakalevu cake kina me vaka ena iVola i Momani. Ni ko sa tekivu mo via kania ka via gunuva na vosa, ko na kunea na bula e cecere cake tikoga” (Nodra iVakavuvuli na Peresitedi ni Lotu: Ezra Taft Benson [2014], 141).

Peresitedi Gordon B. Hinckley: “Kemuni na taciqu kei na ganequ, au yalataka vei kemuni ka sega ni vakabekataka ni kevaka o ni na wilika na iVola i Momani ena yalomasumasu, veitalia na levu ni gauna o sa wilika kina, ena basika mai ki na lomamuni e dua na ikuri ni vakarau ni Yalo ni Turaga. Ena basika mai e dua na navunavuci qaqaco mo na talairawarawa voli ki na nona ivunau, ka na basika mai e dua na ivakadinadina kaukauwa cake me baleta na bula voli vakaidina ni Luve ni Kalou” (Na iVakavuvuli ni Peresitedi ni Lotu: Gordon B. Hinckley [2016], 233).

Peresitedi Russell M. Nelson: “Kemuni na taciqu kei na ganequ, au yalataka ena nomuni vulica ena masumasu na iVola i Momani e veisiga o ni na dau vakatauca na lewa vinaka cake—e veisiga. Au yalataka ena nomuni vakasamataka vakatitobu na veika o ni vulica, ena tadolavi na katubaleka ni lomalagi, o na ciqoma na isau ni nomu taro kei na idusidusi ena nomu bula. Au sa yalataka ni gauna ena veisiga da luvuci tiko ena iVola i Momani, o rawa ni taqomaki mai na veika ca ni dua na siga, ia na ivesu ni mate dewa bibi ni iyaloyalo vakasisila kei na veivakatotogani e vesumona tale eso” (“Na Vola i Momani: Ena Vakacava na Nomu Bula me kevaka e sega?” Ensign se Liaona, Nove. 2017, 62–63).