Minerva K. Teichert (1888–1976), Vosa ni Tatau i Penijamini na Tui, 1935, iboro waiwai ena papa masonite, 36 x 48 na idi. Brigham Young University ni Art

13–19 ni Epereli

Mosaia 1–3

“Vakasinaiti ena Loloma Vua na Kalou kei na Tamata Kecega”

E a solia e dua na inaki na Tui o Penijamini me volaitukutukutaki na veivakauqeti vakayalo eda sotava: “Ni na sega ni rawa vua na tamada, ko Liai, me nanuma rawa tiko na veika kece oqo, ka vakavulici iratou kina na luvena, kevaka a sega na nodra veivuke na peleti oqo” (Mosaia 1:4).

Vola na Veika o Vakauqeti Kina

Ni o rogoca na vosa na tui, o na vakasamataka beka na sala vakatui, vale vakatui, tamata talai, kei na dabedabe vakatui. Ena Mosaia 1–3, o na wilika kina me baleta e dua na mataqali tui e duatani. Me kua kina ni bula ena nodra buno na nona tamata, na Tui o Penijamini “sa cakacaka tiko mada ga e liga[na]” (Mosaia 2:14). Me kua ni ra qaravi koya na tani, e a veiqaravi vei ira na nona tamata ena “igu taucoko, kei na vakasama, kei na kaukauwa kecega sa solia vei [koya] na Turaga” (Mosaia 2:11). Na tui oqo e a sega ni vinakata me ra qaravi koya na nona tamata, ia, e a vakavulici ira me ra sokalou ki na dua na Tui e cecere cake vua, ni sa kila vinaka tu o koya ni sa “Turaga Kaukauwa o koya sa daulewa tiko” (Mosaia 3:5). Me vakataki ira na iliuliu qaqa ena matanitu ni Kalou, na vosa kei na ivakaraitaki ni Tui o Penijamini e dusi keda kivua na Tui Vakalomalagi, sai koya na iVakabula, o Jisu Karisito. E a vakadinadinataka na Tui o Penijamini “ni na lako sobu mai lomalagi” o Jisu “ka lako yani ena kedra maliwa na tamata, ka kitaka na veicakamana lelevu. … Ka raica, ena lako mai ko koya kivei ira na kai nona, me na yaco kina na veivakabulai vei ira na luve ni tamata ena vakabauti ni yacana” (Mosaia 3:5, 9).

Vakasama eso ni Vuli iVolanikalou Yadua

Mosaia 2:1–9

Na ciqomi ni vosa ni Kalou e gadrevi kina na vakavakarau.

Ena gauna sa talatala yani kina na Tui o Penijamini ni vinakata me vosa vei ira na nona tamata, e lewe vuqa era lako mai “ka sa sega ni wiliki rawa na kedra lewe levu” (Mosaia 2:2). Era a lako mai, baleta beka, na nodra vakavinavinakataka kei na nodra lomana na nodra iliuliu. Ia e bibi cake sara, era a lako mai me ra mai vulica na vosa ni Kalou.

Ni o wilika na Mosaia 2:1–9, vakaraica na veika era cakava na tamata me vakaraitaka na nodra vakamareqeta na vosa ni Kalou. Na cava e a tukuna vei ira na Tui o Penijamini me ra cakava me vakarautaki ira me ra rogoca na vosa ni Kalou? (raica na tikina e 9). Ena rawa vakacava ni o vakarautaki iko vakavinaka cake mo ciqoma na vosa ni Kalou ena nomu vuli yadua kei na vuli vakavuvale kei na gauna ni soqoni ni Lotu?

Raica talega na Maciu 13:18–23; Alama 16:16–17.

Mosaia 2:10–26

Niu sa qaravi ira na tani, au sa qarava tale tiko ga na Kalou.

E dredre beka vei iko mo kunea na gauna mo veiqaravi rawa kina se o diva tu ni na kauta mai vei iko na reki na nomu veiqaravi? Na cava beka o nanuma ni na tukuna na Tui o Penijamini kevaka o taroga vei koya na cava beka na vuna e veiqaravi kina ena nona “igu, vakasama, kei na kaukauwa” kece? (Mosaia 2:11). Ni o wilika na Mosaia 2:10–26, raica mai na dina eso e a vakatavulica na Tui o Penijamini me baleta na veiqaravi ka vakasamataka vakatitobu na sala o na rawa ni vakayagataka kina ena nomu bula. Me ivakaraitaki, na cava e kena ibalebale vei iko mo kila ni gauna o qaravi ira kina na tani, o sa qarava tale tikoga na Kalou? (raica na Mosaia 2:17). Vakasamataka e dua na sala o rawa ni qarava kina e dua na tamata ena macawa oqo!

Raica talega na Maciu 25:40.

Niu sa qaravi ira na tani, au sa qarava tale tikoga na Kalou.

Mosaia 3:1–20

Au rawa ni uabaleta na tamata vakavuravura ka yaco meu yalododonu ena Veisorovaki i Jisu Karisito.

Na Tui o Penijamini, me vakataki ira kece na parofita, a vakadinadinataki Jisu Karisito me “bokoci rawa kina na nodra ivalavala ca, ka ra na reki ena marau levu” na nona tamata (Mosaia 3:13). E a vakatavulica talega o koya ni iVakabula, ena Nona Veisorovaki, e sega walega ni vakasavasavataki keda ia e solia talega vei keda na kaukauwa me biuta tani na “tamata vakavuravura” ka yaco me “yalododonu” (Mosaia 3:19; raica talega na iDusidusi ni iVolanikalou, “Tamata Vakavuravura,” scriptures.ChurchofJesusChrist.org).

E vakamacalataka o Elder David A. Bednar: “Ena Veisorovaki nei Jisu Karisito e vakarautaka na kaukauwa ni veivakasavasavataki ka veivueti ena vukei keda meda vorata rawa kina na ivalavala ca kei na kaukauwa veivakatabui ka veivaqaqacotaki ena vukei keda meda tamata uasivi cake sara mai na kena eda saga voli mai ena noda kaukauwa ga. Na Veisorovaki tawamudu sa baleta na tamata ivalavala ca kei koya e ivalavala dodonu” (“Na Liga Savasava kei na Yalo sa Savasava,” Ensign se Liaona, Nove. 2007, 82).

Oqo eso na taro mo vakasamataka vakatitobu ni o wilika na ivakadinadina i Penijamini na Tui me baleta na iVakabula ena Mosaia 3:1–20:

• Na cava au vulica mai na veitikina oqo me baleta na iVakabula kei na Nona ilesilesi?

• Esa vukei au vakacava o Jisu Karisito meu uabaleta na ivalavala ca? Esa vukei au vakacava o Koya me veisautaka na noqu ituvaki ka yaco meu yalododonu vakalevu cake?

• Na cava au vulica mai na Mosaia 3:19?

Mosaia 3:8

Na cava e vakatokai Jisu kina na Tui o Penijamini me “Tama ni lomalagi kei vuravura”?

E vakamacalataka o Peresitedi Josefa F. Simici: “O Jisu Karisito, eda kila kece ni o Jiova, e liga ni cakacaka ni Tamada, o Iloimi, ena cakacaka ni veibuli. … Me vaka e Dauveibuli o Jisu Karisito, e dau kacivi wasoma talega me Tamada vakalomalagi kei vuravura … ; ka tawamudu na ivakatagedegede ni nona veibuli ka donu kina na nona kacivi tiko me Tamada Tawamudu ni lomalagi kei vuravura” (Nodra iVakavuvuli na Peresitedi ni Lotu: Josefa F. Simici [1998], 357).

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Mosaia 1:1–7

E vakalougatataki ira vakacava na tamata i Penijamini na Tui na peleti parasa kei na peleti i Nifai? E vakalougatataka vakacava na noda matavuvale na ivolanikalou?

Mosaia 2–3

Ena rawa ni dua na ka ni lasa ki na nomu vuvale na kena buli e dua na vosa vakatui nei Penijamini na Tui. E rawa ni dou cakava e dua na tavata cere lailai ka qai vakatara me ra wilika yadudua mai dela ni tavata oya na lewe ni vuvale na vosa nei Penijamini na Tui. Na vo ni vuvale e rawa ni vakarorogo mai na loma ni dua na valelaca tara vakarawarawa.

Mosaia 2:9–19

Na cava eda vulica me baleta na veiqaravi mai na ivakavuvuli kei na ivakaraitaki i Penijamini na Tui? Na cava eda vakauqeti meda cakava?

Mosaia 2:15–25

Ena rawa beka ni vinaka ki na nomu vuvale me dou veitalanoataka baleta na yalomalumalumu? Na cava e a sega ni dokadokataka kina na Tui o Penijamini na veika kece esa cakava oti o koya? Na cava eda rawa ni vulica mai na nona ivakavuvuli me baleta na noda veiwekani kei na Kalou?

Mosaia 2:36–41

Na cava e a vakavulica na Tui o Penijamini me baleta na isau ni noda kila na dina ka da sega ni bulataka tiko? Na cava e vakavulica o koya me baleta na noda rawa ni ciqoma na marau dina?

Mosaia 3:19

Na cava eda gadreva meda cakava meda rawa ni yalododonu? Na ivakarau cava soti mai na tikina oqo e rawa nida vakanamata kina meda vakatorocaketaka vakavuvale?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Vakarautaka na lalawa e rawa ni o yacova. Ni ko vakayagataka e vica ga na miniti ena dua na siga mo vulica na ivolanikalou ena rawa ni vakalougatataka na nomu bula. Yalataka mo vuli ena veisiga, ka vakasaqara na sala me vakananumi iko kina me baleta na nomu yalayala.

Nona Vosa o Penijamini na Tui, mai vei Jeremy Winborg