1 Ka sa yaco ni ko ira kece na Amelekaiti kei ira na Leimanaiti kei ira na Emulonaiti ena vanua ko Emuloni, kei na vanua ko Ilami, kei ira ena vanua ko Jerusalemi, ia me vakalekalekataki ga, ena veivanua vakavolivolita, ka ra sega ni saumaki mai ka se bera ni ra vakatokai ira me ra Anitai-Nifai-Liai, e ra sa vakayavalati mai vei ira na Amelekaiti kei na Emulonaiti me ra cudruvi ira na wekadra.

2 Ia era sa cudruvi ira vakalevu sara, ka sa yaco kina me ra tekivu vorata na nodra tui, ka sega ni vinakata me nodra tui; o koya era sa tauri iyaragi kina me ra valuti ira na Anitai-Nifai-Liai.

3 Oqo a sa solia na lewa ni matanitu na tui vua na luvena, ka vakatokai koya me yacana ko Anitai-Nifai-Liai.

4 Ia sa mate na tui ena yabaki vata era sa vakarau tiko mai kina na Leimanaiti me ra mai valuti ira na tamata ni Kalou.

5 Oqo ni sa raica ko Amoni kei iratou na tuakana kei ira ka lako vata mai kei koya, na nodra vakavakarau na Leimanaiti me ra mai vakarusai ira na wekadra, era sa qai lako mai ki na vanua ko Mitiani, ka sa sota mai kea ko Amoni kei ira kece na wekana; ka ra sa lako mai kea ki na vanua ko Isimeli me veivosaki kei Lamonai ka vaka kina na tuakana ko Anitai-Nifai-Liai, ena ka me ra kitaka me ra taqomaki ira kina mai vei ira na Leimanaiti.

6 E sega ni dua na tamata vei ira kecega era sa saumaki vua na Turaga era via tauri iyaragi tale vei ira na wekadra; e sega, era sega mada ga ni vakavakarau ki na ivalu; io, na nodra tui talega sa vakaroti ira me ra kakua ni kitaka vakakina.

7 Ia, sai koya oqo na veivosa ka tukuna vei ira na nona tamata me baleta na ka oqo: Oi kemuni na wekaqu, au sa vakavinavinaka vua na noqu Kalou, ni sa yalololoma ka talai ira mai na wekada, ko ira na Nifaiti, me ra mai vunau vei keda me da kila kina ni sa sega ni dodonu na nodra ivakarau na noda qase daucaka ca.

8 Ia raica, au sa vakavinavinaka vua na noqu Kalou cecere ni sa solia vei keda e dua na iwase ni Yalona me vakalomavinakataki keda, ka da sa veimaliwai kina kei ira na wekada, ko ira na Nifaiti.

9 Ia raica, au sa vakavinavinaka tale ga vua na noqu Kalou, ena noda sa veimaliwai rawa oqo, me rawa ni da kila kina na noda ivalavala ca, kei na vuqa na laba e da sa vakayacora oti.

10 Ka’u sa vakavinavinaka tale ga vua na noqu Kalou, io, na noqu Kalou cecere, ni sa solia me da veivutunitaka na veika oqo, ka vakakina na nona sa vosoti keda ena noda ivalavala ca kei na laba eda a daukitaka tiko, ka bokoca tani mai yaloda na noda cala, ena vuku ni nona vinaka na Luvena.

11 Ia oqo raica, oi kemuni na wekaqu, me vaka ni sai koya oqo na ka e da rawa ni vakayacora (me vaka ni da sa tamata lako sese mai vei ira na tamata kecega) sa kilikili sara me da veivutunitaka na noda ivalavala ca kei na laba eda a dau kitaka, ka laiva na Kalou me kauta tani mai yaloda, ni sai koya ga na ka e rawa me da kitaka oya me da veivutuni ena mata ni Kalou me rawa ni kauta tani ko koya na noda dukadukali—

12 Oqo, oi kemuni na wekaqu lomani, me vaka ni sa kauta tani na Kalou na noda dukadukali, ka sa serau mai na noda iseleiwau, me da kakua sara ni vakadukadukalitaka tale ena nodra dra na wekada.

13 Raica, au sa kaya vei kemuni, me da maroroya mada na noda iseleiwau me kakua sara ni duka mai na nodra dra na wekada; ia kevaka eda sa vakadukadukalitaka tale na noda iseleiwau sa na sega ni vakaserautaki tale ena nona dra na Luvena na noda Kalou Cecere, ka na mai vakadavei me veisorovaki ni noda ivalavala ca.

14 Ia sa yalololoma sara vei keda na Kalou cecere, ka vakatakila vei keda na veika oqo me da kakua kina ni rusa; io, sa vakatakila taumada na veika oqo vei keda, baleta ni lomana na yaloda me vaka na nona lomani ira na luveda; o koya, sa talai ira mai kina na nona agilosi ena nona loloma cecere, me ra vakatakila vei keda kei ira na noda itabatamata mai muri na tuvatuva ni veivakabulai.

15 Ia, sa yalololoma sara na noda Kalou! Ia raica oqo, ni sa rui ka bibi me da kauta laivi na dukadukali mai vei keda, ka vakasavasavataka na noda iseleiwau, me da vunitaka me savasava tikoga, me ivakadinadina vua na noda Kalou ena siga mai muri, se ena siga me da na mai duri tu kina e matana me da na lewai, me vaka ni da sa sega ni vakadukadukalitaka na noda iseleiwau ena nodra dra na wekada, mai na gauna e solia kina vei keda na nona vosa, ka sa vakasavasavataki keda kina.

16 Ia oqo, oi kemuni na wekaqu, kevaka era sa vakasaqara ko ira na wekada me ra vakarusai keda, raica, e da na vunitaka na noda iseleiwau, io, me da buluta ena qele, me rawa ni ra savasava tikoga, me ivakadinadina ena siga mai muri, ni da a sega ni vakayagataka; ka kevaka era na vakarusai keda ko ira na wekada, raica, e da na lako vua na noda Kalou ka vakabulai.

17 Ka sa yaco ni sa tinia na nona vosa na tui, era sa binia vata na nodra iseleiwau, kei na nodra iyaragi kecega ni vakadave dra, ko ira na tamata ka ra sa soqoni vata mai, ka buluta ena qara titobu.

18 Ia era sa kitaka oqo, ni ra sa nanuma me ivakadinadina vua na Kalou, kei ira tale ga na tamata, ni ra na sega tale ni tauri iyaragi me ra vakadave dra kina; a ra sa bubului ka yalayala kina vua na Kalou, ni rawarawa me ra soli ira me ra mate ia me ra kakua ga ni vakadavea na nodra dra na wekadra; me ra kakua ni taura vakatawadodonu mai vei ira na wekadra, ia, me ra dausoli ka ga vei ira; me ra dau cakacaka sara vagumatua, ia, me ra kakua ni vakaoti gauna ena veika mate wale.

19 Ka eda sa raica oqo, ni ra sa vakavulici na Leimanaiti me ra kila ka vakabauta na ivakavuvuli dina, e ra sa tudei sara, io era sa bolea na mate ka me ra kakua ga ni valavala ca tale; raica era sa buluta na nodra iyaragi ni veisaututaki, se era sa buluta na nodra iyaragi ni ivalu me yaco kina na veisaututaki.

20 Ka sa yaco ni ra sa vakavakarau ena ivalu na wekadra, ko ira na Leimanaiti, ka ra kaba mai na vanua ko Nifai, era sa nakita me ra vakarusa na tui, ka bulia e dua me kena isosomi, era sa nakita tale ga me ra vakarusai ira sara na Anitai-Nifai-Liai mai na nodra vanua.

21 Oqo ni ra sa raica na tamata ni ra sa kaba mai era sa lako yani me ra sota kei ira, a ra sa cuva vakatoboicu ki na qele e matadra ka kaciva na yaca ni Turaga; ia ni ra sa cuva tu ga vakaoqori, era sa kabai ira mai ko ira na Leimanaiti, ka yaviti ira ena iseleiwau.

22 Ia era a vakamatea e dua na udolu ka lima, ni sa sega sara e vorati ira yani; ia eda kila ni ra kalougata sara ko ira oqori, ni ra sa lako me bula vata kei koya na nodra Kalou.

23 Oqo ni ra sa raica na Leimanaiti ni ra sa sega ni dro mai na iseleiwau ko ira na wekadra, se me ra vuki vaka ki na imatau se ki na imawi, ia era sa cuva sobu ga ka mate, ka vakalagilagia na Kalou ni sa vakayacori tiko me ra mate ena iseleiwau—

24 Oqo ni ra sa raica na ka oqo ko ira na Leimanaiti, sa mudu na nodra vakamatei ira; ia e lewe vuqa a ra sa rarawataka na nodra bale mate na wekadra ena iseleiwau, ka veivutunitaka tale ga na ka ca era sa kitaka.

25 Ka sa yaco ni ra sa viritaka sobu na nodra iyaragi ni valu, ka sega ni taura tale, ni sa vutu vei ira na laba era sa kitaka; ia era sa cuva sobu tale ga me vakataki ira na wekadra, ka soli ira yani vei ira era sa laveta tu na ligadra me ra vakamatei ira.

26 Ka sa yaco ni ra sa lewe levu cake era saumaki vua na Kalou ena siga ko ya, ka lewe lailai era sa vakamatei; ia era sa tamata ivalavala dodonu ko ira kece era sa vakamatei, ka da kila ni ra sa vakabulai vakaidina.

27 Ia a sa sega sara na tamata ca sa vakamatei vata kei ira; raica sa lewe duanaudolu vakacaca era sa kila na ivakavuvuli dina; eda sa raica eke, ni sa vuqa sara na sala sa vakarautaka na Turaga me ra vakabulai kina na nona tamata.

28 Oqo e lewe levu vei ira na Leimanaiti ka ra laki vakamatei ira na wekadra, era Amelekaiti kei na Emulonaiti, ia era sa lewe levu ga vei ira oqori na ilawalawa i Neori.

29 Oqo, ko ira kece era sa saumaki vua na Turaga, e sega sara ni dua me Amelekaiti se Emulonaiti, se me ra ilawalawa i Neori, ia era kawa dina i Leimani kei Lemueli.

30 Ka sa rawa oqo meda kila vinaka, ni sa oti na nodra vakararamataki na tamata ena Yalo ni Kalou, ka kila vakavinaka cake na veika me rawa kina na bula dodonu, ka qai ia me lutu tani ki na ivalavala ca, kei na talaidredre, era sa qai ca vakaukauwa sara, ia na nodra itutu, sa na qai ca vakalevu cake mai na gauna era a sega ni kila kina na veika oqo.