Sa Vakavulici Ira na nona tamata na Tui o Penijamini

Ni Ko ni sa Qarava tiko na Nomuni Kalou, mai vei Walter Rane

Epereli 20–26

Mosaia 4–6

“Dua na Veisau Levu”

Ni o wilika ena yalomasumasu ka vakasamataka vakatitobu na Mosaia 4–6, vakarogoca vakavinaka na veivakayarayarataki ni Yalo Tabu. Na veika vinaka cava so o sa vakauqeti mo cakava? (raica na Mosaia 5:2).

Vola na Veika o Uqeti Kina

O sa bau vakarogoca e dua me vosa ka o qai vakila na veivakauqeti mo veisautaka nomu bula? De o sa nanuma beka, baleta na veika o rogoca, me sa veisau vakalailai nomu bula—se veisau vakalevu sara. Na ivunau ni Tui o Penijamini e vakatoka oya, kei na dina e vakavulica e vakatoka oya na kena veivakayarayarataki vei ira na tamata era rogoca. E wasea kei ira na tamata na Tui o Penijamini e dua na ka e vakavulica vei koya na agilosi—ni vakavotukana na veivakalougatataki talei ena “dra ni veisorovaki i Karisito” (Mosaia 4:2). Na nona itukutuku e veisautaka taucoko na nodra rai me baleti ira vakataki ira (raica na Mosaia 4:2), veisautaka nodra gagadre (raica na Mosaia 5:2), ka vakauqeti ira me ra veiyalayalati kei na Kalou ni ra na dau cakava na Lomana (raica na Mosaia 5:5). E vakatoka oqo na kena tarai ira na tamata na nona vosa na Tui o Penijamini. Ena tarai iko vakacava?

ivakatakilakila ni vuli yadua

Vakasama eso ni Vuli iVolanikalou Yadua

Mosaia 4

Ena vuku i Jisu Karisito, sa rawa ni vosoti na noqu ivalavala ca ka veivosoti talega.

E sega ni ka rawarawa na noda vorata na tamata vakavuravura. E gadrevi sara kina na gugumatua me yaco “me dua na yalododonu ena vuku ni isoro i Karisito na Turaga” (Mosaia 3:19). Ena so na gauna, ena gauna saraga o vakila ni sa vosoti nomu ivalavala ca, o na sasaga dredre beka me tikoga kei iko na veika oqori ka mo muria na sala ni yalododonu. E vakatavulici ira na nona tamata na Tui o Penijamini na sala me tiko ruarua na ciqoma ka vakayagataka me vosoti kina na ivalavala ca ka bula tikoga vaka e dua na yalododonu. Ni o vulica na wase 4 ni Mosaia, ena rawa ni o tarogi iko na mataqali taro vakaoqo:

Tikina e 1–12:Na veivakalougatataki cava e kauta mai vei ira na nona tamata na Tui o Penijamini na vosoti ni nodra ivalavala ca? Na cava e vakatavulica vei ira na Tui o Penijamini me vukei ira me ra vakayagataka na vosoti ni nodra ivalavala ca? Na cava e vakavulica o koya me baleta na noda rawa ni ciqoma na veivakabulai? Raica matua na veika e tukuna na Tui o Penijamini meda “nanuma vakakina” (tikina 11). Na cava o vakauqeti kina mo nanuma tikoga na veika oqo?

Tikina e 12-16:Ena veitikina oqo, na cava ena yaco ena noda bula kevaka eda vakayacora na veika oqo tikina 11? O sa bau vakila na veisau oqo ena nomu bula? Era veisemati vakacava kei na veisau e vakamacalataki ena Mosaia 3:19?

Tikina e 16–30:E rawa vakacava ni veivuke ena kena vosoti na noda ivalavala ca na noda veiwasei kei ira na dravudravua? Ena rawa vakacava ni o bulataka na tikina 27 ki na nomu sasaga mo va-Karisito?

Raica talega na David A. Bednar, “Ka Na Bokoci na Nomuni Valavala Ca,” Ensign se Liaona, Me 2016, 59–62; Dale G. Renlund, “Maroroi ni Veisau Levu ni Yalo,” Ensign se Liaona, Nove. 2009, 97–99.

Mosaia 5:1–7

Na Yalo ni Turaga e rawa ni vakavuna e dua na veisau levu e yaloqu.

E sega ni ka vou me ra kaya na tamata, “Au sa sega ni rawa ni veisau. Au sa na vakatu ga oqo.” Ni vakatauvatani, ena veika era sotava nona tamata na Tui o Penijamini, e vakaraitaka vei keda na sala ena rawa ni cakacaka kina na Yalo ni Turaga me veisau dina sara na yaloda. E vakatavulica o Peresitedi Russell M. Nelson: “Ena rawa nida veisautaka na noda ivakarau. Na noda gagadre sara mada ga e rawa ni veisau. … Na veisau dina—veisau tudei—e rawa walega ni yaco mai ena kaukauwa veivakabulai, veivakasavasavataki, ka veivakaukauwataki ni Veisorovaki i Jisu Karisito. … Na kosipeli i Jisu Karisito e kosipeli ni veisau!” (“Vakatulewa me baleta na Tawamudu,” Ensign se Liaona, Nove. 2013, 108).

Ni o wilika na veisau era sotava na tamata nei Tui o Penijamini, vakasamataka na “veisau levu” e rawa ni yaco ka na veimuataki ki na saumaki dina e yaco—se rawa ni yaco—ena nomu bula. Esa bau yaco eso na gauna “lelevu” ka veimuataki ki na veisau ni yalomu, se e yaco ga vakamalua na nomu saumaki?

Raica talega na Isikeli 36:26–27; Alama 5:14; David A. Bednar, “Saumaki vua na Turaga,” Ensign se Liaona, Nove. 2012, 106–9.

E vakabula e dua na marama tauvimate o Karisito

E rawa ni veisautaka na yaloda kei na noda bula na iVakabula. Liga ni Veivakabulai, mai vei Adam Abram

Mosaia 5:5–15

Au taura vei au na yaca i Karisito ena gauna au vakayacora kina na veiyalayalati.

E dua na inaki e vinakata kina me vosa vei ira na nona tamata na Tui o Penijamini me solia vei ira “e dua na yaca.” Eso na Nifaiti ka so tale era kawa i Muleki, ia e sega ni yaca oqo e nanuma o koya. E sureti ira na tamata o koya me ra taura vei ira na “yaca i Karisito” me tiki ni nodra veiyalayalati ni talairawarawa vua na Kalou (Mosaia 1:11; 5:10). Na cava o vulica mai na Mosaia 5:7–9 e kena ibalebale ni taura vei iko na yaca i Karisito?

E vakatavulica o Elder D. Todd Christofferson, “Na ivurevure [ni kaukauwa vakayago kei na vakayalo] sai koya na Kalou. E rawa nida curuma yani na kaukauwa oqori ena Noda veiyalayalati” (“Na Kaukauwa ni Veiyalayalati,” Ensign se Liaona, Me 2009, 20). Ni o wilika na Mosaia 5:5–15, tuva na veivakalougatataki ni ena lako mai ki na nomu bula ni o maroroya nomu veiyalayalati o sa cakava kei na Kalou. E vukei iko vakacava na nomu maroroya tiko na veiyalayalati ena “veisau levu” e yaco vei iko mai vei Jisu Karisito kei na Nona Veiyalayalati?

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Mosaia 4:9–12

Ena rawa vakacava me “vakabauta na Kalou” vakataucoko na nomu matavuvale (Mosaia 4:9) kei na “mo nanuma vakakina, ka mo ni dau vakananuma tiko ga na cecere ni Kalou”? (Mosaia 4:11). Ena rawa ni wilika na lewe ni matavuvale na Mosaia 4:9–12 ka raica na veimalanivosa e vukea na tarai cake ni nodra vakabauta na Kalou. Ena rawa ni ra qai vola na veimalanivosa oqo ka veibiuyaka e loma ni vale me veivakananumi. Ena rawa ni vukei keda vakacava na veika oqo meda “marau ena veigauna kecega” ka “na dau bokoci tikoga na nomuni valavala ca”? (Mosaia 4:12).

Mosaia 4:14–15

Na cava eda vulica mai na veitikina oqo me baleta na veivala kei na veiba?

Mosaia 4:16–26

Ena sala cava beka eda tamata daukerekere kecega kina? Na cava e tukuna na veitikina oqo, me baleta na noda ivakarau vei ira na luveni Kalou? (Mosaia 4:26). O cei ena gadreva na noda veivuke?

Mosaia 4:27

Esa rui totolo beka na cici ni nomu matavuvale? Ena rawa beka ni o sureti ira na lewe ni vuvale me ra vakadikeva na nodra itaviqaravi ka qarauna me ra na yalodina tiko na yalomatua talega kina.

Mosaia 5:5–15

Na cava e vakatura me baleta na noda veiwekani kei Karisito na noda sa taura veikeda na Yacana? Ena rawa talega ni veivuke me veitalanoataki nai naki era dau vola kina na yacadra ena nodra iyaya. Ena rawa vakacava nida vakaraitaka nida “nona” na iVakabula?

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Noda Veivakavulici

Susuga e Dua na iTuvaki Veilomani. Na ivalavala ni nodra veimaliwai vakai ira ena rawa ni vakayarayarataka vakatitobu na yalo ni loma ni vale. Vukea na lewe ni vuvale taucoko me ra tauyavutaka na vale veilomani, veirokorokovi ka mera rawa ni vakila ni ra taqomaki ni ra wasea na veika era sotava, na loma tarotaro, kei na ivakadinadina. (Raica na Veivakavulici ena iVakarau ni iVakabula, 15.)

E vakani ira tiko na manumanu vuka ena loma ni bai o Karisito

Ena Nona Dauveikaroni, mai vei Greg K. Olsen