« 12–18 nō ’Ātopa. 3 Nephi 20–26 : ‘’O ’outou ho’i te mau tamari’i o te fafaura’a », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 12–18 nō ’Ātopa. 3 Nephi 20–26 », Mai, pe’e mai—nō te ta’ata hō’ē ’e te ’utuāfare : 2020
Fa’ahōho’ara’a nō te fāra’a te Mesia i te mau ’āti Nephi nā Andrew Bosley
12–18 nō ’Ātopa
3 Nephi 20–26
« ’O ’outou ho’i te mau tamari’i o te fafaura’a »
’Ia parau Iesu nō te mau pāpa’ira’a mo’a, pinepine ’oia i te fa’a’ohipa i te ta’o ra ’imi (hi’o 3 Nephi 20:11 ; 23:1, 5). ’Ia tai’o ’outou i te 3 Nephi 20–26, e aha tā ’outou e ’imi ?
Pāpa’i i te mau mana’o e tae mai
’Ia fa’aro’o ana’e ’outou i te ta’ata ’ia parau nō te utuāfare o ’Īserā’ela, e hiti ānei te mana’o ē, ’o ’outou terā e parauhia ra ? E mau hua’ai mau te mau ’āti Nephi ’e te mau ’āti Lamana nō ’Īserā’ela—tē ha’amata roa nei tō rātou ’ā’amu i Ierusalema—nō vetahi rā o rātou, e au paha ïa Ierusalema ’ei « fenua i te ātea ’ē ra, ’o tei ’itea-’ore-hia ia tātou nei » (Helamana 16:20). ’Oia mau, e « ’āma’a [rātou] o te rā’au o ’Īserā’ela », « tei mo’e [rā] i te tumu mau » (Alama 26:36 ; hi’o ato’a 1 Nephi 15:12). ’Āre’a rā, i te fāra’a te Fa’aora ia rātou, ’ua hina’aro ’oia ’ia ’ite rātou ē, ’aita rātou i mo’e iāna. ’Ua nā ’ō ’oia : « Nō te ’utuāfare o ’Īserā’ela ho’i ’outou ; ’e nō ’outou ho’i te faufa’a tā te Metua i fa’aau mai » (3 Nephi 20:25). E parau paha ’oia i te hō’ē parau mai te reira ia ’outou i teie mahana, inaha te ta’ata ato’a i bāpetizohia ’e ’o tē rave i te mau fafaura’a i mua iāna, nō te ’utuāfare o ’Īserā’ela ato’a ïa, « nō te faufa’a i fa’aauhia », noa atu ā nō vai ’oe ’e i hea ’oe te orara’a. E nehenehe ïa e parau ē, ’ia parau Iesu nō te ’utuāfare o ’Īserā’ela, tē parau nei ’oia nō ’outou. Te arata’ira’a e ha’amaita’i i « te mau fēti’i ato’a o te ao nei », nō ’outou ïa (3 Nephi 20:27). Te tītaura’a manihini ē e « ara, ’a ’ahu na i tō pūai », nō ’outou ïa (3 Nephi 20:36). ’E tāna parau fafau rahi ra ē « e ’ore ta’u hāmani maita’i ia ’oe e ta’a ’ē, ’e te faufa’a hau nā’u ra, e ’ore ïa e huritumuhia », nō ’outou ïa (3 Nephi 22:10).
Mau mana’o nō tā ’oe iho tuatāpapara’a pāpa’ira’a mo’a
I te mau mahana hope’a nei, e rave atu te Atua i te hō’ē ’ohipa rahi ’e te māere.
’Ua hōro’a te Fa’aora i te naho’a ra i te tahi mau parau fa’ahiahia ’e ’ua tohu ho’i nō ni’a i te ananahi o tōna mau ta’ata fafauhia—’o ’oe ato’a ïa. Mai tā te peresideni Russell M. Nelson i parau : « Tei rotopū tātou i te nūna’a fafauhia a te Fatu. E ha’amaita’ira’a nā tātou ’ia riro ’ei tuha’a nō te fa’atupura’a i teie nei mau fafaura’a. ’Auē ïa taime fa’ahiahia nō te ora ! »(« Te ha’aputuputura’a ia ’Īserā’ela i ha’apurara-’ē-hia », Ensign ’aore rā Liahona, Nov. 2006, 79).
E hi’o i te mau parau tohu nō ni’a i te mau mahana hope’a nei i roto i te mau parau a te Fa’aora i roto i te 3 Nephi 20–22. E aha te parau tohu e mea ’ana’anatae ta’a ’ē nō ’oe ? E aha tā ’oe e nehenehe e rave nō te tauturu i te fa’atupura’a i te mau parau tohu i roto i teie mau pene ?
E hi’o ē tē fa’a’ite ra te 3 Nephi 21:1–7 ē, e tāpa’o te taera’a mai te Buka a Moromona (« mau mea » i roto i te mau ’īrava 2 ’e 3) ē, ’ua ha’amata a’ena te mau parau a te Atua i te tupu. E aha taua mau parau ra, ’e te nāhea nei te Buka a Moromona i te tauturu i te fa’atupu i te reira ?
Hi’o ato’a Russell M. Nelson, « Ti’aturira’a nō Ziona » (purera’a nō te feiā ’āpī ’ati ti’a i te ao nei, 3 nō Tiunu 2018), broadcasts.ChurchofJesusChrist.org.
3 Nephi 20:10–12 ; 23 ; 26:1–12
’Ua hina’aro te Fa’aora ’ia ’imi au i te mau parau a te mau peropheta.
Tē heheu nei te mau parau ’e te mau ’ohipa a Iesu i roto i teie mau pene i tōna mana’o nō ni’a i te mau pāpa’ira’a mo’a. E aha tā ’oe e ha’api’i mai nei nō ni’a i te mau pāpa’ira’a mo’a i roto i te 3 Nephi 20:10–12 ; 23 ; ’e te 26:1–12 ? E aha tā ’oe e ’ite ra i roto i teie mau ’īrava ’o tē fa’auru nei ia ’oe ’ia « ’imi māite noa i te reira »? (3 Nephi 23:1).
3 Nephi 22 ; 24
E aroha te Atua i te feiā e ho’i mai iāna ra.
I roto i te 3 Nephi 22 ’e te 24, ’ua fa’ahiti te Fa’aora i te mau parau a Isaia ’e a Malaki tei ’ī roa i te mau hōho’a ’e te mau fa’aaura’a māramarama— te mau ’ōfa’i niu ’una’una, te ’ārahu ’ama, te ’ārio tāmā, te mau ha’amāramarama o te ra’i. E mea maita’i paha ’ia hāmani i te hō’ē tāpura nō te reira. E aha tā teie mau mea tāta’itahi e ha’api’i mai nei ia ’oe nō ni’a i te aura’a o te Atua ’e tōna mau ta’ata ? ’Ei hi’ora’a, tē fa’aau nei te 3 Nephi 22:4–8 i te Atua i te hō’ē tāne ’e tōna mau ta’ata i te vahine. E riro paha te tai’ora’a nō ni’a i teie mau fa’ahōho’ara’a i te tūra’i ia ’oe ’ia feruri i tō ’oe iho aura’a ’e te Fatu. Nāhea te mau parau fafau i roto i teie mau pene e fa’atupuhia ai i roto i tō ’oe orara’a ? (hi’o ta’a ’ē 3 Nephi 22:7–8, 10–17 ; 24:10–12, 17–18).
’Ia fāriu tō’u ’ā’au i ni’a i tō’u mau tupuna e ti’a ai.
’Ua tīa’i-maoro-hia te ho’ira’a i parauhia nō Elia nā te mau ’āti Iuda ’ati a’e i te ao nei, e rave rahi tenetere te maoro. ’Ua ’ite te feiā mo’a ē, ’ua ho’i mai Elia ’e ’ua fā ia Iosepha Semita i roto i te hiero nō Ketelani, i te matahiti 1836 ra (hi’o PH&PF 110:13–16). Te ’ohipa nō te fāriura’a te ’ā’au i te metua—te ’ohipa hiero ’e te ’ā’amu ’utuāfare—’ua ha’amata a’ena ïa. E aha te mau ’ohipa i tupu nō ’oe tei tauturu ia ’oe ’ia fāriu i tō ’oe ’ā’au i ni’a i tō ’oe mau tupuna ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
3 Nephi 22:2
I muri iho i te tai’ora’a i teie ’īrava, e nehenehe tā ’outou e hāmani i te hō’ē ti’ahapa nō ’outou ma te ’āparau nō ni’a i te huru ’ua riro te ’Ēkālesia mai te hō’ē ti’ahapa i roto i te medebara. E aha te aura’a e « ha’amaoro i [te] mau taura » ’e e « ha’amau ’eta’eta i [te] mau titi » ? Nāhea tātou ’ia tītau manihini ia vetahi ’ē ’ia noa’a « te ha’apūra’a » i roto i te ’Ēkālesia ?
3 Nephi 23:6–13
’Āhini ’ua hi’opo’a te Fa’aora i te mau pāpa’a parau o te ’utuāfare, e aha te mau uira’a tāna e ui ia tātou ? Tē vai ra ānei te tahi mau ’ohipa rahi i tupu ’aore rā te tahi ’ohipa pae vārua e tītauhia ’ia pāpa’i i roto ? E taime tano paha nō te hāmani ’aore rā nō te pāpa’i i roto i te pāpa’a parau ’utuāfare ’e nō te tāu’aparau ’āmui i te mea e tu’u i roto. E au paha te mau tamari’i ’āpī ’ia fa’anehenehe i tā ’outou mau pāpa’a parau ma te tahi hōho’a ’aore rā hōho’a pāpa’i. Nō te aha e mea faufa’a ’ia pāpa’i i tā tātou mau ’ohipa pae vārua ?
3 Nephi 24:7–18
E aha tā tātou i ’ite nō te mau ha’amaita’ira’a i parauhia nō te ’aufaura’a i te tuha’a ’ahuru i roto i teie mau ’īrava ? E nehenehe te a’ora’a a Elder David A. Bednar « Te mau ha’amāramarama o te ra’i » (Ensign ’aore rā Liahona, Nov. 2013, 17–20) e tauturu i te mau melo o te ’utuāfare ’ia ’ite i teie mau ha’amaita’ira’a.
3 Nephi 25:5–6
E aha tā ’outou e rave nō te tauturu i te mau melo o tō ’outou ’utuāfare ’ia fāriu i tō rātou ’ā’au i tō rātou mau metua ? Penei a’e e nehenehe e fa’ata’a i te mau melo o te ’utuāfare ’ia ha’api’i mai nō ni’a i te hō’ē o tō rātou mau tupuna ’e e fa’a’ite i tō te ’utuāfare tāna i ’apo mai (hi’o FamilySearch.org). ’Aore rā, e nehenehe tā ’outou e ’ohipa ’āmui nō te ’ite mai i te hō’ē tupuna tei hina’aro i te mau ’ōro’a o te hiero ma te fa’anaho i te hō’ē tere hiero nō te rave i te reira mau ’ōro’a.
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Haʼamaitaʼiraʼa i tā tātou haʼapiʼiraʼa
Ora mai te au i tō ’oe ’itera’a pāpū. ’Ua ha’api’i Elder Neal A. Maxwell, « E ha’api’i ’outou i te mea ’ua riro mai ’outou ». « E ha’amana’ohia tō ’outou huru… hau atu i te hō’ē noa a’e parau mau i roto te hō’ē ha’api’ira’a » (« But a Few Days » [a’ora’a tei hōro’ahia i te mau ’orometua o te Fa’anahora’a Ha’api’ira’a a te ’Ēkālesia, 10 nō Tetepa 1982], 2). ’Ia hina’aro ’outou e ha’api’i i te ta’ata i te hō’ē parau tumu o te ’evanelia, ’a fa’aitoito i te ora i te reira parau tumu.
Hōpoi mai i te mau pāpa’a parau, nā Gary L. Kapp