Karisito kei ira na iApositolo, mai vei Del Parson

30 ni Maji–12 ni Epereli

Siga ni mate

“Ena Tucake Tale ko Koya … ka Veivakabulai e Tabana”

Mai na veisiga me yacova mai na Sigatabu ni Siga ni mate, navuca me vakanamata na nomudou vuli ivolanikalou vakayadua, vakavuvale ni Vola i Momani kei na kena ivakadinadina kaukauwa ni bula, mate, Tucake tale, kei na veisorovaki mana i Jisu Karisito.

Vola na Veika o Uqeti Kina

Na iApositolo ni gauna makawa era doudou ena nodra ivakadinadina me baleti Jisu Karisito kei na Nona Tucake Tale. E Milioni vakamilioni era vakabauti Jisu Karisito ka sasaga me ra vakamuri Koya baleta na nodra vosa ena iVola Tabu. Ia, e so era na vakataroga, kevaka a iVakabula dina ni vuravura taucoko o Jisu Karisito, na cava era yalani kina o ira na Nona ivakadinadina kina vica ga na tamata era tikoga ena dua ga na wasewase lailai ni vuravura?

Na iVola i Momani e tu ka ikuri, ni vakadinadina veirawai ni o Jisu Karisito e iVakabula kei vuravura, ka “dau vakaraitaki koya vei ira na veimatanitu kecega” (ivakamacala taumada ni Vola i Momani) ka solia na veivakabulai vei ira kecega era lako mai Vua. Me kena ikuri, na ikarua ni vakadinadina oqo e vakamatatataka na ibalebale ni veivakabulai. Oqo na vuna e cakacaka kina vagumatua o Nifai, Jekope, Momani, kei ira kece na parofita me ra “cakacaka vagumatua me keimami ceuta na vei vosa oqo ena peleti”—me cauraki yani vei ira na kawa tamata era muri tiko mai ni o ira talega era “kila na veika baleti Karisito, ka tu … na inuinui ni nona lagilagi” (Jekope 4:3–4). Ena gauna ni Siga ni mate oqo, vakasamataka vakatitobu na vei ivakadinadina era tiko ena iVola i Momani ni kaukauwa ni Veisorovaki i Karisito e vaka raraba ka vakayadua talega—ni vueta tu na vuravura taucoko kei iko talega.

Vakasama eso ni Vuli iVolanikalou Yadua

2 Nifai 9:6–15, 22; Alama 11:41–45; 40:21–23; 3 Nifai 26:4–5

Baleta na Tucake tale nei Jisu Karisito, eda na tucake kece tale na tamata.

E sa itovo tudei tu me dau vakasamataki vakatitobu na Tucake tale nei Jisu Karisito ena Siga ni mate, ia na cava dina na kena ibalebale na tucake tale? Na cava e so na rai momona e tiko ena iVola i Momani me baleta na tucake tale? De na rawa beka ni tiki ni nomu marautaka tiko na Siga ni mate na nomu tuva na dina me baleta na tucake tale o kunea ena 2 Nifai 9:6–15, 22; Alama 11:41–45; 40:21–23; kei na 3 Nifai 26:4–5. E rawa talega ni o vola na cava o nanuma kina ni bibi me kilai na dina eso oqo.

O na raica talega ni dina baleta na Tucake tale e dauvakavulici kei na dina eso baleta na iOtioti ni Veilewai. Vakasamataka vakatitobu na veika e vakatavulica vei iko me baleta na bibi ni Tucake tale ena ituvatuva ni veivakabulai.

Raica talega na Luke 24:36–43; Cakacaka 24:15; 1 Korinica 15:12–23.

Mosaia 3:7; 15:5–9; Alama 7:11–13

E taura vei Koya na iVakabula na noqu ivalavala ca, mosi, kei na noqu malumalumu.

E vakavulica vakamatata na iVola Tabu ni veisorovaki i Jisu Karisito e baleta na noda ivalavala ca. Ia na iVola i Momani, e vakarabailevutaka na noda kila me baleta na isoro kei na vakararawataki i Karisito ena sala e bibi. E rawa ni o kunea eso na ivakavuvuli oqo ena Mosaia 3:7; 15:5–9; kei na Alama 7:11–13. Ni o wilika oti na veitikina oqo, navuca mo vola eso na ka o sa kunea ena dua na ilavelave me vakataka oqo:

Na cava e vakararawataki kina na iVakabula?	Na cava na vuna e vakararawataki kina o Koya?	Na cava na kena ibalebale oqo vei au?
Na cava e vakararawataki kina na iVakabula?	Na cava na vuna e vakararawataki kina o Koya?	Na cava na kena ibalebale oqo vei au?

Raica talega na Aisea 53; Iperiu 4:14–16.

Kecisemani, mai vei Michael T. Malm

Mosaia 5:1–2; 27:8–28; Alama 15:3–12; 24:7–19

Na Veisorovaki i Jisu Karisito e vakasavasavataki au ka vukei au meu taucoko.

E rawa ni tukuni ni Vola i Momani e dua na itukutuku levu ni tamata era veisau baleta na Veisorovaki i Jisu Karisito. Na kena dina, eso vei ira na tamata oqo era vakayacora na ivalavala ca lelevu ka nodra meca na tamata ni Kalou ni se bera ni qai cakacaka vei ira na kaukauwa ni Vakabula me yaco vei ira veisau levu ka vakabauti Koya. E rawa ni o wilika eso na veika era sotava oqo ena Mosaia 5:1–2; 27:8–28; kei na Alama 15:3–12; 24:7–19; ena rawa talega ni o vakasamataka tale eso na ivakaraitaki mo vuli talega mai kina. Na cava o rawa ni raica e tautauvata mai na veika era sotava oqo? Na cava na duidui o raica? Na iwalewale cava e vakavulica vei iko na itukutuku eso oqo ena kena rawa ni veisautaki iko na Veisorovaki ni Vakabula?

Raica talega na Alama 5:6–14; 13:11–12; 18; 19:1–16; 22:1–26; 36:16–21; Ica 12:27; Moronai 10:32–33.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o marautaka tiko na Siga ni mate kei na nomu vuvale, vakasaqara na sala e rawa ni dou vulica vata me baleta na iVakabula kei na Nona Veisorovaki, ka oka kina na Tucaka tale. Oqo e vica na vakasama.

3 Nifai 11; 17

Eso na vuvale era sa kunea na kena vulici na itukutuku me baleta na tucake tale kei na veisiko ni Vakabula ki Amerika e vakaibalebale vakalevu sara ena gauna ni Siga ni mate. Vakayaloqaqataki ira na lewe ni vuvale me ra raitayaloyalotaka ena vakacava tu beka me da tara na Nona we ni vako (raica na 3 Nifai 11:14–15) se me dua vei ira na gone e vakalougatataka o Koya (raica na 3 Nifai 17:21). Ena rawa beka ni vakatitobutaka vakacava na nomu vakavinavinaka ki na Tucake tale ni Vakabula na itukutuku oqo? E dua na droini e vakaraitaka na veika oqo e sala vata tiko mai kei na idusidusi oqo; eso tale e rawa ni kune ena ChurchofJesusChrist.org. E rawa talega ni marautaka na nomu lewe ni matavuvale me ra droinitaka na iyaloyalo ni veika era wilika.

Tukutuku mai na Koniferedi Raraba

Ena vuqa na veiyasai vuravura, na koniferedi raraba ni Epereli ena yabaki oqo e yaco tiko ena mua ni macawa se bera na Siga ni mate. De na rawa ni veivuke na vakarorogo ki na tukutuku ena koniferedi raraba mo dou vakanamata ka vakananuma na iVakabula ena Siga ni mate oqo. Me ivakaraitaki, e rawa ni o sureti ira na lewe ni nomu vuvale me ra vakarogoca na itukutuku mai na koniferedi ka vakadinadinataki Jisu Karisito kei na Nona Tucake tale—vakabibi mai vei ira na iApositolo, era ivakadinadina digitaki i Jisu Karisito. Ena qai rawa ni dou taleva tale na veitukutuku eso oqo ka raica na ivakavuvuli e vaqaqacotaka na nomu ivakadinadina ni iVakabula.

“Se Bula Tiko Na Karisito: Na Nodra iVakadinadina na iApositolo”

Wilika vakamatavuvale, na “Se Bula Tiko na Karisito: Na Nodra iVakadinadina na Apositolo” (Ensign se Liaona, Me 2017, raica talega na tabana e loma ChurchofJesusChrist.org) ka sureti ira yadua na lewe ni vuvale me digia e dua nai tukutuku ni Siga ni Mate mai na ivakadinadina me wasei vei ira na tani. Me ivakaraitaki, e rawa ni o tauyavutaka na ivola kabi me vakaraitaki ena tabana ni veimaliwai raraba ena initaneti, ena mata ni dua na katuba, se ena nomu katuba leka.

Vidio: Special Witnesses of Christ

ChurchofJesusChrist.org kei na Gospel Library app e tiko kina e dua na vidio yacana na Special Witnesses of Christ. E tiko kina na vidio yadua ni lewe ni Mataveiliutaki Taumada kei na Kuoramu ni Apositolo Le Tinikarua era wasea tiko na nodra ivakadinadina i Jisu Karisito. E rawa ni o sarava e dua se sivia na vidio oqo ka qai veitalanoataka na cava era vakavulici keda kina o ira me baleta na veika sa cakava vei keda na iVakabula.

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Noda Veivakavulici

Bulataka na kosipeli i Jisu Karisito. E rairai ni ka bibi duadua o rawa ni cakava vakaitubutubu o ya mo bulataka na kosipeli ena yalomu taucoko. Oqo na sala vinaka duadua mo rawata kina na veitokani ni Yalo Tabu. E sega ni gadrevi mo uasivi, mo sasaga tikoga vagumatua mo vakayacora tiko ena nomu vinaka duadua ka vasaqara tiko na veivosoti ena Veisorovaki ni Vakabula. (Raica na Veivakavulici ena iVakarau ni iVakabula, 13–14.)

Na iYaloyalo i Karisito kei ira na Nifaiti mai vei Ben Sowards