Na Vakasama Eso me Vakavinakataka na Nomu Vuli iVolanikalou Yadua

Oqo eso na sala rawarawa me vakarabailevutaka na nomu vulica na vosa ni Kalou ena ivolanikalou:

Vakasaqara na Dina baleti Jisu Karisito

E vakatavulica vei keda na ivolanikalou ni veika kece e vakadinadinataki Karisito (raica na 2 Nifai 11:4; Mosese 6:63), vaqarai Koya ena soqoni, italanoa, kei na veivakatavulici ena iVola i Momani. Navuca mo vola se makataka na tiki ni volanikalou e vakatavulica na veika me baleta na iVakabula kei na veika meda cakava meda muri Koya.

Vakaraica na Veivosa kei na Malanivosa e Veivakauqeti

Ena rawa talega ni o raica eso na vosa kei na malanivosa ena ivolanikalou e tarai iko, e vaka ni ra a volai saraga baleti iko. O na vakila ni sa baleti iko ka vakauqeti iko ka vakayavalati iko. Navuca mo vola ena nomu ivolanikalou se vola ena nomu ivola ni veisiga.

Vakasaqara na Dina Vakosipeli

Ena so na gauna na dina vakosipeli (e vakatokai vakawasoma me ivunau se ivakavuvuli) e volai vakadodonu, ka so na gauna e vakaibalebale ki na ivakaraitaki se italanoa. Tarogi iko mada, “Na dina tawamudu cava e vakatavulici ena veitikina oqo?”

Vakarogoca na Yalotabu

Yadrava matua na nomu vakasama kei na veika o vakila, ke sega mada ni veisotari kei na veika o wilika tiko. Na veivakanananu oqori e rawa saraga ni veika e vinakata na Tamada Vakalomalagi mo vulica.

Vakatautauvatataka na iVolanikalou ki na Nomu Bula

Vakasamataka matua na italanoa kei na ivakavuvuli o wilika tiko e rawa ni o bulataka vakacava. Me ivakaraitaki, e rawa ni o tarogi iko, “Na cava au sa sotava oti e via tautauvata kei na veika au wilika tiko?” se “Ena rawa vakacava meu vakamuria na ivakaraitaki ni tamata oqo ena ivolanikalou?”

Taroga na Taro ni O Vuli tiko

Ni o vulica tiko na ivolanikalou, e rawa ni votu mai nomu vakasama na taro. Na taro oqo ena rawa ni veiganiti kei na veika o wilika se na nomu bula. Vakasamataka vakatitobu na veitaro oqori ka qai vakasaqara na isau ni taro ni o tomana tiko na nomu vuli ivolanikalou.

Vakayagataka na Veivuke ni Vulici ni iVolanikalou

Me vakaikuritaki na rai titobu eso ena veitikina o sa wilika, vakayagataka na idusidusi ena ivolanikalou e ra, na iDusidusi Vakaiulutaga, na iVolavosa ni Vola Tabu, na iDusidusi ni iVolanikalou (scriptures.ChurchofJesusChrist.org), kei na veivuke ni vuli tale eso.

Vakasamataka na iVakavuvuli ni iVolanikalou

Sa rawa mo raica eso na vakasama titobu me baleta na ivolanikalou kevaka o vakasamataka na kena ituvatuva—na ituvaki se ituvatuva ni veika ena ivolanikalou. Me kena ivakaraitaki, na kilai ni ituvaki kei na nodra vakabauta na tamata e vosa kina e dua na parofita ena rawa ni vukei iko mo kila vakavinaka na inaki ni nona vosa.

Vola na Nomu Vakasama kei na Veika o Vakila

E vuqa na sala o rawa ni vola kina na veika e votu mai vei iko ena nomu vuli tiko. Me ivakaraitaki, e rawa ni o makataka e dua na vosa se malanivosa e vakaibalebale ka vola na nomu nanuma ena nomu ivolanikalou. E rawa talega ni o vola na nomu ivolaniveisiga e so na rai titobu, veika o vakila, kei na vakanananu o ciqoma.

Vulica na Nodra Vosa na Parofita kei na iApositolo ni Gauna Oqo

Wilika na veika era sa vakatavulica na parofita kei na apositolo me baleta na ivakavuvuli o kunea ena ivolanikalou (me ivakaraitaki, raica na conference.ChurchofJesusChrist.org kei na mekasini ni Lotu).

Wasea na Rai Titobu

Na veitalanoataki ni rai titobu mai na nomu vuli yadua e sega walega ni sala vinaka mo vakatavulici ira kina na tani, ia e vaqaqacotaka na nomu kila na veika o wilika.

Bulataka na Veika O Vulica

Na vulici ni ivolanikalou me kua walega ni vakauqeti keda ia e dodonu me muataki keda me da veisautaka na ivakarau ni bula eda tiko kina. Vakarogoca na veika e vakauqeti iko kina na Yalo mo cakava ni o wiliwili tiko, ka qai vakadeitaka mo cakacaka ena veivakauqeti oqori.

E kaya o Peresitedi Russell M. Nelson: “Kevaka me da ‘toso ki liu ka tugana ki lomamudou na vosa i Karisito, ka vosota me yacova na ivakataotioti, [eda] na rawata na bula tawamudu’ [2 Nifai 31: 20].

“Mera mai kana magiti e levu cake mai vei ira na tovolea. Na kana magiti e kena balebale me taleitaka. Eda taleitaka na ivolanikalou ena kena vulici e na yalo vinaka ka talei kena kunei kei na talairawarawa ena yalodina. Ni da tugana ki lomadra na vosa i Karisito, era sa curuma tu na ‘dela ni yalomudou sa malumu’ [2 Korinica 3:3]. Era sa yaco me tiki bibi sara ni keda ituvaki” (“Bula ena Veidusimaki ni iVolanikalou,” Ensign, Nove. 2000, 17).