Te Buka a Helamana

1 ’E i teienei, inaha, i muri a’era, i te ha’amatara’a nō te maha ’ahuru o te matahiti nō te fa’aterera’a a te mau ha’avā i ni’a i te mau ta’ata o Nephi, ’ua tupu te hō’ē fifi rahi i rotopū i te mau ta’ata o te mau ’āti Nephi.

2 Inaha ho’i, ’ua pohe ’o Pahorana, ’e i haere na ho’i ’oia nā te ’ē’a o te ao ato’a nei ; nō reira ’ua tupu a’era te hō’ē mārōra’a rahi ’o vai tē tano ’ia fāri’i i te pārahira’a ha’avāra’a i rotopū i te mau taea’e, ’oia ho’i i rotopū i te mau tamaiti a Pahorana.

3 I teienei o teie te mau i’oa ’o tei mārō ’ia roa’a te pārahira’a ha’avāra’a, ’e ’o tei fa’atupu ato’a ho’i i te mārōra’a i rotopū i te mau ta’ata : Pahorana, Paanaki, ’e Pakumeni.

4 I teienei e ’ere ’o teie ana’e iho te mau tamari’i tamāroa a Pahorana (e rave rahi tāna), ’āre’a rā ’o rātou teie ’o tei mārō nō te pārahira’a ha’avāra’a ; nō reira, ’ua fa’a’āmahamaha rātou i te mau ta’ata i roto e toru pupu.

5 ’Āre’a rā, i muri a’era, ’ua mā’itihia Pahorana nā roto i te reo o te mau ta’ata ’ia riro ’ei ha’avā rahi ’e ’ei tāvana rahi i ni’a i te mau ta’ata o Nephi.

6 ’E i muri a’era, ’ia ’ite a’era Pakumeni ē ’aita roa e roa’a iāna te pārahira’a ha’avāra’a, ’ua ’āmui atu ra ’oia i te reo o te mau ta’ata.

7 Inaha rā, ’ua riri roa a’era Paanaki, ’e te tahi pae o te mau ta’ata ’o tei hina’aro iāna ’ei tāvana rahi nō rātou ; nō reira, ’ua fātata roa ’oia i te manuia i te tāvaimanino i taua mau ta’ata ra ’ia ’aro atu i tō rātou ra mau taea’e.

8 ’E i muri a’era, ’ua fātata roa ’oia i te nā reira, inaha, ’ua ’āfa’i-’ē-hia atu ra ’oia, ’e ’ua ha’avāhia ihora ’oia mai te au i te reo o te mau ta’ata, ’e ’ua fa’autu’ahia atu ra ’oia ’ia pohe ; ’e ’ua fa’atupu ’oia i te ’ōrurehau ’e ’ua tītau ’ia fa’a’ore i te ti’amāra’a o te mau ta’ata.

9 I teienei, ’ia ’ite a’era te mau ta’ata i hina’aro iāna ’ei tāvana rahi nō rātou ’e ’ua fa’autu’ahia ’oia ’ia pohe, nō reira ’ua riri rātou, ’e inaha, ’ua tono atu ra rātou i te hō’ē ta’ata ’o Kisakumena i te pārahira’a ha’avāra’a o Pahorana, ’e ’ua taparahi ihora ia Pahorana ’a pārahi noa ai ’oia i ni’a i te pārahira’a ha’avāra’a.

10 ’E ’ua a’ua’uhia atu ra ’oia e te mau tāvini o Pahorana ; inaha rā, nō te ’oi’oi o tō Kisakumena horora’a, ’aita atu ra ’oia i roa’ahia i te ta’ata.

11 ’E ’ua horo atu ra ’oia i te feiā i tono atu iāna, ’e ’ua fa’aau a’era rātou pā’āto’a i te hō’ē fafaura’a, ’oia ïa, ma te tapu nā roto i Tei Hamani ia rātou ’e tei mure ’ore ho’i ē, e’ita roa rātou e fa’a’ite noa atu i te ta’ata ē, nā Kisakumena i taparahi ia Pahorana.

12 Nō reira, ’aita ’o Kisakumena i ’itea i rotopū i te mau ta’ata o Nephi, nō te mea ’ua huna ’oia i tōna hōho’a mata ’a taparahi ai ’oia ia Pahorana. ’Ua fafau atu ho’i Kisakumena ’e tāna pupu fa’ehau iāna, ’e ’ua ’āmui haere atu rātou ia rātou iho i rotopū i te mau ta’ata, ’ia ’ore rātou ’ia ’iteahia ; ’o tei ’itehia rā, ’ua fa’autu’ahia ïa rātou ’ia pohe.

13 ’E i teienei, inaha, ’ua fa’ata’ahia a’era Pakumeni, mai te au i te reo o te mau ta’ata, ’ei ha’avā rahi ’e ’ei tāvana rahi i ni’a i te mau ta’ata, nō te fa’atere ’ei mono i tōna ra taea’e ia Pahorana ; ’e nōna mau taua tōro’a ra. ’E ’ua ravehia teie mau mea ato’a i te maha ’ahuru o te matahiti nō te fa’aterera’a a te mau ha’avā ; ’e ’o te hope’a ïa nō te reira.

14 ’E i muri a’era, i te maha ’ahuru ’e ma hō’ē o te matahiti nō te fa’aterera’a a te mau ha’avā, ’ua ha’aputuputu mai ra te mau ’āti Lamana i te hō’ē nu’u fa’ehau rahi roa, ’e ’ua hōro’a atu ra i te mau mauha’a tama’i ia rātou, te mau ’o’e, te mau simetera, te mau fana, ’e te mau te’a, ’e te mau pāruru upo’o, ’e te mau pāruru ’ōuma, ’e te mau huru pāruru tama’i ato’a.

15 ’E ’ua haere fa’ahou mai ra rātou i raro nō te ’aro i te mau ’āti Nephi. ’E ’ua arata’ihia mai rātou e te hō’ē ta’ata i parauhia o Korianetumera ; ’e e hua’ai ’oia nō Zarahemela ; ’e e ta’ata ’ōrurehau ’oia nō rotopū mai i te mau ’āti Nephi ; ’e e ta’ata rahi ’oia ’e te pūai ho’i.

16 Nō reira, ’o Tubalota te i’oa o te ari’i o te mau ’āti Lamana, ’e e tamaiti ’oia nā Amorona, ’e ’ua mana’o ’oia ē, nō te mea e ta’ata pūai o Korianetumera, e ti’a ïa iāna ’ia ’aro atu i te mau ’āti Nephi, ma tōna pūai ’e tōna ato’a ’aravihi rahi, ’e nō reira ho’i nā roto i te tonora’a atu iāna, e roa’a iāna te mana i ni’a i te mau ’āti Nephi—

17 Nō reira ’ua fa’atupu ’oia i tō rātou riri, ’e ’ua ha’aputuputu mai ra i tōna mau nu’u fa’ehau, ’e ’ua fa’ariro a’era ia Korianetumera ’ei ta’ata fa’atere nō rātou, ’e ’ua fa’aue atu ra ia rātou ’ia haere atu i raro i te fenua ra nō Zarahemela nō te ’aro atu i te mau ’āti Nephi.

18 ’E i muri a’era, nō te mārōra’a rahi ’e te mau fifi rahi i tupu i roto i te hau fenua, ’aita rātou i tāpe’a rahi i te mau fa’ehau tīa’i i te fenua ra nō Zarahemela ; i mana’o ho’i rātou ē, e mata’u te mau ’āti Lamana ’ia haere mai i rotopū i tō rātou mau fenua nō te tama’i mai i taua ’oire rahi ra o Zarahemela.

19 ’E i muri a’era, ’ua haere mai ra Korianetumera ma te arata’i i tōna ra nu’u fa’ehau rahi, ’e ’ua ’aro mai ra i te mau ta’ata o te ’oire, ’e e mea ’oi’oi roa tō rātou haerera’a mai, ’e nō reira ’aita a’era i nava’i te taime nō te mau ’āti Nephi ’ia ha’aputuputu ’āmui i tō rātou mau nu’u fa’ehau.

20 Nō reira, ’ua taparahi ihora Korianetumera i te mau fa’ehau tīa’i i te ’ūputa o te ’oire, ’e ’ua haere atu ra ’oia ’e tōna nu’u fa’ehau pā’āto’a i roto roa i te ’oire, ’e ’ua taparahi ihora rātou i te feiā ato’a i ’aro mai ia rātou, ’e nō reira ho’i ’ua noa’a ia rātou te ’oire tā’āto’a.

21 ’E i muri a’era, ’ua horo atu ra Pakumeni, ’oia ho’i te ha’avā rahi mai mua atu ia Korianetumera, e tae atu i te ’āua o te ’oire ra. ’E i muri a’era, ’ua tūpa’i ihora Korianetumera iāna i ni’a i te ’āua, ’e nō reira ho’i ’ua pohe roa atu ra ’oia. ’E ’o te hope’a te reira o te mau mahana o Pakumeni.

22 ’E i teienei, ’ia ’ite a’era Korianetumera ē, ’ua roa’a iāna te ’oire ra nō Zarahemela, ’e ’ia ’ite ato’a ho’i ’oia ē ’ua horo ’ē atu te mau ’āti Nephi mai mua atu ia rātou, ’e ’ua taparahihia, ’e ’ua ravehia, ’e ’ua hurihia ho’i i roto i te fare tāpe’ara’a, ’e ’ua roa’a iāna te ha’apūra’a rahi i te fenua tā’āto’a, ’ua itoito ihora tōna ’ā’au, ’e nō reira ho’i ’ua fātata ’oia i te ’aro atu i tō te mau fenua ato’a.

23 ’E i teienei, ’aita ’oia i pārahi noa i te fenua ra nō Zarahemela, ’āre’a rā ’ua haere atu ra ’oia ’e te hō’ē nu’u fa’ehau rahi ’e tae atu ra i te ’oire ra nō ’Auhune ; ’e ’ua ’ōpua ho’i ’oia ’ia haere atu nā tōna ’ē’a ma te fa’a’ohipa i te ’o’e ’ia roa’a iāna te mau tufa’a fenua i te pae apato’erau.

24 ’E nō te mea ho’i ’ua mana’o ’oia ē, tei roto roa i te fenua tō rātou pūai rahi, nō reira ’ua haere atu ra ’oia, ’e ’aita a’era tō rātou e taime nō te ha’aputuputu ia rātou, maori rā te tahi mau pupu ri’i noa ; ’e ’ua nā reira rātou i te ’aro atu i i te mau ’āti Nephi ’e i te taparahi ia rātou ’ia ma’iri i raro i te repo.

25 Inaha rā, nā roto i tō Korianetumera haerera’a nā roto roa i te fenua i upo’oti’a rahi ai Moroniha i ni’a ia rātou, noa atu ā te nūmera rahi o te mau ’āti Nephi i taparahihia.

26 Inaha ho’i, ’ua mana’o Moroniha ē, ’aita roa te mau ’āti Lamana e haere nā roto roa i te fenua nō te mata’u, e ’aro mai rā rātou i te mau ’oire i te pae hiti o tō rātou fenua mai tā rātou i nā reira i te mātāmua ra ; nō reira ’ua vaiiho Moroniha i tō rātou mau nu’u fa’ehau pūai ’ia tāpe’a noa i te mau vāhi i te pae hiti fenua.

27 Inaha rā, ’aita te mau ’āti Lamana i mata’u mai te au i tōna mana’o, ’ua haere mai rā rātou i roto roa i te fenua, ’e ’ua haru rātou i te ’oire rahi ra o Zarahemela, ’e ’ua haere noa rātou i te mau vāhi ta’ata rahi o te fenua, ma te taparahi rahi i te mau ta’ata, te mau tāne, te mau vahine, ’e te mau tamari’i, ’e ma te haru i te mau ’oire e rave rahi ’e te mau ha’apūra’a pa’ari e rave rahi.

28 ’Āre’a rā ’ia ’ite a’era Moroniha i te reira, ’ua tono ’oi’oi atu ra ’oia ia Lehi ’e te hō’ē nu’u fa’ehau nōna ra ’ia tae i mua mai ia rātou, hou rātou e tae atu ai i te fenua ra nō ’Auhune.

29 ’E ’ua nā reira ’oia ; ’e ’ua tae ’oia i mua roa i te mau ’āti Lamana hou rātou i tae atu ai i te fenua ra nō ’Auhune, ’e ’ua ’aro atu ia rātou, ’e nō reira ho’i ’ua ha’amata rātou i te ’ōtohe atu i te fenua ra nō Zarahemela.

30 ’E i muri a’era, ’ua tae Moroniha i mua ia rātou i tō rātou ’ōtohera’a, ’e ’ua ’aro atu ra ia rātou, ’e nō reira ho’i ’ua riro te reira ’ei tama’ira’a ha’amani’ira’a toto rahi roa ; ’oia ïa, e rave rahi tei taparahihia, ’e i roto i te mau ta’ata i taparahihia tē vai ato’a ra ’o Korianetumera.

31 ’E i teienei, inaha, ’aita a’era i ti’a i te mau ’āti Lamana ’ia ’ōtohe i te hō’ē a’e vāhi, ’aita i te pae apato’erau, ’aita i te pae apato’a, ’aita i te pae hiti’a o te rā, ’aita i te pae tō’o’a o te rā, ’e ’ua ha’a’atihia rātou i te mau pae ato’a e te mau ’āti Nephi.

32 ’E ’ua nā reira Korianetumera i te fa’ahaere atu i te mau ’āti Lamana i rotopū i te mau ’āti Nephi, ’e nō reira ho’i tei roto rātou i te mana o te mau ’āti Nephi, ’e ’ua taparahihia ’oia iho, ’e ’ua riro atu te mau ’āti Lamana i roto i te rima o te mau ’āti Nephi.

33 ’E i muri a’era, ’ua roa’a fa’ahou ia Moroniha te ’oire ra nō Zarahemela, ’e ’ua fa’ati’a ’oia i te mau ’āti Lamana i roa’a iāna ’ei feiā mau-’āuri ’ia haere atu i rāpae i te fenua ma te hau.

34 ’E ’o te hope’a te reira nō te maha ’ahuru ’e ma hō’ē o te matahiti nō te fa’aterera’a a te mau ha’avā.