1 ’E i muri a’era, ’ua tupu a’era te ’āmahamahara’a i rotopū i te mau ta’ata, ’e nō reira ho’i ’ua ta’a ’ē noa a’era rātou i terā vāhi ’e i terā vāhi, ’e ’ua haere a’era rātou i tō rātou mau haere’a, vaiiho noa mai ra ia Nephi ana’e iho, ’a ti’a noa ai ’oia i rotopū ia rātou.

2 ’E i muri a’era, ’ua haere atu ra Nephi i tōna haere’a i tōna ihora fare, ma te feruri hōhonu i te mau mea tā te Fatu i fa’a’ite mai iāna ra.

3 ’E i muri a’era, ’a feruri hōhonu noa ai ’oia—’ua ’oto noa ’oia nō te ’ohipa ’ī’ino a te mau ta’ata o te mau ’āti Nephi, tā rātou mau ’ohipa huna nō te pōiri, ’e tā rātou mau taparahira’a ta’ata, ’e tā rātou mau harura’a i te tao’a, ’e te mau huru ’ohipa ’ī’ino ato’a—’e i muri a’era, ’a nā reira noa ai ’oia i te feruri hōhonu i roto i tōna ’ā’au, inaha, ’ua tae mai ra te hō’ē reo iāna, i te nā-’ō-ra’a mai ē :

4 E ao tō ’oe, e Nephi, nō taua mau mea tā ’oe i rave ra ; ’ua ’ite ho’i au ia ’oe i te fa’a’itera’a atu i te parau tā’u i hōro’a atu ia ’oe i teie nei feiā ma te tu’utu’u ’ore. ’E ’aita ’oe i mata’u ia rātou, ’e ’aita ato’a ’oe i fa’aherehere i tō ’oe iho ora, ’ua tītau rā i tō’u hina’aro, ’e ’ua ha’apa’o ho’i i tā’u ra mau fa’auera’a.

5 ’E i teienei, nō te mea ’ua rave ’oe i te reira ma te tu’utu’u ’ore, inaha, e ha’amaita’i au ia ’oe ē a muri noa atu ; ’e e fa’ariro vau ia ’oe ’ei ta’ata pūai i te parau ’e i te ’ohipa, i te fa’aro’o ’e i te ravera’a i te mau ’ohipa ; ’oia ïa, ’e e tupu te mau mea ato’a mai te au i tā ’oe parau, nō te mea e ’ore ’oe e ani i tei au ’ore i tō’u nei hina’aro.

6 Inaha, ’o Nephi ’oe, ’e ’o vau te Atua. Inaha, tē parau atu nei au ia ’oe i mua i te aro o tā’u ra mau melahi ē, e mana tō ’oe i ni’a i teie nei feiā, ’e nā ’oe e tā’iri i te fenua i te o’e, ’e i te ma’i rahi, ’e te pohe, mai te au i te parauti’a ’ore o teie nei feiā.

7 Inaha, e hōro’a atu vau i te mana ia ’oe, ’o tā ’oe e tā’ati i te ao nei, e tā’ati-ato’a-hia ïa i te ao ra ; ’e tā ’oe e tātara i te ao nei e tātara-ato’a-hia ïa i te ao ra ; e nā reira ’oe i te fāri’i i te mana i rotopū i teie mau ta’ata.

8 ’E nō reira, mai te mea e parau atu ’oe i teie nei hiero ’ia pararī nā te ’āfara’a, e nā-reira-hia ïa.

9 ’E mai te mea e parau atu ’oe i teie nei mou’a, ’ia hurihia ’oe i raro ’e ’ia riro ’ei fenua pāpū, e nā-reira-hia ïa.

10 ’E inaha, mai te mea e parau atu ’oe ē, e tā’iri te Atua i teie nei feiā, e tupu mau ïa te reira.

11 ’E i teienei, inaha, tē fa’aue atu nei au ia ’oe ’ia haere ’e ’ia fa’a’ite i teie nei feiā ē, tē nā ’ō mai nei te Fatu te Atua, ’oia te Manahope : ’Ia ’ore ’outou ’ia tātarahapa, e tā’irihia ’outou ē e pau roa atu.

12 ’E inaha, i teienei, i muri a’era, ’ia oti a’era tā te Fatu paraura’a mai i teie mau parau ia Nephi, ’ua fa’aea ihora ’oia ’e ’aita a’era i haere atu i tōna ihora fare, ’ua ho’i mai ra rā i pīha’i iho i te mau pupu ta’ata i ha’apurarahia i ni’a te fenua ē ’ati noa a’e, ’e ’ua ha’amata ihora i te fa’a’ite atu ia rātou i te parau a te Fatu ’o tei parauhia mai iāna, nō ni’a i tō rātou ha’amoura’a ’ia ’ore rātou ’ia tātarahapa.

13 I teienei, inaha, noa atu ā taua semeio rahi i ravehia e Nephi nō te fa’a’ite atu ia rātou i te pohera’a o te ha’avā rahi ra, ’ua fa’a’eta’eta rātou i tō rātou ’ā’au ’e ’aita a’era rātou i fa’aro’o mai i te mau parau a te Fatu.

14 Nō reira, ’ua fa’a’ite atu Nephi i te parau a te Fatu ia rātou, i te nā-’ō-ra’a atu ē : Tē nā ’ō mai ra te Fatu, ’ia ’ore ’outou ’ia tātarahapa, e tā’irihia ’outou ē tae roa atu i te ha’amoura’a.

15 ’E i muri a’era, ’ia oti a’era tā Nephi fa’a’itera’a atu i te parau ia rātou, inaha, ’ua fa’a’eta’eta noa ā rātou i tō rātou ’ā’au ’e ’aita rātou i fa’aro’o i tāna ra mau parau ; nō reira ’ua fa’a’ino mai rātou iāna, ’e ’ua tītau rātou ’ia haru iāna, ’ia ti’a ia rātou ’ia huri iāna i roto i te fare tāpe’ara’a.

16 Inaha rā, tei roto iāna te mana o te Atua, ’e ’aita roa a’era i ti’a ia rātou ’ia rave iāna ’e ’ia huri iāna i roto i te fare tāpe’ara’a, i ravehia ho’i ’oia e te Vārua ’e ’ua ’āfa’i-’ē-hia mai rotopū mai ia rātou.

17 ’E i muri a’era, ’ua nā reira ’oia i te haere atu nā roto i te Vārua, mai terā pupu ta’ata i terā pupu ta’ata, i te fa’a’itera’a atu i te parau a te Atua, ē tae noa atu ’ua fa’a’ite atu ’oia i te reira ia rātou pā’āto’a, ’e ’aore rā ’ua fa’ataehia atu te reira i rotopū i te mau ta’ata pā’āto’a.

18 ’E i muri a’era, ’aita roa rātou i hina’aro ’ia fa’aro’o i tāna mau parau ; ’e ’ua tupu ihora te mārōra’a, ’e nō reira ho’i ’ua fa’ata’a ’ē a’era rātou ia rātou iho ’e ’ua ha’amata ihora i te taparahi te tahi i te tahi i te ’o’e.

19 ’E ’o te hope’a te reira nō te hitu ’ahuru ’e ma hō’ē o te matahiti nō te fa’aterera’a a te mau ha’avā i ni’a i te mau ta’ata o Nephi.