Era dro na tamata i Limiai

Minerva K. Teichert (1888-1976), Na Dro i Tui Limiai kei ira na Nona Tamata, 1949-1951, waiwai ena mesanaiti, 35 7/8 x 48 na idi. Univeisiti ni Cakacakaniliga na Brigham Young, 1969.

11–17 ni Me.

Mosaia 18–24

Eda sa Ia Oqo na Veiyalayalati kei Koya

Ni o wilika na Mosaia 18–24, vakasamataki ira na gone o vakavulica. E rawa ni vukei iko na Yalo Tabu mo kila na dina ena vakaibalebale vei ira.

Vola na Veika o Uqeti Kina

ivakatakilakila ni veiwasei

Sureta na Veiwasei

Vakaraitaka na kena iyaloyalo e dua e papitaiso tiko, ka sureti ira na gone me ra wasea e dua na ka era kila me baleta na papitaiso. E rawa ni ra wasea e dua na ka era vulica ni ra wilika tiko na Mosaia 18–24 vata kei ira nodra matavuvale, ni ra tiko ena dua na papitaiso, se ena dua tale na soqoni.

ivakatakilakila ni veivakavulici

Vakavulica na iVunau: Gone Sobu

Mosaia 18:7–16

Niu sa papitaiso, au sa vakayacora e dua na veiyalayalati kei na Kalou.

E dua na sala bibi duadua me da vukei ira kina na gone ena nodra vakarau me ra papitaiso sai koya me ra vakavulici baleta na veiyalayalati era na cakava ni ra papitaiso.

iTaviqaravi e Rawa ni Caka

• Railesuva na italanoa i Alama kei ira na nona tamata ena Wai ko Momani ni o vakayagataka na Mosaia 18:7–16 se “Chapter 15: Alma Teaches and Baptizes” (Book of Mormon Stories, 43–44, se na kena vidio ena ChurchofJesusChrist.org). Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, me ra qai tukuna vei iko na gone na ka era kila baleta na italanoa.

• Vakayagataka na Mosaia 18:8–10 me idusidusi, vakavulica vei ira na gone ena nomu vosa eso na ka era na yalataka me ra cakava ni ra sa papitaiso. Kena ivakaraitaki, era na yalataka me ra muria na Tamada Vakalomalagi kei Jisu ena nodra vakacegui ira na tamata era rarawa tu. Wasea na italanoa ena ivakarau o rokova tiko kina na yalayala oqo o iko se dua o kila. (Raica talega na V&V 20:77, 79; Carole M. Stephens, “Sa Kena iNaki Meda Reki Vakalevu,,” Ensign se Liaona, Nove. 2013, 115–17

• Vakamacalataka ni gauna eda papitaiso kina, sa tu talega nona yalayala vei keda na Tamada Vakalomalagi. Wasea na yalayala eso oqo, me vaka e vakamacalataki ena Mosaia 18:9–10.

Mosaia 18:17–28

Niu sa papitaiso, sa yaco meu lewena na Lotu i Jisu Karisito.

Vukei ira na gone me ra kila na ibalebale ni noda yaco me da lewe ni Lotu ena papitaiso kei na veivakadeitaki.

iTaviqaravi e Rawa ni Caka

• Sureta e dua e se qai papitaiso walega me wasea na veika a sotava. Wilika na Mosaia 18:17, ka vakamacalataka ni gauna eda papitaiso kina sa yaco me da lewe ni Lotu i Jisu Karisito ni Yalododonu Edaidai ka yalataka me da muri Jisu.

• Vakaraitaka vei ira na gone na iyaloyalo e matataka na veika e vakamacalataki ena Mosaia 18:17–28. Kena ivakaraitaki, na iyaloyalo Veitabaki ki na Matabete (iVola ni iYaloyalo Vakosipeli, naba 106) e rawa ni matataka na tikina 18, kei na iyaloyalo na Saumi ni iKatini (iVola ni iYaloyalo Vakosipeli, naba 113) e rawa ni matataka na tikina 27–28. Me ra vakamacalataka na gone na veika era raica ena iyaloyalo, ka vakayagataka na iyaloyalo kei na tikina eso me vukei ira ni raica na ibalebale ni nodra sa lewe ni Lotu.

papitaiso e wasawasa

Eda veiyalayalati kei na Kalou ena gauna eda papitaiso kina.

Mosaia 24:8–17

E rawa ni vakamamadataka na noqu icolacola na Kalou.

Na gauna cava beka sa bau vakamamadataka kina na nomu icolacola na Kalou? Vakasamataka na sala e rawa ni o wasea kina na veika o sotava kei na nomu ivakadinadina vei ira na gone.

iTaviqaravi e Rawa ni Caka

• Vukei ira na gone me ra vakasamataka na ivukivuki rawarawa e rawa ni ra cakava ni o tukuna tiko na veika a yaco vei ira na tamata i Alama ena Mosaia 24:8–17. Dusia ni mai na nona digitaka o Alama me muria na ivakavuvuli i Apinatai me baleti Jisu, e sa sotava o koya kei ira na nona tamata na itovo ca, ia e sega ni mudu na nodra vakabauti Jisu tikoga.

• Wilika na Mosaia 24:14–15 vei ira na gone. Vakasinaita e dua na kato ena veiyaya bibi (me matataka na icolacola), ka sureta e dua na gone me taura na kato. Vakamacalataka ni da rarawa, tauvimate, se sotava eso tale na leqa, e sa na vaka tu ni da colata voli e dua na ka bibi. Sureti ira na gone me ra veivukevuke ena nodra vukea na gone o ya me ra taura na kato me rawa ni mamada kina. Vakamacalataka ni rawa ni vakamamadataka na Tamada Vakalomalagi na noda icolacola ni da segata na Nona veivuke ena masu, vukei ira na tani, kei na so tale.

ivakatakilakila ni veivakavulici

Vakavulica na iVunau: Gone Qase Cake

Mosaia 18:7–16

Niu sa papitaiso, au sa vakayacora e dua na veiyalayalati kei na Kalou.

E rawa vakacava ni o vukei ira na gone o vakavulica me ra kila na veiyalayalati eda vakayacora ena papitaiso?

iTaviqaravi e Rawa ni Caka

• Solia vei ira yadua na gone e dua na tikinipepa. Wilika vata na Mosaia 18:8–10, ka sureti ira na gone me ra vola se droinitaka ena dua na yasa ni nodra pepa na yalayala eda vakayacora ena papitaiso kei na, yasana kadua, na veivakalougatataki e yalataka vei keda na Tamada Vakalomalagi. Vakayaloqaqataki ira mera wasea ki na kalasi na veika era sa raica. Ni ra veiwasei tiko, taroga na taro me vaka: Me da “tagi vata vakacava kei ira era sa tagi”? Na cava na kena ibalebale mo vakadinadinataka na Kalou “ena veivanua kecega”? (tikina 9). Na cava eda rawa ni cakava me da rokova tiko kina noda veiyalayalati?

• Kerei ira na gone sa papitaiso oti me ra wasea na ka era nanuma rawa baleta na nodra papitaiso. Na cava e duatani kina na siga oya? E vakacava tu na ka era vakila? Vakamacalataka ena Sigatabu yadua era sa vakavouia na nodra veiyalayalati ni papitaiso ena nodra vakayagataka na sakaramede. Vukei ira na gone me ra vakatauvatana na veiyalayalati ni papitaiso e vakamacalataki ena Mosaia 18:8–10 kei na masu ni sakaramede (raica na V&V 20:77, 79). E rawa vakacava ni da cakava na sakaramede me gauna digitaki, gauna rokovi, me vaka ga na gauna eda papitaiso kina?

• Taroga e dua se qai saumaki wale mai me wasea na sala a vulica kina me baleta na Lotu kei na ivakarau ni lomana ena nona papitaiso. Me ra taro na gone, me vaka na cava a vukea na tamata oya me vakayacora na yalayala ena Mosaia 18:7–16.

Mosaia 18:17–28

Au sa lewena na Lotu i Jisu Karisito ni Yalododonu Edaidai.

O na vakauqeti ira vakacava na gone me ra vakavinavinakataka na veivakalougatataki ni nodra lewena na Lotu?

iTaviqaravi e Rawa ni Caka

• Sureti ira na gone me ra wilika na Mosaia 18:17–28, ka vaqara na ivakavuvuli ni Lotu i Karisito ena gauna i Alama e tautauvata kei na noda gauna. Vola nodra isaunitaro ena buloko se na bilo, me ra qai vakayagataka na gone me ra tara kina eso na ka me matataka na Lotu i Jisu Karisito.

• Laga vata kei ira na gone se wilika na vosa ni “The Church of Jesus Christ” (Children’s Songbook, 77), ka sureti ira me ra vakarogoca na veika eda yalataka me da cakava ni da lewe ni Lotu. Vukei ira me ra vakasamataka eso na sala e rawa ni ra rokova kina na yalayala eso oqo.

Mosaia 21:1–5, 13–16; 22:1–11; 24:8–22

E rawa ni vakamamadataka na noqu icolacola na Kalou.

Na kedra italanoa na tamata i Alama e rawa ni vakaraitaka vei ira na gone ni so na gauna e dau veivuke na Kalou ena nona vaqaqacotaki keda me da vosota rawa na noda veivakatovolei ka sega ni kauta tani. O na vukei ira vakacava me ra vuli mai na italanoa oqo?

iTaviqaravi e Rawa ni Caka

• Vukei ira na gone me ra raica na veika lelevu mai na kedra itukutuku na tamata i Limiai ena Mosaia 21:1–5, 13–16; kei na 22:1–11 kei ira na tamata i Alama ena Mosaia 24:8–22. Qai kerei ira na gone me ra droinitaka e dua vei ira na ka oqo. Sureti ira na gone me ra tuva vakadodonu na nodra droini me tukuni na italanoa. Ni ra vakayacora vakakina, vakadreta ni sa vukei ira na tamata na Kalou ni colata na nodra icolacola.

• Sureti ira na gone me ra wilika na Mosaia 21:14–15 kei na 24:13–14. A sauma vakacava na Turaga na nodra masu na tamata i Limiai kei na tamata i Alama? Kerei ira na gone me ra wasea na gauna eso era a masuta kina na veivuke ena dua na veivakatovolei ka qai vukei ira na Tamada Vakalomalagi, se wasea na veika o sa sotava.

ivakatakilakila ni vuli

Vakauqeta na Vuli e Vale

Sureti ira na gone me ra vakamacalataka vua e dua tale na ka era na yalataka se sa yalataka ni cakava me tiki ni nodra veiyalayalati ni papitaiso.

Vakatorocaketaki Noda Veivakavulici

Dau vakarorogo vei ira na gone. Kevaka era logaloga ca na gone, sa na rairai kena gauna me tovolei kina e dua tale na itaviqaravi se dua na taubale lekaleka, ena vakarokoroko. Ena dua tale na yasana, kevaka era sa kauwai ka vuli tiko, kakua ni vakaogai mo tomana ga ena kena tauri e levu cake na lewe ni lesoni.

tabana ni itaviqaravi: eda sa veiyalayalati ni da sa papitaiso