’Ana’ana atura te māramarama nō tōna mata i ni’a ia rātou, nā Gary L. Kapp

28 nō Tetepa–11 nō ’Ātopa

3 Nephi 17–19

« ’Ua tae tō’u ’oa’oa i te rahi ra »

I roto i te mau pene i ma’iri nō 3 Nephi tē parau-rahi-hia nei nō te mau parau a te Fa’aora, te mau pene 17–19, tē fa’ata’a nei te reira i tāna tāvinira’a ’e te mau ha’api’ira’a i rotopū i te ta’ata. ’Ia tai’o ’outou i teie mau pene, e aha tā te Vārua e ha’api’i nei ia ’outou nō ni’a i te Fa’aora ?

Pāpa’i i te mau mana’o e tae mai

Nō rave noa mai nei Iesu Mesia terā mahana nō te tāvini i roto i te fenua nō Bounetifula, i te ha’api’ira’a i tāna ’evanelia, i te fa’afana’ora’a i te ta’ata ’ia hi’o ’e ’ia fafa i te mau puta i ni’a i tōna tino tei ti’afa’ahou, ’e i te fa’a’ite-pāpū-ra’a ē, ’o ’oia te Fa’aora i parauhia. I teienei rā, ’ua tae te taime nō te reva atu. Tītauhia ’ia ho’i ’oia i tōna Metua ra, ’e ’ua ’ite ato’a ho’i ’oia ē, tītauhia te tahi taime nō te ta’ata nō te feruri i te mea tāna i ha’api’i. Nō reira, ma te parau ē e ho’i mai ā ’oia ananahi, ’ua parau ’oia i te naho’a ta’ata ’ia ho’i i tō rātou fare. ’Aita rā te ta’ata i ha’uti. ’Aita rātou i parau i tō rātou mana’o, ’ua noa’a rā ia Iesu ’ia ta’a i te reira : tā rātou e tīa’i nei, ’ia « pārahi ri’i ā ’oia ’e rātou ato’a ra » (3 Nephi 17:5). Tē vai fa’ahou ra tāna mau ’ohipa faufa’a rahi e rave, ’aita rā te taime nō te fa’a’ite i te aumihi e tae noa mai i te taime nahonaho, nō reira ’ua fa’aea ri’i ā Iesu ’e teie mau ta’ata. Te ’ohipa i tupu mai, ’o te hi’ora’a marū roa a’e paha nō te aupurura’a tei pāpa’ihia i roto i te mau pāpa’ira’a mo’a. Te mea noa tā te ta’ata i reira e nehenehe e parau, ’oia ho’i, ’aita e parau nō te fa’ahiti atu (hi’o 3 Nephi 17:16–17). ’Ua ha’apoto noa Iesu i terā mani’ira’a pae vārua i reira iho ma teie mau parau ’ōhie ra : « ’E teienei, ’ua tae tō’u ’oa’oa i te rahi ra » (3 Nephi 17:20).

Mau mana’o nō tā ’oe iho tuatāpapara’a pāpa’ira’a mo’a

3 Nephi 17

’O te Fa’aora tō’u hi’ora’a maita’i roa nō te tāvinira’a.

’Ua ’ite tātou ē, e 2 500 ti’ahapa ta’ata (hi’o 3 Nephi 17:25) tei ’ite i te tere mātāmua o te Mesia, mai tei pāpa’ihia i roto i te 3 Nephi 11–18. ’Ua ’itehia rā i te Fa’aora te rāve’a nō te tāvini ia rātou hō’ē hō’ē. E aha tā ’oe e ’apo mai nei nō ni’a i te tāvinira’a i roto i te hi’ora’a o te Fa’aora i roto i teie nei pene ? E aha te mau hina’aro tāna i aupuru atu ? E feruri nāhea tōna hi’ora’a e tauturu ai ia ’oe ’ia tāvini ia vetahi ’ē.

’A hi’o na i tā ’outou mau tamari’i ri’i, nā Gary L. Kapp

3 Nephi 17:13–22 ; 18:15–25 ; 19:6–9, 15–36

’Ua ha’api’i te Fa’aora ia tātou e nāhea ’ia pure.

’A feruri e aha ra te huru ’ia fa’aro’o i te Fa’aora ’ia pure nō ’oe. E aha tāna e pure atu nō ’oe ? E nehenehe tāna mau ha’api’ira’a ’e mau pure i roto i teie mau pene e hōro’a ia ’oe i te tahi mana’o. ’A tuatāpapa ai ’oe, e aha tā ’oe i ’apo mai i roto i te hi’ora’a o te Mesia ’o tē nehenehe e ha’amaita’i atu ā i tā ’oe iho mau pure ? E aha te mau ha’amaita’ira’a nō te pure tā ’oe i ’ite i roto i tō ’oe orara’a ?

3 Nephi 18:1–12

E ti’a iā’u ’ia pa’ia i te pae vārua ’ia rave au i te ’ōro’a mo’a.

’Ia tai’o ’oe i te 3 Nephi 18:1–12, ’a feruri nāhea te ravera’a i te ’ōro’a e nehenehe e tauturu ia ’oe ’ia « pa’ia » i te pae vārua (3 Nephi 18:3–5, 9 ; hi’o ato’a 3 Nephi 20:1–9). ’Ei hi’ora’a, e nehenehe tā ’oe e hāmani i te hō’ē tāpura nō te mau uira’a ’o tē hōro’a mai i te hō’ē ferurira’a o te ta’ata iho i te taime e rave ’oe i te ’ōro’a, mai teie « E aha tō’u mana’o nō te Fa’aora ’e tāna tusia nō’u nei ? » « E aha tā teie tusia e fa’auru nei i roto i tō’u orara’a tāmahana ? » ’aore rā « E aha tā’u e rave maita’i nei ’ei pipi, e aha te nehenehe e ha’amaita’i atu ā ? »

E nehenehe teie mau parau a te peresideni Henry B. Eyring e tauturu ia ’oe ’ia feruri i te hō’ē tumu e tauturu ai te ’ōro’a ia ’oe ’ia pa’ia i te pae vārua : « ’A hi’opo’a ai ’outou i tō ’outou orara’a i te roara’a o te terera’a o te ’ōro’a mo’a, tē ti’aturi nei au ē, ’ua rōtahihia tō ’outou mau mana’o ’eiaha noa i ni’a i te mau mea hape tā ’outou i rave, i ni’a ato’a rā i te mau mea maita’i tā ’outou i rave—te mau taime ’a ’ite ai ’outou ē ’ua poupou te Metua i te Ao ra ’e te Fa’aora ’ia ’outou. E nehenehe ato’a ’outou e rave i te hō’ē taime i roto i te ’ōro’a mo’a nō te ani i te Atua ’ia tauturu ia ’outou ’ia ’ite i te reira mau mea. I tō’u nā-reira-ra’a, ’ua ha’apāpū mai te Vārua ē, noa atu e mea ātea roa vau i te maita’i-roa-ra’a, e mea maita’i a’e au i teie mahana i nanahi ra. E hōro’a mai te reira ’iā’u i te ti’aturira’a ē, maoti te Fa’aora e ti’a ai iā’u ’ia maita’i roa atu ananahi » (« Always Remember Him », Ensign, Feb. 2018, 5).

3 Nephi 18:36–37 ; 19:6–22

E tītau te mau pipi a Iesu Mesia i te hōro’ara’a o te Vārua Maita’i.

’A feruri i te hō’ē pure tā ’oe i parau ’aita i maoro a’enei. E aha tā tō ’oe mau pure e ha’api’i nei ia ’oe nō ni’a i tō ’oe mau hia’ai rahi roa ? I muri mai i terā mahana i mua i te aro o te Fa’aora, « ani atura rātou i tō rātou hina’aro rahi »—te hōro’ara’a o te Vārua Maita’i (3 Nephi 19:9). ’A tai’o ai ’oe i teie mau tuha’a, ’a feruri i tō ’oe iho hina’aro nō te auhoara’a i te Vārua Maita’i. E aha tā ’oe i ha’api’i mai nō ni’a i te tītaura’a i te auhoara’a i te Vārua Maita’i ?

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

3 Nephi 17

’A tai’o ai ’outou te ’utuāfare i teie pene, e nehenehe e fa’afa’aea ri’i i terā ’e terā taime nō te tītau manihini i te ’utuāfare ’ia feruri ē, ’āhani pa’i ’o rātou terā. ’Ei hi’ora’a, e nehenehe e ui i te mau uira’a mai teie « E aha te ’ati tā ’outou e hōpoi atu i mua i te Fa’aora ’ia fa’aorahia ? » « E aha te mea tā ’outou e hina’aro ’ia pure ’oia nō ’outou ? » ’aore rā « ’O vai te feiā herehia tā ’outou e hina’aro ’ia ha’amaita’i ’oia ? » E fa’auru ato’a paha te tai’ora’a i teie pene ’ia pure nō te mau melo o te ’utuāfare, ta’ihō’ē, mai tā Iesu i rave.

3 Nephi 18:1–12

E aha te aura’a ’ia « pa’ia » i te ravera’a i te ’ōro’a mo’a, ’e nāhea e ’ite ai i te reira ? E aha tā tātou i ’apo mai i roto i te mau ’īrava 5–7 nō ni’a i te tumu Iesu i hōro’a mai ai ia tātou i te ’ōro’a nō te ’ōro’a mo’a ?

3 Nephi 18:17–21

E aha tā tātou e ha’api’i mai nei i roto i teie mau ’īrava nō ni’a i te fā o te pure ? Nāhea tātou i te ha’amaita’i atu ā i te mana pae vārua o tā tātou mau pure, te pure ta’ata hō’ē ’e te pure ’utuāfare ?

3 Nephi 18:25 ; 19:1–3

E aha te mea tā te ’utuāfare i ’ite nā roto i te ’evanelia ’o tā tātou e hina’aro ’ia tupu ato’a nō te feiā ’ati a’e ia tātou ? Nāhea tātou e nehenehe ai e pe’e i te hi’ora’a o te mau ta’ata i roto i teie mau ’īrava « tei pau te pō i [te] ravera’a » (3 Nephi 19:3) nō te hōpoi mai ia vetahi ’ē i te Mesia, ’ia « fāfā mai ’e [’ia] ’ite mai ho’i » (3 Nephi 18:25) i tā tātou i ’ite mai i roto i te ’evanelia ?

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’i i tā ’oe iho tuatāpapara’a pāpa’ira’a mo’a

E vaiiho i te Vārua ’ia arata’i i tā ’outou tuatāpapara’a. E ti’a i te Vārua Maita’i ’ia arata’i ia ’outou i te mau mea e tītauhia ia ’outou ’ia ha’api’i i te mahana tāta’itahi. E vai ara i tāna mau muhumuhu, noa atu ā tē huru fa’atae nei te reira i te mana’o e tai’o i te hō’ē tumu parau ta’a ’ē ’aore rā e tuatāpapa ma te huru ta’a ’ē atu i tei mātarohia. ’Ei hi’ora’a, ’ia tai’o ’outou nō ni’a i te ’ōro’a mo’a i roto i te 3 Nephi 18, e nehenehe te Vārua e muhumuhu ia ’outou ’ia fa’aea ri’i ā i ni’a i terā tumu parau, ’eiaha mai tā ’outou i mana’o na.

’Ua vēteahia a’era te ra’i, nā Walter Rane