« 31 nō ’Ātete–6 nō Tetepa. Helamana 13–16 : ‘Te parau ha’amāuruuru ’e te ’oa’oa rahi ra’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 31 nō ’Ātete–6 nō Tetepa », Mai, pe’e mai—nō te ta’ata hō’ē ’e te ’utuāfare : 2020
Samuela te ’āti Lamana i ni’a i te patu, nā Arnold Friberg
31 nō ’Ātete–6 nō Tetepa
Helamana 13–16
« Te parau ha’amāuruuru ’e te ’oa’oa rahi ra »
’A pāpa’i ai ’outou i te mau mana’o e tae mai i teie hepetoma, ’a feruri nāhea te mau parau tumu i roto i te Helamana 13–16 e patu ai ’e e ha’apūai ai i te tahi atu mau mea tā ’outou i ’apo mai i roto i te mau pāpa’ira’a mo’a.
Pāpa’i i te mau mana’o e tae mai
Te taime mātāmua ’ua tāmata Samuela te ’āti Lamana i te fa’a’ite atu i « te parau maitata’i » i Zarahemela (Helamana 13:7), ’ua pāto’ihia ’oia ’e ’ua tīahihia e te mau ’āti Nephi ’ā’au ’eta’eta. E ti’a ’ia parau ē, mai te huru ē, ’ua patu rātou i te hō’ē patu me’ume’u ’ati a’e i tō rātou ’ā’au i ’ore ai rātou i fāri’i i te poro’i a Samuela. ’Ua māramarama Samuela i te faufa’a rahi o te poro’i tāna i hōro’a ’e ’ua fa’a’ite i tōna fa’aro’o nā roto i te pe’era’a i te fa’auera’a a te Atua « e ho’i fa’ahou ’oia e tohu i te mau ta’ata » (Helamana 13:3). Mai ia Samuela te huru, e fārerei tātou pā’āto’a i te mau patu ’a « fa’anehenehe [ai tātou] i te ’ē’a nō te Fatu ra » (Helamana 14:9) ’e ’a tūtava ai i te pe’e i tāna mau peropheta. Mai ia Samuela ato’a te huru, tē hōro’a ato’a nei tātou i tō tātou ’ite nō Iesu Mesia, « ’o tē haere mai ho’i » ma te ani i te tā’āto’ara’a ’ia « fa’aro’o… i tōna ra i’oa » (Helamana 13:6 ; 14:13). E’ita te mau ta’ata ato’a e fa’aro’o mai, ’e tē vai ra e pāto’i ’ū’ana roa mai ia tātou. ’O rātou rā te fa’aro’o i teie poro’i ma te fa’aro’o i te Mesia, e ’ite mai ïa rātou ē e « parau ha’amāuruuru ’e te ’oa’oa rahi » mau te reira (Helamana 16:14).
Mau mana’o nō tā ’oe iho tuatāpapara’a pāpa’ira’a mo’a
Tē hōro’a nei te Fatu i te mau fa’aarara’a nā roto i tāna mau peropheta.
I roto i te mau pāpa’ira’a mo’a, i te tahi taime, tē fa’aauhia nei te mau peropheta i te mau tīa’i i ni’a i te patu ’aore rā i ni’a i te pare ’o tē fa’aara mai i te mau ataatara’a (hi’o Isaia 62:6 ; Ezekiela 33:1–7).
’Ua ha’api’i te peresideni M. Russell Ballard ē : « I te roara’a o te mau tenetere, ’ua rave te mau peropheta i tā rātou ’ohipa i te fa’aarara’a i te ta’ata i te mau fifi i mua ia rātou. E hopoi’a tei tā’amuhia i ni’a i te mau ’āpōsetolo a te Fatu ’ia hi’o, ’ia fa’aara ’e ’ia toro atu ho’i i te rima nō te tauturu i te ta’ata e ’imi ra i te pāhonora’a i te mau uira’a o te orara’a » (« Tei te hoe fa’atere te Atua », Ensign ’aore rā Liahona, Nov. 2015, 25).
’Ia tuatāpapa ’oe ’e ’ia feruri ho’i i te Helamana 13, e nehenehe tā ’oe e tāpa’o i te mau fa’aarara’a e rave rahi tā Samuela i hōro’a. ’Ei hi’ora’a, e aha tāna i ha’api’i atu nō ni’a i te tātarahapara’a ? nō ni’a i te ha’eha’a ’e te tao’a rahi ? Nāhea teie mau fa’aarara’a e tano ai nō ’oe ? E aha te mau fa’aarara’a tā te mau peropheta nō teie ’anotau i hōro’a ’aita i maoro a’enei, ’e e aha te mana’o i tae mai nō ni’a i terā mau fa’aarara’a ?
Tē fa’atoro nei te peropheta ia tātou i ni’a ia Iesu Mesia.
E mea aroha te Fatu i te feiā e tātarahapa.
Nā mua roa, ’ua tonohia Samuela i te mau ’āti Nephi ra nō te fa’a’ite i te parau ’oa’oa nō te taera’a mai te Fa’aora (hi’o Helamana 13:7). Nō tō rātou pāto’ira’a iāna, ’ua ho’i mai ’oia ma te fa’aara ’āfaro ia rātou i te mau ha’avāra’a a te Atua. ’Ua vai tāmau rā i roto i teie mau fa’aarara’a i te anira’a aroha ’ia tātarahapa ; e hi’o i teie mau anira’a i roto i te Helamana 13–15 (hi’o ta’a ’ē Helamana 13:6, 11 ; 14:15–19 ; 15:7–8). Nāhea teie mau anira’a e tano ai nō ’oe ? E aha tā ’oe e ’apo nei i roto i teie mau ’īrava nō ni’a i te tātarahapara’a ? E aha te taime ’oe i te ’itera’a i te aroha o te Atua tei tae mai nā roto i te tātarahapara’a ?
Te mau tāpa’o ’e te mau mea māere e nehenehe e ha’apūai i te fa’aro’o o te feiā e ’ore e fa’a’eta’eta i tō rātou ’ā’au.
I roto i te Helamana 14, ’ua fa’ata’a Samuela i te tumu te Fatu i hōro’a ai i te mau tāpa’o nō te fānaura’a ’e te pohe o te Fa’aora : « ’ia fa’aro’o ’outou i tōna ra i’oa » (Helamana 14:12). ’A tuatāpapa ai ’oe i te Helamana 14, e pāpa’i i te mau tāpa’o nō te fānaura’a o te Fa’aora i roto i te mau ’īrava 1–8 ’e te mau tāpa’o nō tōna pohe i roto i te mau ’īrava 20–28. ’Ia mana’o ’oe, nō te aha e mau tāpa’o fa’ahiahia teie nō te fa’aara i te fānaura’a ’e te pohe o Iesu Mesia ?
E nehenehe ānei tā ’oe e feruri i te tahi atu mau tāpa’o tā te Fatu i hōro’a nō te tauturu ia ’oe ’ia fa’aro’o iāna ? ’Ei hi’ora’a, ’ua parau ātea te mau peropheta nō te mau tāpa’o e ’itehia hou te Tae-piti-ra’a mai o te Fa’aora (hi’o « Te mau tāpa’o o te tau », Arata’i nō te mau pāpa’ira’a mo’a, scriptures.ChurchofJesusChrist.org). ’Ua tupu a’ena ānei te tahi mau tāpa’o i tō tātou nei mahana ? E riro paha te tahi mau tāpa’o arata’i i te fa’aro’o ia Iesu Mesia i te tupu nō te ta’ata iho ’e i te hō’ē fāito iti a’e. E rave i te tahi taime nō te feruri i te mau rāve’a ’ua ’ite mai ’oe i tōna rima i roto i tō ’oe orara’a.
E aha te hi’o maita’i ’e te mau tāpa’o i roto i te Helamana 16:13–23 ? Nāhea ’oe nō te ’ore e pe’e i te huru o te mau ta’ata i fa’ahitihia i roto i teie mau ’īrava ?
Hi’o ato’a Alama 30:43–52 ; Ronald A. Rasband, « ’Ei ’ōpuara’a hanahana », Ensign ’aore rā Liahona, Nov. 2017, 55–57.
E ha’afātata atu ā vau i te Fatu ’ia pe’e ana’e au i te parau a’o a te peropheta.
’Ua ha’api’i Elder NeilL. Andersen ē : « I roto i tō’u iho nei orara’a ’ua ’ite au ē, ’ia tuatāpapa vau i te mau parau a te peropheta o te Atua nā roto i te pure, ’e ’ia fa’a’āfaro vau i te pae vārua i tō’u hina’aro, ma te fa’a’oroma’i, i ni’a i teie mau ha’api’ira’a fa’auru, e rahi mai tō’u fa’aro’o i te Fatu ra ia Iesu Mesia. Mai te peu e mā’iti tātou e vaiiho i tāna parau a’o i te hiti ’e ’ia fa’aoti ’ua ’ite maita’i tātou iāna, e māuiui tō tātou fa’aro’o ’e e rumaruma tō tātou hi’ora’a ātea mure ’ore » (« Te peropheta a te Atua », Ensign ’aore rā Liahona, Mē 2018, 26–27). E aha te mau parau ’e te mau ’ohipa a te mau ’āti Nephi i roto i te Helamana 16 e ha’apāpū nei i te mea tā Elder Andersen i ha’api’i ? ’Ia mana’o ’oe, e aha tei tītauhia ia ’oe iho ’ia fafau ’ia rave nō ni’a i te mau peropheta ’e tā rātou mau poro’i ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
Helamana 13:3–4
E aha te mea e fa’auru nei i tō ’outou ’utuāfare nō ni’a i te pāhonora’a a Samuela i te fa’auera’a a te Fatu i roto i te Helamana 13:3–4 ? I roto i tā ’outou tuatāpapara’a ’utuāfare i teie hepetoma, penei a’e e nehenehe tā ’outou e fa’aitoito i te mau melo o te ’utuāfare ’ia fa’a’ite mai i te mau mana’o tei « tae i roto i [tō rātou] ’ā’au ».
Helamana 13:38
E mana’o mātaro te mana’ora’a ē, e nehenehe e ’itehia te ’oa’oa « i te ravera’a i te ’ohipa ’ino ». Mea nāhea te orara’a i te ’evanelia e hōpoi mai ai i te ’oa’oa mau ia tātou nei ?
Helamana 15:3
Nāhea te fa’atītī’aifarora’a a te Atua e fa’a’ite nei i tōna here ia tātou ? E ani i te mau melo o te ’utuāfare ’ia ani ma te ha’eha’a i te Fatu i te mea tā rātou e nehenehe e rave nō te ha’amaita’i atu ā.
Helamana 15:5–8
E aha tā tātou e ha’api’i nei nō ni’a i te fa’afāriura’a o te mau ’āti Lamana i fa’ahitihia i roto i teie mau ’īrava ? Nāhea e ti’a ai ia tātou ’ia peʼe i tō rātou hiʼoraʼa maitaʼi ?
Helamana 16:1–3
E au ānei tō ’outou ’utuāfare e ha’uti ta’ata ora i te ’ā’amu o Samuela te ’āti Lamana ? I muri a’e i te tai’ora’a i terā fa’ati’ara’a, e nehenehe te mau melo o te ’utuāfare e fa’a’ohu nō te ti’a i ni’a i te hō’ē pārahira’a ’a tai’o ai i te tahi mau parau tohu a Samuela, e fa’ahua ïa te tahi atu mau melo o te ’utuāfare e te’a ’aore rā e taora i te ’ōfa’i. E nehenehe te reira e tauturu i tō ’outou ’utuāfare ’ia māramarama i te mana’o o Samuela i terā taime nā reira ato’a te mana’o o te mau ’āti Nephi. E au ato’a paha te mau tamari’i ’āpī ’ia pāpa’i i te hōho’a nō teie ’ā’amu. E aha tā tātou e nehenehe e rave nō te riro mai ia Samuela i te fa’a’itera’a i te ’evanelia i te ta’ata noa atu ā tō tātou mau mata’u ?
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Ha’amaita’ira’a i te tuatāpapara’a pāpa’ira’a mo’a a te ta’ata iho
’Imi i te mau hōho’a fa’anahora’a. Te hō’ē fa’anahora’a hōho’a, ’o te hō’ē ïa fa’anahora’a ’aore rā te hō’ē hi’ora’a e nehenehe e fa’a’ohipa mai te hō’ē arata’i nō te fa’atupu i te hō’ē ’ohipa. I roto i te mau pāpa’ira’a mo’a e ’ite mai tātou i te mau hōho’a fa’anahora’a e fa’a’ite mai nāhea te Fatu e fa’atupu ai i tāna ’ohipa, mai te tonora’a i tāna mau tāvini nō te fa’aara i te ta’ata.
© The Book of Mormon for Young Readers, Samuela te ’āti Lamana, nā Briana Shawcroft