Te pure a te Mesia, nā Derek Hegsted

19–25 nō ’Ātopa

3 Nephi 27–4 Nephi

« ’Aita ho’i e feiā… tei hau ia rātou i te ’oa’oa »

’A tai’o ai ’outou i te 3 Nephi 27–4 Nephi, e feruri i te mau ’itera’a, te mau mana’o, te mau pāpa’ira’a mo’a, ’e te mau ’ā’amu ’o te nehenehe e tauturu i te mau tamari’i ’ia hāro’aro’a i te mau parau tumu i roto i teie mau pene.

Pāpa’i i te mau mana’o e tae mai

Tītau i te mana’o

E tauturu i te mau tamari’i ’ia ha’amana’o e aha tā rātou i ’apo mai i roto i te mau hepetoma i ma’iri nō ni’a i te mea tā Iesu i ha’api’i i te mau ta’ata i te fenua nō Bounetifula. E fa’ata’a ē, tē parau mai nei te Buka a Moromona ia tātou nāhea te mau ta’ata i te ha’amaita’ira’ahia ’ia ha’apa’o ana’e rātou i te mea tā Iesu i ha’api’i ia rātou.

Ha’api’i i te ha’api’ira’a tumu : Mau tamari’i ’āpī

3 Nephi 27:1–22

E melo vau nō te ’Ēkālesia a Iesu Mesia.

Nāhea te mau parau a te Fa’aora i tāna mau pipi e tauturu ai i te mau tamari’i ’ia hāro’aro’a i te faufa’a nō te rirora’a ’ei melo nō te ’Ēkālesia a Iesu Mesia ?

Mau ’ohipa e nehenehe e rave

• E ani i te tamari’i tāta’itahi ’ia fa’ahiti i tōna i’oa. Nō te aha e mea faufa’a tō tātou mau i’oa ? E parau ia rātou ē, ’ua hina’aro te mau pipi a Iesu ’ia ’ite e aha te i’oa tā rātou e topa i ni’a i te ’Ēkālesia a te Mesia. E tai’o atu ia rātou i te pāhonora’a a te Fa’aora i roto i te 3 Nephi 27:7. O vai tā Iesu i parau ’ia topahia te i’oa o tāna ’Ēkālesia ?

• E hāmani i te hō’ē tāreta tei pāpa’ihia i ni’a iho, « e melo vau nō te ’Ēkālesia a Iesu Mesia i te Feiā Mo’a i te mau Mahana Hope’a nei » nā te tamari’i tāta’itahi nō te tāmau ’a ho’i ai i te fare. E vaiiho i te mau tamari’i ’ia fa’a’ū i tā rātou tāreta. E hīmene te piha ha’api’ira’a « L’Eglise de Jésus Christ » (Chants pour les enfants, 48). E fa’a’ite nō te aha ’outou e māuruuru ai ’ia riro ’ei melo nō te ’Ēkālesia, ’e e ani i te mau tamari’i nō te aha rātou e māuruuru ai nō te ’Ēkālesia.

• E tauturu i te mau tamari’i ’ia ’āmui nō te fa’a’ī i te puzzle i ni’a i te ’api ’ohipara’a o teie hepetoma. E fa’ata’a ē, tē hina’aro nei Iesu ’ia patuhia tāna ’Ēkālesia i ni’a i tāna ’evanelia, ’e e fa’a’ohipa i te ’api ’ohipara’a nō te paraparau i te mau tamari’i nō ni’a i te aura’a o te reira.

4 Nephi 1:2–3, 15–17

E hōro’a mai te orara’a i te ’evanelia i te ’oa’oa iā’u.

E nehenehe te ’oa’oa o te feiā tei fa’a’itehia i roto i te 4 Nephi e tauturu i te mau tamari’i ’ia ’apo mai nō ni’a i te ’oa’oa e tae mai nā roto i te orara’a i te ’evanelia.

Mau ’ohipa e nehenehe e rave

• E ani i te mau tamari’i ’ia paraparau mai nō ni’a i te mau mea e fa’a’oa’oa ia rātou. Nō te parau i te mau tamari’i nō ni’a i te ’oa’oa o te mau ta’ata i roto i te 4 Nephi, e tai’o i te mau pereota faufa’a i roto i te mau ’īrava 2–3 ’e 15–17. E nehenehe ato’a tā ’outou e fa’ahoro i roto i te « Pene 48 : Te hau i Amerika » (Te mau ’ā’amu o te Buka a Moromona, 136–37). E ha’apāpū ē, ’ua ’oa’oa te mau ta’ata nō te mea, ’ua fa’afāriuhia rātou i te Fatu, ’ua ora rātou i te mau fa’auera’a, ’e ’ua here rātou te tahi i te tahi.

• E fa’a’ite i te mau hōho’a o te mau ta’ata ’oa’oa. E fa’ata’a ē, ’ua fātata e 200 matahiti te vaira’a te mau ta’ata i roto i te 4 Nephi, i te ’oa’oa nō te mea ’ua tāmata rātou pā’āto’a i te ora i te ’evanelia. E tauturu i te mau tamari’i ’ia feruri i te tahi mau fa’auera’a tā rātou nehenehe e ha’apa’o. ’Ei hi’ora’a, e nehenehe ’outou e tai’o ia rātou i te 4 Nephi 1:15 nō te ha’api’i ē, ’aita te mau ta’ata i aro fa’ahou te tahi ’e te tahi. E ani i te mau tamari’i ’ia ha’uti mai, tē ha’apa’o ra rātou i te mau fa’auera’a tā rātou e mana’o ra. E hīmene ’āmui i te hō’ē hīmene nō ni’a i te ’oa’oa e tae mai nā roto i te orara’a i te ’evanelia, mai te « Nous aidons tous avec joie« (Chants pour les enfants, 108).

• E tai’o i te mau pereota nō roto mai i te 4 Nephi 1:24–29, 34–35, ’e 43 o tē fa’a’ite nei i te ’ohipa i tupu i te fa’aeara’a te tahi pae o te āti Nephi i te ha’apa’o i te mau fa’auera’a. ’A tai’o ai ’outou, e ani i te mau tamari’i ’ia fa’a’ite mai i te hōho’a mata ’oto ’ia fa’aro’o ana’e rātou i te hō’ē mea e ’ere i te mea ’oa’oa. E fa’a’ite pāpū ē, e ’oa’oa tā te ha’apa’o i te mau fa’auera’a e hōro’a mai.

Ha’api’i i te ha’api’ira’a tumu : Mau tamari’i pa’ari

3 Nephi 27:3–8

E melo vau nō te ’Ēkālesia Iesu Mesia

E feruri nāhea ’outou i te tauturu i te mau tamari’i tā ’outou e ha’api’i ra ’ia ’ite i te mau ha’amaita’ira’a rahi e roa’a mai nā roto i te rirora’a ’ei melo nō te ’Ēkālesia a Iesu Mesia.

Mau ’ohipa e nehenehe e rave

• E tauturu i te mau tamari’i ’ia tai’o i te 3 Nephi 27:3, ma te ’imi i te uira’a tā te mau pipi a Iesu i ui atu iāna. I muri iho, e ani ia rātou ’ia ’imi i roto i te 3 Nephi 27:5–8 i te pāhonora’a. ’Ia au i teie mau ’īrava, nō te aha e mea faufa’a te i’oa o te ’Ēkālesia ?

• E tauturu i te mau tamari’i ’ia feruri i te mau pupu rau tei roto rātou, mai te hō’ē ’utuāfare ’e ’aore rā, hō’ē piha Paraimere. E ani ia rātou ’ia parau mai ia ’outou e aha tā rātou i au i roto i te rirora’a ’ei melo nō te pupu tāta’itahi. E ani i te mau tamari’i ’ia tauturu ia ’outou ’ia pāpa’i i te ta’o tātā’itahi o te i’oa o te ’Ēkālesia i ni’a i te mau ’api parau ta’a ’ē. I muri iho, e ’āno’i i te mau ’api parau, ’e e ani i te mau tamari’i ’ia fa’anaho maita’i i teie mau parau. E aha te mau ha’amaita’ira’a tā tātou i fāri’i i te mea e melo tātou nō te ’Ēkālesia a Iesu Mesia i te Feiā Mo’a i te mau Mahana Hope’a nei ?

3 Nephi 27:13–22

’Ua patuhia te ’Ēkālesia a Iesu Mesia i ni’a i tāna ’evanelia.

’Ua ha’apoto te Fa’aora i tāna ’evanelia i roto i te 3 Nephi 27. Nāhea tāna mau parau i te tauturu i te mau tamari’i ’ia hāro’aro’a e aha te ’evanelia ?

Mau ’ohipa e nehenehe e rave

• E fa’ata’a i te mau tamari’i ē, te aura’a o te ta’o ra ’evanelia o te « parau ’āpī maita’i » ïa (hi’o i te Bible Dictionary, « mau ’evanelia »). Tauturu i te mau tamari’i ’ia ’imi 3 Nephi 27:13–15 nō te hō’ē mea e riro ’ei parau ’āpī maita’i nō rātou. Nō te aha tātou e māuruuru ai ’ia ’ite i te ’evanelia a Iesu Mesia ?

• E pāpa’i i ni’a i te tāpura ’ere’ere i te mau parau tumu o te ’evanelia mai te fa’aro’o, te tātarahapa, te bāpetizora’a, te Vārua Maita’i, ’e te fa’a’oroma’ira’a e tae noa atu i te hōpe’a. E ani i te mau tamari’i ’ia ’imi 3 Nephi 27:19–21, ma te mā’imi i teie mau parau ’e ’aore rā i te mau parau i tū’ati i te fa’ata’ara’a a Iesu i tāna ’evanelia.

• E ani i te mau tamari’i ’ia feruri, e hoa tō rātou e ui nei ’ia rātou e aha tā rātou e ti’aturi nei ’ei melo nō te ’Ēkālesia. Tauturu ia rātou ’ia ’imi i te mau parau mau i roto i te 3 Nephi 27:13–21 ’o tā rātou e fa’a’ite atu nō te pū’ohu i te mea tā tātou e ti’aturi nei.

• E ani i te mau tamari’i ’ia mā’iti hō’ē o te mau parau mau o te ’evanelia tā te Fa’aora i ha’api’i i roto i te 3 Nephi 27:13–21 ’o tā rātou e hina’aro e ’apo hau mai. E tauturu ia rātou ’ia fa’a’ohipa i te mau nota i raro i te ’api, te fa’ahorora’a tumu parau, ’e ’aore rā, te arata’i pāpa’ira’a mo’a nō te ’imi mai hō’ē ’e ’aore rā, e piti ’īrava e tū’ati i ni’a i taua parau mau ra. E ani ia rātou ’ia fa’a’ite mai i tā rātou mau pāpa’ira’a mo’a i te tahi ’e te tahi ’e e aha tā rātou i ’apo mai. Nō te aha tātou e māuruuru ai ’ia ’ite i te ’evanelia a Iesu Mesia ?

4 Nephi

E hōro’a mai te orara’a i te ’evanelia i te ’oa’oa iā’u.

Nō te mea ’ua fa’afāriuhia rātou ia Iesu Mesia ’e i tāna ’evanelia, ’ua ti’a i te mau ta’ata i fa’a’itehia i roto i te 4 Nephi ’ia ha’amau i te hō’ē sōtaiete nō te hau ’e te tāhō’ē. E aha tā te mau tamari’i e nehenehe e ’apo mai nā roto mai ia rātou ?

Mau ’ohipa e nehenehe e rave

• E fa’aineine i te mau ’api parau tāpūpū ’e te mau pereota nō roto mai i te 4 Nephi 1:2–3, 5, ’e 15–17 ’o tē fa’a’ite nei i te mau ha’amaita’ira’a tā te mau ta’ata i fāri’i (mai te « ’aita e mārōra’a i te fenua »). E tu’u i te mau ’api parau i roto i te hō’ē fa’ari’i, ’e e vaiiho i te tamari’i tāta’itahi ’ia rave mai hō’ē ’e ’ia tai’o i te reira. E fa’aitoito i te mau tamari’i ’ia ’imi i tā rātou pereota i roto i teie mau ’īrava i roto i te 4 Nephi. E aha tā tātou i ʼapo mai i roto i teie mau pereota ? E aha te mau tū’atira’a tā tātou e ’ite nei i roto i teie mau ’īrava ’e te tātarara’a nō Ziona i roto i te Mose 7:18 ?

• Nō te tauturu i te mau tamari’i ’ia fa’a’ohipa i te mea i ha’api’ihia i roto i te 4 Nephi 1:15–16, e fa’a’ite atu ia rātou i te mau huru orara’a ’ua riri te mau ta’ata te tahi ’e te tahi. E ani ia rātou ’ia ha’uti i te huru orara’a e tupu mai ’āhani, e tāmata rātou i te ora ma te « mārō ’ore ». Nō te aha e mea ’ōhie a’e ’ia ape i te marōra’a ’ia vai ana’e te « aroha o te Atua » i roto i tō tātou ’ā’au ?

• E tai’o ’e te mau tamari’i i te mau ’īrava i muri nei, ’e e ani ia rātou ’ia ’imi i te mau tumu, i ’ore ai te āti Nephi ’e te āti Lamana i fāri’i fa’ahou ai i te hau ’e te ’oa’oa : 4 Nephi 1:20, 24–29, 34–35, ’e 43. Nāhea tātou i te ape i teie mau fifi ? Tauturu i te mau tamari’i ’ia ’ite i te mau rāve’a e nehenehe ia tātou ’ia ’ape i te riro mai ’ei ta’ata te’ote’o nā roto i te hi’o-fa’ahou-ra’a i Te mau ha’api’ira’a a te mau peresideni o te ’Ēkālesia : Ezra Taft Benson (2014), 238–39.

Fa’aitoito i te ha’api’ira’a mai i te fare

E fa’aitoito i te mau tamari’i ’ia fa’aoti i te hō’ē ’ohipa tā rātou e rave nō te hōpoi mai i te hau ’e te ’oa’oa rahi atu i roto i tō rātou fare ’e ’ia fa’a’ite i te reira i tō rātou ’utuāfare.

Ha’amaita’iraʼa i tā tātou ha’api’ira’a

Pāturu i te mau metua o te mau tamari’i. « ’O te mau metua te mau ’orometua ha’api’i ’evanelia faufa’a rahi roa a’e nō tā rātou mau tamari’i—tei ia rātou ra te hōpoi’a tumu ’e te mana rahi roa a’e nō te fa’auru i tā rātou mau tamari’i (hi’o Deuteronomi 6:6-7). ’A ha’api’i ai ’outou i te mau tamari’i i te fare purera’a, e ’imi nā roto i te pure i te mau rāve’a nō te pāturu i tō rātou mau metua i roto i tā rātou hōpoi’a faufa’a rahi » (Ha’api’ira’a mai tā te Fa’aora, 25).