Na noda takete na Saumaki

Na inaki ni vuli kei na vakatavulici ni kosipeli sai koya me vakatitobutaka na noda saumaki ka vukei keda meda vakataki Jisu Karisito vakalevu cake. Ena inaki oqo, ena gauna eda vulica kina na kosipeli, eda sega walega ni vakasaqara tiko na itukutuku vou; eda vinakata me da sa “buli vou” (raica na 2 Korinica 5:17). E kena ibalebale oqo meda vakararavi vei Karisito me veisautaka na lomada, noda rai, noda ivalavala, kei na keda ituvaki sara madaga.

Ia, na mataqali vulici ni kosipeli e vaqaqacotaka noda vakabauta ka veimuataki ki na veisau veivakurabuitaki ni saumaki e sega ni yaco kecega ena dua na gauna. E tete yani kina rumu ni vuli ki na lomana kei na itikotiko ni tamata yadua. E gadrevi me vakayacori tikoga, na sasaga ena siga yadua me kilai vakatitobu ka bulataki na kosipeli. Na saumaki dina e gadrevi kina na veivakayarayarataki ni Yalo Tabu.

Na Yalo Tabu e dusimaki keda ki na dina oya ka vakadinadinataka na dina (raica na Joni 16:13). E vakararamataka na noda vakasama, ka vakamatatataka na noda kila-ka, ka tara na lomada ena ivakatakila mai vua na Kalou, na ivurevure ni dina kecega. Na Yalo Tabu e vakasavasavataka na lomada. E vakauqeta vei keda na gagadre meda bula ena dina, ka qai vakasolokakanataka vei keda na sala meda cakava kina. E dina ga, “na Yalo Tabu … ena vakavulici [keda] ena ka kecega” (Joni 14:26).

Ena inaki oqo, ena noda sasaga meda bulataka, vulica, ka vakatavulica na kosipeli, e dodonu meda vakasaqara taumada na veitokani ni Yalo. Na lalawa oqo me veidusimaki ena noda digidigi ka dusimaka na noda vakanananu kei na ivalavala. Meda vakasaqara na veika ga e sureta na veivakayarayarataki ni Yalo ka vakanadakuya na veika e kauta tani na veivakayarayarataki oya—baleta nida kila kevaka eda rawa ni bula kilikili kaya ki na Yalo Tabu, ena rawa talega meda bula kilikili kaya meda bula ena iserau ni Tamada Vakalomalagi kei na Luvena, o Jisu Karisito.