« 24–30 nō ’Ātete. Helaman 7–12: ‘Ha’amana’o a’era i te Fatu’ », Mai pe’e mai—nō te Paraimere : Buka a Moromona 2020 (2020)
« 24–30 nō ’Ātete. Helamana 7–12 », Mai, pe’e mai—nō te Paraimere : 2020
Hōho’a o Nephi i ni’a i te hō’ē patu i roto i te ’āua nā Jerry Thompson
24–30 nō ’Ātete
Helamana 7–12
« Ha’amana’o a’era i te Fatu »
’A tai’o ai ’outou i te Helamana 7–12, ’a feruri nāhea te mau ’ā’amu ’e te mau parau tumu i roto i teie mau pene e nehenehe ai e ha’amaita’i i te mau tamari’i tā ’outou e ha’api’i nei. E nehenehe te mau mana’o i roto i teie arata’i ha’api’ira’a e pāturu i te fa’aurura’a tā ’outou e fāri’i.
Pāpa’i i te mau mana’o e tae mai
Tītau i te mana’o
E ani i te mau tamari’i e aha tā rātou i ’ite nō ni’a i te peropheta Nephi, te tamaiti a Helamana (hi’o Helamana 7–12). Mai te mea e hina’arohia, e fa’ata’a i te ta’a-’ē-ra’a i roto i teie peropheta tei pi’ihia o Nephi ’e te peropheta tei pi’ihia o Nephi i te ’ōmuara’a o te Buka a Moromona.
Ha’api’i i te ha’api’ira’a tumu : Mau tamari’i ’āpī
’Ua hina’aro te Fatu ’ia ha’amana’o vau iāna.
’Ua uiui o Nephi iāna iho, e mea nāhea tōna mau ta’ata i te fāriu-’ē-ra’a i te Atua ’e te ha’amo’era’a iāna. Nāhea e ti’a ai ia ’outou ’ia tauturu i te mau tamari’i ’ia ’apo mai i te mau rāve’a e nehenehe ia rātou ’ia ha’amana’o i te Metua i te ao ra ’e ia Iesu ?
Mau ’ohipa e nehenehe e rave
-
E fa’a’ite i te mau tamari’i i te hō’ē ’itera’a ’a mo’ehia ai ia ’outou hō’ē ’ohipa faufa’a roa. E ui ia rātou ē, ’ua mo’ehia ānei te hō’ē mea ia rātou ? E tai’o ia rātou i te Helamana 7:20, ’e e fa’ata’a ē, ’ua mā’iti te ’āti Nephi ’ia ha’amo’e i te Atua. ’Ua hina’aro te peropheta Nephi ’ia ha’amana’o rātou i te Atua. E hōpoi mai i te mau hōho’a i roto i te hō’ē pūtē ’o te fa’ahōho’a i te mau rāve’a e nehenehe ai i te mau tamari’i ’ia ha’amana’o i te Metua i te ao ra ’e ia Iesu. E fa’aue i te mau tamari’i ’ia mā’iti, te tahi i muri mai i te tahi, i te hō’ē hōho’a ’e ’ia fa’a’ite mai nāhea e ti’a ai ia tātou ’ia ha’amana’o i te Atua i te mau mahana ato’a.
-
E tauturu i te mau tamari’i ’ia fa’a’ī i te ’api ’ohipara’a o teie hepetoma.
Tē fa’a’ite pāpū nei te mau peropheta nō Iesu Mesia.
’Ua fa’a’ite pāpū Nephi ē, e haere mai Iesu Mesia, ’e ’ua ani ’oia i tōna mau ta’ata ’ia tātarahapa ’e ’ia pe’e iāna. E fa’a’ohipa i teie mau pene nō te ha’api’i i te mau tamari’i ē, tē fa’a’ite pāpū nei te mau peropheta nō Iesu Mesia.
Mau ’ohipa e nehenehe e rave
-
E fa’a’ite i te hō’ē hōho’a nō Iesu Mesia, ’e e parau i te mau tamari’i ē, tē ani mai nei te mau peropheta mai ia Nephi ’ia pe’e tātou ia Iesu. E tai’o i teie mau parau i muri nei nō ni’a i te mau peropheta nō roto mai i te Helamana 8:22 : « I fa’a’ite rātou i te taera’a mai o te Mesia, ’e ’ua hi’o rātou i mua, e ’ua ’oa’oa rātou i tōna ra mahana e tae mai a muri atu ». E fa’a’ite i te mau tamari’i i te hō’ē mea tā tō tātou peropheta ora i parau nō ni’a i te Fa’aora.
-
E hīmene ’āmui i te hō’ē hīmene nō ni’a i te mau peropheta, mai te « Suis les prophètes » (Chants pour les enfants, 58-59). E rave mai i te hō’ē pereota faufa’a roa i roto i te hīmene, ’e e pāpa’i hō’ē ta’o nō roto mai i te pereota i ni’a i te mau ’api parau ta’ahira’a ’āvae e rave rahi. E tu’u i te mau ta’ahira’a ’āvae i ni’a i te tahua e haere ti’a ra i te hō’ē hōho’a o te Fa’aora. E ani i te mau tamari’i ’ia pe’e i te ’ē’a o te ta’ahira’a ’āvae, ’e e tauturu ia rātou ’ia tai’o i te mau ta’o.
E ha’apa’o vau i te parau a te Metua i te Ao ra.
E nehenehe te hi’ora’a o te ha’apa’o o Nephi e fa’auru i te mau tamari’i tā ’outou e ha’api’i ra ’ia ha’apa’o i te parau a te Fatu.
Mau ’ohipa e nehenehe e rave
-
E tai’o Helamana 10:2, 11–12 ’e e tauturu i te mau tamari’i ’ia hāro’aro’a ē, ’ua ha’apa’o Nephi i te parau a te Atua. E ani i te mau tamari’i ’ia ha’uti i te mea tā Nephi i rave. ’Ei hi’ora’a, e ani ia rātou ’ia haere i te hō’ē pae o te piha (mai tē huru ra ē, tē ho’i ra rātou i te fare), e fa’aea, e huri, ’e e haere i te tahi atu pae o te piha (mai tē huru ra ē, tē ho’i ra rātou e ha’api’i i te ta’ata). E tauturu ia rātou ’ia hi’o ē, ’ua hina’aro Nephi e ha’apa’o i te parau a te Fatu noa atu ē, ’ua tītauhia iāna ’ia rave i te hō’ē ’ohipa fifi.
-
E tauturu i te mau tamari’i ’ia hāro’aro’a ē, i te tahi taime e hina’aro te Metua i te ao ra ’ia rave tātou i te hō’ē ’ohipa ta’a ’ē atu i te mea tā tātou e hina’aro e rave, terā rā, e nehenehe tātou e ha’apa’o i tāna parau mai ia Nephi. E fa’a’ite i te mau fa’ahitira’a parau mai te « i te tahi taime e hina’aro vau e riri, terā rā, e hina’aro te Metua i te ao ra iā’u ’ia… », ’e e vaiiho i te mau tamari’i ’ia fa’aoti i te mau fa’ahitira’a parau. E fa’aitoito i te mau tamari’i ’ia ha’amana’o e fa’aea ’e e feruri i te mea tā te Metua i te ao ra e hina’aro ia rātou ’ia rave ’e ’a rave i te reira.
Ha’api’i i te ha’api’ira’a tumu : Mau tamari’i pa’ari
E vai pāruru-noa-hia vau i te pae vārua mai te mea ē, e pe’e au i te peropheta.
’Ua ha’api’i mai te peresideni James E. Faust : « Tei roto tō tātou pārurura’a i te ha’apa’ora’a i te mea tā [te Peresideni o te ’Ēkālesia] e parau ’e i roto i te pe’era’a i tāna a’o » (« Continuous Revelation », Ensign, Novema 1989, 10).
Mau ’ohipa e nehenehe e rave
-
E ani i te mau tamari’i ’ia hāmani i te hō’ē tāpura i ni’a i te tāpura ’ere’ere nō te mau mea tā te hō’ē peropheta e rave (hio « peropheta », Arata’i o te mau pāpa’ira’a mo’a, scriptures.ChurchofJesusChrist.org). E tauturu ia rātou ’ia ’imi i te Helamana 7:1–2, 27–29; 8:22–23; ’e 10:3–4, 6–7 nō te hi’o, e mea nāhea Nephi i te ravera’a i te tahi o te mau mea i roto i tā rātou tāpura. Afea tō tātou ’itera’a i tō tātou peropheta i teie mahana i te ravera’a i teie mau mea ? E fa’a’ite i tō ’outou ’itera’a pāpū nō ni’a i te peropheta ora.
-
E tai’o ’āmui i te Helamana 11:3–7 (’e ’aore rā, e tai’o fa’ahou te « Pene 39 : ’Ua fāri’i Nephi i te mana rahi », Te mau ’ā’amu o te Buka a Moromona, 108–10). E ani i te mau tamari’i ’ia fa’aro’o e aha tei tupu i ni’a i te mau ta’ata tei ’ore i fa’aro’o i te peropheta. E aha te tupu mai ’ia ’ore ana’e tātou e fa’aro’o i te peropheta ? Nāhea tātou i te ha’amaita’ihia ’ia pe’e ana’e tātou iāna ? E fa’a’ite i te hō’ē mea tā tō tātou peropheta i ha’api’i mai, ’e e fa’aitoito i te mau tamari’i ’ia pe’e i tāna mau ha’api’ira’a.
Tē hina’aro nei te Fatu ’ia ha’amana’o vau iāna.
E fa’aruru te mau tamari’i tā ’outou e ha’api’i nei i te mau ha’anevanevara’a o te nehenehe e tūra’i ia rātou ’ia ha’amo’e i te Metua i te ao ra ’e ia Iesu Mesia. Nāhea ’outou ’ia fa’auru i te mau tamari’i ’ia hōro’a i te taime nō te mau mea pae vārua ?
Mau ’ohipa e nehenehe e rave
-
E tai’o ’āmui i te Helamana 7:20–21, ’e e ani i te mau tamari’i e aha tō rātou mana’o nō tē parau ra ha’amo’e i te Atua. E fa’ata’a ē, te tahi ato’a aura’a o terā ta’o ha’amo’e maori rā, « ha’afaufa’a ’ore » ’e ’aore rā, « tāu’a ’ore ». E fa’a’ite i te hō’ē hōho’a o te Fa’aora, ’e e ani i te mau tamari’i ’ia pāpa’i hōho’a i te mau mea e pau rahi tō rātou taime ’o te tūra’i ia rātou ’ia ha’amo’e i te Fatu. E tu’u i tā rātou mau hōho’a pāpa’i i mua i te hōho’a o Iesu. E ani i te mau tamari’i ’ia feruri i te mau mea e nehenehe rātou e rave i te mau mahana ato’a nō te ha’amana’o i te Metua i te ao ra ’e ia Iesu. ’A fa’a’ite ai rātou i tō rātou mau mana’o, e tātara hō’ē hō’ē i te mau hōho’a pāpa’i e tae roa e ’itehia te hōho’a o te Fa’aora.
-
E ani i te mau tamari’i ’ia fa’a’ī i te ’api ’ohipara’a ’o teie hepetoma.
’Ia feruri hōhonu ana’e au i te mau parau a te Atua, e nehenehe au e fāri’i i te heheura’a.
’Ua ’ite ānei te mau tamari’i tā ’outou e ha’api’i ra, e aha te aura’a o te parau feruri hōhonu ? E tauturu ia rātou ’ia māramarama ē, ’ua ha’amaita’ihia Nephi i te heheura’a a feruri hōhonu ai ’oia i te mau mea tā te Fatu i fa’a’ite iāna.
Mau ’ohipa e nehenehe e rave
-
E tauturu i te mau tamari’i ’ia hāro’aro’a e aha te aura’a o te parau e feruri hōhonu. E ani ia rātou ’ia feruri i te tahi atu mau ta’o ’o te fa’ata’a ra i te aura’a o te parau feruri hōhonu. I muri iho e ani ia rātou ’ia tai’o i te Helamana 10:1–3 ’e ’ia mono i te ta’o feruri hōhonu i te mau parau tā rātou i mana’o. E aha te ’ohipa i tupu ’a feruri hōhonu ai Nephi i ni’a i te mau pāpa’ira’a mo’a ? (hi’o Helamana 10:3–7). E fa’a’ite i te hō’ē taime ’a fāri’i ai ’outou i te heheura’a i muri a’e i te feruri-hōhonu-ra’a i te hō’ē pāpa’ira’a mo’a ’e ’aore rā, te hō’ē heheura’a nō teie ’anotau ’e ’aore rā, te hō’ē ’itera’a pae vārua.
-
E hōro’a i te taime i te mau tamari’i nō te tai’o Helamana 10, ’e ’aore rā, e tai’o ’āmui, ’e e fa’aitoito ia rātou ’ia ’imi i te hō’ē ’īrava tā rātou e hina’aro e feruri hōhonu i roto i te hepetoma e haere mai nei. E ani ia rātou ’ia pāpa’i i te ’īrava tā rātou i mā’iti i ni’a i te hō’ē ’api parau ’e ’aore rā, hō’ē tāreta ’e ’ia tu’u i te hō’ē vāhi nō te fa’aha’amana’o ia rātou ’ia feruri hōhonu i ni’a i te reira ’īrava i roto i te hepetoma e haere mai nei. I roto i te hō’ē piha ha’api’ira’a i muri nei, e hōro’a i te taime ia rātou nō te fa’a’ite mai e aha tā rātou i ’apo mai ’a feruri hōhonu ai rātou i ni’a i te ’īrava.
Fa’aitoito i te ha’api’ira’a mai i te fare
E fa’aitoito i te mau tamari’i ’ia fa’a’ite i tō rātou ’utuāfare e aha tā rātou i fa’anaho e rave nō te ha’amana’o i te Metua i te ao ra ’e ia Iesu Mesia i te mau mahana ato’a. E nehenehe ato’a rātou e ani i tō rātou ’utuāfare ’ia ’āmui mai ia rātou i roto i tā rātou ’ōpuara’a.
Haʼamaitaʼiraʼa i tā tātou haʼapiʼiraʼa
Fa’atae i te mau anira’a ’o te fa’atura i te ti’amāra’a. Mai te mea ē, e ani ’outou i te mau tamari’i ’ia ha’uti i ni’a i te mea tā ’outou i ha’api’i ia rātou, e feruri i te mau rāve’a nō te fa’atura i tō rātou ti’amāra’a ’a fa’a’ohipa ai rātou i te mea tā rātou i ’apo mai. ’Ei hi’ora’a, i muri a’e i te hō’ē ha’api’ira’a nō ni’a i te Fa’aora, e nehenehe ’outou e ani, « E aha tā ’outou e rave nō te ha’amana’o i te Fa’aora i teie hepetoma ? »