« 31 nō ’Ātete–6 nō Setepa. Helamana 13–16 : ’Te parau ha’amāuruuru o te ’oa’oa rahi,’ » Mai, pe’e mai—nō te Paraimere : Buka a Moromona 2020 (2020)
« 31 nō ’Ātete–6 nō Setepa », Mai, pe’e mai—nō te Paraimere : 2020
Samuela te ’āti Lamana i ni’a i te patu, nā Arnold Friberg
31 nō ’Ātete–6 nō Setepa
Helamana 13-16
« Te parau ha’amāuruuru o te ’oa’oa rahi »
E fa’aineine nō te ha’api’i nā roto i te tai’ora’a i te Helamana 13–16. ’e te feruri-māite-ra’a e aha te mau ’ohipara’a e tauturu maita’i a’e i te mau tamari’i ’ia ’apo mai i te mau parau mau i roto i teie mau pene.
Pāpa’i i te mau mana’o e tae mai
Tītau i te mana’o
E fa’a’ite i te hō’ē hōho’a nō Samuela te ’āti Lamana, ’e e ani i te mau tamari’i ’ia fa’a’ite mai i te hō’ē mea tā rātou i ’ite nō ni’a iāna. ’Ei hi’ora’a, e nehenehe ānei rātou e paraparau mai nō ni’a i te ’ā’amu o Samuela e ha’api’i ra i ni’a i te patu ’e ’aore rā, te mau tāpa’o tāna i parau ē, e tupu te reira i te taime e fānauhia ai Iesu ?
Ha’api’i i te ha’api’ira’a tumu : Mau tamari’i ’āpī
E nehenehe te Vārua e paraparau mai i tō tātou ’ā’au.
I te fa’auera’ahia Samuela te ’āti Lamana ’ia poro i te ’āti Nephi, ’ua tauturu te Metua i te ao ra iāna ’ia ’ite i roto i tōna ’ā’au i te mea tāna e ti’a e parau.
Mau ’ohipa e nehenehe e rave
-
E ha’api’i i te mau tamari’i ē, ’ia paraparau ana’e tātou i te tahi ’e te tahi ma te fa’a’ohipa i te mau ta’o, e nehenehe te Vārua Maita’i e paraparau mai ma te mau mana’o i roto i tō tātou ’ā’au. E ani ia rātou ’ia tu’u i tō rātou rima i ni’a i tō rātou māfatu i te mau taime ato’a e tai’o ’outou i te ta’o « ’ā’au » i roto i te Helamana 13:2–5. E tauturu ia rātou ’ia fa’anehenehe i te mau tuha’a ’api parau hōho’a māfatu e parau ra ē, « e paraparau mai te Vārua iā’u i roto i tō’u ’ā’au ».
-
Parau i te mau tamari’i ē, ’ia bāpetizo-ana’e-hia rātou ’e ’ia ha’amauhia, e fāri’i rātou i te hōro’a o te Vārua Maita’i nō te tauturu ia rātou ’ia ’ite i te mau mea tā te Metua i te ao ra e hina’aro ’ia rave ’e ’ia parau rātou. E tauturu ia rātou ’ia feruri i te mau mea tā te Vārua Maita’i e ti’a e parau ia rātou, ’e e ani ia rātou ’ia fa’a’ite mai e aha tā rātou e nehenehe e rave nō te pe’e i tāna mau muhumuhura’a.
Tē ha’api’i nei te mau peropheta nō ni’a ia Iesu Mesia.
E rāve’a faufa’a roa te ’ā’amu o Samuela te ’āti Lamana nō te ha’api’i i te mau tamari’i ē, tē ha’api’i nei te mau peropheta ato’a nō ni’a ia Iesu Mesia.
Mau ’ohipa e nehenehe e rave
-
Fa’a’ite i te hōho’a o Samuela te ’āti Lamana i roto i te arata’i ha’api’ira’a nō teie hepetoma i roto i te Mai, pe’e mai—nō te mau ta’ata hō’ē ’e te ’utuāfare, ’e e parau i te mau tamari’i, nā roto i te mau parau ’ōhie, nō ni’a i te ’ohipa i tupu i ni’a iho iāna i roto i te Helamana 13–16. E nehenehe ato’a ’outou e fa’a’ohipa « Pene 40 : Samuela te ’āti Lamana e parau ra nō Iesu Mesia » (Te mau ’ā’amu o te Buka a Moromona, 111–13). E vaiiho i te mau tamari’i ’ia fa’a’ite mai i te mau mea tā rātou i ’ite nō ni’a ia Samuela te ’āti Lamana.
-
E hīmene ’āmui « Samuel Tells of the Baby Jesus » ’e ’aore rā, te hitu o te ’īrava o « Dans le Livre de Mormon » (Chants pour les enfants, 36, 62). E fa’a’ite i te hō’ē mea tā ’outou e fa’ahiahia nei nō ni’a ia Samuela, ’e e vaiiho i te mau tamari’i ’ia fa’a’ite mai e aha tā rātou i au nō ni’a i tōna ’ā’amu.
-
E huna i te mau hōho’a nā roto i te piha ’o tē fa’ahōho’a ra i te mau tāpa’o tā Samuela i tohu i roto i te Helamana 14:2–7 ’e 20–25. E tai’o i te hō’ē pereota ’o tē fa’ata’a ra i te hō’ē o te mau tāpa’o, ’e e ani i te mau tamari’i ’ia ’imi mai i te hōho’a o te reira tāpa’o. E fa’ata’a ē, ’ua tauturu teie mau tāpa’o i te ’āti Nephi ’ia ’ite nō ni’a ia Iesu Mesia. E fa’a’ite pāpū ē, mai ia samuela, tē fa’a’ite pāpū nei te mau peropheta ato’a nō Iesu Mesia.
Tē fa’atoro nei te peropheta ia tātou i ni’a ia Iesu Mesia.
E ha’amaita’ihia vau ’ia pe’e ana’e au i te peropheta.
’Ua hōro’a mai te Metua i te ao ra ia tātou i te hō’ē peropheta nō te tauturu ia tātou ’ia ’ite i tōna hina’aro ’e ’ia pe’e i tāna fa’anahora’a. E ha’amaita’ihia tātou ’a fa’aro’o ai ’e ’a ha’apa’o ai tātou i te mau parau a te peropheta.
Mau ’ohipa e nehenehe e rave
-
E tauturu i te mau tamari’i ’ia hāmani i te hō’ē patu na’ina’i i te mau tāpū rā’au ’e ’aore rā, i te mau buka. Ma te fa’a’ohipa i te hō’ē tao’a ha’uti, ’e ’aore rā, te hō’ē pēpe ha’avare nō te fa’ahōho’a ia Samuela, e vaiiho i te mau tamari’i, te tahi i muri mai i te tahi, ’ia tauturu ia « Samuela » ’ia ta’uma i ni’a i te patu nō te ha’api’i i te ta’ata nō ni’a ia Iesu Mesia. (Hi’o ato’a i te ’api ’ohipara’a nō teie hepetoma). E fa’a’ite i te mau pereota nō roto mai i te Helamana 16:1 ’e te 5 nō te fa’ata’a ē, ’ua ti’aturi te tahi mau ta’ata ia Samuela ’e ’ua bāpetizohia. Fa’a’ohipa i te mau pereota nō roto mai i te Helamana 16:2 ’e te 6 nō te fa’a’ite ē, ’aita te tahi pae i ti’aturi ’e ’ua riri rātou ia Samuela. E fa’a’ite pāpū ē, te mau ta’ata tei pe’e i te peropheta, ’ua ha’amaita’ihia rātou.
-
E pia i te hō’ē hōho’a o te Fa’aora, ’e e ani i te hō’ē tamari’i ’ia mono ’ei peropheta ’e ’ia arata’i i te tahi atu mau tamari’i nā roto i te piha ’a hīmene ai rātou i te tahi mau ’īrava o te « Suis les prophètes » (Chants pour les enfants,58–59) ’e ’aore rā, te tahi atu hīmene nō ni’a i te mau peropheta. I muri iho, e ani i te tamari’i e mono ra ’ei peropheta ’ia arata’i i te mau tamari’i i te hōho’a o te Fa’aora. E fa’a’ite pāpū ē, mai te peu e pe’e tātou i te peropheta, e arata’i ’oia ia tātou ia Iesu Mesia ra. E fa’a’ite i te tahi mau mea tā tō tātou peropheta i ha’api’i ’aita i maoro a’e nei nō ni’a ia Iesu. Nāhea e ti’a ai ia tātou ’ia pe’e i tāna parau a’o ?
Ha’api’i i te ha’api’ira’a tumu : Mau tamari’i pa’ari
E nehenehe te Vārua e paraparau mai i tō tātou ’ā’au.
’Ia tae i te hō’ē mahana, e tītauhia i te mau tamari’i tā ’outou e ha’api’i ra ’ia ’ite nāhea ’ia rave mai tā Samuela i rave : e fa’a’ite i te parau poro’i tā te Fatu i tu’u i roto i tō rātou ’ā’au.
Mau ’ohipa e nehenehe e rave
-
E fa’a’ite i te hō’ē hōho’a nō Samuela te ’āti Lamana (mai terā i roto i te Mai, pe’e mai—nō te ta’ata hō’ē ’e te ’utuāfare), ’e e ani i te mau tamari’i nāhea tō Samuela ’itera’a e aha te mea e parau ’a ha’api’i ai ’oia i ni’a i te patu o te ’oire. E ani ia rātou ’ia ’imi Helamana 13:2–4 nō te hō’ē pāhonora’a. E parau i te hō’ē taime ’a tauturu ai te Vārua Maita’i ia ’outou ’ia ’ite i roto i tō ’outou ’ā’au e aha tā te Atua i hina’aro ’ia rave ’e ’ia parau ’outou. E ani i te mau tamari’i ’ia fa’a’ite mai i te hō’ē ā ’itera’a tā rātou i fāri’i.
-
E fa’a’ite i te hō’ē hōho’a nō te peropheta ora e paraparau ra i roto i te ’āmuira’a rahi. E parau i te mau tamari’i ē, e parau te Atua i te peropheta i te mea e parau ia tātou, mai tāna i parau ia Samuela i te mau mea e parau i te ’āti Nephi. E paraparau ’āmui i te mau mea tā te peropheta i parau tei fa’auru ia ’outou ’e ’aore rā, i te mau tamari’i.
Tē ha’api’i nei te mau peropheta nō ni’a ia Iesu Mesia.
Te fā o te parau poro’i a Samuela ’o te fa’a’ite-pāpū-ra’a ïa nō Iesu Mesia ’e te anira’a i te ta’ata ’ia tātarahapa ’e ’ia haere mai iāna ra. Hō’ē ā ti’ara’a tō tā tātou mau peropheta i teie mahana.
Mau ’ohipa e nehenehe e rave
-
E ani i te ’āfara’a o te mau tamari’i ’ia tai’o i te Helamana 14:2–6 ’e ’ia pāpa’i hōho’a i te mau tāpa’o nō te fānaura’a o Iesu. E ani i te tahi atu ’āfara’a o te piha ha’api’ira’a ’ia tai’o i te Helamana 14:20–28 ’e ’ia pāpa’i hōho’a i te mau tāpa’o nō te pohera’a o Iesu. I muri iho e ani i te pupu tāta’itahi ’ia fa’a’ite mai i te mea tā rātou i pāpa’i hōho’a. E tai’o ’āmui i te Helamana 14:11–12, ’e e ani i te mau tamari’i ’ia fa’aro’o nō te aha Samuela i tohu ai i teie mau tāpa’o. Nāhea tātou i te ’apo mai nō ni’a ia Iesu Mesia i teie mahana ?
-
E fa’ata’a ē, mai ia Samuela te ’āti Lamana tei ha’api’i nō ni’a ia Iesu Mesia, tē nā reira nei te mau peropheta ora i teie mahana. E fa’a’ite i te hō’ē fa’ahitira’a parau nō roto mai i te hō’ē parau poro’i nō te ’āmuira’a ’aita i maoro a’e nei, i reira tō te peropheta ora fa’a’ite-pāpū-ra’a nō te Mesia. E ani i te mau tamari’i ’ia fa’a’ite mai i te mea tā te peropheta i ha’api’i mai ia rātou nō ni’a ia Iesu Mesia.
E ha’amaita’ihia vau ’ia pe’e ana’e au i te peropheta.
’Ua hōro’a mai te Metua i te ao ra ia tātou i te hō’ē peropheta nō te tauturu ia tātou ’ia ’ite i tōna hina’aro ’e ’ia pe’e i tāna fa’anahora’a. E ha’amaita’ihia tātou ’a fa’aro’o ai ’e ’a ha’apa’o ai tātou i te mau parau a te peropheta.
Mau ’ohipa e nehenehe e rave
-
E tai’o pūai i te Helamana 16:1 ’e 5, ’e e ani i te mau tamari’i ’ia ti’a i ni’a ’ia fa’aro’o ana’e rātou i te hō’ē mea tā te mau ta’ata i rave ’a ti’aturi ai rātou i te mau parau a Samuela. I muri iho e tai’o i te mau ’īrava 2 ’e 6, ’e e ani i te mau tamari’i ’ia pārahi ’ia fa’aro’o ana’e rātou i te hō’ē mea tā te mau ta’ata i rave ’a ti’aturi ’ore ai rātou. Nāhea tātou e fa’a’ite ai ē, tē ti’aturi nei tātou i te mau parau a te peropheta ora ?
-
E fa’a’ite i te hō’ē hōho’a o te peropheta ora, ’e e ani i te mau tamari’i ’ia fa’a’ite mai e aha tā rātou i ’ite nō ni’a iāna. E fa’a’ite nāhea ’outou i te tāmatara’a e pe’e i tāna mau ha’api’ira’a ’e nāhea te reira i te ha’amaita’ira’a ia ’outou.
Fa’aitoito i te ha’api’ira’a mai i te fare
E ani i te mau tamari’i ’ia ’apo mai nō ni’a i te hō’ē mea tā te peropheta i parau ’e ’ia fa’a’ite i te reira i te piha ha’api’ira’a i te hepetoma i muri nei.
Haʼamaitaʼiraʼa i tā tātou haʼapiʼiraʼa
E fa’aitoito i te mau tamari’i ’ia ui i te mau uira’a. ’A tauto’o i te hi’o i te mau uira’a a [te mau tamari’i] ’ei mau rāve’a, ’eiaha ra ’ei fa’a’areareara’a ’e ’aore rā, ’ei ha’afifira’a i tā ’outou ha’api’ira’a… E hōro’a mai teie mau huru uira’a ia ’outou i te mau hi’ora’a faufa’a roa i roto i te mau mea tā te mau tamari’i e feruri ra, i ni’a i tō rātou mau māna’ona’ora’a, ’e i ni’a i tā rātou huru pāhonora’a i te mau mea tā rātou e ’apo nei » (hi’o ato’a Te ha’api’ira’a mai tā te Fa’aora, 25–26).