E ’ana’ana atura te māramarama ’o tōna mata i ni’a ia rātou, nā Gary L. Kapp

28 nō Tetapa–11 nō ’Ātopa

3 Nephi 17–19

« Inaha rā, tē ’oa’oa nei au »

’A tai’o ai ’outou i te 3 Nephi 17–19, e feruri e aha te mau pāpa’ira’a mo’a, te mau ’itera’a, te mau ’ohipara’a, ’e te mau ’ā’amu o te tauturu i te mau tamari’i ’ia hāro’aro’a i te mau parau mau i roto i teie mau pene.

Pāpa’i i te mau mana’o e tae mai

Tītau i te mana’o

E fa’a’ite i te hō’ē hōho’a o te Fa’aora, ’e e ani i te mau tamari’i ’ia fa’a’ite mai e aha tō rātou huru ’āhiri ē, e haere mai ’oia e fārerei ’ia rātou mai tāna i nā reira i te ’āti Nephi.

Ha’api’i i te ha’api’ira’a tumu : Mau tamari’i ’āpī

3 Nephi 17:7, 20–25

’Ua here te Fa’aora i te mau tamari’i tāta’itahi a te Metua i te ao ra.

’Ua fa’a’ite Iesu i tōna here nō te mau tamari’i ato’a ’a ha’amaita’i ai ’oia ’e ’a pure ai ’oia nō rātou. Nāhea e ti’a ai ia ’outou ’ia tauturu i te mau tamari’i tā ’outou e ha’api’i nei ’ia ’ite i tōna here ia rātou ?

Mau ’ohipa e nehenehe e rave

• E ha’apoto i te ’ā’amu i roto i te 3 Nephi 17 ’a pia ai ’outou i te hō’ē hōho’a mai terā i roto i te arata’i ha’api’ira’a nō teie hepetoma i roto i te Mai, pe’e mai—nō te mau ta’ata hō’ē ’e te ’utuāfare. E aore ra, e nehenehe ’outou e fa’a’ohipa « Pene 44 : Te ha’amaita’i nei Iesu Mesia i te mau tamari’i », (Te mau ā’amu o te Buka a Moromona 124-25). E tai’o i te mau pereota ’e ’aore rā, te mau ’īrava i roto i te 3 Nephi 17 ’o tē ha’apāpū ra i te here o te Fa’aora i te mau ta’ata (mai te mau ’īrava 7 ’e 20–25). E vaiiho i te mau tamari’i te tahi i muri mai i te tahi, ’ia tāpe’a i te hōho’a ’e ’ia parau e aha tā Iesu i rave nō tōna here i te ta’ata.

• E fa’a’ohipa i te ’api ’ohipara’a nō teie hepetoma nō te tauturu i te mau tamari’i ’ia pāpa’i i te hō’ē hōho’a nō rātou iho ’e o Iesu. ’A rave ai rātou, e tauturu ia rātou ’ia feruri i te mau rāve’a ’a fa’a’ite ai Iesu i tōna here ia rātou.

  

  ’A hi’o na i tā ’outou mau tamari’i ri’i, nā Gary L. Kapp

3 Nephi 18:1–12

E nehenehe au e feruri nō ni’a ia Iesu ’ia rave ana’e au i te ’ōro’a mo’a.

E rave rahi mau mea o te fa’anevaneva i te hō’ē tamari’i i te taime nō te ’ōro’a mo’a. Nāhea e ti’a ai ia ’outou ’ia tauturu i te mau tamari’i i roto i tā ’outou piha ha’api’ira’a ’ia hāro’aro’a i te faufa’a nō te ferurira’a i te Fa’aora ’e tōna here ia rātou i roto i teie ’ōro’a mo’a ?

Mau ’ohipa e nehenehe e rave

• E ani i te mau tamari’i ’ia fa’a’ite mai ia ’outou e aha te ’ohipa i tupu i te taime nō te ’ōro’a mo’a. E tai’o i te mau ’īrava nō roto mai i te ’ā’amu o Iesu i te ’ōperera’a i te ’ōro’a mo’a i te ’āti Nephi (hi’o 3 Nephi 18:1–12), ’e e ani i te mau tamari’i ’ia ti’a i ni’a ’ia fa’aro’o ana’e rātou i te hō’ē ’ohipa e tū’ati i te mea tā tātou e rave nei i te taime nō te ’ōro’a mo’a. E aha tā Iesu Mesia e hina’aro ’ia « ha’amana’o » ’e ’aore rā, ’ia feruri tātou i te taime nō te ’ōro’a mo’a ? (hi’o 3 Nephi 18:7, 11).

• E hum, e hīmene ’e ’aore rā e ha’uti i te hō’ē hīmene Paraimere ’a fa’a’ū ai te mau tamari’i i te mau hōho’a ’o te nehenehe e tauturu ia rātou ’ia ha’amana’o i te Fa’aora i te taime nō te ’ōro’a mo’a (hi’o i te ’api ’ohipara’a nō teie hepetoma). E fa’aitoito ia rātou ’ia hi’o i teie mau hōho’a nō te tauturu ia rātou ’ia ha’amana’o ia Iesu i te taime ’a rave ai rātou i te ’ōro’a mo’a.

3 Nephi 18:15, 20–21, 24; 19:16–17, 30

Tē ha’api’i nei Iesu iā’u nāhea ’ia pure.

E aha tā ’outou i ’apo mai nō ni’a i te pure ’a tuatāpapa ai ’outou i te 3 Nephi 17–19 ? Nāhea ’outou i te fa’a’ohipa i te mea tā ’outou i ’apo mai nō te ha’api’i i te mau tamari’i nāhea ’ia pure ?

Mau ’ohipa e nehenehe e rave

• E fa’a’ite i te mau hōho’a o te mau ta’ata e pure ra (mai te mau ta’ata i roto i te « Pene 46 : Te ha’api’i nei Iesu Mesia ’e te pure nei ’e te mau ’āti Nephi » i roto i Te mau ’ā’amu-o te Buka a Moromona, 128–30). E ani i te mau tamari’i ’ia fa’a’ite mai i te mau ha’apāpūra’a i roto i te mau hōho’a o tē fa’a’ite ra, te pure nei teie mau ta’ata. E tai’o i te 3 Nephi 19:16–17 nō te fa’ata’a ē, ’ua ha’api’i mai Iesu ia tātou nāhea ’ia pure. E vaiiho i te mau tamari’i ’ia parau mai ia ’outou e aha tā rātou i fāri’i ’a pure ai rātou.

• E tai’o i te 3 Nephi 18:21, ’e e ani i te mau tamari’i ’ia pāpa’i i te hō’ē hōho’a nō rātou iho ’e ’aore rā, nō tō rātou ’utuāfare tē pure ra. E fa’aitoito i te mau tamari’i ’ia ani i tō rātou ’utuāfare ’ia pure ’e o rātou.

• E hīmene ’āmui i te hō’ē hīmene nō ni’a i te pure, mai te « La prière d’un enfant », Chants pour les enfants, 6–7). E ani i te mau tamari’i ’ia fa’a’ite mai e aha tā rātou e ’apo nei nō ni’a i te pure i roto i te hīmene. E fa’a’ite i tō ’outou ’itera’a pāpū nō te pure.

Ha’api’i i te ha’api’ira’a tumu : Mau tamari’i pa’ari

3 Nephi 17

’Ua here te Fa’aora i te mau tamari’i a te Metua i te ao ra.

’Ua ha’api’i mai te Peresideni Ezra Taft Benson ē : « Tē fafau atu nei au ia ’outou, e te mau tamari’i here ē, e utuutu mai te mau melahi ia ’outou ato’a. E’ita paha ’outou e ’ite ia rātou, terā rā tei reira rātou nō te tauturu ia ’outou, ’e e ’ite ’outou ē, tei reira rātou » (« I te mau tamari’i o te ’Ēkalesia », Ensign, Mē 1989, 83).

Mau ’ohipa e nehenehe e rave

• E tai’o ’āmui i te tahi mau ’īrava i roto i te 3 Nephi 17 ’o tā ’outou e mana’o ra e riro ’ei mea faufa’a nō te mau tamari’i tā ’outou e ha’api’i nei. ’A tai’o ai ’outou i te ’īrava tāta’itahi, e ani i te mau tamari’i ’ia mā’iti i te hō’ē ta’o ’e ’aore rā, i te hō’ē pereota tā rātou e mana’o ra e mea faufa’a ’e i muri iho, e fa’a’ite mai nō te aha teie mau ta’o i riro ai ’ei mea faufa’a nō rātou. E fa’a’ite pāpū ē, ’ua here roa Iesu i te mau tamari’i, ’e nō reira ’oia i ha’amaita’i ai ia rātou ’e i pure ai nō rātou.

• E ani i te mau tamari’i ’ia fa’a’ite mai, e aha tā rātou e fāri’i ’āhiri tei rotopū rātou i te mau tamari’i tā te Fa’aora i ha’amaita’i. Mai te mea e nehenehe, e fa’a’ite i te video « Inaha rā, tē ’oa’oa nei au » (ChurchofJesusChrist.org) nō te tauturu ia rātou ’ia feruri i teie ’ohipa. E aha tā te Fa’aora i rave nō te fa’a’ite i tōna here ? E aha te ti’a ia tātou ’ia rave nō te fa’aineine ia tātou iho ’ia vai noa i pīha’i iho iāna ’ia ho’i fa’ahou mai ’oia ?

3 Nephi 18:1–12

’Ia rave ana’e au i te ’ōro’a mo’a, e nehenehe au e ’ī i te Vārua Maita’i.

E nehenehe tātou e ’apo mai i roto i te 3 Nephi 18 i te faufa’a rahi o te ’ōro’a mo’a nō te Fa’aora. Nāhea e ti’a ai ia ’outou ’ia tauturu i te mau tamari’i ’ia ’ite ē, e mea faufa’a te reira nō rātou ?

Mau ’ohipa e nehenehe e rave

• E tauturu i te mau tamari’i ’ia tai’o i te 3 Nephi 18:1–12. E aha tā rātou e ’apo mai nō ni’a i te ’ōro’a mo’a nā roto mai i teie mau ’īrava ? E tauturu ia rātou ’ia tai’o i te mau pure o te ’ōro’a moa i roto i Te Parau Ha’api’ira’a ’e te mau Parau Fafau 20:77 ’e 79 e ’ia ’imi i te mau ta’o ’e te mau pereota i roto i te mau pure o te ’ite-ato’a-hia i roto i te 3 Nephi 18:1–12. E aha te aura’a o teie mau ta’o ’e teie mau pereota ? Nāhea tātou i te fa’aineine nō te rave i te ’ōro’a mo’a ? E aha tā tātou e fafau e rave, ’ia rave ana’e tātou i te ’ōro’a mo’a ?

• E hīmene ’āmui i te hō’ē hīmene nō ni’a i te fa’aturara’a, mai te «Humblement, calmement» Chants pour les enfants,26). Nāhea te ravera’a i te ’ōro’a mo’a ma te fa’atura e tauturu ia tātou ’ia fāri’i i te Vārua ? Nāhea te reira e tauturu ia tātou ’ia rave i te mau fa’aotira’a ti’a ?

3 Nephi 18:15–24; 19:6–9, 15–36

E tauturu te pure iā’u ’ia ha’afātata atu i te Metua i te ao ra.

E nehenehe tātou e ’ite, tei pīha’i iho roa te Metua i te ao ra ia tātou nā roto i te pure. E aha te mau parau poro’i nō ni’a i te pure i roto i te 3 Nephi 18–19 ’o te tauturu i te mau tamari’i tā ’outou e ha’api’i nei ’ia ha’amaita’i i tā rātou mau pure ?

Mau ’ohipa e nehenehe e rave

• E pāpa’i i teie fa’ahorora’a pāpa’ira’a mo’a i muri nei i ni’a i te mau tuha’a ’api parau, ’e e hōro’a i te reira i te tamari’i tāta’itahi ’e ’aore rā, i te mau pupu tamari’i na’ina’i : 3 Nephi 18:15; 3 Nephi 18:20; 3 Nephi 18:21; 3 Nephi 19:19; ’e 3 Nephi 19:24. E ani i te mau tamari’i ’ia tai’o i te mau pāpa’ira’a mo’a, ma te ’imi i te mau mea tā Iesu Mesia ’e ’aore rā, tā tāna mau pipi i ha’api’i nō ni’a i te pure. E ani ia rātou ’ia fa’a’ite i te piha ha’api’ira’a i te mea tā rātou i ’apo mai.

• E pāpa’i i ni’a i te tāpura ’ere’ere, Tē ha’amāuruuru nei au ia ’oe nō te . E hōro’a i te mau tamari’i hō’ē minuti nō te feruri i te mau mea e rave rahi nō te fa’a’ī i te vāhi vata. Nō te aha e mea maita’i nō tātou ’ia fa’a’ite i te ’ā’au mēhara i te Metua i te ao ra ? I muri iho, e pāpa’i Tē ani nei au ia ’oe nō te i ni’a i te tāpura ’ere’ere, ’e e tai’o ’āmui i te 3 Nephi 18:18–21 ’e 19:9, 23, ma te ’imi i te mau mana’o nō ni’a i te mau mea e ti’a ia tātou ’ia pure.

• E fa’a’ite i tō ’outou ’itera’a pāpū ’e ’aore rā, hō’ē ’itera’a nō ni’a i te mana o te pure, ’e e fa’aitoito i te mau tamari’i ’ia fa’a’ite i tō rātou ’itera’a pāpū ’e ’aore rā, te mau ’itera’a.

Fa’aitoito i te ha’api’ira’a mai i te fare

E fa’aitoito i te mau tamari’i ’ia ’āparau i tō rātou mau metua ’e ’aore rā, i te tahi atu melo o te ’utuāfare nāhea e roa’a ia rātou te hō’ē ’itera’a hau atu i te faufa’a i roto i te ’ōro’a mo’a i te sābati i muri nei ?

Ha’amaita’iraʼa i tā tātou ha’api’ira’a

E tauturu i te mau tamari’i ’āpī ’ia ’apo mai nā roto mai i te mau pāpa’ira’a mo’a. Nō te tauturu i te mau tamari’i ’āpī ’ia ’apo mai nā roto mai i te mau pāpa’ira’a mo’a, e rōtahi i ni’a i te hō’ē ’īrava o te pāpa’ira’a mo’a ’e ’aore rā, te tahi noa pereota tumu. E nehenehe ’outou e ani i te mau tamari’i ’ia ti’a i ni’a ’ia fa’aro’o ana’e rātou i te hō’ē ta’o ’e ’aore rā, te hō’ē pereota ta’a ’ē.