Fa’ahōho’ara’a nō tō te Mesia fāra’a i te mau ’āti Nephi, nā Andrew Bosley

12–18 nō ’Ātopa

3 Nephi 20-26

« O ’outou ho’i te mau tamari’i o te fafaura’a »

’A tai’o ai ’outou i te 3 Nephi 20–26, « ’ia ’imi māite noa i te reira » (3 Nephi 23:1) nō te ’ite i te mau parau mau i fa’auruhia ia ’outou ’ia fa’a’ite i te mau tamari’i i roto i tā ’outou piha ha’api’ira’a.

Pāpa’i i te mau mana’o e tae mai

Tītau i te mana’o

E fa’ahaere i te hō’ē hōho’a o te Fa’aora ha’ati te piha ha’api’ira’a. ’Ia tāpe’a ana’e te hō’ē tamari’i i te hōho’a, e ani iāna ’ia fa’a’ite mai i te hō’ē mea tā Iesu i ha’api’i ’e ’aore rā, i rave ’a haere ai ’oia e fārerei i te mau ta’ata i roto i te Buka a Moromona. E nehenehe rātou e fa’a’ite mai i te hō’ē mea tā rātou i ’apo mai i te fare ’e ’aore rā, i te paraimere.

Ha’api’i i te ha’api’ira’a tumu : Mau tamari’i ’āpī

3 Nephi 20:1

E nehenehe au e pure i roto i tō’u ’ā’au.

Mai te mea ē, ’ua ’apo mai tā ’outou piha ha’api’ira’a nō ni’a i te pure i te hepetoma i ma’iri, e nehenehe ’outou e ha’amau i ni’a i te reira ha’api’ira’a ma te hō’ē o teie mau ’ohipara’a.

Mau ’ohipa e nehenehe e rave

• E ani i te mau tamari’i ’ia fa’a’ite mai ia ’outou e aha tā rātou e rave ’ia pure ana’e rātou. Nāhea rātou i tō rātou rima ? Tō rātou upo’o ? Tō rātou nā mata ? E fa’ata’a ē, i te tahi taime, e hina’aro tātou e paraparau i te Metua i te ao ra, terā rā, e’ita tā tātou e nehenehe e tūturi ’e ’aore rā, e tāpiri i tō tātou mata. E aha tā tātou e nehenehe e rave ? E tai’o i te mau tamari’i i te 3 Nephi 20:1: « ’E ’ua fa’aue atura [Iesu] ia rātou ’eiaha rātou e fa’aea i te pure i tō rātou ’ā’au ». E parau i te mau tamari’i nāhea ’outou i te pure i roto i tō ’outou ’ā’au.

• E pāpa’i hōho’a i te hō’ē vaha ’e te hō’ē māfatu i ni’a i te tāpura ’ere’ere. E ani i te mau tamari’i ’ia fa’atoro i ni’a i te vaha ’e ’ia parau mai ia ’outou i te tahi mau mea tā rātou e parau ’ia pure ana’e rātou. I muri iho e ani ia rātou ’ia fa’atoro i ni’a i te māfatu, ’e e fa’ata’a ē, e nehenehe tātou e fa’ahiti ato’a i te reira mau mea i roto i tō tātou māfatu. E fa’a’ite pāpū ē, ’ua ’ite te Metua i te ao ra i tō tātou mau mana’o o te ’ā’au ’e tō tātou mau ferurira’a.

3 Nephi 24:8–12

E hōpoi mai te aufaura’a i te tuha’a ’ahuru i te mau ha’amaita’ira’a.

’Aita te mau tamari’i tei ’ore i bāpetizohia, e tītauhia ’ia aufau i te tuha’a ’ahuru. Terā rā, ’aita i ’oi’oi roa nō te ha’api’i ia rātou i te mau parau tumu ’e te mau ha’amaita’ira’a i tā’amuhia i ni’a i teie ture.

Mau ’ohipa e nehenehe e rave

• Mai te mea e ha’amāramarama tō tā ’outou piha ha’api’ira’a, e ani i te mau tamari’i ’ia hi’o atu i ni’a i te ha’amāramarama. E aha te mea e haere mai i roto i te piha ’ia ’īriti-ana’e-hia te ha’amāramarama ? E tai’o 3 Nephi 24:10, ’e e fa’ata’a atu ē, ’ia aufau ana’e tātou i te tuha’a ’ahuru, e matara te mau « ha’amāramarama o te ra’i » ’e e tae mai te mau ha’amaita’ira’a i roto i tō tātou orara’a.

• E fa’a’ite 10 toata i te mau tamari’i (’e ’aore rā, te tahi atu mau tao’a na’ina’i). E ani ia rātou ’ia tai’o i te mau toata ’e o ’outou. E fa’a’ite pāpū ē, te mau mea ato’a i roa’a ia tātou, e mau ha’amaita’ira’a ïa nō ō mai i te Metua i te ao ra. E fa’ata’a ’ē hō’ē toata, ’e e fa’ata’a ē, ’ia aufau ana’e tātou i te tuha’a ’ahuru, e fa’aho’i tātou i te Metua i te ao ra hō’ē i ni’a i te ’ahuru o tā tātou ’āpī. E fa’a’ite i te mau hōho’a ’o tē fa’a’ite ra e mea nāhea te tuha’a ’ahuru i te fa’a’ohipahia nō te ha’amaita’i i te ’Ēkālesia a te Fatu (mai te patura’a i te mau hiero, te ha’apararera’a i te ’evanelia, ’e tē vai atu ra; hi’o Vaira’a hōho’a ’evanelia, nūmera 109–10, 118–19).

• E hīmene ’āmui i te hō’ē hīmene nō ni’a i te tuha’a ’ahuru, mai te « Je donne ma dîme au Seigneur » (Chants pour les enfants, 148). E fa’a’ite atu i te mau pereota e ha’api’i ra nō te aha tātou e aufau ai i te tuha’a ’ahuru.

3 Nephi 25:5–6

Hina’aro te Metua i te ao ra ’ia ’apo mai au nō ni’a i tō’u mau tupuna.

Mai tei tohuhia i roto i teie mau ’īrava, ’ua fa’aho’i mai Elia i te mau tāviri nō te tā’atira’a, ’o te ha’apārahi ia tātou i pīha’i iho i tō tātou mau ’utuāfare e a muri noa atu.

Mau ’ohipa e nehenehe e rave

• E tai’o i te 3 Nephi 25:6, ’e e ani i te mau tamari’i ’ia tu’u i tō rātou rima i ni’a i tō rātou māfatu i te mau taime ato’a e fa’aro’o rātou i te ta’o ra « māfatu ». E fa’ata’a ē, e hina’aro te Metua i te ao ra i « te mau tamari’i »—tātou pā’āto’a—’ia ’apo mai ’e ’ia ’ite i te here nō « te mau metua »—tō tātou mau metua, mau metua ru’au, ’e mau metua tupuna.

• E ani i te hō’ē metua o te hō’ē o te mau tamari’i ’ia paraparau mai nō ni’a i tō rātou mau tupuna. ’E ’aore rā, e fa’ati’a i te hō’ē ’ā’amu i te mau tamari’i nō ni’a i te hō’ē o tō ’outou mau tupuna ; e fa’a’ite i te mau hōho’a mai te mea ē, e nehenehe. E fa’a’ite pāpū ē, tē hina’aro nei te Metua i te ao ra ia tātou ’ia vai i pīha’i iho i tō tātou ’utuāfare ’e a muri noa atu, ’e nō reira ’oia i hōro’a mai ai i te mau hiero ia tātou. E hīmene ’āmui « Ensemble à tout jamais » (Chants pour les enfants, 98).

Ha’api’i i te ha’api’ira’a tumu : Mau tamari’i pa’ari

3 Nephi 23:1, 5

E nehenehe au e ’imi itoito i te mau pāpa’ira’a mo’a.

’Ua parau te Fa’aora i te naho’a ta’ata ’ia ’imi i te mau pāpa’ira’a mo’a, ’e ’ua hina’aro ’oia ’ia ha’apāpū ē, ’ua pāpa’i rātou i te mau parau a te mau peropheta (hi’o 3 Nephi 23:1, 5–13; 26:2).

Mau ’ohipa e nehenehe e rave

• E ani i te mau tamari’i ’ia tai’o i te 3 Nephi 23:1, 5 ’e ’ia ’imi i te hō’ē ta’o tei fa’ahitihia e toru taime. E aha te aura’a, e ’imi i te mau parau a te mau peropheta ? Nāhea te ’imira’a e ta’a ’ē ai i te tai’o-noa-ra’a ? E parau i te mau tamari’i e mea nāhea ’outou i te ’imi i te mau pāpa’ira’a mo’a ’e e aha tei ’itehia ia ’outou i reira

• E hōro’a i te tamari’i tāta’itahi hō’ē tāreta na’ina’i ’e ’aore rā, i te hō’ē tuha’a ’api parau, ’e e ani ia rātou ’ia pāpa’i i te fa’ahorora’a o te hō’ē pāpa’ira’a mo’a au-roa-hia. (Tauturu ia rātou mai te mea e tītauhia). E vaiiho ia rātou te tahi i muri mai i te tahi, ’ia huna i tā rātou tāreta i roto i te piha ’a tāpo’i ai te toe’a o te mau tamari’i i tō rātou mata. E ani i te mau tamari’i ’ia ’imi i te pāpa’ira’a mo’a, ’e ’ia ’ite-ana’e-hia ia rātou, ’ia tai’o ’āmui i te reira. E aha tā tātou e ’ite i roto i teie pāpa’ira’a mo’a ’o tei riro ’ei mea faufa’a nō tātou ?

3 Nephi 24:8–12

E ’īriti te aufaura’a i te tuha’a ’ahuru i te mau ha’amāramarama o te ra’i.

’Ia ha’api’i ana’e ’outou i te mau tamari’i i te parau nō te tuha’a ’ahuru, tē fa’aineine ra ’outou ia rātou ’ia fāri’i i te « hō’ē ha’amaita’ira’a ’aore ho’i e nava’i te vaira’a nō te fāri’i i te reira » (3 Nephi 24:10).

Mau ’ohipa e nehenehe e rave

• E pāpa’i i ni’a i te tāpura ’ere’ere mai te mea e aufau vau i te tuha’a ’ahuru, teie tā te Fatu e rave . E ani i te mau tamari’i ’ia tai’o i te 3 Nephi 24:8–12, ’e e tauturu ia rātou ’ia ’imi i te mau pereota nō te fa’a’ī i teie pereota. E fa’a’ite atu i te hō’ē ’itera’a i reira ’outou i te ha’amaita’ira’ahia nō te mea ’ua aufau ’outou i te tuha’a ’ahuru.

• E pāpa’i i te tahi mau tino moni i ni’a i te tāpura ’ere’ere, ’e e tauturu i te mau tamari’i ’ia nūmera e hia tuha’a ’ahuru (10 i ni’a i te hānere) tā tātou e hōro’a nō te tino moni tāta’itahi. E fa’a’ite ia rātou nāhea ’ia fa’a’ī i te parau aufaura’a tuha’a ’ahuru.

• E tauturu i te mau tamari’i ’ia tāpura i ni’a i te tāpura ’ere’ere i te tahi mau rāve’a nō te fa’a’ohipara’a i te tuha’a ’ahuru nō te ha’amaita’i i te ’Ēkālesia a te Fatu (te patura’a i te mau hiero, te ha’apararera’a i te ’evanelia, te nene’ira’a i te mau pāpa’ira’a mo’a, ’e tē vai atu) E ani i te mau tamari’i ’ia pāpa’i hōho’a (’e ’aore rā, e ’imi i te mau hōho’a i roto i te mau ve’a a te ’Ēkālesia) nō te mau rāve’a e ha’amaita’i ai te tuha’a ’ahuru i te ’Ēkālesia.

3 Nephi 25:5–6

Hina’aro te Metua i te ao ra ’ia ’apo mai au nō ni’a i tō’u mau tupuna.

E feruri nāhea ’outou i te fa’auru i te mau tamari’i ’ia ’imi i tō rātou mau tupuna ’ia nehenehe ia rātou ’ia haere i te hiero ’ia nava’i tō rātou pa’ari, ’e ’ia rave i te mau ’ōro’a ’ei mono nō te reira mau tupuna.

Mau ’ohipa e nehenehe e rave

• E parau i te mau tamari’i ē, tē vai ra i roto i te 3 Nephi 25:5–6 te hō’ē parau tohu nō ni’a i te hō’ē ’ohipa ’o te tupu i te mau mahana hope’a nei. E ani ia rātou ’ia tai’o i teie mau ’īrava nō te ’imi e aha te reira. E fa’a’ite pāpū ē, ’ua tupu teie parau tohu, ’e e ani i te mau tamari’i ’ia tai’o i te reira i roto i Te Parau Ha’api’ira’a ’e te mau Parau Fafau 110:13–16 (hi’o ato’a c, nūmera 95). E fa’ata’a ē, ’ia ’apo mai ana’e tātou nō ni’a i tō tātou mau tupuna ’e ’ia rave i te ’ohipa hiero nō rātou, tē fāriu ra ïa tō tātou ’ā’au i tō tātou mau huimetua.

• E parau i te mau tamari’i nō ni’a i te hō’ē o tō ’outou mau tupuna tei pohe ma te ’ore i fāri’i i te rāve’a ’ia bāpetizohia. E fa’a’ite i te hō’ē hōho’a mai te mea e nehenehe. E fa’a’ite i tō ’outou ’itera’a pāpū ē, ’ua here te Metua i te ao ra i teie ta’ata, nō reira ’ua fa’aineine ’oia i te hō’ē rāve’a nōna nō te fāri’i i te bāpetizora’a nā roto i te ’ohipa e ravehia i roto i te mau hiero. E ani i te mau tamari’i ’ia ’imi i te hō’ē pereota i roto i te 3 Nephi 25:6 ’o te nehenehe e tātara e aha tō ’outou mana’o nō ni’a i tō ’outou tupuna.

• E tauturu i te mau tamari’i ’ia fa’a’ī i te hō’ē tumu rā’au tuatāpapara’a i te i’oa o tō rātou mau metua ’e te mau metua rū’au. E fa’aitoito ia rātou ’ia ani i tō rātou mau metua ’ia tauturu ia rātou ’ia tu’u i te tahi atu mau i’oa.

Fa’aitoito i te ha’api’ira’a mai i te fare

E ani i te mau tamari’i ’ia ani i tō rātou mau metua ’e ’aore rā, mau metua rū’au ’ia fa’ati’a mai ia rātou i te mau ’ā’amu nō ni’a i tō rātou mau tupuna.

Ha’amaita’ira’a i tā tātou ha’api’ira’a

E ’apo mai te mau tamari’i nā roto i te mau rāve’a e rave rahi. E ’oa’oa te mau tamari’i i te ’apora’a mai nā roto i te mau ’itera’a ’āpī ’e te rau. E fa’a’ohipa i te mau ’ohipara’a ’o te fa’ati’a ia rātou ’ia ha’uti, ’ia fa’a’ohipa i tō rātou mau huru, ’e ia tāmata i te mau mea ’āpī. (Hi’o Te Ha’api’ira’a mai tā te Fa’aora, 25)