Vakavulici Ira na Gonelalai

Kevaka e tiko na gonelalai ena nomu vuvale, oqo eso na itaviqaravi ena rawa ni vukei ira me ra vuli:

• Lagata na. Serenilotu kei na sere mai na iVolanisere ni Gonelalai vakavulica vagumatua na ivunau. Vakayagataka na ituvatuva ni ulutaga ena daku ni iVolanisere ni Gonelalai mo kunea kina na sere ka veiwekani kei na ivakavuvuli ni kosipeli o vakavulica tiko. Vukei ira na gone me ra semata na itukutuku ni sere ki na nodra bula. Me ivakaraitaki, e rawa ni o taroga na taro me baleta na vosa kei na malanivosa ena qaqanisere. Me ikuri ni lagasere, e rawa ni ra matanataka na luvemu na qaqanisere se vakarogoca na sere e vakatagi malua tu ni ra cakava tale tiko eso na itaviqaravi.

• Vakarogoca se matanataka e dua na italanoa. Era dau taleitaka na gonelalai sobu na itukuni—mai na ivolanikalou, mai na nomu bula, mai na itukutuku makawa ni Lotu, se mai na mekesini ni Lotu. Vakasaqara na sala me vakaitavitaki ira ena tukuni ni italanoa. E rawa ni ra taura tu na iyaloyalo se iyaya, droinitaka na iyaloyalo me baleta na veika era rogoca tiko, vakatasuasuataka na italanoa, se veivuke ena tukuni ni italanoa. Vukei ira na luvemu me ra raica donu na dina vakosipeli ena italanoa o wasea.

• Wilika e dua na ivolanikalou. Era sega beka ni rawa ni wilivola vakalevu na gonelalai sobu, ia se rawa tikoga ni o vakaitavitaki ira ena vuli mai na ivolanikalou. Ena gadrevi beka mo vakanamata ena dua walega na tikina, malanivosa bibi, se vosa. Ena rawa sara mada ga me ra cavuqaqataka e dua na malanivosa lekaleka kevaka era na cavuta tikoga vakavica. Ni ra rogoca na vosa ni Kalou, era na vakila na Yalo.

• Raica e dua na itaba se sarava e dua na vidio. Ni o vakaraitaka vei ira na luvemu e dua na itaba se iyaloyalo e veisemati kei na ivakavuvuli ni kosipeli se italanoa vakaivolanikalou, tarogi ira na taro ena vukei ira me ra vuli mai na veika era raica tiko. Me ivakaraitaki, e rawa ni o taroga, “Na cava e yaco tiko ena itaba se vidio oqo? Na cava o a vakila?” Na Gospel Library app, medialibrary.ChurchofJesusChrist.org, kei na children.ChurchofJesusChrist.org eso na vanua vinaka mo raica kina na itaba kei na vidio.

• Tauyavutaka. Era rawa ni bulia, droinitaka, se rokataka na ka e veisemati ki na italanoa se ivakavuvuli era vulica tiko.

• Vakaitavi ena lesoni vakainaki. E dua na lesoni vakainaki ena rawa ni vukei ira na gone me ra kila vinaka na ivakavuvuli ni kosipeli ena via dredre me ra kila. Ni vakayagataki tiko na lesoni vakainaki, vakasaqara na sala me rawa ni ra vakaitavi kina na gone. Ena levu cake na ka era vulica ni ra na vakaitavi tiko, mai na nodra sarava walega e dua na ka e matanataki tiko.

• Matanataka Ni ra matanataka na gone e dua na ituvaki e rawa ni ra sotava ena nodra bula, sa rawa me ra kila vakavinaka cake na iwalewale ena yaga kina ena nodra bula e dua na ivakavuvuli ni kosipeli.

• Tokaruataki na itaviqaravi. Ena gadrevi beka me ra rogoca vakavica vata na gone eso na ivakavuvuli me rawa ni ra kila vakavinaka. Kakua ni rere me tokaruataki wasoma na italanoa se itaviqaravi eso. Me ivakaraitaki, o na wasea beka e dua na italanoa ni ivolanikalou vakavica vata ena sala duidui eso—wilika mai na ivolanikalou, vakalekalekataka ena nomu vosa ga, vakaraitaka e dua na vidio, vakatara me ra vukei iko na luvemu mo talanoataka e dua na italanoa, ka sureti ira me ra matanataka na italanoa, kei na so tale.

  Vuli vata na matavuvale