Minerva K. Teichert (1888–1976), Vunau ni Veitalatala i Tui Penijamini, 1935, waiwai ena mesanaiti, 36 x 48 na idi. Univeisiti ni Cakacakaniliga na Brigham Young

13–19 ni Epereli

Mosaia 1–3

“Vakasinaiti ena Loloma Vua na Kalou kei na Tamata Kecega”

Ni o wilika na Mosaia 1–3, masulaka mo kila na ivakarau e rawa ni o vukei ira kina na gone o vakavulica me ra kila na veidina bibi e vakavuvulitaka na Tui o Penijamini. Vola na vakasama eso e yaco mai vei iko mai vua na Yalo Tabu.

Vola na Veika o Uqeti Kina

Sureta na Veiwasei

Vakaraitaka na iyaloyalo kei Penijamini na Tui ni veivakavulici, ka kunei ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Kerei ira na gone me ra wasea na ka era kila me baleta na iyaloyalo.

Vakavulica na iVunau: Gone Sobu

Mosaia 2–3

Niu sa qaravi ira na tani au sa qarava tale tikoga na Kalou.

Na cava mo cakava mo vukei ira na gone me ra kila ni veiqaravi vei ira na tani sa sala talega eda qarava kina na Kalou?

iTaviqaravi e Rawa ni Caka

• Me ra veivukevuke na gone ena daramaki ni dua na isala vakatui (e tiko ena tabana ni itaviqaravi ni macawa oqo e dua na ivakaraitaki) ka tu ena dua na idabedabe me vaka ni o koya na Tui o Penijamini. E rawa ni ra cakava oqo ni o wasea eso na ka a vakavulica na Tui o Penijamini vei ira na nona tamata, ka kunei ena Mosaia 2–3. Raica talega na “Wase 12: King Benjamin” (Book of Mormon Stories, 32–35, se na kena vidio ena ChurchofJesusChrist.org.)

• Sureti ira na gone me ra tokaruataka na iyatuvosa eso oqo, vica na vosa ena dua na gauna ni ra sauvaka na iwasenivosa yadua vata kei iko: “Ni ko ni sa qarava tiko na nomuni Kalou, ena gauna ko ni qaravi ira tiko kina na wekamuni” (Mosiah 2:17). Cakava tiko me yacova ni ra sa vulica na gone eso se na vosa kece. Vakadinadinataka ni gauna eda vukei ira tiko kina na tani, eda sa vukea tale tikoga na Tamada Vakalomalagi kei Jisu ka vakamarautaki Rau. Kerei ira na gone me ra wasea na sala eso e rawa ni ra vukei ira kina na tani.

• Vukei ira na gone me ra vakatotomuria na ligadra ena dua na tikinipepa ka droinitaka e dua na ka e rawa ni ra cakava me ra qarava kina nodra matavuvale. Ni lagata vata e dua na sere baleta na veiqaravi, me vaka na “When We’re Helping”Children’s Songbook, 198).

E vakavuvulitaka na Tui o Penijamini ni rawa ni da qarava na Kalou ena noda qaravi ira na tani.

Mosaia 2:19–25

Na noqu veivakalougatataki kece e lako mai vei Tamada Vakalomalagi.

Ni ra vakadinadinataka na gone ni sa ivurevure ni nodra veivakalougatataki kece na Kalou, era na vakarokoroko ka vakavinavinaka.

iTaviqaravi e Rawa ni Caka

• Vakamacalataka ni vakavulica na Tui o Penijamini ni noda veivakalougatataki kece sara e lako mai vei Tamada Vakalomalagi. Sureti ira na gone me ra vakarogoca e dua na veivakalougatataki sa solia mai vei keda na Tamada Vakalomalagi ni o wilika na Mosaia 2:21. Na veivakalougatataki cava tale sa solia vei keda na Tamada Vakalomalagi? Eda na vakaraitaka vakacava ni da sa vakavinavinakataka na veika oqo? (raica na Mosaia 2:22).

• Qitora e dua na qito me ra veipasitaka kina na gone e dua na iyaya ni ra lagata e dua na sere ni vakavinavinaka se vakarogoca e dua (raica na “Gratitude” ena ituvatuva vakamatanivola ni ulutaga ni Children’s Songbook). Cegu na laga se muduka vagauna na ivakatagi, ka sureti cei ga e taura tu na iyaya oya me wasea e dua na veivakalougatataki e vakavinavinakataka tu.

Mosaia 3:1–20

Au vakabauti Jisu Karisito.

A tukuna e dua na agilosi vei Tui Penijamini na dina bibi baleta na bula kei na veiqaravi i Jisu Karisito. Raica ena veitikina oqo na dina baleti Jisu o nanuma ni bibi me ra vulica na gone.

iTaviqaravi e Rawa ni Caka

• Vakaraitaka na iyaloyalo ni so na veika e yaco e tukuni ena Mosaia 3:5–10 (raica na, iVola ni iYaloyalo Vakosipeli, naba 30, 41, 42, 57, 59). Taroga vei ira na gone na cava e yaco tiko ena iyaloyalo, ka vukei ira kevaka e gadrevi. Wilika vakamalua na Mosaia 3:5–10, ka sureti ira na gone me ra laveta na ligadra ni o wilika e dua na ka ena dua vei ira na iyaloyalo. Sureti ira na gone me ra wasea eso tale na ka era kila ni a cakava o Jisu ena Nona tiko voli e vuravura.

• Droinitaka e dua na matanisiga ena ulu ni papa ni volavola me matataka na lomalagi. Droinitaka e vica na sala ka gole ki na veivanua ena papa ni volavola ia e dua ga na sala e gole ki lomalagi. Kerei ira na gone me ra raica na sala oya ka biuta kina e dua na iyaloyalo kei Jisu. Wilika na Mosaia 3:17, ka vakadinadinataka ni nona muri o Jisu Karisito e sa sala duadua ga me da lesu tale kina kivua na Tamada Vakalomalagi.

Vakavulica na iVunau: Gone Qase Cake

Mosaia 2:11–18

Niu sa qaravi ira na tani au sa qarava tale tikoga na Kalou.

O na rawa ni vukei ira vakacava na gone me ra vuli mai na ivakaraitaki ni veiqaravi i Tui Penijamini?

iTaviqaravi e Rawa ni Caka

• Vakaraitaka vei ira na gone e dua na iyaloyalo ni nona vakavulici ira tiko na nona tamata na Tui o Penijamini (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale se Kato ni iYaloyalo Vakosipeli, naba 74). Vukei ira na gone me ra vaqaqara ena Mosaia 2:11–18 me ra raica na veika a vakayacora na Tui o Penijamini me veiqaravi. Na cava na vuna a qaravi ira kina na nona tamata? Na cava na vuna me da veiqaravi kina vakataki keda?

• Vola ena papa ni volavola na malanivosa eso mai na Mosaia 2:16–17 me yali tiko eso na vosa. Sureti ira na gone mera vakasaqara ena ivolanikalou na vosa era yali tiko. Kerei ira me ra vakamacalataka na ibalebale ni veitikina oqo vei ira. Sureti ira me ra wasea na veigauna eso era veiqaravi kina ena vukudra eso se ra veiqaravi eso ena vukudra. Na cava beka era a vakila ena veika era sotava?

• Solia vei ira na gone na tikinipepa me ra vola na sala e rawa ni ra veiqaravi kina ena vukudra na lewe ni nodra matavuvale, ka solia vei ira yadua na gone e dua na taga me ra biuta kina na pepa. Vakauqeti ira na gone me ra tomika e dua na tikinipepa mai na taga e veisiga ka cakava na cakacaka ni veiqaravi oya ena vukuna e dua.

Mosaia 2:15–25

Meu kakua ni dokadokataka na noqu veiqaravi kei na cakacaka vinaka.

Vakasamataka na ivakarau mo vukei ira kina na gone o vakavulica me ra kila ni noda veiqaravi e sa dodonu me uqeti mai na noda lomani ira na tani kei na Kalou.

iTaviqaravi e Rawa ni Caka

• Sureti ira na gone me ra wasea na ivakarau era na vakamacalataka kina na vosa dokadoka, se vukei ira me ra kunea na ivakamacala ena ivolavosa. Vukei ira me ra vaqara ena Mosaia 2:15–24, na vuna e sega ni dokadokataka kina na Tui o Penijamini na nona veiqaravi ena vukudra na tani. Na cava na vuna me da qaravi ira kina na tani? Ni ra sa wasea oti na gone na nodra vakasama, vukei ira me ra kila ni sa dodonu me da segata ni qaravi ira na tani baleta ni da sa lomani ira kei na Kalou, sega ni baleta me da rairai vinaka kina e matadra na tamata.

• Kerei ira na gone me ra wasea na gauna eso a dokadoka se tukutukuni koya kina e dua me baleta e dua na ka. Na cava na vuna e cala kina me da dau dokadoka ena veigauna vakaoya? Sureti ira me ra vakayagataka na ivakasala mai na nona vosa na Tui o Penijamini ena Mosaia 2:15–24 me vukei ira ena nodra isaunitaro.

Mosaia 3:19

O Jisu Karisito e vakasavasavataki au mai na ivalavala ca ka vukei au meu dua na yalododonu.

Me rawa ni da vaka na Tamada Vakalomalagi, eda sega ni gadreva walega na veivakasavasavataki mai na noda ivalavala ca—sa dodonu me veisau na yaloda. Me vaka e vakavulica na Tui o Penijamini, eda na gadreva me da ulabaleta na noda gagadre ca ka yaco me yalododonu ena vuku ni nona Veisorovaki na iVakabula.

iTaviqaravi e Rawa ni Caka

• Droinitaka e rua na tamata ena papa ni volavola—e dua me “tamata vakayago” kei na dua tale me “yalododonu.” (O na gadreva beka mo vakamacalataka na vosa e rua oqo.) Wilika vata na Mosaia 3:19, ka sureti ira na gone me ra raica na veisau ena gadreva me cakava na tamata vakayago me rawa ni yaco me yalododonu. Na cava eso tale na vosa kei na malanivosa era na gadreva kina na veivuke na gone me ra kila?

• Era sa bau vukea mada o ira na gone o vakavulica na nodra itubutubu me vakarautaki e dua na kakana ena kena vakayagataki e dua na icakacaka ni kakana? Ke vakakina, e rawa ni o sureti ira me ra vakayagataka na Mosaia 3:19 me rawati kina e dua na “ituvatuva ni cakacaka” ena ivakarau e rawa ni da yaco kina me vakataki Jisu Karisito. Na cava na vuna e “isaluwaki” bibi duadua kina na Veisorovaki i Jisu Karisito?

Vakauqeta na Vuli e Vale

Sureti ira na gone me ra vakayagataka na tabana ni itaviqaravi ni macawa oqo me ra wasea kina ki na nodra matavuvale se itokani na sala era na muria kina na ivakaraitaki i Penijamini na Tui ka qaravi ira na tani.

Vakatorocaketaki Noda Veivakavulici

Dau yaga vei ira na gone na tokarua. Kua ni rere mo tokaruataka vakavica vata na itaviqaravi, vakauasivi vei ira na gone sobu. Na tokarua ena vukei ira na gone me ra nanuma na veika era vulica.