tē fa’a’ite ra Iesu i nā ’ahuru ma piti ’āpōsetolo

Nephi toru : Teie nei tino ta’ata e hō’ē ’ahuru ma piti tā’u i mā’iti, nā Gary L. Kapp

21–27 nō Tetepa

3 Nephi 12–16

« ’O vau te ture ’e te māramarama »

E rave rahi parau tumu e ’apo mai i roto i te 3 Nephi 12–16. Tē vai ra ’ua tu’uhia i roto i teie arata’i ha’api’ira’a, terā e ’ite mai paha ’outou i te tahi atu ā. E vaiiho i te Metua i te Ao ra, nā roto i tōna Vārua, e ha’api’i ia ’outou i te mea e tītauhia nō ’outou i teienei.

Pāpa’i i te mau mana’o e tae mai

Mai te mau pipi a Iesu i putuputu i ni’a i te mou’a i Galilea, i ora na te ta’ata i putuputu i te hiero nō Bounetifula i raro a’e i te ture a Mose. ’Ua pe’e rātou i te reira nō te mea e fa’atoro te reira i tō rātou vārua i te Mesia ra (hi’o Iakoba 4:5), i teienei rā, tē ti’a nei te Mesia i mua ia rātou ma te fa’a’ite i tāna ture teitei a’e. Noa atu rā ’aita tātou nei i ora i te ture a Mose, e ti’a ia tātou ’ia ta’a ē, te fa’aturera’a tā Iesu i tu’u nō tāna mau pipi, e ture teitei a’e ïa. ’Ua nā ’ō ’oia ē : « Tē hina’aro nei au ’ia maita’i roa ’outou » (3 Nephi 12:48). Mai te peu e tae mai te mana’o ē, e’ita te reira e roa’a ia ’outou, e ha’amana’o ē ’ua parau ato’a Iesu ē : « E ao tō tei ha’eha’a te ’ā’au, ’o tei tae iā’u ra, nō rātou ho’i te bāsileia ra o te ao » (3 Nephi 12:3). E tītaura’a manihini teie ture teitei a’e—te tahi rāve’a nō te parau ē « e haere mai ’outou iā’u nei, ’e e fa’aorahia ’outou » (3 Nephi 12:20). Mai te ture a Mose te huru, tē fa’atoro nei teie ture i ni’a i te Mesia—te ta’ata ana’e e nehenehe e fa’aora ’e e ha’amaita’i roa ia tātou. ’Ua nā ’ō ’oia ē : « Inaha, ’o vau te ture ’e te māramarama. E hi’o mai iā’u, e tāmau ā ē tae noa atu i te hope’a, ’e e roa’a ia ’outou te ora » (3 Nephi 15:9).

ītona tuatāpapara’a a te ta’ata iho

Mau mana’o nō tā ’oe iho tuatāpapara’a pāpa’ira’a mo’a

3 Nephi 12–14

Tē fa’a’ite nei te mau ha’api’ira’a a te Fa’aora nāhea i te riro ’ei pipi mau.

Tē vai ra e rave rahi parau mau, mau parau a’o ’e mau fa’aarara’a i roto i te 3 Nephi 12–14. Teie hō’ē rāve’a nō te tuatāpapa ’e nō te fa’a’ohipa i te mea tā te Fa’aora i ha’api’i i roto i teie mau pene : E rave i te hō’ē tuha’a ’īrava ’e e hi’o ē, e ti’a ānei ia ’oe ’ia tātara poto i teie mau ’īrava ’ei hō’ē pereota e ha’amata nā roto i te mau parau « Nō te mau pipi mau a Iesu Mesia… » ’Ei hi’ora’a, te hō’ē tātarara’a poto nō te mau ’īrava 3 Nephi 14:1–5, ’o teie ïa « Nō te mau pipi mau a Iesu Mesia, ’aita te mana’o fa’ahapa ». E hina’aro paha ’oe e rave i te hō’ē ’īrava i roto i teie mau pene e aura’a ta’a ’ē tōna, nō te tāmau ’ā’au i te reira ’aore rā nō te tu’u i te reira i te hō’ē vāhi e ’ite pinepine ’oe i te reira. E feruri nāhea i te fa’a’ohipa i te mea tā ’oe e ha’api’i ra i roto i tā ’oe iho mau tauto’ora’a nō te riro ’ei pipi maita’i a’e nā Iesu Mesia.

Hi’o ato’a Mataio 5–7 ; Luka 6:20–49.

3 Nephi 12:1–2 ; 15:23–24 ; 16:1–6

E ao tō te feiā e ti’aturi ma te ’ite mata ’ore.

’Ia hi’ohia te tā’āto’ara’a o te mau tamari’i a te Atua, e mea iti roa tei ’ite mata i te Fa’aora ’e tei fa’aro’o i tōna reo, mai tei tupu nō te ta’ata i Bounetifula. Te rahira’a o tātou, mai te mau ta’ata ïa i fa’ahitihia i roto i te 3 Nephi 12:2 ; 15:23 ; ’e te 16:4–6. E aha te mau mea i parau-fafau-hia i taua mau ta’ata ra i roto i teie mau ’īrava ? Nāhea teie mau parau i tē tupura’a i roto i tō ’oe orara’a ?

Hi’o ato’a Ioane 20:26–29 ; 2 Nephi 26:12–13 ; Alama 32:16–18.

3 Nephi 12:21–30 ; 13:1–8, 16–18 ; 14:21–23

’Aita i nava’i te mau ’ohipa parau-ti’a ; tītau-ato’a-hia te ’ā’au ateate.

Hō’ē tumu parau e ’ite mai ’oe i roto i teie mau pene, ’o te tītau-manihini-ra’a ïa a te Fa’aora ’ia ora i te hō’ē ture teitei a’e—’ia vai parau-ti’a tātou ’eiaha i roto noa i tā tātou mau ’ohipa i rāpae, i roto ato’a rā i tō tātou ’ā’au. E hi’o mai i te reira tumu parau i te paraparaura’a te Fa’aora nō ni’a i te mārōra’a (3 Nephi 12:21–26), te vi’ivi’i mōrare (3 Nephi 12:27–30), te pure (3 Nephi 13:5–8), ’e te ha’apaera’a mā’a (3 Nephi 13:16–18). E aha te tahi atu mau hi’ora’a tā ’oe e ’ite ra ? E aha tā ’oe e nehenehe e rave nō te fa’aateate i te mau hia’ai o tō ’ā’au, ’eiaha rā e rōtahi noa i ni’a i te mau ’ohipa i rāpae ?

3 Nephi 14:7–11

Mai te mea e ’imi au i « te mea maita’i » nō ’ō mai i te Metua i te Ao ra, e fāri’i ïa vau i te reira.

’Ua parau te peresideni Russell M. Nelson : « ’Ua hina’aro mau ānei te Atua e paraparau ia ’outou ? ’Ē ! ’Auē, e mau mea hau atu ho’i tā tō ’outou Metua i te Ra’i i hina’aro ’ia ’ite ’outou » (« Heheura’a nō te ’Ēkālesia, heheura’a nō tō tātou orara’a », Ensign ’aore rā Liahona, Mē 2018, 95). ’Ia tai’o ’oe i te tītaura’a manihini a te Fatu i roto i te 3 Nephi 14:7–11 e ani, e ’imi ’e e pātōtō, ’a feruri i « te mea maita’i » tāna e hina’aro ia ’oe ’ia ani atu. E nehenehe teie fa’ahou mau ’īrava i muri nei e tauturu ia ’oe ’ia māramarama nāhea i te ani, i te ’imi ’e i te pātōtō. E tauturu ato’a paha te reira i te fa’ata’a mai nō te aha ’aita te tahi mau pure e pāhonohia nei mai tā ’oe e tīa’i ra : Isaia 55:8–9 ; Helamana 10:5 ; Moroni 7:26–27, 33, 37 ; ’e Te Parau Ha’api’ira’a ’e te mau Parau Fafau 9:7–9.

ītona tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

3 Nephi 12:48

Nāhea te a’ora’a a Elder Jeffrey R. Holland « ’Ia maita’i roa ho’i ’outou—I te pae hope’a » (Ensign ’aore rā Liahona, Novema 2017, 40–42) e tauturu ai ia tātou ’ia māramarama i te mau parau a te Fa’aora i roto i teie ’īrava ? Tē vai ra te tauturu i roto i te Moroni 10:32–33.

3 Nephi 12:9, 38–42 ; 14:3–5, 12

Nāhea teie mau ’īrava e tano ai nō te mau ’ohipa i rotopū i te mau melo o te ’utuāfare ? Penei a’e e nehenehe tō ’outou ’utuāfare e ha’amau ’āmui i te tahi mau fā nō te ora ’e nō te ha’apa’o maita’i a’e i teie mau parau tumu.

3 Nephi 13:19–21

E nehenehe teie mau ’īrava e tūra’i i te hō’ē tāu’ara’a parau nō ni’a i te mea tā tō ’outou ’utuāfare e ha’afaufa’a nei. Tē vai ra ānei te tahi mau tao’a i ni’a i te fenua nei ’o tē ārai nei ia ’outou i te ha’apu’e i te tao’a i ni’a i te ra’i ? E nehenehe tā ’outou e ha’apūai ā i te reira nā roto i te ravera’a ’e te ’utuāfare i te hō’ē ha’uti mā’imi tao’a, nō te ’ite mai i te mau mea i roto i tō ’outou fare ’o tē fa’aha’amana’o i te mau melo o te ’utuāfare i te mau tao’a faufa’a mure ’ore.

3 Nephi 14:7–11

E au mai paha te mau tamari’i ’āpī i te hō’ē ha’uti, fa’auruhia o te 3 Nephi 14:8–9, ’oia ho’i e ani mai rātou i te hō’ē mea ’e e fāri’i rātou i te tahi ’ē atu ’ohipa. E aha tā te Fa’aora i hina’aro ia tātou ’ia ’ite nō ni’a i tō tātou Metua i te Ra’i ’a fa’a’ite ai ’oia i teie hi’ora’a ?

3 Nephi 14:15–20

E aha « te huero maita’i » e tauturu nei ia tātou ’ia ’ite ē, e peropheta mau ’o Iosepha Semita, ’aore rā te peresideni o te ’Ēkālesia nei ?

3 Nephi 14:24–27

E feruri i te mau rāve’a nō te fa’ahi’o i tō ’outou ’utuāfare i te parabole i roto i teie mau ’īrava. Penei a’e e nehenehe te mau melo o te ’utuāfare e pāpa’i i te hōho’a, e rave i te tahi ’ohipa ’aore rā e patu i te hō’ē mea i ni’a i te niu pāpū ’e i ni’a i te niu one.

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i tā tātou ha’api’ira’a

Fa’a’ohipa i te mau ha’api’ira’a tao’a. ’Ua ha’api’i te Fa’aora i te mau parau mau hōhonu roa ma te fa’ahiti i te parau nō te tahi mau tao’a mātarohia. E nehenehe e rave i te hō’ē mea mai te reira ’a tai’o ai tō ’outou ’utuāfare i te 3 Nephi 12–16. ’Ei hi’ora’a, ’ia tai’o ’outou i te pene 12, e nehenehe e fa’a’ite i te tahi miti papa’ā, te hō’ē mōrī hinu ’e te hō’ē ’ahu ’ō’omo. E nehenehe ato’a te reira e riro ’ei fa’aha’amana’ora’a ha’api’ira’a. I muri mai i te tai’ora’a i teie mau pene, e fa’a’ite fa’ahou ā i te mau tao’a ma te ani i te mau melo o te ’utuāfare e aha tā te Fa’aora i ha’api’i nō ni’a i te tao’a tāta’itahi.

tē ha’api’i ra Iesu i te mau ’āti Nephi

Te tere o te Fa’aora i te mau ta’ata ra i Amerika, nā Glen S. Hopkinson