1 ’E i muri a’era, i taua iho matahiti ra, inaha, ’ua hōro’a atu ra Nephi i te pārahira’a ha’avāra’a i te hō’ē ta’ata, ’o Kezorama tōna i’oa.

2 ’Ua fa’ati’ahia ho’i tā rātou mau ture ’e tō rātou mau hau fenua nā roto i te reo o te mau ta’ata ; ’e ’o rātou tei mā’iti i te ’ino, ’ua hau ïa i te rahi i tei mā’iti i te maita’i ; nō reira ’ua ineine rātou nō te ha’amoura’a, nō te mea ’ua ha’avi’ivi’ihia te mau ture.

3 ’Oia ïa, e ’ere i te reira ana’e ra ; e feiā ’ā’au ’eta’eta ho’i rātou, ’e nō reira ho’i ’aita rātou e ti’a ’ia fa’aterehia e te ture ’e te parauti’a, maori rā ’ia ha’amouhia rātou.

4 ’E i muri a’era, ’ua fiu Nephi i tā rātou mau ’ohipa ’ī’ino ; ’e ’ua ha’apae atu ra ’oia i te pārahira’a ha’avāra’a, ’e ’ua ’ōpua ’oia i te a’o atu i te parau a te Atua ē hope roa a’e tōna ra mau mahana ; ’e ’ua nā reira ato’a tōna taea’e o Lehi, ē hope roa a’e tōna ra mau mahana.

5 ’Ua ha’amana’o ho’i rāua i te mau parau tā tō rāua metua tāne o Helamana i parau ia rāua. ’E ’o teie te mau parau tāna i parau mai :

6 Inaha, e tā’u nā tamaiti, tē hina’aro nei au ’ia ha’amana’o ’ōrua ’ia ha’apa’o maita’i i te mau fa’auera’a a te Atua ; ’e tē hina’aro nei au ’ia a’o atu ’ōrua i teie mau parau i te mau ta’ata. Inaha, ’ua topa atu vau i te i’oa o tō tātou nā metua mātāmua i ni’a iho ia ’ōrua, ’e ’ua haere mai rātou mai te fenua ra nō Ierusalema ; ’e ’ua nā reira vau, nō te mea ’ia ha’amana’o ’ōrua i tō ’ōrua i’oa e ha’amana’o ato’a ’ōrua i tā rāua mau ’ohipa ; ’e ’ia ha’amana’o ’ōrua i tā rāua mau ’ohipa, e ’ite ato’a ’ōrua i tei parauhia ’e tei pāpa’ihia ho’i, ’o tei nā ’ō mai ē, e nā ta’ata maitata’i rāua.

7 Nō reira, e tā’u nā tamaiti, tē hina’aro nei au ’ia rave ’ōrua i te mea maita’i, ’ia parauhia ’e ’ia pāpa’i-ato’a-hia te parau nō ni’a ia ’ōrua mai tei parauhia ’e tei pāpa’ihia nō ni’a ia rāua.

8 ’E i teienei, e tā’u nā tamaiti, inaha, tē hina’aro nei au i te tahi atu mau mea ia ’ōrua, ’e teie taua hina’aro ra, ’eiaha roa ’ōrua e rave i teie mau mea nō te fa’ate’ote’o ia ’ōrua, ’ia rave rā ’ōrua i teie mau mea nō te ha’apu’e i te tao’a rahi nā ’ōrua i te ao ra, ’oia ïa, ’o tei riro ’ei mea mure ’ore, ’e tē ’ore roa e māhe’ahe’a atu ; ’oia ïa, ’ia roa’a ia ’ōrua taua hōro’ara’a fa’ahiahia roa nō te ora mure ’ore, ’o tā tātou ho’i i mana’o ē ’ua hōro’ahia i tō tātou mau metua.

9 ’A ha’amana’o, ’a ha’amana’o e tā’u nā tamaiti, i te mau parau tā te ari’i Beniamina i parau atu i tōna ra mau ta’ata ; ’oia ïa, ’a ha’amana’o ē ’aita atu e rāve’a e ti’a ai i te mau ta’ata ’ia fa’aorahia, maori rā nā roto i te toto tāra’ehara nō Iesu Mesia, ’o tē haere mai ; ’oia ïa, ’a ha’amana’o, e haere mai ’oia nō te fa’aora i tō teie nei ao.

10 ’E ’a ha’amana’o ato’a i te mau parau tā Amuleka i parau atu ia Zeezeroma i roto i te ’oire ra nō Amoniha ; ’e ’ua parau atu ’oia iāna ē, e haere mai te Fatu nō te fa’aora i tōna mau ta’ata ; ’āre’a rā ’aita ’oia e haere mai nō te fa’aora ia rātou i roto i tā rātou mau hara, e fa’aora rā ’oia ia rātou mai roto mai i tā rātou ra mau hara.

11 ’E e mana tōna i hōro’ahia mai iāna e te Metua nō te fa’aora ia rātou i tā rātou mau hara maoti ho’i te tātarahapara’a ; nō reira, ’ua tono mai ’oia i tāna mau melahi nō te fa’a’ite mai i te mau parau tumu nō te tātarahapara’a, e tae ai rātou i raro a’e i te mana nō te Tāra’ehara, ’e i te fa’aorara’a o tō rātou vārua.

12 ’E i teienei, e tā’u nā tamaiti, ’a ha’amana’o, ’a ha’amana’o, e mea ti’a roa ia ’ōrua ’ia ha’amau i tō ’ōrua niu i ni’a i te papa o tō tātou Tāra’ehara, ’o te Mesia, te Tamaiti a te Atua ; ’e ’ia fa’atae mai te diabolo i tāna ra mau mata’i ’ū’ana, ’oia ïa, ’e tāna mau ’ohe nā roto i te pūāhiohio, ’oia ïa, ’e ’ia ma’iri mai te tā’āto’ara’a nō tāna ra ūa pa’ari, ’e tāna vero rahi i ni’a iho ia ’ōrua, ’aita roa tō te reira e mana i ni’a iho ia ’ōrua, nō te huti ia ’ōrua i raro i te ’ābuso nō te mamae ’e te ’oto hope ’ore, maoti ho’i te papa i ni’a iho ’ōrua i te patuhia, e niu pāpū ho’i, ’e mai te mea e patu te ta’ata ia rātou i ni’a i taua niu ra, e ’ore ïa rātou e ma’iri i raro.

13 ’E i muri a’era, ’o teie te mau parau tā Helamana i ha’api’i atu i tāna nā tamaiti ; ’oia ïa, ’ua ha’api’i ’oia ia rāua i te mau mea e rave rahi ’o tei ’ore i pāpa’ihia, ’e i te mau mea e rave rahi ato’a ’o tei pāpa’ihia.

14 ’E ’ua ha’amana’o rāua i tāna mau parau ; ’e nō reira ’ua haere atu ra rāua ma te ha’apa’o maita’i i te mau fa’auera’a a te Atua, nō te ha’api’i i te parau a te Atua i rotopū i te mau ta’ata o Nephi, ma te ha’amata i te ’oire ra nō ’Auhune ;

15 ’E mai reira mai ē tae atu i te ’oire nō Gida ; ’e mai te ’oire mai o Gida ē tae atu i te ’oire nō Muleka ;

16 ’E mai te tahi ’oire i te tahi ’oire, ē tae noa atu ’ua tae rāua i rotopū i te mau ta’ata ato’a o Nephi i te fenua i te pae apato’a ; ’e mai reira atu i te fenua ra nō Zarahemela, i rotopū i te mau ’āti Lamana.

17 ’E i muri a’era, ’ua a’o atu rāua ma te mana rahi, ’e nō reira ’ua fa’a’ite pāpū atu rāua i te hape o rātou e rave rahi tei ’ōrurehau ’e ’o tei haere mai mai roto mai i te mau ’āti Nephi, ’e nō reira ’ua haere mai ra rātou ’e ’ua fā’i mai ra i tā rātou mau hara ’e ’ua bāpetizohia nō te tātarahapara’a, ’e ’ua ho’i ’oi’oi atu ra i te mau ’āti Nephi ra nō te tāmata ’ia fa’a’ore i te mau mea hape ’o tā rātou i rave.

18 ’E i muri a’era, ’ua a’o atu ra Nephi rāua ’o Lehi i te mau ’āti Lamana ma te mana rahi ’e te ha’amanara’a rahi, ’e ’ua hōro’ahia te mana ’e te ha’amanara’a ia rāua ’ia ti’a ia rāua ’ia paraparau atu ; ’e ’ua hōro’a-ato’a-hia mai ia rāua te mau mea tā rāua e parau atu—

19 Nō reira ’ua paraparau atu rāua, i tupu ai tō te mau ’āti Lamana māere rahi, ’e i fa’afāriuhia mai ai rātou, ’e nō reira ho’i ’ua bāpetizohia ihora nō te tātarahapara’a te mau ’āti Lamana e va’u tauatini nō te fenua ra nō Zarahemela ’e tō reira mau fenua, ’e ’ua ’ite pāpū ihora rātou i te parauti’a ’ore nō te mau peu tumu a tō rātou mau metua.

20 ’E i muri a’era, mai reira atu ’ua haere atu ra Nephi rāua ’o Lehi i te fenua ra nō Nephi.

21 ’E i muri a’era, ’ua haruhia ihora rāua e te hō’ē nu’u fa’ehau o te mau ’āti Lamana, ’e ’ua hurihia atu ra i roto i te fare tāpe’ara’a ; ’oia ïa, i roto i te fare tāpe’ara’a i hurihia ai Amona ’e tōna ra mau taea’e ato’a e te mau tāvini o Limehi ra.

22 ’E i muri iho i tō rāua hurira’ahia i roto i te fare tāpe’ara’a nō nā mahana e rave rahi ma te mā’a ’ore, inaha, ’ua haere mai ra rātou i roto i te fare tāpe’ara’a nō te rave ia rāua ’e nō te taparahi ia rāua.

23 ’E i muri a’era, ’ua ha’a’ati-roa-hia ihora Nephi rāua ’o Lehi i te hō’ē mea mai te auahi ra te huru, ’e nō reira ho’i ’ua mata’u a’era rātou ’ia haru mai ia rāua, ’o te ’ama rātou iho. ’Āre’a rā ’aita roa atu Nephi rāua ’o Lehi i ’ama noa a’e ; ’e tē ti’a ra rāua mai te mea ra ē, tei roto roa rāua i te auahi, ’e ’aita roa rāua i ’ama noa a’e.

24 ’E ’ia ’ite a’era rāua ē, ’ua ha’a’atihia rāua i te pou auahi, ’e ’aita rāua e ’ama ra, ’ua itoito a’era tō rāua ’ā’au.

25 ’Ua ’ite ho’i rāua ē, tē mata’u ra te mau ’āti Lamana ’ia haru mai ia rāua ; ’e tē mata’u ato’a ra ho’i rātou ’ia ha’afātata mai ia rāua, ’āre’a rā ’ua ti’a noa rātou mai te mea ra ē, ’ua tā’iri-vava-hia rātou i te māere rahi.

26 ’E i muri a’era, ’ua ti’a a’era Nephi rāua ’o Lehi, ’e ’ua ha’amata ihora i te parau atu ia rātou, nā ’ō atu ra : ’Eiaha e mata’u, inaha ho’i, nā te Atua i fa’a’ite mai i teie mea ta’a ’ē ia ’outou na, ’e tē fa’a’ite ra ho’i te reira ē, e ’ore roa e ti’a ia ’outou ’ia fa’atae mai i tō ’outou rima i ni’a ia māua nō te taparahi ia māua.

27 ’E inaha, ’ia oti a’era tā rāua paraura’a mai i teie mau parau, ’ua ’āueue roa ihora te fenua, ’e ’ua ’āueue ho’i te mau papa’i o te fare tāpe’ara’a, mai te mea ra ē ’ua fātata roa te reira i te ma’iri i raro i te repo ; inaha rā, ’aita te reira i ma’iri i raro. ’E inaha, ’o rātou tei roto i te fare tāpe’ara’a ’o te mau ’āti Lamana ïa, ’e te mau ’āti Nephi tei ’ōrurehau.

28 ’E i muri a’era, ’ua tāpo’ihia rātou e te hō’ē ata pōiri, ’e ’ua tae mai te mata’u ahoaho rahi i ni’a ia rātou.

29 ’E i muri a’era, ’ua tae mai ra te hō’ē reo mai te mea ra ē nō ni’a mai ïa i taua ata pouri ra, i te nā-’ō-ra’a mai ē : ’A tātarahapa ’outou, ’a tātarahapa ’outou, ’eiaha e tītau fa’ahou ’ia ha’amou i tō’u mau tāvini, ’o tā’u i tono atu ia ’outou nō te fa’a’ite atu ia ’outou i te mau parau maitata’i.

30 ’E i muri a’era, ’ia fa’aro’o a’era rātou i teie nei reo, ’e ’ia ’ite a’era ē, e ’ere ïa i te reo mai te pātiri, ’e e ’ere ato’a ho’i i te reo mai te hō’ē haruru rahi ra ; inaha rā e reo ha’iha’i ’e te marū roa, mai te mea ra ē, ’o te hō’ē parau iti ha’iha’i nei, ’e ’ua ha’aputa roa te reira i te vārua—

31 ’E noa atu ā te marū o te reo, inaha, ’ua ’āueue rahi te fenua, ’e ’ua ’āueue fa’ahou te mau papa’i o te fare tāpe’ara’a, mai te mea ra ē, ’ua fātata te reira i te ma’iri i raro i te repo ; ’e inaha, ’aita roa te ata pōiri ’o tei tāpo’i ia rātou i pe’e ’ē atu—

32 ’E inaha, ’ua tae fa’ahou mai ra te reo, i te nā-’ō-ra’a mai ē : ’A tātarahapa ’outou, ’a tātarahapa ’outou, tē fātata mai nei ho’i te bāsileia o te ao ra ; ’e ’eiaha e tītau fa’ahou ’ia ha’amou i tō’u mau tāvini. ’E i muri a’era, ’ua ’āueue fa’ahou ihora te fenua, ’e ’ua ’āueue te mau papa’i fare.

33 ’E ’ua tae fa’ahou mai ra te reo i te toru o te taime, ’e ’ua parau mai ra i te tahi mau parau fa’ahiahia ia rātou ’o tē ’ore e ti’a i te ta’ata ’ia fa’ahiti ; ’e ’ua ’āueue fa’ahou ihora te mau papa’i fare, ’e ’ua ’āueue te fenua mai te mea ē, ’ua fātata te reira i te ’āfāfā.

34 ’E i muri a’era, ’aita roa e ti’a i te mau ’āti Lamana ’ia horo nō te ata pōiri ’o tē tāpo’i ia rātou ; ’oia ïa, ’e ’aita ato’a e ti’a ia rātou ’ia haere nō te mata’u i tae mai i ni’a ia rātou.

35 I teienei, tē vai ra te hō’ē i rotopū ia rātou ’o tei fānauhia e ’āti Nephi, i riro na ho’i ’oia i te mātāmua ’ei melo nō te ’ēkālesia a te Atua, ’ua tāiva rā ’oia ia rātou.

36 ’E i muri a’era, ’ua fāriu mai ra ’oia, ’e inaha, ’ua ’ite ’oia nā roto i te ata pōiri i te mata o Nephi rāua ’o Lehi ; ’e inaha, ’ua ’ana’ana rahi mai te reira mai te mata o te mau melahi ra. ’E ’ua ’ite ’oia ē tē nānā atu ra rāua i tō rāua mata i ni’a i te ra’i ; ’e tē ti’a ra rāua mai te mea ra ē, tē paraparau ra ’e ’aore rā tē fa’ateitei ra rāua i tō rāua reo i te hō’ē mea e hi’ohia ra e rāua.

37 ’E i muri a’era, ’ua ti’aoro a’era teie nei ta’ata i te mau ta’ata ’ia fāriu mai rātou ’e ’ia hi’o. ’E inaha, ’ua hōro’ahia mai te mana ia rātou ’ia fāriu ’e ’ia hi’o ; ’e ’ua hi’o a’era rātou i te mata o Nephi rāua ’o Lehi.

38 ’E ’ua nā ’ō a’era rātou i taua ta’ata ra : Inaha, e aha te aura’a o teie nei mau mea pā’āto’a ’e ’o vai teie tā teie nā ta’ata e paraparau ra ?

39 I teienei, ’o Aminadaba te i’oa o taua ta’ata ra. ’E ’ua parau atu ra Aminadaba ia rātou nā ’ō atu ra : Tē paraparau ra rāua i te mau melahi a te Atua.

40 ’E i muri a’era, ’ua nā ’ō mai ra te mau ’āti Lamana iāna : E aha tā tātou e rave, ’ia ’īriti-’ē-hia atu teie nei ata pōiri ’o tē tāpo’i nei ia tātou ?

41 ’E ’ua nā ’ō atu ra Aminadaba ia rātou : ’Ia tātarahapa ’outou e ti’a ai, ’e ’ia ti’aoro atu i te reo ra ē tae noa atu ’ua roa’a ia ’outou te fa’aro’o i te Mesia, ’o tei ha’api’ihia mai ia ’outou e Alama rātou ’o Amuleka, ’e ’o Zeezeroma ; ’e ’ia nā reira ’outou, e ’īriti-’ē-hia atu teie nei ata pōiri ’o tē tāpo’i nei ia ’outou.

42 ’E i muri a’era, ’ua ha’amata ihora rātou pā’āto’a i te ti’aoro atu i te reo nōna ’o tei fa’a’āueue i te fenua ; ’oia ïa, ’ua ti’aoro a’era rātou ē tae roa atu ’ua pe’e ’ē atu te ata pōiri.

43 ’E i muri a’era, ’ia nānā a’era rātou i tō rātou mata, ’e ’ia ’ite a’era rātou ē, ’ua pe’e ’ē atu te ata pōiri ’o tei tāpo’i ia rātou, inaha, ’ua ’ite a’era rātou ē, ’ua ha’a’atihia rātou tāta’ihō’ē, ’oia ïa te ta’ata tataitāhō’ē, ’e te hō’ē pou auahi.

44 ’E tei rotopū Nephi rāua ’o Lehi ia rātou ; ’oia ïa, ’ua ha’a’atihia rātou ē ’ati noa a’e ; ’oia ïa, e au ra ē tei roto rātou i te hō’ē auahi ’ama, ’aita rā rātou i pa’apa’a, ’e ’aita ato’a te papa’i fare o te fare tāpe’ara’a i pa’apa’a ; ’e ’ua ’ī roa rātou i taua ’oa’oa ra ’o tē ’ore roa e ti’a ’ia parauhia ’e ’o tei ’ī ho’i i te hanahana.

45 ’E inaha, ’ua pou mai ra te Vārua Mo’a o te Atua mai te ra’i mai, ’e ’ua ō mai ra i roto i tō rātou ’ā’au, ’e ’ua ’ī ihora rātou i te mea mai te auahi ra te huru, ’e ’ua ti’a a’era ia rātou ’ia parau i te mau parau fa’ahiahia.

46 ’E i muri a’era, ’ua tae mai ra te hō’ē reo ia rātou, ’oia ïa, te hō’ē reo au roa, ’e mai te mea ra ē, e reo marū iti ha’iha’i, i te nā-’ō-ra’a mai ē :

47 ’Ei hau, ’ei hau tō ’outou, nō tō ’outou fa’aro’o i tā’u Here Rahi ra, ’o tei vai na mai te ha’amatara’a mai ā o te ao nei.

48 ’E i teienei, ’ia fa’aro’o a’era rātou i te reira, ’ua nānā a’era rātou i tō rātou mata i ni’a ’e ’ua hi’o atu ra i te vāhi nō reira mai taua reo ra ; ’e inaha, ’ua ’ite atu ra rātou i te mau ra’i i te vēteara’a ; ’e ’ua pou mai ra te mau melahi nō te ra’i mai ’e ’ua poihere mai ra ia rātou.

49 E toru hānere ti’ahapa ta’ata i hi’o ee i fa’aro’o i taua mau mea ra ; ’e ’ua fa’auehia mai ra rātou ’ia haere atu ’e ’eiaha e māere, ’e ’eiaha ato’a rātou e fē’a’a.

50 ’E i muri a’era, ’ua haere atu ra rātou, ’e ’ua ha’api’i atu ra i te mau ta’ata, ma te fa’a’ite atu ē ’ati noa a’e te mau retioni ato’a i te mau mea tā rātou i fa’aro’o ’e i hi’o, ’e nō reira ho’i ’ua ti’aturi te pae rahi o te mau ’āti Lamana i te reira, nō te rahi o te mau ’ite i noa’a mai ia rātou ra.

51 ’E ’ua ha’apae ihora te mau ta’ata ato’a ’o tei ti’aturi mai i tā rātou parau i tā rātou mau mauha’a tama’i, ’e i tō rātou au ’ore ’e te mau peu tumu a tō rātou mau metua.

52 ’E i muri a’era, ’ua hōro’a atu ra rātou i te mau ’āti Nephi i tō rātou ra mau fenua.