1 ’E i teienei, i muri a’era, ’ia oti a’era tā Nephi paraura’a i teie mau parau, inaha, tei reira te tahi mau ta’ata, e mau ha’avā rātou, ’e nō roto mai rātou i te pupu huna a Gadianetona, ’e ’ua riri rātou, ’e ’ua pi’i fa’ahapa mai ra rātou iāna, i te nā-’ō-ra’a atu i te mau ta’ata : Nō te aha ’aita ’outou i haru i teie ta’ata ’e ’a arata’i mai ai iāna, ’ia fa’ahapahia ’oia mai te au i te hara tāna i rave ?

2 Nō te aha ’outou i hi’o noa atu ai i teie nei ta’ata, ’e i fa’aro’o atu ai iāna, ’a fa’a’ino mai ai ’oia i teie nei feiā ’e i tā tātou ture ?

3 Inaha ho’i, ’ua parau atu Nephi ia rātou nō ni’a i te mau mea vi’ivi’i o tā rātou ture ; ’oia ïa, e rave rahi te mau mea tā Nephi i parau atu ’o tē ’ore e ti’a ’ia pāpa’ihia ; ’e ’aita roa atu e mea ’o tāna i parau ’o tei fa’ahapa i te mau fa’auera’a a te Atua.

4 ’E ’ua riri taua mau ha’avā ra iāna nō te mea ’ua parau pāpū atu ’oia ia rātou nō ni’a i tā rātou mau ’ohipa huna nō te pōiri ; ’āre’a rā, ’ua mata’u rātou ’ia haru atu iāna, nō te mea ’ua mata’u rātou i te mau ta’ata ’o te parau fa’ahapa mai rātou ia rātou.

5 Nō reira ’ua ti’aoro atu rātou i te mau ta’ata, i te nā-’ō-ra’a atu ē : Nō te aha ’outou i fa’ati’a ai i teie ta’ata ’ia fa’a’ino mai ia tātou nei ? Inaha ho’i, tē fa’ahapa ra ’oia i teie mau ta’ata ato’a ’ia ha’amouhia ; ’oia ïa, ’e ’oia ato’a ’ia rave-’ē-hia atu tō tātou mau ’oire rahi mai ia tātou atu nei, ’e ’ia ’ore tō tātou e vāhi i reira.

6 ’E i teienei, ’ua ’ite tātou ē, ’aita roa te reira e tupu, inaha ho’i, e feiā pūai roa tātou, ’e e mea rarahi tō tātou nei mau ’oire, nō reira ’aita roa tō tō tātou mau ’enemi e mana i ni’a ia tātou.

7 ’E i muri a’era, ’ua fa’ati’arepu rātou i te mau ta’ata ’ia riri atu ia Nephi, ’e ’ua fa’atupu ihora i te mau mārōra’a i rotopū ia rātou ; ’e tē vai ra te tahi pae i parau ē : ’A vaiiho noa i teie nei ta’ata, e ta’ata maita’i ho’i ’oia, ’e e tupu mau ā te mau mea ato’a ’o tāna i parau, maori rā ’ia tātarahapa tātou.

8 ’Oia ïa, inaha, e tae mai te mau ha’avāra’a i fa’a’itehia mai e ana i ni’a ia tātou ; ’ua ’ite ho’i tātou ē, ’ua fa’a’ite mai ’oia ia tātou i te parau mau nō ni’a i tā tātou mau ’ohipa ’ī’ino. ’E inaha, e rave rahi ho’i te reira, ’e ’ua ’ite ho’i ’oia i te mau mea ato’a e ma’iri mai i ni’a ia tātou nei, mai tāna i ’ite i tā tātou mau ’ohipa ’ī’ino.

9 ’Oia ïa, ’e inaha, ’āhiri e’ita ’oia i te peropheta, e’ita ïa e ti’a iāna ’ia fa’a’ite mai i taua mau mea ra.

10 ’E i muri a’era, ’aita a’era i ti’a ia rātou, ’o tei tītau ’ia ha’apohe ia Nephi, ’ia fa’atae atu i tō rātou rima i ni’a iāna, nō tō rātou mata’u ; nō reira ’ua ha’amata fa’ahou ihora ’oia i te parau atu ia rātou, ’e ’ua ’ite ho’i ’oia ’e ’ua auhia mai ’oia e te tahi pae, ’e nō reira ho’i ’ua mata’u te toe’a o rātou.

11 Nō reira ’ua tītauhia ’oia ’ia parau fa’ahou atu ā ia rātou, i te nā-’ō-ra’a atu ē : Inaha, e tō’u mau taea’e, ’aita ānei ’outou i tai’o ē, ’ua hōro’a mai te Atua i te mana i te hō’ē ta’ata, ’oia ho’i ia Mose, nō te tā’iri i ni’a i te mau pape nō te miti ’Ute’ute, ’e ’ua vetea ihora te reira i te tahi pae ’e i te tahi pae, ’e nō reira ho’i ’ua haere mai ra te mau ’ati ’Īserā’ela, ’oia ho’i tō tātou mau metua, nā roto i te reira ē tae roa mai ra i ni’a i te repo marō, ’e ’ua ho’i fa’ahou ihora taua mau pape ra i ni’a i te mau nu’u fa’ehau o tō ’Aiphiti ra ’e ’ua horomi’i roa ihora ia rātou ?

12 ’E i teienei, inaha, mai te mea ē ’ua hōro’a mai te Atua i taua huru mana ra i teie ta’ata, nō te aha ïa ’outou i mārō ai i rotopū ia ’outou iho, ’e i parau ai ho’i ē, ’aita ’oia i hōro’a mai i te mana iā’u ’ia ’ite au i te mau ha’avāra’a e tae mai i ni’a ia ’outou, maori rā ’ia tātarahapa ’outou ?

13 ’Āre’a rā, inaha, ’aita ’outou i huna i tā’u ana’e mau parau, ’āre’a rā ’ua huna ato’a ’outou i te mau parau ato’a ’o tei parauhia mai e tō tātou mau metua, ’e te mau parau ato’a i parauhia mai e teie nei ta’ata, ’o Mose, ’o tei fāri’i i te mana rahi i hōro’ahia mai iāna, ’oia ïa, te mau parau ’o tāna i parau nō ni’a i te taera’a mai te Mesia.

14 ’Oia ïa, ’aita ānei ’oia i fa’a’ite ē, e tae mai te Tamaiti a te Atua ? ’E mai iāna i fa’ateitei i te ’ōphī veo i roto i te mēdēbara, ’oia ato’a e fa’ateiteihia ’oia ’o tē haere mai.

15 ’E ’o rātou e rave rahi ’o tē hi’o atu i taua ’ōphī ra e ora ïa, ’e mai te reira ato’a rātou e rave rahi ’o tē hi’o atu i te Tamaiti a te Atua ma te fa’aro’o, ’e te vārua tātarahapa, e ora ïa, ē tae noa atu i te ora mure ’ore ra.

16 ’E i teienei, inaha, ’aita Mose i fa’a’ite pāpū atu nō ni’a i teie ana’e mau mea, ’ua nā reira ato’a rā te mau peropheta mo’a ato’a, mai tōna ra mau mahana ē tae noa atu i te mau mahana o Aberahama.

17 ’Oia ïa, ’e inaha, ’ua ’ite Aberahama i tōna taera’a mai, ’e ’ua ’ī ’oia i te ’oa’oa ’e ’ua poupou.

18 ’Oia ïa, ’e inaha, tē parau atu nei au ia ’outou, ’aita Aberahama i ’ite i teie ana’e mau mea, ’āre’a rā tē vai ra e rave rahi atu ā nā mua atu i te mau mahana o Aberahama ’o tei pi’ihia i te fa’anahora’a a te Atua ; ’oia ïa, ’ia au i te fa’anahora’a a tāna Tamaiti ; ’e i nā-reira-hia, ’ia fa’a’itehia i te mau ta’ata, i te mau matahiti e rave rahi tauatini nā mua i tōna taera’a mai, ’e ’ia tae mai te fa’aorara’a ia rātou.

19 ’E i teienei, tē hina’aro nei au ’ia ’ite ’outou ē, i muri mai i te mau mahana o Aberahama, e rave rahi te mau peropheta i fa’a’ite pāpū mai i taua mau mea ra ; ’oia ïa, ’e inaha, ’ua fa’a’ite pāpū mai te peropheta ra ’o Zenosa ma te mata’u ’ore ; ’e nō te reira ho’i i taparahihia ai ’oia ra.

20 ’E inaha, ’o Zenoke ato’a, ’e Eziasa ato’a, ’e Isaia ato’a, ’e Ieremia ato’a, (Ieremia, te peropheta iho i fa’a’ite mai i te ha’amoura’a o Ierusalema), ’e i teienei, ’ua ’ite tātou ē, ’ua ha’amouhia Ierusalema mai te au i te mau parau a Ieremia ra. ’E i teienei, nō te aha ïa ’aita te Tamaiti a te Atua e tae mai, ’ia au i tāna ra tohura’a ?

21 ’E i teienei, e aha ’outou i mārō ai ē ’ua ha’amouhia ’o Ierusalema ? E ti’a ānei ia ’outou ’ia parau ē, ’aita te mau tamari’i tamāroa a Zedekia i taparahihia, te tā’āto’ara’a maori rā ’o Muleka ana’e ra ? ’Oia ïa, ’aita ānei ’outou i ’ite ē, tei pīha’i iho ia tātou nei te hua’ai a Zedekia, ’e ’ua ti’avaruhia rātou i rāpae i te fenua ra nō Ierusalema ? Inaha rā, e ’ere te reira te hope’a—

22 ’Ua ti’avaruhia tō tātou metua tāne ra ’o Lehi i rāpae ia Ierusalema nō te mea ’ua fa’a’ite pāpū ’oia i teie mau mea. ’Ua fa’a’ite pāpū ato’a Nephi i teie mau mea ; ’e te pae rahi ato’a o tō tātou mau metua, ē tae noa mai i teie nei taime ; ’oia ïa, ’ua fa’a’ite pāpū rātou nō ni’a i te taera’a mai o te Mesia, ’e ’ua hi’o rātou i mua, ’e ’ua ’oa’oa rātou i tōna ra mahana ’o tē tae mai a muri atu.

23 ’E inaha, ’o ’oia te Atua, ’e tei pīha’i iho ’oia ia rātou, ’e ’ua fa’a’ite mai iāna iho ia rātou, ’e ’ua fa’aorahia rātou e ana ; ’e ’ua fa’ahanahana atu rātou iāna, nō te mea e tupu a muri atu.

24 ’E i teienei, nō te mea ’ua ’ite ’outou i teie mau mea ’e ’ua ’ite ho’i ’outou ’e e’ita e ti’a ia ’outou ’ia huna, maori rā e ha’avare ’outou, nō reira ’ua hara ’outou i taua mea nei, nō te mea ’ua pāto’i ’outou i teie mau mea ato’a, noa atu ā te mau fa’a’itera’a pāpū e rave rahi tā ’outou i fāri’i ; ’oia ïa, ’ua fāri’i ’outou i te mau mea ato’a, te mau mea i roto i te ra’i ’e te mau mea ato’a i ni’a i te fenua, ’ei fa’a’itera’a pāpū ē, e parau mau te reira.

25 Inaha rā, ’ua pāto’i ’outou i te parau mau, ’e ’ua fa’aru’e i te Atua mo’a ; e i teie nei taime, ’aita ’outou e ha’apu’e nei i te mau tao’a nā ’outou i te ao ra, i te vāhi e ’ore ai e ’ino i te hō’ē mea, ’e e ’ore ai ho’i e tomohia mai e te mea vi’ivi’i ra, tē ha’apu’e nei rā ’outou i te riri ’ū’ana nō ’outou iho i te mahana nō te ha’avāra’a.

26 ’Oia ïa, ’e i teie nei taime ’ua ineine roa ’outou nō te pohe mure ’ore, nō tā ’outou mau taparahira’a ta’ata e tā ’outou poreneia ’e te mau ’ohipa ’ī’ino ; ’oia ïa, ’e ’ia ’ore ’outou ’ia tātarahapa, e tae vave mai te reira ia ’outou.

27 ’Oia ïa, inaha, ’ua fātata mai te reira i tō ’outou pae ’ūputa ; ’oia ïa, ’a haere ’outou i tō ’outou pārahira’a ha’avāra’a, ’e ’a ’imi ; ’e inaha, ’ua taparahihia tō ’outou ha’avā, ’e tē tārava ra ’oia i roto i tōna toto ; ’e ’ua taparahihia ’oia e tōna ra taea’e, ’o tei hina’aro ’ia pārahi i ni’a i te pārahira’a ha’avāra’a.

28 ’E inaha, nō roto rāua e piti ato’a i tā ’outou pupu huna, ’e ’o Gadianetona te fa’atere nō te reira ’e te diabolo ’o tei tītau ’ia ha’amou i te mau vārua o te ta’ata nei.