1 ’E i muri a’era, i te hitu ’ahuru ’e ma piti o te matahiti nō te fa’aterera’a a te mau ha’avā, ’ua tupu rahi roa te mau mārōra’a, ’e nō reira ho’i ’ua tupu te mau ’arora’a i rotopū i te mau ta’ata ato’a o Nephi ē ’ati noa a’e te fenua tā’āto’a.

2 ’E nā teie pupu huna nō te feiā ’eiā haru i fa’atupu i teie nei ’ohipa nō te pohe ’e te parauti’a ’ore. ’E ’ua tupu noa teie ’arora’a i te tā’āto’ara’a nō taua matahiti ra ; ’e i te hitu ’ahuru ’e ma toru o te matahiti ’ua hope ihora te reira.

3 ’E i muri a’era, i teie matahiti ’ua ti’aoro atu ra Nephi i te Fatu, i te nā-’ō-ra’a ē :

4 E te Fatu, ’eiaha e vaiiho i teie nei feiā ’ia ha’amouhia i te ’o’e ; ’āre’a rā e te Fatu, ’a fa’atae mai i te o’e i ni’a i te fenua, nō te fa’aitoito ia rātou ’ia ha’amana’o i te Fatu tō rātou Atua, ’e penei a’e ’o te tātarahapa rātou ’e ’o te fāriu mai ia ’oe na.

5 ’E ’ua nā-reira-hia mai te au i tā Nephi mau parau. ’E ’ua tupu ihora te o’e rahi i ni’a i te fenua, i rotopū i te mau ta’ata ato’a o Nephi. ’E nō reira i te hitu ’ahuru ’e ma maha o te matahiti ’ua vai noa te o’e, ’e ’ua fa’aea ihora te ’ohipa nō te pohe i te ’o’e ’e ’ua rahi roa atu te pohe i te o’e.

6 ’E ’ua vai tāmau noa ato’a teie ’ohipa nō te pohe ē tae roa atu i te hitu ’ahuru ’e ma pae o te matahiti. ’Ua tā’irihia ho’i te fenua ’e ’ua marō, ’e ’aita a’era i fa’ahotu mai te sītona i te ’anotau mau nō te sītona ; ’e ’ua tā’irihia te fenua tā’āto’a, i rotopū i te mau ’āti Lamana ’e i rotopū ato’a i te mau ’āti Nephi, ’e ’ua tā’irihia rātou ’e ’ua pohe roa te mau ta’ata e rave rahi tauatini i roto i te mau vāhi parauti’a ’ore roa o te fenua.

7 ’E i muri a’era, ’ua ’ite a’era te mau ta’ata ē, ’ua fātata roa rātou i te pohe i te o’e ra, ’e ’ua ha’amata ihora rātou i te ha’amana’o i te Fatu tō rātou Atua ; ’e ’ua ha’amata ihora rātou i te ha’amana’o i te mau parau a Nephi.

8 ’E ’ua ha’amata ihora te mau ta’ata i te tāparu atu i tō rātou mau ha’avā rahi e tō rātou mau ta’ata fa’atere, ’ia parau atu rātou ia Nephi ē : Inaha, ’ua ’ite mātou ē, e ta’ata ’oe nō te Atua, e nō reira, ’a ti’aoro atu i te Fatu ra i tō tātou Atua ’ia hōpoi ’ē atu ’oia i teie nei o’e ia tātou nei, ’o te tupu mau te mau parau ato’a tā ’oe i parau nō ni’a i tō mātou ha’amoura’a.

9 ’E i muri a’era, ’ua parau atu ra te mau ha’avā ia Nephi, mai te au i te mau parau i hina’arohia ra. ’E i muri a’era, ’ua ’ite a’era Nephi ē, ’ua tātarahapa te mau ta’ata ’e ’ua fa’aha’eha’a ia rātou iho i roto i te ’ahu ’oto ra, ’ua ti’aoro fa’ahou atu ra ’oia i te Fatu, nā ’ō atu ra :

10 E te Fatu, inaha, ’ua tātarahapa teie nei mau ta’ata ; ’e ’ua ha’amou roa rātou i te pupu ta’ata o Gadianetona i rotopū ia rātou, ’e nō reira ho’i ’ua mou roa rātou, ’e ’ua hunahia tā rātou mau ’ōpuara’a huna i roto i te repo.

11 I teienei, e te Fatu, nō tō rātou ha’eha’a i teienei, ’ia tāmarūhia tō ’oe nā riri nō te ha’amou i te mau ta’ata parauti’a ’ore ’o tā ’oe na i ha’apohe.

12 E te Fatu, ’a fa’afāriu ’ē atu ’oe i tō ’oe na riri, ’oia ïa, tō ’oe na riri ’ū’ana, ’e ’ia fa’a’ore ’oe i te o’e i ni’a i teie nei fenua.

13 E te Fatu, ’a fa’aro’o mai na ’oe iā’u nei, ’e ’ia nā-reira-hia mai te au i tā’u nei mau parau, ’e ’a ha’ama’iri mai na i te ua i ni’a i te fenua nei, ’ia fa’ahotu mai te reira i tōna mā’a e tōna sītona i te tau mau nō te sītona.

14 E te Fatu, ’ua fa’aro’o mai ’oe i tā’u nei mau parau ’a parau ai au ē, ’a tu’u mai i te o’e, ’ia fa’a’orehia te ’ati rahi nō te ’o’e ra ; ’e ’ua ’ite au ē, e fa’aro’o mai ’oe i tā’u nei mau parau, ē tae roa mai i teie taime, nō te mea ’ua parau mai na ho’i ’oe ē : Mai te mea e tātarahapa teie nei feiā, e fa’aora vau ia rātou.

15 ’Oia ïa, e te Fatu, ’e tē ’ite nei ’oe ē, ’ua tātarahapa rātou, nō te o’e ’e te ma’i rahi ’e te pohe i tae mai i ni’a ia rātou.

16 ’E i teienei, e te Fatu, ’a fa’afāriu ’ē atu na ’oe i tō ’oe na riri, ’e ’a tāmata fa’ahou ia rātou nō te hi’o e tāvini ānei rātou ia ’oe na ? ’E mai te mea ē ’oia mau roa, e te Fatu, e ti’a ia ’oe i te ha’amaita’i mai ia rātou mai te au i tā ’oe i parau ra.

17 ’E i muri a’era, i te hitu ’ahuru ’e ma ono o te matahiti, ’ua fa’afāriu ’ē atu ra te Fatu i tōna riri i taua feiā ra, ’e ’ua ha’ama’iri ihora i te ua i ni’a i te fenua, ’e nō reira ho’i ’ua fa’ahotu mai ra te fenua i te mā’a i te ’anotau mau nō te mā’a. ’E i muri a’era, ’ua fa’ahotu mai i te sītona i te ’anotau o te sītona ra.

18 ’E inaha, ’ua ’oa’oa ’e ’ua fa’ahanahana te mau ta’ata i te Atua, ’e ’ua ’ī roa te fenua tā’āto’a i te ’oa’oa ; ’e ’aita atu ra rātou i tītau fa’ahou ’ia ha’apohe ia Nephi, ’ua mana’o rā rātou ē, e peropheta rahi ’oia, ’e e ta’ata ho’i nō te Atua, ’e ’ua hōro’ahia mai te mana rahi ’e te ha’amanara’a rahi iāna nō ’ō mai i te Atua ra.

19 ’E inaha, ’aita roa ’o Lehi, tōna taea’e, i hemo ri’i a’e iāna i te parauti’a.

20 ’E nō reira, i muri a’era, ’ua ha’amata ihora te mau ta’ata o Nephi i te manuia fa’ahou i ni’a i te fenua, ’e ’ua ha’amata ihora rātou i te patu i te mau vāhi ano ra, ’e ’ua ha’amata ihora rātou i te tupu rahi ’e ’ua purara a’era, ē tae noa atu ’ua ’ī roa te fenua tā’āto’a, te pae apato’erau ’e te pae apato’a ato’a, mai te miti i te pae nō te tō’o’a o te rā ē tae roa atu i te miti nō te pae nō te hiti’a o te rā.

21 ’E i muri a’era, i te hope’a nō te hitu ’ahuru ’e ma ono o te matahiti ’ua vai noa te hau. ’E ’ua ha’amata a’era te hitu ’ahuru ’e ma hitu o te matahiti ma te hau ; ’e ’ua tupu noa a’era te ’ēkālesia i te rahi i ni’a i te fenua tā’āto’a ; ’e ’ua riro te pae rahi o te mau ta’ata, te mau ’āti Nephi ’e te mau ’āti Lamana ato’a ho’i, ’ei melo nō te ’ēkālesia ; ’e ’ua fāri’i rātou i te hau rahi i ni’a i te fenua ; ’e ’o te hope’a te reira nō te hitu ’ahuru ’e ma hitu o te matahiti.

22 ’E ’oia ato’a ’ua fāri’i rātou i te hau i te hitu ’ahuru ’e ma va’u o te matahiti, maori rā nō te tahi mau mārōra’a ri’i nō ni’a i te mau tufa’a nō te mau ha’api’ira’a tumu i ha’api’ihia e te mau peropheta.

23 ’E i te hitu ’ahuru ’e ma iva o te matahiti ’ua tupu ihora te mārōra’a rahi. ’Āre’a rā i muri a’era, ’ua ha’api’i atu Nephi ’e Lehi ’e tō rāua mau taea’e e rave rahi i te mau ta’ata, ’e ’ua ’ite ho’i rātou i te parau mau nō ni’a i te mau tufa’a nō te mau ha’api’ira’a tumu, nō te mea ’ua fāri’i rātou i te mau heheura’a i te mau mahana ato’a, ’e nō reira ho’i ’ua fa’a’ore rātou i tā rātou mārōra’a i taua iho matahiti ra.

24 ’E i muri a’era, i te va’u ’ahuru o te matahiti nō te fa’aterera’a a te mau ha’avā i ni’a i te mau ta’ata o Nephi, tē vai ra ho’i te tahi feiā ’ōrurehau nō roto mai i te mau ta’ata o Nephi ’o tei ’āmui atu i te mau ’āti Lamana i te tahi mau matahiti nā mua atu, ’e ’o tei rave ho’i i te i’oa o te mau ’āti Lamana i ni’a iho ia rātou, ’e tē vai ato’a ra te tahi mau hua’ai mau nō te mau ’āti Lamana ’o tā rātou ’oia ho’i ’o tā te feiā ’ōrurehau i fa’ati’arepu ’ia riri, ’e nō reira ’ua ha’amata ihora rātou i te ’aro atu i tō rātou mau taea’e.

25 ’E ’ua taparahi rātou i te ta’ata ’e ’ua haru i te tao’a ; ’e i muri iho ’ua ’ōtohe atu ra rātou i roto i te mau mou’a, ’e i roto i te mēdēbara ’e te mau vāhi tāpunira’a, ’e ’ua tāpuni rātou ’ia ’ore rātou ’ia ’iteahia, ’e ’ua haere noa tō rātou pupu i te rahi i te mau mahana ato’a, nō te mea tē vai ra te mau ta’ata ’ōrurehau ’o tei haere mai ia rātou ra.

26 ’E i roto i te hō’ē taime poto, ’oia ïa, i roto i te tahi noa mau matahiti ri’i, ’ua riro rātou ’ei pupu ’eiā haru rahi roa ; ’e ’ua ’imi māite rātou i te mau ’ōpuara’a huna ato’a a Gadianetona ; ’e nō reira ’ua riro rātou ’ei feiā ’eiā haru nā Gadianetona.

27 I teienei, inaha, ’ua fa’atupu teie feiā ’eiā haru i te pe’ape’a rahi, ’oia ïa, i te ha’amoura’a rahi i rotopū i te mau ta’ata o Nephi, ’e i rotopū ato’a i te mau ta’ata o te mau ’āti Lamana.

28 ’E i muri a’era, e mea ti’a roa ’ia fa’a’orehia teie ’ohipa nō te ha’amoura’a ; nō reira ’ua tono atu rātou i te hō’ē nu’u fa’ehau tāne pūai i roto i te mēdēbara ’e i ni’a i te mau mou’a nō te ’imi i teie pupu ta’ata ’eiā haru, ’e ’ia ha’amou ia rātou.

29 Inaha rā, i muri a’era, i taua iho matahiti ra, ’ua tūra’ihia atu rātou i muri i roto i tō rātou iho mau fenua. ’E ’o te hope’a te reira nō te va’u ’ahuru matahiti nō te fa’aterera’a a te mau ha’avā i ni’a i te mau ta’ata o Nephi.

30 ’E i muri a’era, i te ha’amatara’a nō te va’u ’ahuru ’e ma hō’ē o te matahiti ’ua haere fa’ahou atu ra rātou e ’aro i teie pupu ta’ata ’eiā haru, ’e ’ua ha’amou ia rātou e rave rahi ; ’e ’ua ro’o-ato’a-hia rātou i te pohe rahi.

31 ’E ’ua fa’ahepo-fa’ahou-hia rātou ’ia ho’i atu i tō rātou iho mau fenua mai roto mai i te mēdēbara ’e te mau mou’a, nō te rahi o te mau ta’ata ’eiā haru i pārahi haere i roto i te mau mou’a ’e te mēdēbara.

32 ’E i muri a’era, ’o te hope’a ïa o teie matahiti. ’E tē rahi noa atu ra ’e tē pūai noa atu ra te mau ta’ata ’eiā haru, ’e nō reira ho’i ’ua ’aro mai ra rātou i te mau nu’u fa’ehau o te mau ’āti Nephi, ’e tō te mau ’āti Lamana ato’a ; ’e ’ua fa’atae mai ra rātou i te mata’u rahi i ni’a i te mau ta’ata i ni’a i te fenua tā’āto’a nei.

33 ’Oia ïa, ’ua tāho’o atu rātou i te mau tufa’a e rave rahi o te fenua, ’e ’ua fa’atae atu ra i te ha’amoura’a rahi i ni’a ia rātou ; ’oia ïa, ’e ’ua taparahi i te mau ta’ata e rave rahi, ’e ’ua hōpoi tītī atu ra ia vetahi ’ē i roto i te mēdēbara, ’oia ïa, i tā rātou mau vahine ’e tā rātou mau tamari’i.

34 I teienei, nā teie ’ino rahi ’o tei tae mai i ni’a i te mau ta’ata nō tā rātou mau ’ohipa ’ī’ino, i fa’aitoito fa’ahou ia rātou ’ia ha’amana’o i te Fatu tō rātou Atua.

35 ’E ’o te hope’a te reira nō te va’u ’ahuru ’e ma hō’ē o te matahiti nō te fa’aterera’a a te mau ha’avā.

36 ’E i te va’u ’ahuru ’e ma piti o te matahiti ’ua ha’amata fa’ahou rātou i te ha’amo’e i te Fatu tō rātou Atua. ’E i te va’u ’ahuru ’e ma toru o te matahiti, ’ua ha’amata rātou i te pūai i roto i te mau ’ohipa ’ī’ino. ’E i te va’u ’ahuru ’e ma maha o te matahiti, ’aita rātou i fa’atītī’aifaro i tō rātou mau haere’a.

37 ’E i muri a’era, i te va’u ’ahuru ’e ma pae o te matahiti ’ua pūai roa a’era rātou i roto i tō rātou te’ote’o, ’e i roto i tā rātou mau ’ohipa ’ī’ino ; ’e nō reira ’ua ineine fa’ahou rātou nō te ha’amoura’a.

38 ’E ’o te hope’a te reira nō te va’u ’ahuru ’e ma pae o te matahiti.