Minerva K. Teichert (1888–1976), Na Dro i Limiai na Tui kei na Nona Tamata, 1949-1951, iboro waiwai ena papa masonite, 35 7/8 x 48 na idi. Brigham Young University Museum of Art, 1969.

11–17 ni Me.

Mosaia 18–24

Ni Da Sa Ia Oqo na Veiyalayalati kei Koya

E vakatavulica o Peresitedi Thomas S. Monson, “Ni da wilika ka vakananuma vakatitobu na ivolanikalou, eda na vakila na vakasolokakana kamica ni Yalotabu ki na lomada” (“Eda Sega ni Lako Duadua Voli,” Ensign se Liaona, Nove. 2013, 122).

Vola na Veika o Vakauqeti Kina

Na itukutuku i Alama kei na nona tamata ena Mosaia 18; 23–24 e vakaraitaka nai balebale ni “curu mai ki na lomanibai ni Kalou” (Mosaia 18:8). Ena gauna era papitaiso kina, era a cakava na veiyalayalati kei na Kalou me ra “qaravi koya ka muria na nona ivunau” (Mosaia 18:10). E dina ni dua na cakacaka ni yalayala bibi ki na tamata yadua, e tiki talega ni veika me caka na nodra itovo ni veimaliwai vakaiira. Io, e dina sara, ni lakolako lesu vua na Tamada Vakalomalagi e baleti keda yadua, ka sega tale ni dua ena rawa ni maroroya na veiyalayalati vei keda, ia, e sega ni kena ibalebale oya nida tiko taudua. E gadrevi meda veivukei vakai keda. Nida lewe ni Lotu i Karisito, eda veiyalayalati meda qarava na Kalou ena noda veivukei ka veiqaravi ena sala oqo, “[meda] colata vata na nod[ra] icolacola” (Mosaia 18:8–10). E a tiko dina na nodra icolacola na tamata i Alama, me vakataki keda kece. Ka dua na sala e vukei keda kina na Turaga me “rawarawa vei [keda] na nod[a] icolacola” (Mosaia 24:15) oya na nona solia vei keda e dua na mataitikotiko ni Yalododonu era sa yalataka mera rarawa kei keda ka vakacegui keda, me vaka ga eda sa yalataka nida na cakava vei ira.

Vakasama eso ni Vuli iVolanikalou Yadua

Mosaia 18:1–17

Na papitaiso e oka kina na veiyalayalati meda qarava na Kalou ka vakadinadinataki Koya.

Mosaia 18:8–10 e tiko kina na ivakavuvuli i Alama me baleta na veiyalayalati ni papitaiso, se na yalayala eda cakava vua na Kalou ena papitaiso. Ni o wilika na veitikina oqo, vakasamataka vakatitobu na veitaro oqo:

• Na cava o vulica mai na veitikina oqo baleta na yalayala eso o vakayacora ena papitaiso? Na cava e yalataka vei iko na Kalou?

• E vakaveiwekanitaki vakacava na noda veiyalayalati meda qarava na Kalou (raica na tikina 10) ki na noda sasaga ni veiqaravi vakai keda? (raica na tikina 8–9).

• Na cava o sa cakava tiko mo maroroya na nomu yalayala?

• E vukei iko vakacava na maroroi ni nomu veiyalayalati ni papitaiso mo “vakasinaiti ena Yalo”? (Mosaia 18:14). E vukei iko vakacava na Yalo mo maroroya na nomu veiyalayalati?

Niu veiyalayalati kei na Kalou, au ciqoma na Nona veivakalougatataki.

Na itukutuku oqo e vakaraitaka talega na iwalewale dodonu ni veipapitaisotaki. Na cava o vulica ena tikina 14–17 me baleta na iwalewale dodonu ni veipapitaisotaki? Na cava tale o vulica me baleta na papitaiso ena Maciu 3:16; Roma 6:3–5; 3 Nifai 11:21–28; kei na Vunau kei na Veiyalayalati 20:72–74?

Raica talega na Vunau kei na Veiyalayalati 20:37, 77, 79.

Mosaia 18:17–30

E dodonu me ra duavata o ira na tamata ni Kalou.

Me vaka era a qai vulica o Alama kei na nona tamata, na vakamuri Jisu Karisito e okati kina na kena biu tani na ivakarau ni bula taleitaki ka taurivaki e dua e vou ka duatani. Ia o ira na tamata i Alama era veivakaukauwataki vakai ira ni ra sa tiki ni “lotu i Karisito” (Mosaia 18:17). E rawa ni vakauqeti iko vakacava na ivakavuvuli ena Mosaia 18:17–30 mo lewenilotu vinaka cake? Na cava o rawa ni cakava mo vukea na lewe ni nomu tabana levu se tabana me “semati na lomadra ena duavata kei na veilomani”? (Mosaia 18:21).

Raica talega na Henry B. Eyring, “Me Duavata na Yaloda,” Ensign se Liaona, Nove. 2008, 68–71.

Mosaia 19–20

Na nodra vosa na parofita ena vakayacori.

E a vakayacora o Apinatai eso na parofisai matata me baleta na veika ena yaco vua na Tui o Noa kei ira na nona tamata kevaka era sega ni veivutuni. Ia, kivei ira na so era sega ni vakabauta na parofisai eso oqo (raica na Mosaia 12:1–8, 14–15), vakabibi ni ra sa dau taqomaki ira rawa tiko na Nifaiti mai vei ira na Lemanaiti ena loma ni 50 na yabaki (raica na Mosaia 9:16–18; 11:19). Ia, na vosa kece ni parofita ena yaco vakaidina—ena noda gauna me vaka ga ena gauna i Apinatai.

Na cava o raica ena Mosaia 19–20 ka na vakavuna me vakaraitaka kina o Kitioni na kena sa mai yaco na parofisai i Apinatai? (raica na Mosaia 20:21). E vaqaqacotaka vakacava na itukutuku oqo na nomu vakabauta na veivakaroti kei na veivakasalataki ni parofita ni Kalou kei na nomu yalayala mo muria nodra vosa? Na gauna cava beka o sa raica kina me yaco na nodra vosa na parofita ena gauna oqo?

Mosaia 21–24

Na Kalou e rawa ni vakamamadataka na noqu icolacola.

Era yaco me bobula na tamata i Limiai kei Alama, e dina ga ni duidui nai naki kei na ituvaki ruarua. Na cava o vulica ni o vakatautauvatataka na itukutuku ni tamata i Limiai ena Mosaia 19–22 kei na tamata i Alama ena Mosaia 18; 23–24? E rawa ni o vakaraica talega na duidui ni walewale erau kau vakavesu kina, kei na nodra sereki e muri nai lawalawa e rua oqo. Ni o cakava oqo, vakasaqara na itukutuku e rawa ni yaga ki na nomu bula. Me ivakaraitaki, na cava o sa vulica mai na itukutuku eso oqo ka rawa ni vukei iko ena nomu icolacola?

Mosaia 23:21–24; 24:8-17

Au rawa ni nuitaka na Turaga.

E dina ga ni ra sa veivutunitaka na nodra ivalavala ca, o Alama kei ira na nona tamata era se tu ga vakabobula. E vakaraitaka na veika era sotava ni noda nuitaka na Turaga kei na noda bulataka tiko na noda veiyalayalati e sega ni tarova na dredre, ia e vukei keda meda uabaleta. Ni o wilika na Mosaia 23:21–24 kei na 24:8–17, toqa toka na vosa kei na veimalanivosa ena rawa ni vukei iko mo vulica mo nuitaka na Kalou, veitalia se ituvaki cava o tu kina.

Raica talega na Thomas S. Monson, “Au na Sega ni Weletaki Iko, se Biuti Iko,” Ensign se Liaona, Nov. 2013, 85–87.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Mosaia 18:1–4

E dua na ivosavosa e va oqo ni rawa ni o wilika na sore ni dua na apolo, ia e sega ni rawa ni o wilika na levu ni apolo e vua mai na dua na sorena. E dua ga na tamata e a ciqoma na ivakadinadina i Apinatai, ia na dua na tamata oqori—o Alama—e a vakayarayarataka e vuqa na tabatamata vaka-Nifaiti. E rawa ni o vakayagataka beka e dua na vuata ka vaka sorena mo vakaraitaka na ivakavuvuli oqo. E yaga vakacava na itukutuku oqo ki na noda matavuvale? Na cava e rawa ni da cakava meda wasea na noda ivakadinadina vei ira na tani?

Mosaia 18:8–10

Na cava eda rawa ni vulica me baleta na noda veiyalayalati ni papitaiso mai na veitikina oqo? (raica talega na V&V 20:73, 77–79). Na cava beka eda sa cakava tiko meda vakavakarau ki na papitaiso se na maroroi ni noda veiyalayalati ni papitaiso?

Mosaia 18:30

Na vanua cava so e vakaibalebale vakatabakidua vei keda baleta na veika vakayalo eda sa sotava e kea?

Mosaia 21:11–16; 24:10-15

Na cava eda vulica nida vakatautauvatataka na nodra tu vakavesu na tamata i Alama kei na tamata i Limiai?

Mosaia 21:15; 24:11-15

Na cava e vakavulica vei keda na veitikina oqo me baleta na sala eso e dau sauma mai kina na Turaga na noda masu?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Raica na gauna e ganiti iko. E dau rawarawa sara na vuli ni o rawa ni vulica na ivolanikalou ka sega ni vakaosoosotaki. Raica na gauna e veiganiti vei iko, ka qai cakava ena nomu vinaka taucoko mo na vuli tiko ena gauna vata oqori e veisiga yadua.

Na Wai ko Momani, mai vei Jorge Cocco