1 Inaha, i teienei, i muri a’era, i te ono ’ahuru ’e ma iva o te matahiti nō te fa’aterera’a a te mau ha’avā i ni’a i te mau ’āti Nephi, ’ua ho’i mai ra Nephi, te tamaiti a Helamana, i te fenua ra nō Zarahemela mai te fenua mai i te pae apato’erau.

2 I haere na ho’i ’oia i rotopū i te mau ta’ata i ora na i te fenua i te pae apato’erau, ’e ’ua poro haere ho’i ’oia i te parau a te Atua ia rātou, ’e ’ua tohu i te mau mea e rave rahi ia rātou.

3 ’E ’ua pāto’i atu ra rātou i tāna mau parau ato’a, ’e nō reira ho’i ’aita a’era i ti’a iāna ’ia pārahi i rotopū ia rātou, ’āre’a rā ’ua ho’i fa’ahou atu ra ’oia i te fenua ’oia i fānauhia ai.

4 ’E ’ite a’era ’oia i te mau ta’ata i te vai-noa-ra’a i roto i te mau ’ohipa ’ī’ino e rave rahi, ’e i te feiā ’eiā haru o Gadianetona i ni’a i te mau pārahira’a ha’avāra’a—’o tei haru i te mana ’e te ha’amanara’a nō te fenua ; ’o tei ha’apae i te mau fa’auera’a a te Atua i te hiti, ’e ’aita roa rātou i au maita’i i mua iāna ; ’o tei ’ore i fa’aau i te parauti’a i te mau tamari’i a te ta’ata nei ;

5 ’O tei fa’ahapa noa i te feiā parauti’a nō tō rātou parauti’a ; ’o tei vaiiho noa i te feiā hara ’e te feiā parauti’a ’ore ’ia haere noa ma te fa’autu’a-’ore-hia nō tā rātou moni ; ’e ’oia fa’ahou ’ia fāri’i i te tōro’a i te upo’o o te hau fenua, nō te fa’atere ’e nō te rave mai te au i tō rātou mau hina’aro, ’ia roa’a ia rātou te faufa’a ’e te hanahana o te ao nei ; ’e ’oia fa’ahou, ’ia ti’a ia rātou ’ia rave ’ōhie noa i te fa’aturi, te ’eiā, ’e te taparahi ta’ata, ’e ’ia rave mai te au i tō rātou iho mau hina’aro—

6 I teienei ’ua tae mai teie mau ’ohipa ’ī’ino i ni’a i te mau ’āti Nephi i roto i te tahi noa iho mau matahiti ; ’e ’ia ’ite a’era Nephi i te reira, ’ua ’oru ihora tōna ’ā’au i te ’oto i roto i tōna ’ōuma ; ’e ’ua ’auē noa a’era ’oia i te māuiui o tōna vārua, i te nā-’ō-ra’a :

7 ’Auē, ’āhiri i ora na vau i tō’u nei mau mahana i te mau mahana ’a tae mātāmua mai ai tō’u metua tāne ra ’o Nephi mai te fenua mai ra mai Ierusalema, ’ia ti’a iā’u ’ia ’oa’oa i pīha’i iho iāna i te fenua i fafauhia ra ; ’e i taua taime ra e mea ti’aturi ’ōhie roa tōna mau ta’ata, e mea ha’apa’o maita’i i te mau fa’auera’a a te Atua, e mea tāere ’ia arata’ihia ’ia rave i te mau ’ohipa ’ī’ino ; ’e e mea ’oi’oi ’ia fa’aro’o i te mau parau a te Fatu—

8 ’Oia ïa, ’āhiri au i ora na i tō’u nei mau mahana i taua mau mahana ra, ’ua ’oa’oa ïa tō’u vārua i te parauti’a o tō’u ra mau taea’e.

9 Inaha rā, ’ua fa’ata’ahia ē ’o teie tō’u mau mahana, ’ia ’ī tō’u vārua i te ’oto, nō te mau ’ohipa ’ī’ino a tō’u ra mau taea’e.

10 ’E inaha, i teienei, i muri a’era, tei ni’a ’oia i te hō’ē pare, i roto i te ’ō a Nephi ra, ’e tei pīha’i iho taua ’ō ra i te purūmu ē tae atu ai i te mātete rahi i roto i te ’oire ra nō Zarahemela ; ’e tē pi’o ra Nephi i raro i ni’a i taua pare ra i roto i te ’ō, ’e tei pīha’i ato’a iho taua pare ra i te ’ūputa nō te ’ō e tae atu ai i te purūmu.

11 ’E i muri a’era, tē haere ra te tahi mau ta’ata nā reira, ’e ’ua ’ite a’era rātou ia Nephi i ni’a i te pare ’e tē pure māite ra ’oia, ma te nīni’i atu i tōna vārua i te Atua ; ’e ’ua horo atu ra rātou ’e ’ua fa’a’ite atu ra i te mau ta’ata i te mau mea tā rātou i ’ite, ’e ’ua haere ha’aputuputu ’āmui mai ra te mau ta’ata e rave rahi ’ia ’ite rātou i te tumu nō tōna ’oto rahi i te parauti’a ’ore o te mau ta’ata.

12 ’E i teienei, ’ia ti’a a’era Nephi i ni’a, ’ua ’ite atu ra ’oia i te mau pupu ta’ata ’o tei ha’aputuputu ’āmui mai.

13 ’E i muri a’era, ’ua hāmama atu ra ’oia i tōna vaha ’e ’ua nā ’ō atu ra ia rātou : Inaha, nō te aha ’outou i ha’aputuputu ’āmui mai ai ? ’ia fa’a’ite atu ānei au ia ’outou i tā ’outou mau ’ohipa ’ī’ino ?

14 ’Oia ïa, nō te mea ’ua pa’uma mai au i ni’a i tō’u pare nō te nīni’i atu i tō’u vārua i tō’u ra Atua, nō te ’oto rahi o tō’u nei ’ā’au i tā ’outou mau ’ohipa ’ī’ino !

15 ’E nō tā’u nei ’otora’a ’e te auēra’a i ha’aputuputu ’āmui mai ai ’outou, ’e i māere ai ; ’oia ïa, ’e ’ua ti’a roa ia ’outou ’ia māere ; ’oia ïa, ’e ’ua ti’a mau ia ’outou ’ia māere, nō te mea ’ua fa’aru’ehia ’outou ’e nō reira ’ua roa’a i te diabolo te hō’ē vāhi rahi i roto i tō ’outou ’ā’au.

16 ’Oia ïa, nō te aha ’outou i fa’ati’a ai ia ’outou ’ia fa’ahemahia e ana ’o tei tītau ’ia huri i tō ’outou vārua i raro i te mamae mure ’ore ’e te ’oto hope ’ore ?

17 ’A tātarahapa ’outou, ’a tātarahapa ’outou ! Nō te aha ho’i ’outou e pohe ai ? ’A fāriu mai ’outou, ’a fāriu mai ’outou i te Fatu ra i tō ’outou Atua. Nō te aha ho’i ’oia i fa’aru’e ai ia ’outou ?

18 Nō te mea ’ua fa’a’eta’eta ’outou i tō ’outou ’ā’au ; ’oia ïa, ’e ’aita ’outou i fa’aro’o noa atu i te reo o te tīa’i māmoe maita’i ; ’oia ïa, ’ua fa’atupu ’outou i tōna riri ia ’outou.

19 ’E inaha, ’ia ’ore ’outou ’ia tātarahapa, e’ita ’oia e ha’aputuputu ia ’outou, inaha, e ha’apurara ’oia ia ’outou ’ia riro ’outou ’ei mā’a nā te mau ’ūrī ’e te mau ’ānimara taehae.

20 ’Auē, nāhea e ti’a ai ia ’outou ia ha’amo’e i tō ’outou Atua i te mahana iho ’oia i fa’aora ai ia ’outou ?

21 Inaha rā, nō te fāri’i ïa i te faufa’a, ’ia ’āruehia e te ta’ata ; ’oia ïa, ’ia ti’a ia rātou ’ia fāri’i i te ’auro ’e te ’ārio. ’E ’ua ha’amau ’outou i tō ’outou ’ā’au i ni’a i te mau tao’a ’e te mau mea faufa’a ’ore o teie nei ao ; nō reira, te taparahi na ’outou i te ta’ata, tē haru ra i te tao’a, tē ’eiā ra, ’e tē pari ha’avare ra i tō ’outou ta’ata tupu, ’e tē rave ra i te mau huru ’ohipa ’ī’ino ato’a.

22 ’E nō te reira tumu, e tae mai te pohe i ni’a iho ia ’outou ’ia ’ore ’outou ’ia tātarahapa. Nō te mea ’ia ’ore ’outou ’ia tātarahapa, inaha, e rave-’ē-hia teie nei ’oire rahi, ’e te mau ’oire rahi ato’a ē ’ati noa a’e, i roto i te fenua i fatuhia e tātou nei, ’e e ’ore roa ’outou e pārahi fa’ahou i roto i te reira ; inaha ho’i, e ’ore roa te Fatu e hōro’a mai i te pūai ia ’outou, mai tāna i nā reira i te mātāmua, nō te pāruru ia ’outou i tō ’outou mau ’enemi.

23 Inaha ho’i, te nā ’ō mai ra te Fatu : E ’ore au e fa’a’ite i tō’u pūai i te feiā parauti’a ’ore, ’ia hau tei ’itea i te hō’ē i tei ’itea i te tahi, maori rā ia rātou ’o tei tātarahapa i tā rātou mau hara, ’e ’o tei fa’aro’o ho’i i tā’u mau parau. I teienei, nō reira, tē hina’aro nei au ’ia ’ite ’outou, e tō’u mau taea’e, e maita’i a’e tō te mau ’āti Lamana i tō ’outou, maori rā ’ia tātarahapa ’outou.

24 Inaha ho’i, e mea parauti’a a’e rātou ia ’outou, ’aita ho’i rātou i hara i taua ’ite rahi ra ’o tā ’outou i fāri’i ; nō reira e aroha te Fatu ia rātou ; ’oia ïa, e fa’aroaroa ’oia i tō rātou mau mahana ’e e fa’arahi i tō rātou hua’ai, ’a ha’amou-roa-hia ai ’outou ra, maori rā ’ia tātarahapa ’outou.

25 ’Oia ïa, ’auē ho’i ’outou ē, nō taua mea vi’ivi’i rahi i tae mai i rotopū ia ’outou na ; ’e ’ua ’āmui atu ’outou ia ’outou iho i te reira ; ’oia ïa, i taua pupu ta’ata huna ’o tei fa’ati’ahia e Gadianetona !

26 ’Oia ïa, e tae mai te ’ati i ni’a ia ’outou nō taua te’ote’o ra ’o tā ’outou i fa’ati’a ia ō mai i roto i tō ’outou na ’ā’au ; ’o tei fa’ateitei ia ’outou i ni’a a’e i te mea maita’i, nō tā ’outou mau tao’a rahi !

27 ’Oia ïa, ’auē ho’i ’outou ē, nō tā ’outou mau ’ohipa ’ī’ino ’e te mau ’ohipa vi’ivi’i !

28 ’E ’ia ’ore ’outou ’ia tātarahapa, e pohe roa ’outou ; ’oia ïa, e rave-’ē-hia tō ’outou mau fenua ia ’outou na, ’e e ha’amouhia ’outou mai ni’a atu i te fenua nei.

29 Inaha, i teienei, ’aita vau iho e parau nei ē, e tupu teie mau mea, nō te mea ’aita vau i ’ite i teie nei mau mea nā roto iā’u iho ; inaha rā, ’ua ’ite au ē, e parau mau teie mau mea nō te mea ’ua fa’a’ite mai te Fatu te Atua i te reira iā’u nei, nō reira tē fa’a’ite pāpū nei au ē, e tupu te reira mau mea.